Junio

Jehová Diosca chai llaquicunata ahuantashcamanta, ayudanacushpa catishcamantami Jesusta punta catijcunataca achcata bendiciarca. Huaquin gentecunaca mana yuyashcapimi paicunataca catirashpa llaquichircacuna. Listra llajtapi Bernabé y Pablo predicacushpa ima tucushcata ricushunchij. Callaripica achca gentecunaca paicuna imata huillashcata uyashpami alli chasquircacuna. Pero chai punllallapitajmi huaquin millai gentecunaca Bernabetapish, Pablotapish yangamanta juchachircacuna. Chaimi achca gentecunaca paicunata alli chasquishca cashpapish paicunapaj contrami tucurcacuna. Chaimantami Pablotaca rumicunahuan shitashpa huañushcami yuyashpa chai llajta canllaman sirijta aisarcacuna (Hechos 14:19). Chashna llaquichishca cajpipish Bernabepish, Pablopish shujtaj ladopi predicanamanmi rircacuna. Chashna predicanata mana saquishcamantami achca gentecunataca Jesusta catijcuna tucuchun ayudarcacuna. Huauqui panicunatapish sinchiyachij shimicunahuanmi animarcacuna. Paicunamanca shuj alli ejemplotapishmi curcacuna (Hechos 14:​21, 22). Bernabepish, Pablopish mana shaicushpa predicanata mana saquishcamantami paicunallataj, shujtaj gentecunapish achca bendicioncunata chasquircacuna. Chai shinallatajmi ñucanchijpish mana saquirishpa, gentecunaman yachachinata mana saquishpaca achca bendicioncunata chasquishun. w23.04 págs. 16, 17 párrs. 13, 14

Rey Davidtaca achca contracunami llaquichisha nirca. Chaimi Jehová Diostaca ayudahuai nishpa mañaj carca. Rey Davidca Jehová Dios paipaj mañaicunata uyaj, cutichij cashcatami seguro carca. Ñucanchijpish segurosmi cana canchij. Bibliapi yachashca shinaca Jehová Diosca ñucanchij mañaicunataca alli yuyaita, fuerzasta cushpami cutichin. Shinallataj huauqui panicunata, hasta paita mana sirvijcunata utilizashpami ñucanchij mañaicunata cutichi tucun. Diosca ñucanchij mañaicunataca manachari ñucanchij munashca shina cutichinga. Pero siempremi cutichinga. Paica minishtishca ratomi ñucanchij minishtishcata cushpa ayudanga. Shamuj punllacunapicarin sumaj causaitami cunga (Salmo 145:16). Chaimanta, Yayitu Jehová Diosta tucui shunguhuan mañashpa catishunchij. w23.05 págs. 8, 9, 13 párrs. 4, 17, 18

Metacunata imamanta pajtachina cashcata yuyana canchij. ¿Metacunata pajtachingapajca imapitaj yuyana canchij? Por ejemplo, Bibliata liyinata o Diosta tucui shunguhuan mañanatachari yuyacungui. Chaita pajtachingapajca chaicunata rurashpa Jehová Diosman ashtahuan cꞌuchuyai tucushcatami yuyana cangui (Salmo 145:​18, 19). Cutin shuj alli cualidadta charingapaj esforzaricushpaca chai cualidadta charishpa shujtajcunahuan alli apanacui tucushcatami yuyana cangui (Colosenses 3:14). Shinallataj imamanta chai metacunata pajtachisha nishcatami anotana cangui. Qꞌuipaca can anotashcacunapi yuyangapajmi tiempota llujchina cangui. Animaj huauqui panicunahuan apanacuna canchij (Proverbios 13:20). ¿Metacunata pajtachina munaita mana charishpaca imatataj rurana canchij? Huaquinpica metacunata pajtachina munaitaca ashallatami charishun. Shujtaj punllacunacarin chai metacunataca ña mana pajtachinata munashunchu. Pero ¿pajtachina munaita mana charishpapish esforzarishpachu catina canchij? Ari. Metacunata pajtachina munaita mana charishpapish esforzarishpa catina canchij. w23.05 págs. 27, 28 párrs. 5-8

Mana allicunata rurashpaca tal vez ñucanchij shungu ucupimi mana alli sintirishun. Chaimantami imapi pandarishcata huillanata munashun. Shinallataj mana alli ruraicunata ladoman saquishpa ama cutin pandaringapajmi esforzarishun. Chaita rurashpaca huiñai causaiman apaj carrerapimi callpashpa cati tucushun. Chaipajca puntapica pandarishcatami aceptana cangui. Shujtajcunatapish mana culpanachu cangui. Pretextocunatapish mana churanachu cangui. Ashtahuanpish cambaj culpamanta pandarishcatami reconocina cangui. Ima shina mejorai tucushcatapishmi yuyana cangui. Pandarishcamanta yallitaj llaquilla sintirishpaca “ñuca pandarishcacunata perdonahuai” nishpa Jehová Diosta mañai (Salmo 25:11; 51:​3, 4). Shujtajcunata llaquichishca cashpaca perdonta mañai. Shinallataj ancianocunapaj ayudata mashcai (Santiago 5:​14, 15). Ama cutin chaillapitaj pandaringapajpishmi esforzarina cangui. Chaita rurajpica Jehová Diosca canta llaquishpami ayudanga (Salmo 103:​8-13). w23.08 págs. 28, 29 párrs. 8, 9

