Abril

Huiñai causaita charingapajca Jesús ñucanchijmanta huañushcapimi feta churana canchij (Efesios 1:7). Jesusca achca gentecuna ‘shujtaj ovejacuna’ cashcatami nirca. Paicunaca Jesús huañushca yuyarina tandanacuipica tandata mana micuna, vinotapish mana ubyanachu can (Juan 10:16). Paicunapish Jesús paipaj aichata, paipaj yahuarta cushcamantami bendicioncunata chasqui tucuncuna. Pero chai bendicioncunata chasquingapajca Jesús huañushcapimi feta churana cancuna (Juan 6:53). Cutin Jesús huañushcata yuyarina tandanacuipi tandata micujcuna, vinota ubyajcunaca jahua pachapi Jesushuan mandangapajmi paihuan ari ninacurcacuna. Shinashpaca ungidocunapish, shujtaj ovejacunapish huiñai causaita charingapajca fetami ricuchina canchij. w24.12 pág. 13 párr. 14; pág. 13 párr. 16

Jesusca pai callarichishca micuipica apostolcunamanmi levadura illaj tandata curca. Paica: ‘Cai tandaca ñuca cuerpotami ricuchin’ nircami. Chai huashaca vinota pasachishpaca: “Caica ñuca yahuartami ricuchin. ‘Ñuca yahuarmi ari ninacushcata’ callarichinga” nircami (Marcos 14:​22-25; Lucas 22:20; 1 Corintios 11:24). Jesusca chai ari ninacuitaca jahua pacha Israelllahuanmi rurarca. Chaita nishpaca Jesusca ungidocunamantami parlacurca. Paicunami “Diospaj Gobiernopi” Jesushuan mandangacuna (Hebreos 8:​6, 10; 9:15). Jesusca pai callarichishca micuipica “ashalla ovejacuna” nishca grupopi cajcunallahuanmi parlacurca. Puntapica chai grupopica Jehová Diosta alli sirvij apostolcunallami carcacuna. Qꞌuipamanca shujtaj gentecunapishmi chai grupopaj parte tucurcacuna. Paicunaca Jesushuanmi jahua pachapi mandangacuna. w24.12 pág. 11 párrs. 9, 10

Jesustaca shuj alli amigomi traicionarca. Chai qꞌuipaca paipaj enemigocunami carcelpi churashpa paitaca cꞌamircacuna. Chai huashaca cꞌuyaillatami macarcacuna. Soldadocunaca Jesustaca jatun caspipimi clavarcacuna. Chashna huañucushpaca Jesusca llaquillami sintirishcanga. Jehová Diospish chaita ricushpaca yallitajmi llaquirishcanga. Pero paita ayudangapaj poderta charishpapish imata mana rurarcachu. ¿Jehová Diosca paipaj Churita achcata cꞌuyashpapish imamantataj chashna huañuchun saquirca? Ñucanchijta cꞌuyashcamanta. Jehová Diosca paipaj Churita cushpami ñucanchijta achcata cꞌuyashcata ricuchishca. Paica cantapish achcatami cꞌuyan. Chaimantami juchamanta, huañuimanta canta quishpichingapaj paipaj Churi huañuchun saquirca. Chaita ruranaca Yayitu Diospajca sinchimi cashcanga (1 Juan 4:​9, 10). Caipi ricushca shinaca ñucanchij juchayujcuna cajpipish Jehová Diosca paita sirvichunmi ayudasha nin. Ashtahuanpish shamuj punllacunapica ñucanchijta cꞌuyashcamantami juchataca anchuchinga. w24.08 pág. 6 párrs. 13, 14

Jehová Diospajca ñucanchijmanta huañuchun paipaj Churita cunaca sinchimi carca. Pero ñucanchijta cꞌuyashcamantami chaitaca rurarca. Satanasca: “Llaquicuna japijpica Diostaca ni pi mana sirvishpa catingachu” ninmi. Pero chai nishcacuna mana cierto cashcata ricuchingapajmi Yaya Diosca Jesús manaraj huañujpi achcata sufrichun saquirca (Job 2:​1-5). Jesuspaj enemigocuna paimanta burlarijpi, paita azotijpi, jatun caspipi huarcucujpipish Yayitu Diosca jahua pachamantami tucuita ricucurca. Shinallataj Jehová Diosca paipaj cꞌuyashca Churi cꞌuyaillata huañushcatami ricurca (Mateo 27:​28-31, 39). Jehová Diosca Jesuspaj enemigocuna paita ama llaquichichunmi jarcai tucurca (Mateo 27:​42, 43). Pero Jehová Dios chaita rurashca cajpica Jesusca gentecunamantaca mana huañunmanchu carca. Chaimantami gentecunaca ima esperanzata mana charinman carca. Pero Jehová Diosca gentecunata yallitaj cꞌuyashcamantami Jesús cꞌuyaillata huañuchun saquirca. w25.01 pág. 22 párr. 7

