Mayo

Israelitacunata Egiptomanta llujshichishca qꞌuipaca Jehová Diosca paipaj carpa huasipi sirvichunca sacerdotecunatami churarca. Shinallataj chaipi huaquin ruraicunata rurashpa ayudachunca levitacunatapishmi churarca. Pero ¿Jehová Diosca paipaj carpa huasipi ayudajcunata, shinallataj chai cꞌuchullapi causajcunataca ashtahuanchu cuidarca? Mana. Yaya Diosca tucui israelitacunatami por igual tratarca. Israelitacunaca levitacuna, sacerdotecuna cashpapish tucuicunami Jehová Diospaj amigo cana oportunidadta charircacuna. Por ejemplo, Diospaj carpa huasi jahuapi jatun pꞌuyu o lunyacuj nina ricurijpica tucui israelitacunami chaicunataca ricui tucurcacuna (Éxodo 40:38). Shinallataj chai jatun pꞌuyu shujtaj ladoman ri callarijpica Diospaj carpa huasimanta carupi o cꞌuchullapi causaj israelitacunapishmi chaitaca ricui tucurcacuna. Chaita ricushpaca tucuicunami paicunapaj carpa huasicunata, paicuna imalla charishcacunata huaquichishpa shujtaj ladoman rijcuna carca (Números 9:​15-23). Cunan punllacunapipish ñucanchijcuna maipi causashpapish tucuicunami Yaya Diospajca valishca canchij. Chaimantami paica tucuicunata ayudan. w24.06 págs. 4, 6 párrs. 10-12

Davidpaj churi Absalonca mandanata quichungapajca paipaj yayatami huañuchisha nirca (2 Samuel 15:​12, 13). Chaimi Davidca Jerusalenmantaca utca miticushpa rina carca. Shinapish Davidca Jerusalenpi Absalón imata ruracushcata yachangapaj pi chaipi saquirina cashcata cuentata curca. Chaimantami Sadoctapish, shujtaj sacerdotecunatapish Jerusalenman tigrachishpa cacharca (2 Samuel 15:​27-29). Jerusalenman tigranaca peligrosomi carca. Chaimantami paicunaca cuidadohuan rina carcacuna. Davidca ama huañungapajca Sadoctapish, Husaitapish paita ayudachunmi mañarca. Husaica Davidpaj alli amigomi carca (2 Samuel 15:​32-37). David mandashca shinami Husaica Absalonpaj amigo tucurca. Chaimi paica Davidta japingapaj imallata rurana cashcata Absalonmanca nirca. Absalonca Husái nishcatami rurarca. Chaimi Davidca macanacungapaj allichiri tucurca. Husaica Absalón imata ruragrishcataca Sadocmanpish, Abiatarmanpishmi huillarca (2 Samuel 17:​8-16). Chai huashaca paicunaca Davidmanmi chaitaca huillarcacuna. Shinami Sadocpaj, caishuj sacerdotecunapaj ayudahuanpish Davidca quishpiri tucurca (2 Samuel 17:​21, 22). w24.07 págs. 4, 5 párrs. 9, 10

Maijancunaca manaraj bautizarishpa o bautizarishca huasha imapi pandarishcamantami yallitaj llaquilla sintirincuna. Shinapish Jehová Dios ñucanchijta cꞌuyashcamanta paipaj Churita ñucanchijmanta huañuchun cachashcatami yuyarina canchij. Chaica shuj sumaj regalo shinami can. Jehová Diosca chai regalota chasquichunmi munan. Chaimantami paica: ‘Cunanca cancuna pandarishcacunata allichingapaj ñucapajman shamuichij’ nin. Shinashpaca Jehová Dioshuan ñucanchij pandarishcacunata allichishca qꞌuipaca paica chaicunataca ña mana yuyachicungallachu. Chaita rurashpami Yayitu Diosca yallitaj cꞌuyaj cashcata ricuchin. Ashtahuanpish Yayitu Diosca ñucanchij alli ruraicunataca manataj cungaringachu (Salmo 103:​9, 12; Hebreos 6:10). ¿Can pandarishcacunata yuyarishpa llaquilla sintirishpaca imatataj rurana cangui? Ñaupa punllacunapi ima tucushcata yuyacunapaj randica cunan punllacunapi imata ruracushcata, shamuj punllacunapi imata ruragrishcatami yuyana cangui. Ñucanchijca ñaupa punllacunapi imata rurashcataca mana cambiai tucunchijchu. Pero cunan punllacunapi allicunata rurashpami Jehová Diosta jatunyachi tucunchij. Shinallataj shamuj punllacunapi bendicioncunata chasquina yuyaillami causana canchij. w24.10 págs. 8, 9 párrs. 8, 9

