Marzo

Bibliapica maijancuna cashcata rurajcuna cashpapish qꞌuipaca cashcata mana rurajcuna tucushcatami nin. Salomonpi yuyashun. Paica Jehová Diostaca allimi rijsirca. Salomonca Jehová Dios munashca shina paita adorashcamantami achca bendicioncunata chasquirca. Pero qꞌuipaca yanga dioscunatami adorai callarirca. Chaita ricushpaca Jehová Diosca achcatami pꞌiñarirca. Ashtahuanpish Salomonpaj culpamantami tucui israelitacunaca achca huatacunata llaquicunahuan causarcacuna (1 Reyes 11:​5-9; 2 Reyes 23:13). “Chai qꞌuipaca Salomonca huañurcami” (1 Reyes 11:43). Hebreo rimaipica “huañurcami” ninapaj randica “Salomonca paipaj ñaupa yayacunahuanmi samarirca” ninmi. Bibliapica Jehová Diosta alli sirvij shujtaj runacunapish huañushpaca paipaj ñaupa yayacunahuan samarishcatami nin. Por ejemplo, Davidmanta parlashpaca chaitami nin (1 Reyes 11:​21-pi tiyaj notata ricui). ¿Pero Bibliapi “Salomonca paipa ñaupa yayacunahuanmi samarirca” nishpaca cutin causarina cashcatachu nin? Bibliapica chaitaca mana ninchu. Ashtahuanpish Jehová Diosca yallitaj cꞌuyaj cashcamantami picunallata cutin causachinata agllan. Cutin causarinaca Jehová Dios cushca regalomi can (Job 14:​13, 14; Juan 6:44). ¿Shinashpaca Salomonca cutin causaringachu? Chaitaca mana yachanchijchu. Jehová Diosllami yachan. Pero chaita mana yachashpapish Jehová Dios siempre cashcata ruraj cashcataca allimi yachanchij. w24.05 pág. 4 párr. 9

¿Ñucanchijcunaca ima horamantataj Yaya Diospaj carpa huasimanca yaicunchij? Ñucanchij causaita paiman mingarishca horasmantami paipaj ‘carpa huasimanca’ yaicunchij. Chai carpa huasipi cashcamantami Jehová Diosmanta shamuj achca yachaicunata charinchij. Shinallataj chai carpa huasipica Jehová Dios invitashcacunahuanmi tandalla cai tucunchij. Pero ¿chai carpa huasica maipitaj can? Chai carpa huasica mana shuj lugarllapichu can. Ashtahuanpish Jehová Diosta cꞌuyajcuna maipimi can, Jehová Diospaj carpa huasica chaipimi can (Apocalipsis 21:3). ¿Jehová Diosta alli sirvishpa huañujcunapishchu Diospaj carpa huasipi can? Ari. Bibliapi nishca shinaca paicunaca Jehová Diospaj yuyaipimi can. Chaimantami Yaya Diospajca paicunaca mana huañushca shina can. Jesusca: “Moisespish rupacuj zarza yuramanta quillcashpaca huañushcacuna causarinamantapishmi parlarca. Paica Jehová Diostaca: ‘Abrahanpaj, Isaacpaj, Jacobpaj Diosmi can’ nircami. Paica huañushcacunapaj Diosca mana canchu. Ashtahuanpish causajcunapaj Diosmi can. Diospajca tucuicunami causacuncuna” nircami (Lucas 20:​37, 38). w24.06 págs. 3, 4 párrs. 6, 7

Sacerdote Sadocca Hebronmanca enemigocunahuan macanacunaman ringapajmi allichirishca carca (1 Crónicas 12:38). Paica enemigocunamanta israelitacunata difindingapaj rey David maiman rijpipish paihuanmi risha nirca. Sadocca ima shina macanacunataca mana tanto yachashcangachu. Chashnapish paica mana manchajmi carca. ¿Sadocca manchaita ama charingapajca imatataj rurarca? Paica Jehová Diosta alli sirvijcunamantami mana manchaj canata yacharca. Paicunaca sinchi, mana manchajcunami carcacuna. Por ejemplo, Davidpi yuyashun. Paica macanacuicunapica mana manchashpami Israel soldadocunata alli pushaj carca. Chaimantami David rey tucujpica israelitacunaca cushilla carcacuna (1 Crónicas 11:​1, 2). Davidca Jehová Diospimi tucui shunguhuan confiaj carca. Enemigocuna paita llaquichisha nijpipish Davidca Jehová Diospaj ayudatami mashcaj carca (Salmo 138:3). Shinallataj Sadocca Jehoiadá runamanta, paipaj churi Benayamanta, 22 jatun familiacunata pushaj runacunamantapishmi mana manchaj canata yacharca (1 Crónicas 11:​22-25; 12:​26-28). w24.07 págs. 3, 4 párrs. 5, 6