Huata 33-pi 16 de nisantaca Jesusta catijcunaca manchaihuanmi llaquilla carca. Ishqui discipulocunaca Jerusalenmanta llujshishpami Emaús puebloman chayangacama purircacuna. Mana rijsishca runaca discipulocunapajman cꞌuchuyashpami paicunahuan igual puri callarirca. Paicunaca Jesús huañushcamanta llaquilla cashcatami paiman parlarcacuna. Chai qꞌuipaca chai runaca discipulocunamanca ‘Moisés quillcashcamanta callarishpami tucui Profetacuna Mesiasmanta imata quillcashcata intindichirca’. Chai profetacuna nishca shinaca Jesusca achcata sufrishpami huañuna carca. Emausman chayashpaca chai mana rijsishca runaca Jesús cashcatami huillarca (Lucas 24:​13-35). Jesusca causarishca qꞌuipaca cai Allpapica 40 punllacunatami saquirirca. Chai punllacunapica Jesusca huaquin cutincunami paipaj discipulocunaman ricurirca. Discipulocuna Jesusta ricushcamanta llaquilla, manchaihuan canapaj randica Diospaj Gobiernomanta mana manchashpa huillangapajmi fuerzasta japircacuna. w24.10 págs. 12, 13 párrs. 1-3

Huatacuna pasajpica huahuacunaca runa entero tucungacamami huiñashpa catincuna. ¿Diosta sirvijcunahuanca chashnallatajchu can? Mana. Huatacuna pasajpipish cada uno mana esforzarishpaca espiritualmenteca mana huiñashpa catishunchu. Por ejemplo, Corintopi causaj huauqui panicunaca Diosmanta yachashpami bautizarircacuna. Chai qꞌuipaca espíritu santotami chasquircacuna. Apóstol Pablomantapish achcatami yacharcacuna (Hechos 18:​8-11). Pero achca huatacuna pasajpipish paicunaca espiritualmente huiñashpaca mana catircacunachu (1 Corintios 3:2). Maijancunaca jatuncuna cashpapish paicunapaj yaya mama paicunamanta tucuita decidishpa cuchunmi munancuna. Chashnallatajmi maijancunaca espiritualmente huahuacuna laya cashcamanta mana huiñashpa catincuna (Proverbios 1:22). Pero ñucanchijpish paicuna layaca mana casha ninchijchu. Ashtahuanpish espiritualmente sinchi tucungacamami esforzarishpa catina canchij. Pero chaita rurangapajca espiritualmente sinchi tucuna munaitami charina canchij. ¿Canpish espiritualmente sinchi tucunata munanguimanchu? Chaipajca Jehová Diostami ‘munaitapish, fuerzatapish cushpa sinchiyachipai’ nishpa mañana cangui (Filipenses 2:13). w24.04 pág. 4 párrs. 9, 10

Cai punllapaj versopica Jehová Diosca gentecunata tucuchishpaca ima shina sintirishcatami nin (Ezequiel 33:11). Jehová Dios gentecuna imalla rurashcacunata ricushpa paicunata huiñaipaj tucuchinata o cutin causachinata alli juzgaj cashcataca segurosmi canchij. Paica yallitaj cꞌuyaj cashcamantami gentecunata ayudanata o mana ayudanataca alli yuyashpa decidin. Maijan gentecuna manataj causarina cashcataca allimi yachanchij. ¿Paicunaca picunataj can? Bibliapica huaquincunallamantami parlan. Por ejemplo, Jesusca ‘Judas Iscarioteca manataj causaringachu’ nircami (Marcos 14:21; Juan 17:​12-tapish ricui, españolpi tiyaj nota de estudiotapish ricui). Judasca Jehovapaj contra tucuna, shinallataj Jesusta traicionana jatun juchacuna cashcatami yacharca. Pero chaita yachashca jahuami chaitaca rurarca (Marcos 3:​29-ta ricui, españolpi tiyaj nota de estudio nishcatapish ricui). Shinallataj Jesusca chai tiempopi tiyaj panda religionta pushajcunamantaca maijancuna paipaj contracuna tucushcamanta manataj causarina cashcatami nirca (Mateo 23:33; Juan 19:​11-ta ricui, españolpi tiyaj “del hombre” nishca notatapish ricui). Apóstol Pablopish mana arrepintirij apostatacunaca ‘manataj causaringacunachu’ nircami (Hebreos 6:​4-8; 10:29). w24.05 pág. 4 párrs. 10, 11