Bibliata liyicushpaca cambaj causaipi achca cambiocunata rurana cashcata cuentata cushpaca maipica llaquillami sintiringui. Cai ejemplopi yuyai. Santiago librota liyicushpaca tal vez mana ñahuita ricushpalla shujtajcunata tratana cashcatami yachangui (Santiago 2:​1-8). Chaita liyishpaca shujtajcunata alli tratangapaj huaquin cambiocunata rurana cashcatami cuentata cungui. Cutin cayandij punllaca manaraj imata nishpa alli yuyanaraj cashcatami liyingui (Santiago 3:​1-12). Chaita liyishca qꞌuipaca huaquinpica desanimachij yuyaicunata o mana alli yuyashpa parlaj cashcatachari cuentata cungui. Chaimantami animachij yuyaicunata parlangapaj ashtahuan esforzarinata decidingui. Cutin cayandij punllaca cai mundopaj ruraicunapi mana chagrurina cashcatami liyingui (Santiago 4:​4-12). Chaita liyishpami diversioncunata alli yuyashpa agllana cashcata cuentata cungui. Cayandij punlla Bibliata liyisha nishpapish cambaj causaipi achca cambiocunata rurana cashcata yuyarishpaca llaquillachari sintiringui. Cambaj causaipi achca cambiocunata rurana cashcata cuentata cushpaca mana desanimarinachu cangui. Shinallataj “mushuj churanata churarij shina Dios cushca mushuj causaita” churaringapajca tiempomi minishtirin. w24.09 págs. 5, 6 párrs. 11, 12

Jesusca mana allita ruranamantami jarcarirca. Shinallataj paipaj Yaya tucuita ricucushcatami alli yacharca. Jehová Dios pai agllashca tiempopi tucui cai llaquicunata tucuchinatami Jesusca seguro carca. Ñucanchijpish Jesuspaj ejemplotami catina canchij. Maipica shujtajcuna ñucanchijta llaquichijpipish cungari tucunchijllami. O ama ashtahuan llaquicunata charingapajmi upalla saquirina canchij (Eclesiastés 3:7; Santiago 1:​19, 20). Pero shujtajcunata maltratacujta ricushpa o ñucanchij crishcacunamanta llullacunata nijpica mana upalla saquirinachu canchij (Hechos 6:​1, 2). Imata nishpapish respetohuanmi parlana canchij. Ñucanchijpish Jesús shinami ‘cashcata rurashpa juzgajpaj maquipi mingarina’ canchij (1 Pedro 2:23). w24.11 págs. 5, 6 párrs. 10-12

Juchata ruraj arrepintirijpica tucuicunami achcata cushicunchij (Lucas 15:7). Pero ¿ancianocuna ayudashcallamantachu paica arrepintirirca? Mana. Apóstol Pabloca juchata rurajcunamanta parlashpaca: “Paicunaman arrepintirina yuyaita Dios cungapishchari” nircami (2 Timoteo 2:25). Shinashpaca juchata rurajcunaca mana gentecuna ayudashcallamantachu paicunapaj yuyaita cambiashpa arrepintirincuna. Ashtahuantajca Jehová Diosmi shungumanta arrepintirichun paicunataca ayudan. Shinallataj apóstol Pabloca juchata rurajcuna arrepintirishpa ima bendicioncunallata chasquinatami nirca. Por ejemplo, paicunaca Diosmanta yachashpa catina oportunidadtami charingacuna. Shinallataj paicunapaj yuyaita cambiashcamantami Diablopaj trampacunapica ña mana urmangacuna (2 Timoteo 2:26). Juchata ruraj arrepintirishpapish paipaj feta sinchiyachishpami catina can. Diablopaj trampacunapi ama urmangapajpish esforzarishpami catina can. Chaipajca ancianocunaca paita ayudangapajmi visitashpa catina can. Chashnami paica allita rurangapaj esforzarishpa catinga (Hebreos 12:​12, 13). w24.08 págs. 23, 24 párrs. 14, 15