Jehoiadaca Jehoastaca achcatami ayudarca. Chaimantami Jehoasca jovenraj cashpaca Jehová Diospaj ñaupajpi alli ricuringapaj esforzarirca. Pero Jehoiadá huañujpica Jehoasca Judata mandajcunahuanmi apanacui callarirca. Paicunaca Jehová Diosmantami caruyashcacuna carca (2 Crónicas 24:​4, 17, 18). Chaita ricushpaca Jehová Diosca achcatami llaquirirca. Chaimantami profetacunata cachashpa arrepintirichun ayudasha nirca. Diosca Jehoiadapaj churi profeta Zacariastapishmi Jehoaspajman cacharca. Pero Jehoasca Zacariasta uyanapaj randica paita huañuchichunmi cacharca (2 Crónicas 22:11; 24:​19-22). Chaimi Jehová Diosca: ‘Ñucata pꞌiñajcunataca mana alli nishca canapimi churasha’ ninmi (1 Samuel 2:30). Jehoasca Jehová Diostami manchanata saquirca. Por ejemplo, ‘Siria llajta soldadocunaca shuj mirgallami Jehoaspaj soldadocunata misharca. Chai Sirio soldadocunaca Jehoastaca achcata chugrichishpa anchatami saquircacuna. Chashna saquijpica pai churashca mandajcunallatajmi Jehoasta huañuchircacuna’ (2 Crónicas 24:​24, 25). w23.06 págs. 18, 19 párrs. 16, 17

Apóstol Pabloca más o menos huata 50-pimi Éfeso llajtapi huillashca carca (Hechos 19:​1, 8-10; 20:​20, 21). Paica huauqui panicunataca achcatami cꞌuyaj carca. Chaimantami Jehová Diosta sirvishpa catichun paicunataca ayudasha nirca. Efesopi causajcunaca panda religioncunata catishcamantami amsapi puricushca shina causacurcacuna. Efesopi causajcunaca mapa ruraicunata rurashpa causacushcamantami amsapi shina carcacuna. Chashna causacushpapish paicunaca mana pingarijcunallapishchu carca. Paicunapaj fiestacunapipishmi yanga Dioscunata adorangapaj huainayajcuna carca. Shinallataj mapa cosascunatami ricujcuna carca (Efesios 5:3). Paicunaca millaita rurashcamantaca paicunapaj concienciapica ña imata mana sintircacunachu (Efesios 4:​17-19). Shinallataj paicunapaj rurashcacunamanta Yaya Dios ima shina sintirishcapica mana yuyajcunachu carca. Paicunaca ima alli cashcata, ima mana alli cashcata mana yachashcamantami apóstol Pabloca: “Paicunapaj yuyaicunaca amsapimi. Diosmanta mana yachasha nishcamanta, rumi shungucuna cashcamantami Dios cusha nishca causaitapish mana chasquincuna” nirca. Efesopi causaj huaquin runacunaca amsa causaimantami llujshircacuna. w24.03 págs. 20, 21 párrs. 2, 4, 5, 6

Gedeonca juez cashpaca israelitacunata cuidangapajmi achcata esforzarirca. Por ejemplo, tutapi madianitacunahuan macanacucujpica paicunaca miticushpami rircacuna. Chaimi Gedeonca paicunataca Jezreelmanta Jordán yacucama catishpa rirca (Jueces 7:22). ¿Jordán yacuman chayashpaca Gedeonca imatataj rurarca? ¿Chaipi saquirircachu? Mana. Paipish, paipaj 300 soldadocunapish shaicushcachari carca. Chashnapish chai yacuta chꞌimbashpami madianitacunata catishpa rircacuna. Chashnami paicunataca misharcacuna (Jueces 8:​4-12). Gedeonca chaitami rurarca (Jueces 6:​14, 34). Shuj cutinca, ishqui mandaj madianitacuna camellocunapi miticushpa rijpica Gedeonca paipaj soldadocunandijmi chaquillahuan paicunata catishpa rircacuna (Jueces 8:​12, 21). Jehová Dios paicunaman fuerzasta cujpimi chai ishqui mandajcunata japishpa huañuchircacuna. Ancianocunaca nunca mana shaicurij Jehová Diospimi shunguta churana can. Paimi shaicushca cajpi fuerzasta cushpa ayudanga (Isaías 40:​28, 29). w23.06 págs. 6, 7 párrs. 14, 16

Ñucanchijca ima jarcaicuna ricurijpipish Jehová Diosta tucui shunguhuan cazungapajmi esforzarina canchij. Barac runa Jehová Diosta tucuipi cazushcamanta ima tucushcata ricushun. Israelitacunaca macanacungapaj armacunata, escudocunata, shuj lanzallatapish mana charircacunachu. Chashnapish Jehová Diosca Baracmanca Sísara runahuan, cananeo soldadocunahuan macanacunaman richunmi mandarca. Pero chai soldadocunaca achca armacunatami charircacuna (Jueces 5:8). Jehová Dios yuyachijpimi Débora huarmica Baracmanca ‘Tabor urcumanta uriyashpa Sisarahuan, paipaj 900 carrocunahuan macanacugri’ nirca. Israelitacunapajca chai pambajllapi Sisarahuan macanacunaca ashtahuan sinchi layami ricurirca. Pero Baracca Jehová Diostami cazurca. Baracpaj soldadocuna Tabor urcumanta uriyacujpica Jehová Diosca sinchitami tamyachirca. Sisarapaj carrocuna lodopi trancarijpimi Baracca paicunataca mishai tucurca (Jueces 4:​1-7, 10, 13-16). Jehová Dios ñucanchijtapish ayudachunca paita, paipaj organización cushca instruccioncunataca tucui shunguhuanmi cazuna canchij. w23.07 pág. 19 párrs. 17, 18