Diosmanta mana caruyajpica Diabloca mana huiñaipajchu ñucanchijtaca llaquichi tucunga (1 Juan 3:8). Cai Allpa shuj Paraíso tucujpipish Jehová Diosca paipaj amigocunataca cuidashpami catinga. Huañuimantapishmi paicunataca quishpichinga (Apocalipsis 21:4). Jehová Dios paipaj carpa huasipi chasquij shina paipaj amigo cachun saquishcamantaca cushillami sintirinchij. ¡Chaica sumaj bendicionmi can! (Ezequiel 37:27). Pero ¿Jehová Diospaj carpa huasimanta ama llujshingapajca imatataj rurana canchij? Caipi yuyashun. Pi ñucanchijta paipaj huasiman invitajpica respetotami ricuchina canchij. Chashnallatajmi Jehová Diospaj carpa huasimanta ama llujshingapajca pai imata munashcata rurana canchij. Jehová Diosta tucui shunguhuan cꞌuyashcamantami tucuipi paita cushichisha ninchij (Colosenses 1:10). Jehová Dios ñucanchij Yaya cashcata yuyaipi charishpaca pai millashca ruraicunamantami caruyashun. Ashtahuanpish tucuipimi humildadta ricuchishun (Miqueas 6:8). w24.06 pág. 4 párrs. 8, 9

Jehová Dios Abrahanpaj churi Isaacta sacrificiota shina paiman cuchun mandajpica paipajca chaita cazunaca sinchimi cashcanga. Shinapish Abrahanca Jehová Diostami cazurca. Pero Isaacta ñalla huañuchigrijpimi Jehová Diosca Abrahantaca jarcarca. ¿Caimantaca imatataj yachanchij? Jehová Diosca gentecunata yallitaj cꞌuyashcamantami paipaj propio Churita sacrificiota shina cugrirca (Génesis 22:​1-18). Huatacuna pasajpica Jehová Diosca israelitacunamanca shuj Leytami curca. Chai Leypi nishca shinaca israelitacunaca paicunapaj juchacunamanta perdonashca cangapajca Diosmanmi sacrificiocunata cuna carca (Levítico 4:​27-29; 17:11). Chai sacrificiocunaca Jehová Dios gentecunata juchamanta quishpichingapaj shuj ashtahuan valishca sacrificiota cugrishcatami ricuchirca. Jehová Dios yuyachijpimi profetacunaca, ‘huarmipaj huahua huahuacunamanta shuj huahua’ llaquinaita sufrishpa huañuna cashcata huillarcacuna. Chai huahuaca Jehová Diospaj cꞌuyashca Churimi carca. Shinashpaca Jehová Diosca juchamanta, huañuimanta canta quishpichingapajmi paipaj cꞌuyashca Churita cugrirca (Isaías 53:​1-12). w24.08 pág. 4 párrs. 7, 8

Bibliata liyicushpaca chaipi nishcacunata ima shina pajtachinatami yuyana cangui. Chaipajca: “¿Caitaca cunan punllacunapi, shamuj punllacunapica ima shinataj pajtachi tucuni?” nishpami tapurina cangui. Cai ejemplopi yuyashun. 1 Tesalonicenses 5:​17, 18-tachari liyingui. Chai ishqui versocunata liyishca qꞌuipaca cashna nishpami tapurina cangui: “¿Yayitu Diostaca tucui shunguhuanchu mañani? ¿Punllapica mashna cutintaj mañani? ¿Ñuca mañaicunapica imacunallamantataj agradicini?”. Chashna tapurishca qꞌuipaca Jehová Diostaca quimsa cosascunamantachari agradicinata decidingui. Bibliata liyishca qꞌuipaca cashna laya tapuicunata ruraringapaj asha tiempollatapish surcushpaca Diospaj Shimita alli uyaj, alli pajtachijmi tucungui. Tiempohuancarin Diostaca ashtahuan allimi sirvingui. w24.09 págs. 4, 5 párrs. 9, 10

Jehová Diosca shujtajcunata ayudashpa cushilla sintirichunmi ñucanchijcunataca rurashca. Pi ñucanchijman imata cujpica cushillami sintirinchij. Ayudashcamanta agradicijpicarin ashtahuanmi cushicunchij. Pero ñucanchijta agradicijpipish o mana agradicijpipish allita rurashcamantami cushicuna canchij. ‘Jehová Diosca ñucanchijcuna cushcatapish yallimi ñucanchijmanca cunga’. Chaitaca manataj cungarinachu canchij (2 Crónicas 25:9). Shinashpaca shujtajcunata ayudajpica Jehová Diosca ñucanchijtaca achcatami bendicianga. Chaita yachashcamantami cushilla sintirinchij. Chaimanta Jehová Dios shina shujtajcunata ayudashpa catishunchij. w24.09 pág. 31 párrs. 20, 21