Achca gentecunami Jesús paicunaman maipi carashcaman rircacuna. Pero Jesuspish, apostolcunapish ña mana chaipi carcacunachu. Chaimantami gentecunaca Jesusta mashcangapajca Tiberíades llajtamanta shamuj barcocunata japishpa Capernaumman rircacuna (Juan 6:​22-24). ¿Paicunaca Diospaj Gobiernomanta ashtahuan yachasha nishpachu chaitaca rurarcacuna? Mana. Ashtahuanpish chai gentecunaca Jesús ashtahuan carachun nishcallamantami chaitaca rurarcacuna. Chai gentecunaca Capernaúm cꞌuchullapimi Jesushuan tuparcacuna. Chaipica Jesusca: ‘Tandata huijsa pajtata micushcallamantami ñucataca mashcacunguichij. Chingarijlla micunamantaca ama trabajaichijchu. Ashtahuanpish huiñai causaiman apaj mana tucurij micunamanta trabajaichij’ nircami (Juan 6:​26, 27). Jesusca mana tucurij micunaca Jehovamanta shamushcatami nirca. w24.12 pág. 5 párrs. 8, 9

Huauquicunaca alli yachachij cangapajca ima nicushca Bibliamanta cashcatami ricuchina can. Chaipajca Bibliatapish, publicacioncunatapishmi alli estudiana cangui (Proverbios 15:28). Bibliata estudiashpaca ñucanchij publicacioncunapi chai versocunamanta imata nishcatami intindina cangui. Chashnami chai versocunataca alli intindichi tucungui. Yachachicushpaca canta uyajcunapaj shunguman chayangapaj esforzari. Alli yachachij cangapajca experienciata charij ancianocunatami ayudachun mañana cangui (1 Timoteo 5:17). Ancianocunaca ‘alli yachaihuan shujtajcunata animajmi’ cana can. Shinapish maipica huauqui panicunatami ‘sinchita cunana’ can. Chaita rurana cashpapish paicunataca cꞌuyaihuanmi tratana can. Cꞌuyaihuan tratashpa, Diospaj Shimimanta yachachishpaca ñucanchij alli yachachij Jesuspaj ejemplota caticushcatami ricuchingui (Mateo 11:​28-30; 2 Timoteo 2:24). w24.11 pág. 24 párr. 16

Ñucanchij shimicunahuanmi Jehová Diosta jatunyachi tucunchij. Jehová Diosca paita sirvijcuna paita cantachun, paipaj shutita alli nichunpishmi munan. Shinallataj alli huillaicunata, pai jatun cashcata tucui llajtacunapi huillachunmi animan (Salmo 96:​1-3). Chaicunata rurashpami Yaya Jehová Diosta jatunyachishcata ricuchishun (Hechos 4:29). Ñucanchij charishca cosascunahuanmi Jehová Diosta jatunyachi tucunchij. Jehová Diosta sirvijcunaca valishca cosascunata cushpami paitaca jatunyachishcacuna (Proverbios 3:9). Por ejemplo, israelitacunaca Diospaj templota shayachingapaj, cuidangapajmi cullquita, shujtaj valishca cosascunatapish curcacuna (2 Reyes 12:​4, 5; 1 Crónicas 29:​3-9). Shinallataj huaquin discipulocunaca Jesusta, paipaj apostolcunatapish atindingapajmi paicuna imalla charishcacunata curcacuna (Lucas 8:​1-3). Cutin punta siglopica huauqui panicunaca yaricaihuan caj huauqui panicunatami ayudarcacuna (Hechos 11:​27-29). Cunan punllacunapipish ñucanchij imalla charishcacunata cushpami Jehová Diostaca jatunyachinchij. w25.01 pág. 4 párr. 8; pág. 5 párr. 11