Ñaupa tiempopi Diosta sirvijcunaca Dios cusha nishcacuna pajtarichunca pacienciahuanmi shuyarcacuna. Ñucanchijpish quishpirisha nishpaca pacienciahuanmi shuyana canchij (Hebreos 6:​11, 12). Bibliapica cada uno tarpuj runa shina cashcatami nin (Santiago 5:​7, 8). Tarpuj runaca muyuta tarpushpa, plantitata cuidashpami sinchita trabajan. Shinapish grano ima hora pꞌucunataca mana yachanchu. Pero mana yachashpapish cosechana cashcata seguro cashcamantami pacienciahuan shuyan. Diosta sirvijcunaca chashnallatajmi canchij. Diospaj punlla ima hora shamuna cashcata mana yachashpapish Jehová Diospajta rurashpami ocupados canchij (Mateo 24:42). Shinashpaca Jehová Dios cusha nishcacuna pajtarinataj cashcata yachashcamantami shuyana canchij. Pacienciata mana charishpaca asha ashami Diosmanta caruyashun. Ashtahuanpish ñucanchijllapi yuyashpami cai rato cushilla causangapaj yallitaj esforzari callarishun. Pero pacienciata charishpaca Jehová Dios sumaj causaita cungacamami mana pꞌiñarishpa shuyashun (Miqueas 7:7). w23.08 pág. 22 párr. 7

Daniel 2:​41-43-ta liyishpaca chai profeciata Danielpi Apocalipsispi tiyaj shujtaj profeciacunahuan chꞌimbapurashpaca estatuapaj chaqui dedocuna Estados Unidos y Reino Unido llajtacunata ricuchishcatami cuentata cunchij. Cai ishqui llajtacunaca shuj shinallami mandacuncuna. Pero Danielca chai llajtacunamanta parlashpaca ‘chai mandanaca ashaca sinchi, ashaca urmanallami canga’ nircami. ¿Caica imatataj nisha nin? Gentecunaca lodo shinami can. Paicunami chai ishqui llajtacuna fierro shina sinchi cachunca mana saquincuna. ¿Cai estatuamanta Daniel imalla parlashcamantaca imatataj yachai tucunchij? Estados Unidos y Reino Unido llajtacuna shuj shinalla mandacushpaca achca poderta charishcatami ricuchishcacuna. Por ejemplo, shuj shinalla macanacushcamantami paicunaca Primera y Segunda Guerra Mundial nishca jatun macanacuicunata misharcacuna. Shinapish cunan punllacunapi chai llajtacunapi causaj gentecunaca paicunapurami pꞌiñanacushpa causacuncuna. Chaimantami cai ishqui llajtacunaca ña mana achca poderta charin. Shinallataj Bibliapica cai ishqui llajtacuna mandashca qꞌuipa shujtaj llajtacuna mandana cashcataca mana ninchu. w23.08 págs. 10, 11 párrs. 12, 13

Davidca achca llaquicunata charishcamantami huaquinpica yallitaj sustarij carca (Salmo 18:​4, 5). Pero Jehová Dios cꞌuyaihuan paita cuidajpimi ñaupajman catingapaj fuerzata japirca. Jehová Dios ayudajpimi Davidca: ‘Yaya Diosca llullujlla qꞌuihuacuna tiyancunapi, casijlla yacucuna tiyan cꞌuchupimi ñucataca samachin’ nirca. Chashna sintirishcamantami Davidca cushilla Jehová Diosta sirvishpa catirca (Salmo 18:​28-32; 23:2). ‘Jehová Dios llaquijllapimari ñucanchijca mana tucuicuna chingarishcanchij’ (Lamentaciones 3:22; Colosenses 1:11). Davidpaj contracunaca paitaca achca cutincunami huañuchisha nircacuna. Shinapish paica Jehová Dios paita cꞌuyashcamantami tranquilo sintirirca. Davidca Jehová Dios paipaj ladopi cashcatami seguro carca. Chaimantami “Diosca tucui ñuca manchaimantami ñucataca quishpichirca” nirca (Salmo 34:4). Caipi ricushca shinaca Davidca achca llaquicunahuan chꞌimbapurana cashpapish Jehová Dios paita tucui shunguhuan cꞌuyashcata yuyarishcamantami ahuantai tucurca. w24.01 pág. 30 párrs. 15-17