Jehová Diosca cꞌuyaj, llaquij Diosmi can (Salmo 103:13; Isaías 49:15). Llaquicunata charishcamanta cada uno ima shina sintirishcataca paica allimi yachan (Zacarías 2:8). Shinallataj Yaya Diosca paipajman cꞌuchuyachunmi ayudan (Salmo 25:14; Hechos 17:27). Ashtahuanpish Jehová Diosca humilde cashcamantami ‘jahua pachatapish, cai pachatapish cumurishpa ricun. Humilde runatapish allpamantami jatarichin’ (Salmo 113:​6, 7). ¿Paitaca pitaj mana jatunyachisha ningayari? Gentecuna Jehová Diosta rijsichun munashcamantami paitaca jatunyachinchij. Diabloca Jehová Diosmanta llullacunata nishpami gentecunataca pandachishca. Chaimantami paicunaca Diosmanta panda yuyaicunata charincuna (2 Corintios 4:4). Diabloca: “Jehová Diosca pꞌiñaj Diosmi can, ñucanchijmantaca mana preocuparinchu. Paimi llaquicunataca churan” nishpami llullan. Pero ñucanchijca Diablo nishcacuna mana cierto cashcataca allimi yachanchij. Chaimantami Jehová Dios ima shina cashcata gentecunaman yachachinchij. Chaita rurashpami paitaca jatunyachinchij (Isaías 43:10). w25.01 págs. 3, 4 párrs. 6, 7

Jesusca jucha illajmi can. Paica cai allpapi cashpaca milagrocunata rurashpami gentecunataca ayudarca. Shinapish Diabloca Jesusmanta llullacunata nichunmi huaquin gentecunamanca yuyaita curca. Por ejemplo, panda religioncunata pushajcunaca “Jesusca demoniocunata mandaj poderta cujpimi demoniocunataca llujshichin” nishpami yangamanta juchachircacuna (Marcos 3:22). Jesusta juzgacushpapish chai millai pushajcunaca ‘Jesusca llullacunatami yachachishpa puricun’ nishpami juchachircacuna. ‘Jesusta huañuchichun mañaichij’ nishpapishmi chaipi cajcunataca yachachircacuna (Mateo 27:20). Jesús huañushca qꞌuipa discipulocuna huillai callarijpipish paicunaca ‘gentecunata tandachishpami paicunapaj contra jatarichircacuna’ (Hechos 14:​2, 19). La Atalaya del 1 de diciembre de 1998 revistapica Hechos 14:​2-pi nishcacunamantami yachachirca. Chai revistapi nishca shinaca panda religionta pushajcunaca Diosmanta shamuj alli huillaicunataca mana chasquishun nircacunachu. Ashtahuancarin shujtaj llajtacunamanta gentecunapish Jesuspaj discipulocunata catirashpa llaquichichunmi achca llullacunata nircacuna. Cunan punllacunapipish Diabloca “allpapi causajcunataca tucuicunatami pandachicun”. w24.04 págs. 11, 13 párrs. 15, 16

Gentecuna ima tiempopi huañushcallamanta Jehová Dios paicunata causachinata o mana causachinata agllaj cashcata mana yuyanachu canchij. Ashtahuanpish Jehová Dios alli Juez cashcamanta siempre cashcata rurashpa imatapish decidij cashcatami yuyarina canchij (Salmo 33:​4, 5). Chaimanta cai pachapaj Juez cashcata ruranataca tucui shunguhuan crishunchij. ¿Gentecunaca maipi causashcallamantachu huiñaita causana oportunidadta charingacuna? Mana. Huaquin llajtacunapi causajcunaca Diosmanta yachana oportunidadtaca mana tanto charishcacunachu. Pero chai gentecunaca chai llajtacunapi causashcallamantaca Diospaj ñaupajpica mana “chivocuna” shina ricuringacunachu (Mateo 25:46). Ñucanchijca chai llajtacunapi causajcunapi yuyashpaca achcatami sustarishcanchij. Jehová Dioscarin paicunamantaca achcatami sustarin. Jatun llaqui punllacunapi Jehová Dios chai gentecunahuan imata ruranataca mana yachanchijchu. Pero tal vez chai gentecunaca Jehová Dios jatun llaqui punllacunapi imata rurajta ricushpa, shinallataj paipaj shutita ima shina santificajta ricushpaca paipimi cri callaringacuna (Ezequiel 38:16). w24.05 págs. 12, 13 párrs. 14, 15

Diosta sirvijcunaca ñucanchijpurami cushilla ayudanacunchij (2 Corintios 8:4). Pero caishuj chaishuj ayudanacungapajca huaquinpica mana manchaj canami minishtirin. Por ejemplo, shuj guerra tiyajpica ancianocunaca huauqui panicunata animangapaj, shinallataj espiritualmente, materialmentepish ayudangapajmi mana manchajcuna cana can. Ancianocunaca Diospaj ovejitacunataca achcatami cꞌuyancuna. Chaimantami huaquinpica paicunapaj causaita peligropi churashpa paicunata ayudangapaj listos cancuna. Sucursalmanta cachashca instruccioncunata cazushpaca tucuicuna tandalla cachunmi ayudashun (Hebreos 13:17). Jatun llaquicuna manaraj tiyajpi, shinallataj llaquicuna tiyai horas imata ruranata yachangapajca ancianocunaca instruccioncunatami chasquincuna. Paicunaca chai instruccioncunatami alli yachana can (1 Corintios 14:​33, 40). Mana manchashpa, alli yuyashpami imatapish rurana canchij (Proverbios 22:3). Mana alli yuyashpa imatapish rurashpaca llaquipimi urmashun. Chaimantami puntapica alli yuyanaraj canchij. Jehová Diospimi confiana canchij. Paica tucuicunamanta sustarishcamantami tucuicuna alli cachun munan. Chaimi paica ñucanchij causaita cuidashpa huauqui panicunata ayudachun imata ruranata ricuchin. w24.07 pág. 4 párr. 8; pág. 6 párr. 11