¿Cornelio bautizarichunca imataj ayudarca? Bibliapi nishca shinaca “Cornelioca Diosta manchaj, tucui paipaj familiandij Diosta sirvijmi carca”. Cutin cutin rogarishpa Diosta mañajpishmi carca (Hechos 10:2). Apóstol Pedro alli huillaicunata huillajpica Corneliopish, paipaj familiapish Jesuspi feta churashpami bautizarircacuna (Hechos 10:​47, 48). Shinallataj Cornelioca paipaj familiandijmi cambiocunata rurangapaj listos carcacuna (Josué 24:15; Hechos 10:​24, 33). Cornelioca jatun mandaj, rijsishca runami carca. Chashna cashpapish bautizarinata imapish jarcachunca mana saquircachu. ¿Canpish bautizaringapajca cambaj causaipi achca cambiocunatachu rurana cangui? Chashna cajpica Jehová Dios canta ayudanatami seguro cana cangui. Shinallataj pai mandashcacunata cazungapaj esforzaricujta ricushpaca cantami bendicianga. w25.03 pág. 5 párrs. 12, 13

¿Diospaj organizacionmanta, ñucanchijta pushajcunamanta llullacunata nijpica imatataj rurana canchij? Diospaj enemigocuna Jesustapish, paita catijcunatapish ima shina pandachisha nishcatami yuyarina canchij. Bibliapi nishca shinaca cunan punllacunapipish millai gentecunaca Diosta sirvijcunatapishmi catirashpa llaquichina carca. Shinallataj llullacunata nishpami paicunataca yangamanta juchachina carca (Mateo 5:​11, 12). Pero ñucanchijta ama pandachichunca Diablo yuyaita cushcamanta llullacunata nijcuna cashcatami yuyarina canchij. Cunanca chai llullacunapi ama cringapaj imata rurana cashcatami yachashun. Llulla parlocunapi ama crishunchij. Llulla parlocuna uyarijpica 1 Timoteo 1:​3, 4-pi apóstol Pablo nishca shinaca chaicunataca mana uyanachu canchij. Pabloca Timoteotaca “llulla parlocunataca ama uyangui” nishpami aconsejarca. Caipi yuyashun, llullu huahuacunaca pambapi imata tarishpaca chaita japishpami shimiman apanllacuna. Pero jatuncunaca chaitaca mana ruranchijmanchu. ¿Imamanta? Ñucanchijta dañota rurai tucushcata yachashcamanta. ¿Caimantaca imatataj yachanchij? Llulla parlocunaca pambapi tarishca mapa cosascuna shinami can. Ñucanchijta dañota rurai tucushcataca allimi yachanchij. Chaimantami chaicunata uyanapaj randica Diosmanta shamuj ‘alli yachaicunata’ uyana canchij (2 Timoteo 1:13). w24.04 págs. 11, 13 párrs. 16, 17

Jehová Diosta cazujcunamantaca mana caruyanachu canchij. Jehová Diosca tucui huauqui panicuna shuj shinalla paita adorachunmi munan. Paita chashna adorangapajca paipaj yachachishcacunamantaca mana caruyanachu canchij. Jehová Diospaj yachachishcacunamanta caruyajcunaca huauqui panicunatami chꞌicanyachincuna. Ñucanchijpish Diospaj ñanmanta mana caruyasha nishpaca paicunahuanca mana tandanacunachu canchij (Romanos 16:17). Ima verdad cashcata seguros cashpa, shinallataj chai verdadmanta mana caruyashpaca Yayitu Jehová Dioshuanca allimi apanacushun (Efesios 4:​15, 16). Shinallataj Diabloca llullacunahuanca mana pandachi tucungachu. Jatun llaqui punllacuna shamujpipish Jehová Diosmi ñucanchijta quishpichinga. Chaimanta Diospaj yachachishcacunamanta ama caruyashunchij. Chaita rurajpimi “sumaj causaita cuj Diosca” siempre ñucanchijhuan canga (Filipenses 4:​8, 9). w24.07 pág. 13 párrs. 16, 17