Jatun Mandaj Jehoaspaj pandarishcacunamantami yachai pudinchij. Sumo sacerdote Jehoiada huañujpica Jehoasca mana alli gentecunahuanmi apanacui callarirca (2 Crónicas 24:​17, 18). Paica Judapi mandajcunapaj consejocunatami uyarca. Paicunaca Jehová Diostaca mana sirvijcunachu carca. Chaimantami paicunataca mana uyana carca. Jehoasca chai mandajcunata uyashcamantami mana alli decisioncunata japirca. Ashtahuanpish paipaj primo Zacarías paipaj yuyaita cambiachun ayudasha nijpica paita huañuchichunmi mandarca. Chaica jatun juchami carca (2 Crónicas 24:​20, 21; Mateo 23:35). Jehoasca alli mandajmi carca. Pero mana alli decisioncunata japishcamantami Diospaj contra tucurca. Qꞌuipacarin paita sirvijcunami paita huañuchircacuna (2 Crónicas 24:​22-25). Tucui vida Jehová Diosta cazushca cashpaca Jehoasca cushillami causanman carca. w23.09 pág. 9 párr. 6

Jesusca Apóstol Pedro Jehová Diosta tucui shunguhuan sirvi tucushcatami yacharca. Chaimantami cꞌuyaihuan paitaca ama manchaichu nirca. Pedroca Jesús cꞌuyaihuan paita tratashcataca manataj cungarircachu. Chaimantami tiempohuanca paipish, paipaj huauqui Andrespish paicunapaj negociota saquishpa Jesusta catij tucurcacuna. Chaita rurashcamantami paicunaca achca bendicioncunata chasquircacuna (Marcos 1:​16-18). Pedroca Jesusta catij tucushcamantaca achca bendicioncunatami chasquirca. Por ejemplo, Jesús ungushcacunata jambijta, demoniocunata llujshichijta, huañushcacunata causachijtami ricurca (Mateo 8:​14-17; Marcos 5:​37, 41, 42). Shinallataj Pedroca muscuipi shinami Jesús jahua pachapi ima shina mandanata ricurca. Chaitaca manataj cungarishcangachu (Marcos 9:​1-8; 2 Pedro 1:​16-18). Shinaca Pedroca mana yuyashca bendicioncunatami chasquirca. Pero Pedroca imapaj mana valishcata ama yuyangapajmi esforzarishpa catirca. Chaita mana rurashca cashpaca bendicioncunataca mana chasquinmanchu carca. w23.09 págs. 21, 22 párrs. 4, 5

Apóstol Pedroca paipaj punta cartapica huauqui panicunata shungumanta cꞌuyana cashcatami nirca. Chashna cꞌuyaita charishpaca asha juchacunata perdonangapaj randica, ‘achca juchacunata perdonangapajmi listos cashun’ (1 Pedro 4:8). 1 Pedro 4:​8-pi nishcata quillcacushpaca Jesús paiman imata yachachishcatami yuyarishcanga. Paica, Jesustaca ¿shujtajcunataca canchis cutincamachu perdonana canchij? nishpami tapushcarca. Pedroca shungumanta perdonaj cashcatami yuyashcanga. Pero Jesusca “77 cutincamami perdonana cangui” nishpami cutichirca. Chashna nishpaca huauqui panicuna mashna cutin pandarijpipish perdonanalla cashcatami yachachisha nirca. Ñucanchijpish chaita rurangapajmi esforzarina canchij (Mateo 18:21). Jesús yachachishcata pajtachinaca sinchi cajpipish esforzarishpami catina cangui. Juchayujcuna cashcamantami shujtajcunata perdonanaca huaquinpica sinchi can. Pero sinchi cajpipish huauqui panicunata perdonangapaj, paicunahuan alli tucungapajmi esforzarina canchij. w23.09 pág. 29 párr. 12

Jonasca pescadopaj huijsapi cashpaca Jehová Dios paipaj mañaita cutichinata, paita ayudanataca seguromi carca. Chaimi chai pescado Jonasta allpapi shungu tigrajpica Jonasca paiman mingashcata pajtachingapaj listo carca (Jonás 2:10–3:4). ¿Llaquicunata apacushpaca yallitaj sustarishca cashcamanta Jehová Diosta mañanaca cambajca sinchichu cashca? ¿O fuerzas, ánimo illaj saquirishcamantachu Bibliata estudianaca sinchi can? Jehová Dios can ima shina sintirishcataca allimi yachan. Chaimantami ashalla shimicunapi paita mañajpipish Jehová Diosca can imalla minishtishcacunataca cunga (Efesios 3:20). Ungushca o llaquilla cashcamanta Bibliata, publicacioncunata liyina sinchi cajpica grabashcatami uyai tucungui. Ashtahuanpish jw.org paginapi tiyaj cantocunata, videocunata uyashpami animota japi tucungui. Shinashpaca Jehová Diosca ñucanchij mañashcacunataca paipaj Shimipi nishcacunahuan, sumaj publicacioncunahuanmi cutichi tucun. w23.10 págs. 13, 14 párrs. 6, 9