Rey Davidca Jehová Diosta alli rijsishcamantami paipi tucui shunguhuan confiarca. Por ejemplo, rey Saúl paipaj soldadocunahuan paita huañuchingapaj catiracujpimi Davidca Jehová Diospaj ayudata mashcarca. Jehová Dios paipaj mañashcata cutichijta ricushpaca Davidca “Mandaj Diosca huiñaita causacuchunlla” nishpami Jehová Diosta jatunyachirca (Salmo 18:46). Pero chaita nishpaca Davidca Jehová Dios tiyaj cashcallataca mana nicurcachu. Ashtahuanpish shuj libropi nishca shinaca Davidca Jehová Dios cutin cutin paipaj pueblota ayudashcamantami tucui shunguhuan paipi confiaj carca. Shinallataj Davidca Jehová Dios paita tucuipi ayudashcata ricushcamantami Jehová Dios causaj Dios cashcata seguro carca, seguro cashcamantami Jehová Diosta sirvishpa, jatunyachishpa catingapaj fuerzasta charirca (Salmo 18:​28, 29, 49). Yaya Dios causaj Dios cashcata seguros cashpami paitaca cushicuihuan sirvishpa cati tucushun. Ashtahuanpish tucui llaquicunatami chꞌimbapurai tucushun. Paipajta ruranatapish manataj saquishunchu. Chashnami paimantaca mana caruyashun. w24.06 págs. 20, 21 párrs. 3, 4

¿Tesalonicapi caj huauqui panicunaman Apóstol Pablo quillcashca cartamantaca imatataj yachanchij? Ñucanchijpish huaquin noticiacunata uyashpaca mancharishcachari saquirishun. Pero chai noticiacuna Bibliapi nishcacunahuan mana de acuerdo cajpica cuidadotami charina canchij. Ñaupa Unión Soviética llajtapi ima tucushcata ricushun. Millai gentecunami central mundialmanta huauquicuna shuj cartata cachashcata crichisha nircacuna. Chai cartapica huaquin huauquicunataca Diospaj organizacionta saquishpa shujtaj organizacionta callarichichunmi animacurca. Pero chai carta Central Mundialmanta huauquicuna cachashca laya uyarijpipish Jehová Diosta alli sirvij huauqui panicunaca chaipi nishcacunapica mana crircacunachu. ¿Imamanta? Paicunaca chai cartapi nishcacuna Bibliapi nishcacunahuan mana de acuerdo cashcatami cuentata curcacuna. Cunan punllacunapipish millai gentecunaca ñucanchijta pandachingapaj, huauqui panicunamantapish caruyachingapajmi tecnologiata utilizancuna. Pero ñucanchij yuyaita maijanpish cambiachunca mana saquinachu canchij. Chaipajca imalla uyashcacuna, imalla liyishcacuna Bibliapi nishcacunahuan de acuerdo cachunmi ricuna canchij (2 Tesalonicenses 2:2; 1 Juan 4:1). w24.07 págs. 12, 13 párrs. 14, 15

Jehová Diosman mingarina decisionta japinami ima decisiontapish yalli valishca can. Chai decisionta japishpami Jehová Diospaj familiapaj parte tucunchij. Paica tucuicuna chaita rurachunmi munan. ¿Imamanta? Yayitu Diosca tucuicunami paipaj alli amigocuna tucuchun, huiñai causaita charichunpish munan (Deuteronomio 30:​19, 20; Gálatas 6:​7, 8). Jehová Diosca paita sirvichunca pitapish mana obliganchu. Ashtahuanpish cada uno chaita decidichunmi saquin. Pero ¿maijan huauqui o pani Jehová Diospaj mandashcacunata ladoman saquishpa, jatun juchapi urmashpaca paihuanca imataj tucunga? Shungumanta mana arrepintirijpica paitaca congregacionmantami llujshichina can (1 Corintios 5:13). Pero Jehová Diosca juchata ruraj paipajman tigrarichunmi munan. Chaimantami tucuicunamanta huañuchun paipaj Churita cai Allpaman cacharca. Jesús huañushcamantami ñucanchij juchacunamanta perdonashca cai tucunchij. Jehová Diosca juchata rurajcunataca cꞌuyaihuanmi arrepintirichun animan (Zacarías 1:3; Romanos 2:4; Santiago 4:8). w24.08 pág. 14 párrs. 1, 2