Manaraj Jesusta cati callarishpaca Pabloca Jesusta catijcunatami catirashpa llaquichishca carca. Chaimi Jesusta catijcunaca Pabloca nunca mana cambiangachu nishpa yuyashcangacuna. Shinapish Jesusca Pablo arrepintirishpa cambiai tucushcatami yacharca. Paipish, Jehová Diospish Pablo alli cualidadcunata charishcatami ricurcacuna. Chaimi Jesusca ‘ñucamanta huillachunmi Pablota agllashcani’ nirca (Hechos 9:15). Jesusca Pablo arrepintirichunca shuj milagrotapishmi rurarca (Hechos 7:58–8:3; 9:​1-9, 17-20). Pabloca arrepintirishca qꞌuipaca Jesustami cati callarirca. Chaimi Jesusca paitaca apóstol cachun nombrarca. Pabloca Jehová Diospish, Jesuspish paita perdonashcamanta achca agradecido cashcatami siempre nij carca (1 Timoteo 1:​12-15). Corinto congregacionmanta shuj huauqui mapa ruraicunata ruracujpipish congregacionpi cachunmi saquishcacuna carca. ¿Chaita yachaj chayashpaca Pabloca imatataj rurarca? Paica Jehová Dios disciplinashpapish cꞌuyaita ricuchij cashcatami intindichirca. Shinallataj juchata rurajcuna arrepintirijpi Jehová Dios paicunata llaquishpa ima shina ayudaj cashcatami yachachirca. w24.08 pág. 13 párrs. 15, 16

Huatacuna pasajpica Jehová Diosca juchayuj gentecuna paipajman ima shina cꞌuchuyai tucushcatami intindichirca. Adán y Eva Diospaj contra tucushca qꞌuipaca paicunapaj qꞌuipa churi Abelmi Diospi feta churarca. Abelca Jehová Diosta cꞌuyashcamantami paipajman cꞌuchuyasha nirca. Chaimantami huaquin bachujcitocunata huañuchishpa sacrificiota shina Jehová Diosman curca. ¿Chaita ricushpaca Jehová Diosca ima shinataj sintirirca? ‘Jehová Diosca Abeltapish, paipaj ofrendatapish allimi chasquirca’ (Génesis 4:4). Jehová Diospi confiaj shujtaj runacunapish chashna laya sacrificiocunata cujpica Jehová Diosca allimi chasquirca. Por ejemplo, Noé runami chaitaca rurarca (Génesis 8:​20, 21). Chai sacrificiocunata chasquishpami Jehová Diosca juchayuj gentecuna paipajman cꞌuchuyai tucushcata ricuchirca. w24.08 págs. 3, 4 párrs. 5, 6

Ñucanchijta mana alli tratajpica dimastijmi llaquirinchij o pꞌiñarinchij (Eclesiastés 7:7). Jobpish, Habacucpish ñucanchij shinallatajmi sintirircacuna (Job 6:​2, 3; Habacuc 1:​1-3). Mana alli tratajpi llaquilla sintirinaca normalmi can. Pero chashna sintirishpapish ima mana allita ama rurangapajmi cuidarina canchij. Chaita rurashpaca ashtahuan llaquicunatami charishun. Millai gentecuna mana allita rurashpa ima mana tucujtachari ricunchij. Chaimi, “Yangamantami allita rurangapaj esforzaricuni” nishpa yuyai callarishun. Por ejemplo, salmista runaca millai gentecuna alli gentecunata llaquichijta ricushpami: ‘Millaicunaca imapish mana tucunchu’ nirca (Salmo 73:12). Chaimantami paica yallitaj sustarishpa Yaya Diosta sirvina mana importante cashcata yuyai callarirca. Paica: ‘Ñuca intindisha nishpapish ñucapajca yallitaj sinchimari carca’ nircami (Salmo 73:​14, 16). w24.11 págs. 3, 4 párrs. 5-7

Jehová Diosta achcata respetashcamantami paita jatunyachinchij. Jehová Diosca tucuicunamanta yallimi poderyuj can. Imata rurashpapish paica nunca mana shaicurinchu (Salmo 96:​4-7). Dios imalla rurashcacunata ricushpami pai yachaisapa cashcata intindinchij. Shinallataj Jehová Diosca causaitapish, causangapaj imalla minishtishcacunatapishmi cushca (Apocalipsis 4:11). Paita sirvijcunatapish manataj saquinchu (Apocalipsis 15:4). Pai imata rurashpapish tucuitami alli ruran. Pai nishcacunatapish siempremi pajtachin (Josué 23:14). Chaimantami Jeremiasca: “Tucui cai pacha llajtacunapi causaj jatun yachajcunapurapipish, tucui jatun mandajcunapurapipish can shina jatunca mana tiyanchu” nirca (Jeremías 10:​6, 7). Jehová Dios chashna cashcata ricushpami paitaca respetanchij. Shinallataj paita tucui shunguhuan cꞌuyashcatami ricuchishun ninchij. Jehová Diosta tucui shunguhuan cꞌuyashcamantami paita jatunyachinchij. w25.01 pág. 3 párrs. 5, 6