Diospaj carpa huasipaj ucuca qꞌuipata rurashca templocunapaj ucucuna shinami carca. Chaipica ishqui cuartocunami tiyarca. Shujca ‘Diospajlla chꞌicanyachishca ucu’, caishujca ‘Diospajlla ashtahuan chꞌicanyachishca ucu’ nishcacunami carca. Chai ishqui cuartocunapaj chaupipica shuj racu telami tiyarca (Hebreos 9:​2-5; Éxodo 26:​31-33). Diospajlla chꞌicanyachishca ucupica oromanta rurashca shuj candelero, inciensota rupachingapaj shuj altar, Diosman cushca tandapajpish shuj mesami tiyarca. Chai ucumanca Dios agllashca sacerdotecunallami paicunaman mingashcacunata pajtachingapaj yaicui tucurcacuna (Números 3:​3, 7, 10). Cutin Diospajlla ashtahuan chꞌicanyachishca ucupica oromanta rurashca ari ninacushca arcami tiyarca. Chai arcaca Jehová Dios chaipi cashcatami ricuchij carca (Éxodo 25:​21, 22). Chai ucumanca jatun mandaj sacerdotellami juchacunata quishpichina punllapi yaicui tucurca. Chaitaca huatapica shuj cutinllatami rurajcuna carca. Paica animalcunapaj yahuarhuan chaiman yaicushpami paipaj juchacunamanta, israelitacunapaj juchacunamanta perdonta mañaj carca (Levítico 16:​2, 17). Qꞌuipaca Jehová Diosca paipaj carpa huasipaj ucupi imalla tiyashcacuna imata nisha nishcatami intindichirca (Hebreos 9:​6, 7). w23.10 págs. 27, 28 párr. 12

Bibliapica achca cutincunami “caishuj chaishuj cꞌuyanacuichij” nishpa mandan (Juan 15:12; Romanos 13:8; 1 Tesalonicenses 4:9; 1 Pedro 1:22; 1 Juan 4:11). Cꞌuyaica shungu ucupimi huiñan. Chaimantami cꞌuyaita charishcataca pi mana ricui tucun. Pero ¿tucuicuna ñucanchijcuna cꞌuyajcuna cashcata ricuchunca imatataj rurana canchij? Ñucanchij rimaicunahuan, ruraicunahuanmi cꞌuyaita charishcata ricuchina canchij. ¿Huauqui panicunata cꞌuyashcataca ima shinataj ricuchi tucunchij? Chaitaca Bibliapimi yachai tucunchij. Bibliapi nishca shinaca caishuj chaishujca mana llullanacunachu canchij (Zacarías 8:16). Shinallataj caishuj chaishujhuanmi sumajta causana canchij (Marcos 9:50). Ñucanchijraj shujtajcunata respetashcatapishmi ricuchina canchij (Romanos 12:10). Shinallataj caishuj chaishujmi alli chasquinacuna canchij (Romanos 15:7). Shungumanta perdonanacunataca manataj saquinachu canchij (Colosenses 3:13). Llaquicunapi cashpaca llashaj cargata apaj shinami caishuj chaishuj ayudanacuna canchij (Gálatas 6:2). Shinallataj caishujmanta chaishujmanta alaja shimicunahuanmi cushichinacuna canchij (1 Tesalonicenses 4:18). Caishuj chaishuj animanacushpa, sinchiyarinacushpami catina canchij (1 Tesalonicenses 5:11). Ashtahuanpish caishujmanta chaishujmantami Diosta mañana canchij (Santiago 5:16). w23.11 pág. 9 párrs. 7, 8

Tucui punllacunami huaquin decisioncunata agllana canchij. Chaipajca sinchi feta charishcatami ricuchina canchij. Por ejemplo, amigocunamanta, diversioncunamanta, imata estudianamanta, cazaranamanta, huahuacunata charinamanta, imapi trabajanamantapishmi decisioncunata agllana canchij. Chaimanta: “¿Cai mundo ashallapaj cashcata crishpachu alli decidingapaj esforzarini? ¿Dios ñalla shuj Paraisota ruranapichu tucui shunguhuan crini? ¿O Paraíso tiyanata mana crij gentecuna shinachu causani?” nishpa tapurishunchij (Mateo 6:​19, 20; Lucas 12:​16-21). Cai Allpata Dios ñalla shuj Paraisota rurana cashcata tucui shunguhuan crishpaca alli decisioncunatami agllashun. Shinallataj catirashpa llaquichijpi, shuj millai ungüi japijpi o shujtaj problemacunata charishpaca desanimari tucunchijmi. Callaripica chai llaquicunataca ahuantai tucuj layami sintishun. Pero chai llaquicunaca achca tiempo pasajpipish manachari tucuringa. Chaimantami chai llaquicunata ahuantashpa catingapaj, Jehová Diosta cushilla sirvishpa catingapajca sinchi feta charinata minishtinchij (1 Pedro 1:​6, 7). w23.04 págs. 26, 27 párrs. 4, 5

Jehová Diosca ñucanchij mañashcacuna pajtarichun ñucanchijpish esforzarichunmi munan. Caipi yuyashun: Shuj huauquimi Jehová Diostaca “jatun tandanacuiman ringapaj ñuca jefe permisota cuchun ayudahuai” nishpa mañan. ¿Jehová Diosca cai huauquipaj mañaitaca ima shinataj cutichinga? Tal vez paipaj jefehuan parlachunmi mana manchaj cachun ayudanga. Pero cai huauquica paipaj jefehuan parlanamanmi rina can. Huaquinpicarin jefehuanca cutin cutinmi parlana canga. Tal vez asamblea punllacuna shujtaj compañero paipaj randi trabajai tucushcatami ni tucun. Pai mana trabajashca punllacunamanta paiman pagachun mana minishtishcatapishmi ni tucun. Diosca ñucanchij llaquicunamanta cutin cutinmi paita mañachun munan. Jesusca Jehová Dios huaquin mañaicunata mana utca cutichinatami nirca (Lucas 11:9). Shinaca mana shaicushpa cutin cutin rogarishpa mañashpa catishunchij (Lucas 18:​1-7). Ñucanchij imalla minishtishcamanta Jehová Diosta cutin cutin mañashpaca de verdad chaita minishtishcatami ricuchinchij. Ashtahuanpish Jehová Dios ñucanchijta ayudanata tucui shunguhuan crishcatami ricuchinchij. w23.11 págs. 22, 23 párrs. 10, 11