Apóstol Juanca huauqui panicuna Diosta cazushpa causacujta ricushpaca achcatami cushicurca. Chaitami paipaj tucuri cartapica quillcarca. Chai tiempopica achcacunami llullacunata nishpa huauqui panicunata chꞌicanyachicurcacuna. Chashnapish shujtajcunaca Diospaj mandashcacunata cazushpami ‘mana llullapi purishpa’ catircacuna (2 Juan 4, 6). Chashnami paicunaca Jehová Diostapish, Juantapish cushichircacuna (Proverbios 27:11). ¿Ñucanchijpish imatataj yachanchij? Jehová Diosmanta mana caruyashpaca cushillami sintirishun (1 Juan 5:3). Jehová Diosca ñucanchijcuna mana allicunamanta caruyashpa paita cazujpica cushillami sintirin. Chaita yachashpami ñucanchijpish cushicunchij. Ñucanchij allita rurajpica jahua pacha angelcunapishmi cushicun (Lucas 15:10). Ñucanchij huauqui panicunapish Diosmanta mana caruyajta ricushpaca cushillami sintirinchij (2 Tesalonicenses 1:4). Satanaspaj mundo ña tucurijpi Jehová Diosmanta mana caruyashcamantami ñucanchijca cushilla sintirishun. w24.11 págs. 12, 13 párrs. 17, 18

Maijan huauquita panita carullamanta alli rijsishca qꞌuipa paita munashcata ningapajca ¿mashna tiempotataj shuyana cangui? Paita rijsishcahuan “cantami munani” nijpica paica can mana alli yuyashpa ucui jahua imatapish decidij cashcatachari yuyanga (Proverbios 29:20). Shinallataj paica can paita munashcataca ñachari cuentata curca. Pero cambaj sentimientocunata paiman ningapaj achca tiempo pasachun saquijpica paica can ishqui yuyaiyuj cashcamanta imatapish decidingapaj yallitaj demoraj cashcatachari yuyanga (Eclesiastés 11:4). Caitapishmi yuyarina cangui: “Cantaca ashtahuanmi rijsisha nini” pita ningapajca paihuan cazaranataj cashcata convencido canaca mana minishtirinchu. Ashtahuanpish cazarangapaj ña listo cashcata, shinallataj chai huauqui o pani cambaj alli cusa, alli huarmi cai tucushcatami convencido cana cangui. ¿Shuj soltero o shuj soltera canhuan purisha nishcata cuentata cushpaca imatataj rurana cangui? Paihuan mana purisha nishpaca pugllashpalla canmanta enamorarichun saquinaca mana allichu can. Chaimantami cambaj ruraicunahuan paihuan mana purisha nishcata ricuchina cangui (Efesios 4:25). w24.05 págs. 22, 23 párrs. 9, 10

Jehová Diosta cazuj ungidocunallami jahua pachapi Jesushuan mandangapaj apashca cangacuna. Espiritualmente mana rijcharishca caj ungidocunaca jahua pachaman ringapaj agllashcacunahuanca mana tandachishcacunachu canga (Mateo 24:31). Pero jahua pachaman rina esperanzata mana charishpapish tucuicunami rijcharishca cangapaj, Diosmanta ama caruyangapaj esforzarishpa catina canchij. Jehová Diosta alli rijsishcamantami pai alli juzgaj cashcata seguros canchij. Chaimantami jahua pachaman richun cunan punllacunapiraj huaquin gentecunata agllajpipish mana mancharinchij. Jesusca shuj chꞌimbapuraipica casi las cinco de la tardeta maijancuna trabajanaman yaicushcatami nirca (Mateo 20:​1-16). Chai horas trabajanaman yaicujcunapish, punlla enterota trabajajcunapish chai pagollatatajmi chasquircacuna. ¿Caimantaca imatataj yachanchij? Ungidocunaca ima hora agllashca cashpapish tucuicunami jahua pachaman rishpaca chai bendicionllatataj chasquingacuna. Pero chai bendicionta chasquingapajca Jehová Diostami tucuipi cazuna can. w24.09 pág. 24 párrs. 15-17

Jesustaca achca gentecunami llaquichirca. Por ejemplo, paipaj familiaca paitaca locomi cangui nishpami juchachircacuna. Religionta pushajcunapish paica demoniocunapaj poderhuanmi milagrocunata ruran nishpami juchachircacuna. Cutin Romamanta soldadocunaca paimanta burlarishpa, macashpami huañuchircacuna (Marcos 3:​21, 22; 14:55; 15:​16-20, 35-37). Chashna llaquichijpipish Jesusca mana chashnallataj tigra llaquichircachu. ¿Jesuspaj ejemplomantaca imatataj yachanchij? (1 Pedro 2:​21-23). Jesusca shujtajcuna mana alli tratajpi imata rurana cashcatami yachachirca. Paica ima hora rimanata, ima hora upalla saquirinatami yacharca (Mateo 26:​62-64). Por ejemplo, paimanta llullacunata nijpica paica upallami saquirirca (Mateo 11:19). Paita catirashpa llaquichijcunataca mana maipishcachun rimarcachu. w24.11 págs. 4, 5 párrs. 9, 10