Diospaj organizacionca ñucanchijcuna alli causachun munashpami chꞌican chꞌican instruccioncunata cun. Shinapish Diospaj enemigocunaca chai instruccioncuna mana alli cashcata yuyachunmi munancuna. Por ejemplo, Bibliapi nishca shinaca Diosta sirvijcunaca cuerpopi, yuyaipimi chuya, limpio cana canchij. Shinallataj Bibliapi nishca shinaca paicunapaj mapa ruraicunamanta mana arrepintirijcunaca congregacionmantami llujshichishca cana can (1 Corintios 5:​11, 12; 6:​9, 10). Bibliapi nishcacunata cazungapaj esforzarijta ricushpaca Diospaj enemigocunaca: “Cancunaca yallitaj exagerajcuna, millaicunami canguichij. Shujtajcunata yalli cashcatapishmi yuyanguichij” nincunami. Diablo yuyaita cujpi Diospaj enemigocuna ñucanchijta yangamanta juchachishcatami yuyarina canchij. Diabloca ‘llullapaj yayami can’. Chaimantami paica Diospaj organizacionmanta achca llullacunata nishpa ñucanchijta pandachisha nin (Juan 8:44; Génesis 3:​1-5). Diabloca ñucanchijmanta llullacunata nichunmi paita sirvijcunamanca yuyaita cushca. w24.04 págs. 10, 11 párrs. 13, 14

Jatun llaqui punllacunapica maijan gentecunaca “Babilonia jatun pueblo” tucurishcata ricushpaca ¿ima shinataj sintiringacuna? Maijancunaca testigo de Jehovacuna chashna tucuna cashcata achca huatacunata huillashpa puricushcatachari yuyaringacuna. Chaita yuyarishpaca ¿maijancunaca Jehová Diospaj parte tucunatachu agllangacuna? (Apocalipsis 17:5). Moisespaj punllacunapi ima tucushcata yuyarishunchij. Israelitacuna Egiptomanta llujshijpica paicunahuanca “tucui laya achca gentecunami” llujshircacuna. Maijancunaca Moisés huillashca shina Jehová Dios egipciocunata diez plagacunahuan llaquichijta ricushpami Jehová Diospi cri callarishcangacuna (Éxodo 12:38). Babilonia jatun pueblo tucurijta ricushpaca maijancunaca chai gentecuna shinachari Jehová Diospi cri callaringacuna. Diospaj jatun punlla ñalla callarigrijpi chai gentecuna Jehová Diosta sirvinata agllajta ricushpaca ¿pꞌiñarishunchu? Mana, ashtahuanpish Jehová Dios shina “llaquij, alli shungu, pacienciata charij, achcata cꞌuyaj” cashcatami ricuchina canchij (Éxodo 34:6). w24.05 págs. 11, 12 párrs. 12, 13

¿‘Alli yachaicunamanta’ caruyashpaca imataj tucushun? Punta siglopi ima tucushcata ricushun. Maijan huauqui panicunaca apóstol Pabloca “Diospaj punllaca ñami chayamurca” nishpa shuj cartata cachashcatami cri callarircacuna. Paicunaca apóstol Pablo chai cartata quillcashcata mana seguros cashpapish chaipi nishcacunapimi crircacuna. Ashtahuanpish shujtajcunamanpish chaipi nishcacunatami parlai callarircacuna. Pero chai panda yuyaicunapi ama cringapajca apóstol Pablo paicunahuan cashpa imata yachachishcatami yuyarina carcacuna (2 Tesalonicenses 2:​1-5). Pabloca tucui ima uyarishcata ama crichunmi aconsejashca carca. Shinallataj cutin ama panda yuyaicunapi crichunmi paicunaman cachashca tucuri cartapica: “Ñucaca Pablomi cani. Cai saludotaca cancunapajmi ñuca propio maquihuan quillcani. Ñuca quillcashca cashcata yachachunmi ñuca cartacunapica siempre chashna quillcani” nishpa quillcarca (2 Tesalonicenses 3:17). w24.07 págs. 11, 12 párrs. 13, 14

Judea llajtapi llaquicuna ashtahuan ashtahuan mirashpa catijpimi huauqui panicunaca chai llaquicunata ahuantashpa sinchi feta charishcata ricuchina carca. Maijancunataca ñami catirashpa llaquichishcacuna carca. Pero la mayoriami llaquicuna, jarcaicuna mana tiyai horas Jesusta cati callarishcacuna carca. Shinapish apóstol Pabloca millai gentecuna paicunata catirashpa ashtahuan llaquichinata yachashcamantami, Jesús shina huañungacama ahuantangapaj allichirishca caichij nirca (Hebreos 12:4). Jehová Diosta mana sirvij judiocunaca Jesusta catijcuna ashtahuan ashtahuan mirarijta ricushpaca achcatami pꞌiñarircacuna. Por ejemplo, huaquin huatacuna huashamanca 40 yalli judiocunaca: “Pablota huañuchingacama manataj micushunchu, manataj ubyashunchu” nishpami ari ninacushcacuna carca (Hechos 22:22; 23:​12-14). Pero gentecuna paicunata pꞌiñajpipish huauqui panicunaca tandanacunata, Diosmanta huillanata, sinchi feta charinataca manataj saquinachu carca. w24.09 pág. 12 párr. 15