Jehová Diosca paipaj amigo Abrahanmanca, ‘cambaj huahua huahuacunamantami tucui llajtacuna bendiciashca canga’ nircami (Génesis 15:5; 22:18). Abrahanca sinchi feta charishcamantami Jehová Diospaj nishcacuna pajtarinataj cashcata seguro carca. Shinapish Abrahanca Sarahuanca manaraj huahuacunata charishcacunachu carca. Chai punllacunapica paicunaca 100 y 90 huatacunatami charircacuna (Génesis 21:​1-7). Abrahanca huahuacunata mana chari tucushpapish ‘feta charishcamantami Jehová Dios huillashca shina achca llajtacunapaj yaya canata shuyacurca’ (Romanos 4:18). Abrahán shuyacushcaca pajtarircami. Chaimi pai shuyacushca huahuata charirca. Paitaca Isaac nishpami shutichirca. Pero ¿Abrahanca imamantataj Jehová Diospi tucui shunguhuan confiaj carca? Abrahanca Jehová Diostaca allimi rijsirca. Chaimantami Jehová Diospaj nishcacuna pajtarinata tucui shunguhuan crirca (Romanos 4:21). Abrahán sinchi feta charishcamantami Jehová Diosca paitaca cashcata rurajta shina ricurca (Santiago 2:23). w23.12 pág. 8 párrs. 1, 2

Confianalla joven huauquicunaca paicunaman mingashcacunatami alli pajtachincuna. Por ejemplo, Jesusca imatapish mala gana, jahua jahuallaca mana rurajchu carca. Paica Jehová Dios paiman imalla mingashcacunata pajtachina huaquinpi sinchi cajpipish chaicunataca tucui shunguhuanmi alli pajtachirca. Paica gentecunata, ashtahuantajca paipaj discipulocunata cꞌuyashcamantami paipaj causaita curca (Juan 13:1). Canpish canman mingashcacunata alli pajtachingapajmi esforzarina cangui. Chai mingashcacunata ima shina pajtachinata mana tucuita intindishpaca humilde shunguhuanmi Diosta alli sirvij huauquicunata ayudachun mañana cangui. Canman mingashcacunataca mana jahua jahuallachu pajtachina cangui (Romanos 12:11). Ashtahuanpish imata ruracushpapish Jehová Diospaj ruracushca shina ruracushcamantami tucui shunguhuan rurana cangui (Colosenses 3:23). Juchayuj cashcamantami huaquinpica pandaringui. Pero mana jatun tucushpami pandarishcata reconocina cangui (Proverbios 11:2). w23.12 pág. 26 párr. 8

Cunanlla bautizarijcuna Diospaj familia parte tucujta ricushpaca achcatami cushicunchij. Diospaj familia ucupi cajcunaca paihuanmi alli apanacui tucunchij. Chaimantami David shina sintirinchij. Paica: “Maijanpish quiquin agllashcaca cushichishcami. Quiquin pushamushcaca cushichishcami. Quiquinpaj huasi canllacunapi causachunmi pushamushcangui” nircami (Salmo 65:4). ¿Jehová Diosca paipaj familia parte tucuchunca picunatataj chasquin? Paica paipaj amigo casha nijcunatami chasquin (Santiago 4:8). Jehová Diosman mingarishpa, bautizarishpaca paipaj alli amigocunami tucunchij. Paica paipaj amigocunamanca: ‘Cancunapaj imapish ama faltachunca achcatami bendiciasha’ ninmi (Malaquías 3:10; Jeremías 17:8). ¿Bautizarishca qꞌuipaca chaillapichu saquirina canchij? Mana. Tucuicunami Jehová Diosman mingarishpa ñucanchij ari nishcata pajtachingapaj esforzarina canchij. Tentacioncuna, llaquicuna ricurijpipish chaitami rurana canchij (Eclesiastés 5:​4, 5). Shinallataj Jesús shina causanata, paipaj yachachishcacunata pajtachinataca manataj saquinachu canchij (Mateo 28:​19, 20; 1 Pedro 2:21). w24.03 pág. 8 párrs. 1-3