Shuj cꞌuyashca amigoman pai minishtishca, alaja regalota cushcata yuyai. ¿Chai amigo chai regalota mana utilizajpica ima shinataj sintiringuiman? Seguramente achcatami llaquiringuiman. Pero chai amigo canta agradicijpi, chai regalotapish alli utilizajpica achcatami cushicunguiman ¿nachu? ¿Caimantaca imatataj yachanchij? Jehová Diosca ñucanchijcunamanta huañuchunmi paipaj Churita curca. Chai sumaj regalota cushcamanta agradecido cashcata ricuchijpica Yayitu Jehová Diosca cushillami sintiringa (Juan 3:16; Romanos 5:​7, 8). Mana cuidadota charishpaca huatacuna pasajpica Jesús ñucanchijmanta huañushcamanta agradicinatami saquishun. Shuj regalota chasquishcamanta cushilla sintirishpapish chai regalota huaquichicushca shinami canga. Pero agradecido cashcata ricuchishpa catingapajca Jehová Dios, Jesús ñucanchijmanta imata rurashcatami yuyarina canchij. w25.01 pág. 26 párrs. 1, 2

‘Cristota cunanlla cati callarij’ huauquica mana anciano cai tucunchu. Paica achca huatacunata mana bautizarishca cashpapish Jehová Dioshuan alli amigo tucungapajmi tiempota minishtin. Manaraj anciano cashpaca paica Jesús shina humilde cashcatami ricuchina can. Shinallataj shuj asignacionta Jehová Dios cungacamami pacienciahuan shuyana can (Mateo 20:23; Filipenses 2:​5-8). Jehová Dios mandashca shina causashpa, paipaj organización ima nishcata catishpami “Diosta tucui shunguhuan sirvij” cashcata ricuchinga. Bibliapica ancianocuna “alli yachachij” cana cashcatami nin. Mana tucui ancianocunachu sumaj discursocunata cun. Chashnapish predicashpa, huauqui panicunata visitashpaca Bibliahuanmi sumajta animancuna. w24.11 págs. 23, 24 párrs. 14, 15

Bibliapi shuj verso ima nishcata mana intindishpaca ashtahuan informaciontami mashcana canchij. Chai huashaca chai versopi Jehová Diosmanta, Jesusmanta imata yachashcatami punllanta yuyarina canchij. Paicuna ñucanchijman ima shina cꞌuyaita ricuchishcatapishmi yuyana canchij (Salmo 119:97). Bibliata liyishpa o estudiacushpa mushuj yuyaicunata mana tarishpaca mana desanimarinachu cangui. Bibliata estudianaca orota mashcacushca shinami can. Orota mashcajcunaca orota japingacamaca achca horascunata, achca punllacunatami trabajancuna. Paicunapajca shuj uchilla oro pepitapish achca valishcami can. Chaimantami mana shaicushpa sinchita trabajashpa catincuna. Bibliapi tiyaj valishca yuyaicunaca orotapish yallimi valishca can (Proverbios 8:10). Chaimantami Bibliataca mana shaicushpa, cushilla estudiashpa catina canchij (Salmo 1:2). w25.01 págs. 24, 25 párrs. 14, 15

Jehová Diosca ñucanchijcunapish shujtajcunata shungumanta perdonachunmi munan (Salmo 86:5; Lucas 17:4; Efesios 4:32). Paipaj rimashcacunahuan o rurashcacunahuan pi ñucanchijta llaquichijpica achcatami llaquirinchij. Familiacuna, amigocuna chashna llaquichijpicarin ashtahuanmi llaquirinchij (Salmo 55:​12-14). Maipica espadahuan chugrichishca shinami sintirinchij (Proverbios 12:18). Chashna llaquichijpica tal vez ima mana tucushca shinami ñaupajman catinata munashun. Pero chaita rurashpaca llaquilla sintirinataca mana saquishunchu. Ashtahuanpish cuchillohuan ñucanchijta tujsishca qꞌuipa cuchillota chugrimanta mana anchuchishca shinami canman. Bibliapi nishca shinaca pi ñucanchijta llaquichijpica maipica ratomi pꞌiñarinchij. Shinapish Bibliapica ama pꞌiñarishca saquirichunmi animan (Salmo 4:4; Efesios 4:26). ¿Imamantataj chai consejota catina canchij? Pꞌiñarishca saquirishpaca ñucanchijta llaquichijcunatami tigra llaquichinata munashun. Pero chaita ruranaca mana allichu can (Santiago 1:20). Shinashpaca pi llaquichishcamanta rato pꞌiñarishpapish pꞌiñarishca saquirinata o mana saquirinataca cada unomi agllana canchij. w25.02 pág. 15 párrs. 4-6