Apóstol Juanca Jesuspaj cꞌuyashca amigomi carca (Mateo 10:2). Juanca Jesushuanmi achca tiempota huillarca. Jesús rurashca milagrocunatapishmi ricurca. Jesús achca llaquicunata apacujpica Juanca paihuanmi carca. Jesús ima shina huañujta, ima shina causarijtapishmi ricurca. Shinallataj Juanca punta siglopi Jesusta catijcuna mirarishpa ‘alli huillaicunata tucui muyundij allpapi huillacujtapishmi’ ricurca (Colosenses 1:23). Apóstol Juanca ña mayorlla cashpami Jesús imata ricuchishcata Apocalipsis libropi escribirca (Apocalipsis 1:1). Shinallataj paica Juan librota, quimsa cartacunatapishmi escribirca. Tucuri cartataca Diosta alli sirvij Gayo shuti huauquimanmi escribirca. Gayotaca paipaj propio huahuata shinami cꞌuyaj carca (3 Juan 1). Apóstol Juan quillcashca shimicunaca Jesusta catijcunataca cunancamami ayudashca. w24.11 pág. 12 párrs. 15, 16

Alli cusaca paipaj huarmitaca Jehová Dios cushca achcata valij curita shinami ricuna can (Proverbios 18:22; 31:10). Chaimantami ishquindijlla cashpapish paita cꞌuyashcata, respetashcata ricuchingapaj esforzarin. Shinallataj ishquindij chayarinacushpaca pai mana munashca ruraicunata rurachunca mana obliganachu can. Chaita rurachun obligajpica huarmica imapaj mana valishcatami yuyanga. Paipaj concienciapipish mana alli sintiringachu. Cusacunaca Jehová Diospaj ñaupajpi shuj alli concienciata charingapajmi esforzarina can (Hechos 24:16). Jehová Diosca paicunapaj huarmicunata respetangapaj esforzarij cusacunataca achcatami valoran. Chaimantami cusacunaca paicunapaj huarmicunata ama maipishcachun tratangapaj esforzarina can. Ashtahuanpish cꞌuyaihuan, respetohuanmi tratana can. Chashnami paicunapaj huarmicunata valorashcata, cꞌuyashcata ricuchingacuna. Shinallataj Jehová Dioshuan alli apanacushpami catingacuna (Salmo 25:14). w25.01 pág. 13 párrs. 17, 18

Jehová Diosta sirvijcunaca alli huillaicunata cushicushpa huillangapajmi esforzarinchij. Chashnami shujtaj religioncunamanta chꞌican cashcata ricuchinchij. ¿Cushilla huillashpa catingapajca imatataj rurana canchij? Cushilla huillashpa catingapajca Jesuspaj ejemplomantami yachana canchij. Paica cai Allpapi cashpaca cushillami huillashpa catirca. Paillatajmi higo yurata cuidaj runahuan chꞌimbapurarirca. Chai runaca quimsa huatacunatami higo yura mana granota pꞌucujpipish cuidashpa catirca. Chashnallatajmi Jesusca judiocunamanca quimsa huatacunata huillarca. Shinapish ashacunallami paita catijcuna tucurca. Ima shinami higota cuidaj runaca granota pꞌucungacama sinchita trabajashpa catirca, Jesuspish alli huillaicunata gentecuna chasquichunmi huillangapaj sinchita esforzarirca (Lucas 13:​6-9). Ñucanchijpish pai shina cushicushpa huillangapajmi esforzarinchij. w25.03 págs. 14, 15 párrs. 1-4

Tal vez “chai huauqui, panica ñucapajca alli cusa, alli huarmimi canga” nishpachari yuyangui. Pero chashna yuyacushpapish ¿paita rijsishcahuanchu cantami munani nina cangui? Mana. Bibliapi nishca shinaca ‘alli yuyaiyuj runaca alli yuyaihuanmi imatapish ruran’. Chaimantami manaraj noviocuna tucushpaca paitaca carullamanta alli rijsinaraj cangui. ¿Shuj huauquita, shuj panitaca ima shinataj carullamanta rijsi tucungui? Por ejemplo, reunioncunapi o huauqui panicunahuan tandalla cashpaca pai ima shina cashcata, Jehová Diosta mashnata cꞌuyashcatami ricui tucungui. ¿Paica picunahuantaj alli apanacun? ¿Ima cosascunamantataj parlanata munan? (Lucas 6:45). Shinallataj ¿paica can charishca metacunallatatajchu charin? Paimanta ashtahuan yachasha nishpaca paipaj congregacionta pushaj ancianocunahuanpishmi parlai tucungui. Mana cashpaca paita alli rijsij huauqui panicunatami tapui tucungui. Pero chai huauqui panicunaca Diosta alli sirvijcunami cana can (Proverbios 20:18). Chai huauqui panicunataca: “¿Huauqui panicunaca paimantaca imatataj yuyancuna? ¿Paica ima cualidadcunallatataj charin?” nishpami tapui tucungui (Rut 2:11). Pero chai huauquita, chai panita alli rijsisha nishpapish siempremi respetota ricuchina cangui. Chaimantami cada rato paihuan pasanataca mana mashcana cangui. Shinallataj paimanta tucuita huillachunca mana obliganachu cangui. w24.05 pág. 22 párrs. 7, 8