Huaquin cusa huarmicunaca ishquindij tiempota pasanataca mana tanto munancunachu. ¿Chashna problemacuna tiyajpica cazadocunaca imatataj rurai tucuncuna? Ninapi yuyashunchij. Nina ashtahuan japirishpa catichunca uchilla yantacunata, qꞌuipaca racu yantacunatami churashpa catinchij. ¿Caimantaca imatataj yachanchij? Huaquin cusa huarmicunaca callaripica manachari achca tiempota pasanata munangacuna. Chaimantami callaripica cada punlla asha tiempollatapish pasangapaj esforzari tucuncuna. Ishquindij munashca ruraicunatami rurai tucuncuna (Santiago 3:18). Chashna rurajpimi cꞌuyaica asha asha mirarishpa catinga. Matrimoniopica respetota ricuchinaca importantemi can. Respetota ricuchinaca huaira shinami can. Nina lunyashpa catichunca huairami minishtirin. Huaira mana tiyajpica ninaca ratomi ahogarishpa huañunga. Chashnallatajmi matrimoniopi respeto mana tiyajpica cꞌuyaica asha asha chingaringa. Pero cusandij, huarmindij respetota ricuchinacujpica cꞌuyaica ashtahuan ashtahuanmi mirarishpa catinga. “Respetotami ricuchicuni” nishpachari yuyangui. Pero cambaj cusa o huarmica manachari chashnallataj yuyan. w23.05 págs. 22, 24 párrs. 9, 14, 15

Ñaupa tiempopi Diosta sirvijcunapishmi paicunapaj contracunamanta o llaquicunata charishcamanta maipica achca manchaita charircacuna (Salmo 18:4; 55:​1, 5). ¿Ñucanchijpish imamantataj huaquinpica manchaita charinchij? Escuelapi, trabajopi compañerocuna, familiacuna, autoridadcuna catirashpa llaquichishcamantami maipica manchaita charinchij. Shinallataj millai ungüita charishcamantachari huañunata manchanchij. Jatun llaquicuna japijpica uchilla huahua manchaita charij shinami sintirishun. Jehová Dios ñucanchijta ima shina ayudasha nishcata ricushun. Diosta mañangapaj, Bibliata liyingapajmi siempre tiempota llujchina canchij (Salmo 77:​1, 12-14). Chashnami llaquicuna ñapish japijpica Diospaj ayudata utca mashcangapaj allichirishca cashun. Shinallataj Diosta mañacushpaca imamanta sustarishca cashcata, imamanta manchaihuan cashcata paiman tucuita huillashunchij. Paipaj Shimipi nishcacunahuan ñucanchijta cushichichunpish saquishunchij (Salmo 119:28). w24.01 págs. 24, 25 párrs. 14-16

Ñucanchij metacunata pajtachingapajca pajtachina munaitami charina canchij. Chashnami metacunata pajtachingacama esforzarishpa catishun. Metacunata pajtachina munaita ashtahuan charingapaj esforzarishpaca chai metacunataca utcami pajtachi tucushun. Shinaca ¿metacunata pajtachina munaita charingapajca imatataj rurana canchij? Metacunata pajtachina munaita charingapaj Jehová Diosta mañai. Chaita rurajpimi Yaya Diosca espíritu santota cushpa pajtachina munaita charichun ayudanga. Jehová Diosta ashtahuan sirvingapaj metacunata churarinaca allimi can. Pero metacunata churarishpapish huaquinpica chaicunataca mana tanto pajtachinata munanchijchu. Jehová Dios canmanta imallata rurashcata yuyai (Salmo 143:5). Apóstol Pabloca Jehová Dios paiman cꞌuyaita ima shina ricuchishcapimi yuyaj carca. Chaimantami paitaca ashtahuan sirvinata munarca (1 Corintios 15:​9, 10; 1 Timoteo 1:​12-14). Ñucanchijpish Jehová Dios ñucanchijman ima shina cꞌuyaita ricuchishcapimi yuyana canchij. Chashnami paitaca ashtahuan sirvinata munashun (Salmo 116:12). w23.05 págs. 26, 27 párrs. 3-5

Yaya Jehová Diosca paipaj shutita jatunyachichunmi munan (Salmo 119:108). Huaquin gentecunaca alli sintiringapajllami paicunata felicitachun munancuna. Pero, ¿Jehová Diosca chai gentecuna shina cashcamantachu paita jatunyachichun munan? Mana. Diabloca ñucanchijmantapishmi shuj llullata nishca. Paica: ‘Llaquicuna japijpica gentecunaca Diospaj shutitaca ña mana jatunyachingacunachu. Ashtahuanpish paicunapaj ima alli cashcata mashcashpami Diosmanta caruyangacuna’ nircami (Job 1:​9-11; 2:4). Pero Job runaca Diablo llulla cashcatami ricuchirca. Ñucanchijpish ¿imatataj rurana canchij? Jehová Diosta jatunyachishpaca ñucanchijpish Diablo llulla cashcatami ricuchinchij. Ñucanchijpajca Diospaj shutita difindina, paita tucuipi cazuna, paipaj shunguta cushichinami tucuimanta yalli valishca can (Proverbios 27:11). w24.02 págs. 8, 9 párrs. 3-5