Jesusca: “Achcata charij runaca Diospajta mana rurashpaca Diospaj ñaupajpica huajchami can” nircami (Lucas 12:​16-21). Cayandij punlla ima tucunata mana yachashcamantami charishcacunallapica mana confiana canchij (Proverbios 23:​4, 5; Santiago 4:​13-15). Shinallataj maipica Jesusta catisha nishpaca ñucanchij charishcacunata saquingapajmi listo cana canchij (Lucas 14:33). Punta siglopica Judeapi caj huauqui panicunaca cushicuihuanmi chaita rurarcacuna (Hebreos 10:34). Cunan punllacunapipish achca huauqui panicunaca politicapi mana chagrurishcamantami paicunapaj trabajotapish, charishcacunatapish saquishcacuna (Apocalipsis 13:​16, 17). Paicunaca Jehová Dios cusha nishcapimi confiancuna. Jehová Diosca: “Cantaca manataj saquishachu. Manataj shitashachu” ninmi (Hebreos 13:5). Ñucanchijpish mayorlla cai horaspaj minishtishcacunata charingapajmi esforzarinchij. Pero jarcaicuna ricurijpipish Jehová Dios ayudanapimi confianchij. w25.03 págs. 29, 30 párrs. 13, 14

¿Jehová Diosca espiritualmente sinchi tucuchunca ima shinataj ñucanchijtaca ayudan? Paica congregacionpica huaquin huauquicunatami michijcuna, yachachijcuna cachun churashca. Paicuna “ayudajpimi Cristo shinallataj allita rurajcuna tucushpa alli yuyaiyuj, jatun runacuna tucushun” (Efesios 4:​11-13). Shinallataj Jehová Diosca ‘Cristopaj yuyaita’ charichunmi espíritu santota cun (1 Corintios 2:​14-16). Ashtahuanpish Jehová Diosca Jesusmanta yachachunca Mateo, Marcos, Lucas, Juan librocunatami quillcachirca. Jesús shina yuyangapaj, allicunata parlangapaj, alli causangapaj esforzarishpaca espiritualmente sinchimi tucushun. Espiritualmente huiñashpa catingapajca ‘Cristomanta punta yachaicunata’ yachashpallaca mana saquirinachu canchij. w24.04 págs. 4, 5 párrs. 11, 12

Tucui punllacunami decisioncunata agllana canchij. Maijan decisioncunata agllanaca jahuallami can. Por ejemplo, imata micunata, ima horas dorminatami agllana canchij. Pero maijan decisioncunata agllanaca sinchimi can. Maipica alli saludta charingapaj, cushilla causangapaj, ñucanchij familiata cuidangapaj, Jehová Diosta alli adorangapajmi decisioncunata agllana canchij. Ñucanchij agllashca decisioncunaca ñucanchijpaj, ñucanchij familiapajpishmi alli cana can. Ashtahuantajca Jehová Dios munashca shinami alli decisioncunata agllana canchij (Romanos 12:​1, 2). Shuj alli decisionta japingapajca tucui informaciontami yachana canchij. ¿Imamantataj chaita rurana canchij? Caipi yuyai. Shuj runaca ancha ungushca cashcamantami doctorpajman rin. Doctorca manaraj shuj tratamientota cushpaca paitaca allimi ricun, tapuicunatapishmi ruran. Ñucanchijpish chai doctor shinami manaraj shuj decisionta japishpaca chai temamanta tucui informacionta mashcana canchij. w25.01 págs. 14, 15 párrs. 1-3

Jehová Diosca yallitaj llaquij, cꞌuyaj cashcamantami shujllapish tucuchishca cachunca mana munan. Huaquin gentecuna jatun juchacunapi urmajpica ¿Jehová Diosca paicunata llaquishcataca ima shinataj ricuchirca? (2 Pedro 3:9). Por ejemplo, rey Davidca jatun juchacunapimi urmarca. Paica cazarashca huarmihuanmi huainayarca. Shuj runatapish huañuchichunmi cacharca. Pero David arrepintirijpimi Jehová Diosca paita llaquishpa perdonarca (2 Samuel 12:​1-12). Rey Manasespish achca huatacunatami millaita rurashpa causarca. Pero shungumanta arrepintirijpica Jehová Diosca paita llaquishpami perdonarca (2 Crónicas 33:​9-16). Cai ejemplocunapi ricushca shinaca shungumanta arrepintirijpimi Jehová Diosca perdonai tucun. Davidpish Manasespish shungumanta arrepintirishcamantami Jehová Diosca paicunataca cutin causachinga. w24.05 pág. 4 párr. 12