Ancianocunaca: “Cai huauqui, cai panica paipaj juchacunamantaca manataj arrepintiringachu” nishpaca mana yuyanachu can. Maijancunaca ancianocuna punta cutin paicunahuan tandanacujpimi ña shungumanta arrepintirincuna. Cutin shujtajcunaca arrepintiringapajca ashtahuan tiempotachari minishtingacuna. Chaimantami ancianocunaca juchata rurajta ayudangapajca cutin paihuan tandanacui tucuncuna. Ancianocunahuan cutin tandanacungacamaca juchata rurajca tal vez ancianocuna punta tandanacuipi imata nishcapi yuyangapajmi tiempota charinga. Shinallataj humilde shunguhuanmi Yayitu Diosta paita perdonachun mañai tucun (Salmo 38:18). Chaita rurashcamantami tal vez qꞌuipa tandanacuipica juchata rurajca paipaj yuyaita cambiashcata ricuchinga. Shinallataj ancianocunaca juchata rurajta arrepintirichun ayudangapajca paita alli intindishpami cꞌuyaihuan ayudana can. Ancianocunaca paicunata ayudachun, juchata ruraj mana allita rurashcata intindishpa arrepintirichunpishmi Yayitu Diosta mañana can (2 Timoteo 2:​25, 26). w24.08 págs. 22, 23 párrs. 12, 13

Jehová Diosca shujllapish ama chingarichunmi munan. Ashtahuanpish tucui juchayujcuna paihuan alli tucuchunmi munan (2 Corintios 5:20). Chaimantami paica ñaupa punllacunamantapacha gentecuna arrepintirishpa paipajman tigrachun ayudashca. Ancianocunapish Jehová Diospaj ejemplota catishpami mana arrepintirisha nijcunata arrepintirichun ayudana can (Romanos 2:4; 1 Corintios 3:9). Juchayujcuna arrepintirijpica jahua pachapica achca cushicuimi tiyan. Yayitu Jehová Diosca paipaj ovejitacuna congregacionman tigrajpica achcatami cushicun. Jehová Dios yallitaj cꞌuyaj, llaquij cashcata intindishpaca paipajmanmi ashtahuan cꞌuchuyashun (Lucas 1:78). w24.08 pág. 31 párrs. 16, 17

Jesús mandaj tucushca cashpaca politicapi chagruricushcatami ricuchinman carca. Chai punllacunapica romanocunami Israelta mandacurcacuna. Chaimi Jesusca paita ama mandajta rurachun pailla shuj urcuman rirca. Shinashpaca gentecuna politicapi chagrurichun Jesusta obligasha nijpipish Jesusca chaitaca mana rurarcachu. Ñucanchijtaca shuj milagrota rurashpa tandata mirachichun, ungushcacunatapish alliyachichunca manachari mañangacuna. Shinallataj ñucanchijtaca manachari reyta rurasha ningacuna. Pero gentecunaca maipica shuj politicota apoyachun o paiman votota cuchunmi animangacuna. Paicunaca: “Cai runami ñucanchijtaca ayudanga” nishpami pandachisha ningacuna. Chaipica Jesús politicapi mana chagrurishcatami yuyarina canchij. Paica: ‘Ñuca Gobiernoca mana cai pachamantachu can’ nircami (Juan 17:14; 18:36). Shinallataj Diospaj Gobiernota apoyashcamantami huillana canchij (Mateo 6:10). w24.12 págs. 4, 5 párrs. 5, 6

Bibliata estudiacushpaca imalla yachashcacunata cambaj causaipi ima shina pajtachinatami yuyana cangui. Por ejemplo, Jehová Dios shina cashcata ruraj cashcata ricuchingapajca mana ñahuita ricushpallami tucuicunata alli tratana cangui. Shinallataj ¿Jesús shina Jehová Diosta cꞌuyashcata ricuchingapajca imatataj rurana cangui? Jehová Diosta sirvishcamanta llaquicunata apana cashpaca chaicunataca apanallami cangui. Shinallataj huauqui panicunatami tucui shunguhuan ayudana cangui. Shujtaj gentecunapish Jesús huañushcamanta quishpirichunca tucui shunguhuanmi huillashpa catina cangui. Jehová Diospish, Jesuspish ñucanchijta quishpichingapaj imallata rurashcata alli intindishpaca paicunatami ashtahuan cꞌuyashun. Paicunapish ñucanchijtaca ashtahuanmi cꞌuyangacuna (Santiago 4:8). Jehová Diosca ñucanchijta ima shina quishpichishcata alli intindichunca chꞌican chꞌican ayudacunatami cushca. w25.01 pág. 25 párrs. 16, 17