Jehová Diosca Moisespaj, Josuepaj huaquin huatacuna qꞌuipaca israelitacunata pushachunca juezcunatami churarca. Cutin reycuna mandacui punllacunapica Jehová Diosca israelitacunata pushashpa catichunca profetacunatami churarca. Jehová Diosta cazuj reycunaca profetacunapaj consejocunataca allimi chasquircacuna. Por ejemplo, rey Davidca profeta Natán cunashcataca allimi chasquirca (2 Samuel 12:​7, 13; 1 Crónicas 17:​3, 4). Rey Jehosafatpishmi profeta Jahaziel nishcata cazurca. Judá llajtapi causajcunatapish Jehová Dios cachashca profetacunapi confiachunmi animarca (2 Crónicas 20:​14, 15). Shinallataj llaqui punllacunapica rey Ezequiasca profeta Isaiaspaj ayudatami mashcarca (Isaías 37:​1-6). Reycuna Jehová Diospaj mandashcacunata cazujpica Jehová Diosca paicunatami bendiciarca, tucui israelitacunatapish cuidarca (2 Crónicas 20:​29, 30; 32:22). Shinashpaca israelitacunaca Jehová Dios profetacunata utilizashpa paicunata ñaupajman pushacushcatami alli yacharcacuna. w24.02 pág. 22 párr. 8

Diabloca Diospaj mandashcacunata mana cazujcunahuan tandanacuchunmi munan. Pero paicunahuan tandanacushpaca Jehová Diosta tucuipi cazunaca sinchimi canga. Efesopi caj huauqui panicunaca ñahui ñahuillami Diosta mana cazujcunahuan tandanacui tucurcacuna. Pero ñucanchijcunaca redes socialespipishmi Diosta mana sirvijcunahuan tandanacui tucunchij. Chaimantami ashtahuan cuidadota charina canchij. Diosta mana sirvijcuna mapa ruraicunata ruranaca mana juchachu can nijpipish ñucanchijca chaitaca mana crinachu canchij. Chaica jatun llullami can (Efesios 4:​19, 20). Chaimantami escuelapi, trabajopi shujtaj ladocunapipish Diospaj mandashcacunata mana cazuj gentecunahuan ama yalli tiempota pasangapaj esforzarina canchij. Shinallataj maijancunaca: “Yaya Diosta tucuipi cazuna cashcataca mana yuyanachu canguichij” ningacunami. Paicuna cashna nijpipish ñucanchijca mana manchashpami ñucanchij crishcacunata difindina canchij. Ashtahuanpish 2 Timoteo 2:​20-22-pi nishca shinaca congregación ucupipish alli yuyashpami pihuan apanacunata agllana canchij. ¿Imamanta? Maijancunaca Jehová Diosta tucui shunguhuan sirvishpa catichunca manachari ñucanchijta ayudangacuna. w24.03 págs. 22, 23 párrs. 11, 12

¿Jehová Dios ima laya cashcata yuyashcanguichu? Yaya Diostaca mana ricui tucunchijchu. Shinapish Bibliapica Yaya Dios achijyachij inti shina, huaquichij escudo shina, rupachishpa tucuchij nina shina cashcatami nin (Salmo 84:11; Hebreos 12:29). Cutin profeta Ezequielca muscuipi shinami Jehová Dios zafiro rumi shina, achijnicuj fierro shina, achijnicuj cuichi shina cashcata ricurca (Ezequiel 1:​26-28). Jehová Diosta mana ricui tucushcamantami pai ñucanchijta cꞌuyaj cashcata crinaca huaquinpica sinchi can. Shinallataj huahuacunaraj cajpi ñucanchij yaya cꞌuyaita mana ricuchishcamantachari Yaya Diospish ñucanchijta mana cꞌuyashcata yuyai tucunchij. Shinapish Jehová Diosca ñucanchijcuna ima shina sintirishcata, ima llaquicunata apacushcataca allimi intindin. Ashtahuanpish pai cꞌuyaj cashcata crichunca Bibliapimi pai ima shina cashcata huillan. Yaya Diosca cꞌuyaimi (1 Juan 4:8). Paica tucuitami cꞌuyaimanta ruran. Shinallataj paica yallitaj cꞌuyaj cashcamantami paita mana cꞌuyajcunatapish cꞌuyan (Mateo 5:​44, 45). w24.01 pág. 26 párrs. 1-3

Jehová Diosca israelitacunata Egiptomanta llujshichichunca Moisestami agllarca. ¿Israelitacuna Jehová Dios Moiseshuan cashcata ricuchingapajca Jehová Diosca imatataj rurarca? Israelitacunaca punllapica shayacuj jatun pꞌuyuhuan, tutaca jatun lunyacuj ninahuan achijyachishpa Jehová Dios paicunata pushacushcatami ricurcacuna (Éxodo 13:21). Moisesca chaita catishpami israelitacunahuan Puca cuchaman chayarca. Pero chaiman chayashpaca Egipto soldadocuna paicunata huañuchinata yuyashpami israelitacunaca yallitaj mancharircacuna. Pero Moisesca mana pandarishcachu carca. Jehovami israelitacunata chaiman pushachun Moisesman nishca carca (Éxodo 14:2). Chai qꞌuipaca Jehová Diosca shuj milagrota rurashpami israelitacunata quishpichirca (Éxodo 14:​26-28). Moisesca chaquishca pambapi israelitacunata pushangapajca 40 huatacunatami chai jatun pꞌuyuta catirca (Éxodo 33:​7, 9, 10). Jehová Diosca chai pꞌuyumantami Moiseshuan parlanacuj carca. Chai qꞌuipaca Moisesca Jehová Dios imalla nishcacunatami israelitacunaman huillaj carca. Shinashpaca israelitacunaca Moisés Jehová Dios churashca pushaj cashcataca segurosmi carcacuna. w24.02 pág. 21 párrs. 4, 5