Cai punllapaj versopi nishca shinaca Jehová Diosca ñucanchij juchacunataca paipaj ñahuimantami anchuchishca. Shinaca ñucanchij juchacunamanta arrepintirijpica Jehová Diosca chai juchacunata japishpa caruta shitashca shinami can. Chaimantami chai juchacunataca ña mana nunca ricun. Isaías 38:​17-taca cashna nishpapishmi traducishcacuna: “Canca ñuca ima juchatapish nunca mana rurashca layami ñucataca ricungui”. Cai yuyaita ashtahuan intindingapajca Bibliapi shujtaj chꞌimbapuraita ricushun (Miqueas 7:​18, 19). Ñaupa punllacunapica ima cosastapish jatun mama cuchaman shitajpica cutin ña mana japi tucunallami carca. Chai shinallatajmi Jehová Diosca tucui ñucanchij juchacunataca mama cucha ucuman shitaj shina perdonan. Caipi yachashca shinaca ñucanchij juchacunaca llashaj quipita aparicushca shinami can. Shinapish Jehová Diosca ñucanchij juchacunata perdonashpaca chai llashaj quipita anchuchishpa apashpa rishca shinami can. Chaimantami Davidca: “Mana allita rurajcunaca paicunata perdonashcamantami cushicuncuna. Juchata rurajcunapish paicunapaj juchacunata perdonashcamantami cushicuncuna” nirca (Romanos 4:7). Shinaca Jehová Diosca de verdadtajmi perdonan. w25.02 pág. 9 párrs. 7, 8

Cunan punllacunapica shuj sumaj paraisopimi causacunchij. Chaipica achca huaranga huaranga gentecunami cushilla, tranquilo causacuncuna. Chaipi causanataca manataj saquisha ninchijchu. Ashtahuanpish shujtajcunapish chai paraisopi causachunmi munanchij. ¿Ima paraisomantataj parlacunchij? Ñucanchijcunaca Jehová Diosta sirvicushcamantami paraisopi shina causacunchij. Jehová Dios ayudashcallamantami cai millai mundopi achca llaquicuna tiyajpipish Diosta sirvijcunaca cushilla, tandalla cai tucunchij (1 Juan 5:19; Apocalipsis 12:12). Diablo llaquichisha nijpipish Jehová Diosta tranquilo sirvi tucushcamantami ñucanchijcunaca paraisopi shina causacunchij. Chai paraisomanta parlashpaca Bibliapica: ‘Punllapish inti rupachinamanta miticunapajmi canga. Larca yacucunayuj huerta shinami canga’ ninmi (Isaías 4:6; 58:11). Cai tucuri punllacunapi causanaca sinchimi can. Pero Jehová Dios ayudacushcamantami tranquilo causai tucunchij (Isaías 54:14; 2 Timoteo 3:1). w24.04 pág. 20 párrs. 1, 2

Cazarasha nishpaca seguramente Jehová Dios canta ayudachunca ñachari mañashcangui. Shinapish Jehová Diosca “ñucami alli cusata, alli huarmita mashcashpa cusha” mana nishcachu. Chashnapish paica can ima shina sintirishcata, imata minishtishcataca allimi yachan. Chaimantami cantaca ayudasha nin. Pero canta ayudachunca paimanmi ima shina sintirishcata, ima laya cusata, huarmita mashcacushcata tucuita huillana cangui (Salmo 62:8). Alli yuyaita, pacienciatapish cuchun mañai (Santiago 1:5). Huatacuna pasajpipish can mashcacushca huauqui pani mana ricurijpica Jehová Diosca cantaca manataj saquingachu. Paica can imalla minishtishcata charichun, cushilla causachunmi ayudashpa catinga (Salmo 55:22). Pero cusata, huarmita japina yuyaillaca mana causanachu cangui (Filipenses 1:10). Diosta sirvijcunaca solterocuna cashpapish, cazadocuna cashpapish cushilla causangapajca Jehová Diospaj alli amigocunami cana canchij (Mateo 5:3). Ashtahuanpish soltero cashpaca Jehová Diospajta ruranapi ocuparingapajmi ashtahuan tiempota charingui (1 Corintios 7:​32, 33). Chaimantami chai tiempotaca alli aprovechana cangui. w24.05 pág. 21 párr. 4; pág. 22 párr. 6

¿Mashna tiempotataj noviocuna cana canguichij? Yuyarishcahuan ucui jahua imatapish decidishpaca llaquicunatami charinguichij (Proverbios 21:5). Chaimantami cancunapura alli rijsinacungapaj mashna tiempota minishtishcata alli ricuna canguichij. Pero yangamanta achca tiempo pasachunca mana saquinachu canguichij. Bibliapi nishca shinaca ñucanchij ‘shuyacushca mana utca pajtarijpica maipica shungu pꞌaquirishpami llaquirishun’ (Proverbios 13:12). Shinallataj noviocunataca tal vez ñucanchijhuan micuchun, ñucanchij familiahuan Bibliata estudiachun o ñucanchijhuan paseanaman richunmi invitai tucunchij (Romanos 12:13). Paicuna minishtijpica paicunatami acompañai tucunchij. Mana cashpaca shujtaj ladocunamanmi apai tucunchij o ishquindij parlanacuchunmi ñucanchij huasiman invitai tucunchij (Gálatas 6:10). ¿Shuj pareja paicunata acompañachun mañajpica imatataj rurana canchij? Paicunata ayudai tucushcamantami cushilla sintirina canchij. Paicunata acompañacushpaca ishquindijlla ama saquirichunmi cuidana canchij. Pero paicunata cuidana cashpapish paicunapura parlanacuchunmi saquina canchij. w24.05 págs. 30, 31 párrs. 13, 14

Ancianocunaca juchata ruraj huauqui o pani imamanta juchapi urmashcatami intindina can. Por ejemplo, ¿Bibliata estudianata saquishcamanta, predicacionman llujshinata saquishcamantachu Diosmantaca asha asha caruyarca? ¿Yaya Diosta punllanta mañanatachu saquirca? ¿Jehová Diostaca jahua jahuallachu mañan? ¿Mapa ruraicunapi ama urmangapajchu esforzarinata saquirca? ¿Diversioncunata, pihuan apanacunatapish mana alli yuyashpa agllashcamantachu paipaj yuyaita cambiarca? ¿Mana alli ruraicunata rurashcamanta, mana alli decisioncunata japishcamanta Diospaj ñaupajpi mana alli ricurishcatachu reconocin? Juchata rurajca imamanta Jehová Diosmanta caruyashcatami intindina can. Chaipajca ancianocunaca paitaca tapuicunatami rurana can. Pero paipaj causaipi mana yallitaj satirishpami alli yuyashpa imatapish tapuna can (Proverbios 20:5). Shinallataj mana allita rurashcata cuentata cuchunca alaja chꞌimbapuraicunata churashpami intindichi tucuncuna. Ancianocuna punta cutin juchata rurajhuan tandanacujpica tal vez paica juchata rurashcamantami llaquilla sintiri callaringa. Mana cashpaca chai punta tandanacuillapitajmi tal vez shungumanta arrepintiringa. w24.08 pág. 22 párrs. 9-11

Jesusca “Diospaj Gobiernomanta alli huillaicunataca” cushicushpami huillarca. Chaita rurachun Dios munashcatami yacharca. Jesuspajca cai obrata ruranami tucuimanta yalli valishca carca. Pai huañunapaj ashalla quillacuna illajpicarin “chꞌican chꞌican llajtacunapi, uchilla pueblocunapipishmi yachachishpa” purirca (Lucas 13:22). Pai shinallataj huillachunmi paita catijcunamanpish yachachirca (Lucas 10:1). Jehová Diospish, Jesuspish cunan punllacunapica alli huillaicunata huillashpa catichunmi munan (Mateo 24:14; 28:​19, 20). Jehová Diosca achca gentecuna alli huillaicunata uyachun, chasquichunmi munan (1 Timoteo 2:​3, 4). Chaimantami cushicushpa huillashpa catina canchij. Alli huillaicunata uyashpami gentecunaca quishpiri tucun. Jehová Diosca ñucanchijcuna alli huillajcuna cachunmi ayudasha nin. Cunan punllacunapi gentecuna alli huillaicunata mana chasquishpapish jatun llaqui punllacuna manaraj tucurijpica tal vez ñucanchij huillashcata yuyarishpami Diosta sirvisha ningacuna. w25.03 págs. 15, 16 párrs. 5-7

Cada unomi congregacionmanta llujshichishcata saludanata o mana saludanata decidina canchij. Maijancunaca tal vez paita saludanata o alli shamushca ninatami decidingacuna. Pero paicunahuan ama yalli parlanacungapaj o paicunahuan ama tiempota pasangapajmi cuidarina canchij. Maijancunaca “¿segurochu congregacionmanta llujshichishcacunataca saludanalla canchij? Bibliapica: ‘Maijanpish paita saludajca paipaj mana alli ruraicunapimi chagrurin’ ninmi” nishpami yuyancuna (2 Juan 9, 11). Bibliapi ima nishcata alli intindingapajca ñaupa versocunapi, catij versocunapipish ima nishcatami alli intindina canchij. Segunda de Juanpica apostatacunamanta, mapa ruraicunata rurachun animajcunamantami parlacun (Apocalipsis 2:20). Chaimantami maijanpish apostatacunapaj yachachishcacunata crichisha nijpi o mapa ruraicunata rurachun animajpica ancianocunaca paicunataca mana visitana can. Tal vez paicunaca tiempohuanmi cambiangacuna. Pero paicuna cambiangacamaca mana saludanachu canchij. Tandanacuicunaman shamuchunpish mana invitanachu canchij. w24.08 págs. 30, 31 párrs. 14, 15

Achca gentecunaman carashca qꞌuipaca Jesusca paita catijcunataca barcopimi Capernaumman cacharca. Cutin Jesusca gentecuna paita ama mandajta rurachunmi shuj urcuman rirca (Juan 6:​16-20). Discipulocuna barcopi ricujpimi sinchi huaira jatarishpa yacuta caiman chaiman cuyuchirca. Jesusca yacu jahuata purishpami paicunapajman cꞌuchuyashpa Pedrotapish chaita rurachun nirca (Mateo 14:​22-31). Jesús barcoman llujshijpimi huairapish, yacupish casijlla tucurca. Chaimi discipulocunaca Jesustaca: “Canca Diospaj Churitajmari cangui” nircacuna (Mateo 14:33). ¿Jesús tandacunahuan milagrota rurajpica discipulocunaca imamantataj mana chaita nircacuna? Paicunaca ‘tandacunahuan Jesús imata rurajta ricushpapish chai milagro ima nisha nishcataca mana intindircacunachu’ (Marcos 6:​50-52). Shinashpaca Jehová Dios milagrocunata rurachun Jesusman poderta cushcataca paicunaca mana intindishcacunachu carca. w24.12 pág. 5 párr. 7

¿Ñucanchijta quishpichishcamanta Jehová Diosta agradicishcata ricuchingapajca Conmemoración punllacunapica imatataj rurana canchij? Chai tandanacuipi cangapajmi allichirina canchij, shujtajcunatapish chaiman richun invitana canchij. Conmemoracionman invitacushpaca chai tandanacui ima shina canatami alli ricuchina canchij. Chaipajca ¿Jesusca imamantataj huañurca?, Jesús huañushcata yuyarishunchij nishca videocunatami ricuchi tucunchij. Anciano huauquicunaca congregacionmanta caruyashcacunatapish invitangapajmi esforzarina can. Chai huauqui panicunaca Jehová Diospaj ñaupajpica chingarishca ovejitacuna layami ricurincuna. Chaimantami paicuna congregacionman tigrajpica ñucanchijpish, jahua pachapi angelcunapish cushilla sintirinchij (Lucas 15:​4-7). Conmemoracionman rishpaca tucui huauqui panicunata saludanaca allimi can. Pero mushujcunata, tandanacuiman unita mana shamujcunatapish saludangapajmi ashtahuan esforzarina canchij. Chashnami paicunaca cushilla sintiringacuna (Romanos 12:13). w25.01 pág. 29 párr. 15

Jehová Diosca ñucanchijmanta huañuchun paipaj Churita cachashpami cashcata ruraj cashcata ricuchirca. Pero ashtahuantajca Jehová Diosca ñucanchijta yallitaj cꞌuyashcamantami paipaj Churita curca (Juan 3:16; 1 Juan 4:​9, 10). Shinallataj Jehová Diosca ñucanchijcuna huiñai causaita charichunllaca paipaj Churitaca mana curcachu. Ashtahuanpish paipaj familia parte tucuchunpishmi paipaj Churita curca. Caipi yuyai. Adán juchata rurajpica Jehová Diospaj familia canatami saquircanchij. Chaimantami ñucanchijcuna huacharishcamantapacha Diospaj familia mana cai tucunchij. Pero Jesús huañushcamantami shuj punlla Diospaj familia parte tucushun. Chaipajca Jehová Diospi feta charina, paita tucuipi cazunami canchij. Chai punlla manaraj chayajpipish Jehová Diosca ñucanchij juchacunatami perdonai tucun. Ashtahuanpish Jehová Dioshuan, huauqui panicunahuanpishmi alli amigocuna cai tucunchij. Shinashpaca Yayitu Jehová Diosca ñucanchijtaca achcatami cꞌuyan (Romanos 5:​10, 11). w25.01 pág. 21 párr. 6

Jehová Dios ñucanchijmanta huañuchun paipaj Churita cushpaca shuj valishca regalota cushca shinami carca (2 Corintios 9:15). Jesús ñucanchijmanta huañushcamantami Jehová Dioshuan alli apanacuna, huiñaita causana oportunidadta charinchij. Yayitu Diosca ñucanchijta achcata cꞌuyashcamantami paipaj shujlla Churita curca. Chaimantami paitaca agradicina canchij (Romanos 5:8). Paipaj shujlla Churita cushcamanta tucui shunguhuan agradicishcata ricuchingapajca cada huatami Jesús huañushcata yuyaringapaj tandanacunchij (Lucas 22:​19, 20). Jesús huañushcataca jueves 2 de abril de 2026-tami yuyarishun. Tucuicunami chaiman ringapaj allichirina canchij. Conmemoración manaraj chayajpica Jehová Diospish, Jesuspish ñucanchijta ima shina quishpichishcatami yuyarina canchij. w25.01 pág. 20 párrs. 1, 2

Jehová Diospish, Jesuspish cꞌuyajcuna cashcamantami ñucanchijta quishpichirca. Chaipi yuyashpaca paicunamantaca ashtahuanmi yachashun. Jesuspaj causaimantaca Mateo, Marcos, Lucas y Juan librocunapimi parlan. Conmemoración punllacunapica chai chuscu librocunata o huaquin librocunallatami liyi tucunchij. Pero de una tucuita liyinapaj randica asha ashami liyishpa catina canchij. Chashnami Jehová Diostapish, Jesustapish imamanta cꞌuyana cashcata intindishun. Shinallataj ñucanchijcuna imalla yachashcataca shujtajcunamanpishmi parlana canchij. Tal vez canca achca huatacunatachari Jehová Diosta sirvicungui. Chaimi: “¿Jehová Dios cashcata ruraj cashcata, cꞌuyaj cashcata, ñucanchijta ima shina quishpichishcata ashtahuanchu yachai tucuni?” nishpa tapuringui. Pero Jehová Diosta achca huatacunata sirvicushpapish caicunamantaca ashtahuanmi yachai tucunchij. Chaipajca ñucanchij publicacioncunatami alli estudiana canchij. w25.01 págs. 24, 25 párrs. 13-15