Jesusca paicunapaj juchacunamanta llaquilla caj gentecunatami ashtahuanca ayudarca. Paica gentecuna juchayujcuna cashcamanta achca llaquicunata charishcatami yacharca. Chaimi: ‘Sano gentecunaca jambijtaca mana minishtincunachu. Ungushcacunami jambijtaca minishtincuna. Ñucaca cashcata rurajcunata cayanamanca mana shamurcanichu. Ashtahuanpish juchayujcunata cayanamanmi shamurcani’ nirca (Mateo 9:​12, 13). Jesusca chai versopi nishcacunatami pajtachirca. Por ejemplo, shuj juchayuj huarmi paipaj huiquicunahuan Jesuspaj chaquicunata maillajpica Jesusca paipaj juchacunatami perdonarca (Lucas 7:​37-50). Shinallataj samaritana huarmi juchata rurashpa causajpipish Jesusca Diosmantami paimanca yachachirca (Juan 4:​7, 17-19, 25, 26). Gentecunaca juchamantami huañunchij. Pero Jehová Diosca cꞌaricunata, huarmicunata, huahuacunata causachichunmi Jesusmanca poderta curca (Mateo 11:5). w24.08 págs. 4, 5 párrs. 9, 10

¿Jehová Diosca paipaj shutitaca ima shinataj jatunyachinga? Paica ñallami cashcata rurashpa gentecunata juzganga. Paipaj shutita mapayachishcamantami ñalla tucui panda religioncunatapish tucuchinga (Apocalipsis 17:​5, 16; 19:​1, 2). Huaquin gentecunaca Jehová Dios panda religioncunata tucuchijta ricushpaca tal vez Jehová Diosta adoranatami decidingacuna. Shinallataj Armagedonpica Jehová Diosca Diablopaj ruraicunatami tucuchinga. Paita pꞌiñajcunatapish, paipaj shutita mapayachijcunatapishmi tucuchinga. Pero paita cazujcunata, paipaj shutita jatunyachijcunatami quishpichinga (Marcos 8:38; 2 Tesalonicenses 1:​6-10). Chai qꞌuipaca Jesusca cai Allpataca mil huatacunatami mandanga. Chai mil huatacuna tucurijpica Diabloca cutinmi Diosta sirvijcunataca pandachisha ninga. Chai qꞌuipaca tucuicunami Jehová Diospaj shutita jatunyachina cashcata intindingacuna. Chashnami Jehová Diosca paipaj shutita jatunyachinga (Apocalipsis 20:​7-10). Chai tiempopica “ima shinami mama cuchaca yacuhuan junda tiyacun, chashnallatajmi cai pachapi causajcunaca Mandaj Dios jatun cashcata rijsina yuyaihuan junda cangacuna” (Habacuc 2:14). Tucui gentecuna Jehová Diospaj shutita alabajpica sumajmi canga. w25.01 pág. 7 párrs. 15, 16

¿Hebreo huauqui panicunaca llaquicunata ahuantangapajca imatataj rurana carca? Apóstol Pabloca chai llaquicunata imamanta ahuantana cashcata yuyachunmi animarca. Jehová Diosca paicunapaj crishcacunata sinchiyachichunmi munarca. Chaimantami llaquicunahuan chꞌimbapurachun saquirca. Hebreo huauqui panicunaca alli cualidadcunata charingapaj, shinallataj espiritualmente mejorashpa catingapajmi llaquicunata apana carcacuna. Chaita yuyaipi charishpami llaquicunataca cushilla ahuantai tucurcacuna (Hebreos 12:11). Apóstol Pabloca hebreo huauqui panicunataca mana shaicushpa llaquicunata ahuantashpa catichunmi animarca. Paipaj nishcacunaca valishcami carca. ¿Imamanta? Jehová Diosta manaraj rijsishpaca Pabloca huauqui panicunatami catirashpa llaquichishca carca. Chaimantami paica huauqui panicuna ima llaquicunallata apacushcataca alli yacharca. Shinallataj Jesusta cati callarijpica apóstol Pablotapishmi tucui laya catirashpa llaquichishcacuna carca (2 Corintios 11:​23-25). w24.09 págs. 12, 13 párrs. 16, 17

Jehová Diospaj punlla quichquiyamucushcamantami Diosmanta huillanaca importante can. Marcos 13:​10-pi nishca shinaca Jesusmi cai Allpapi cashpaca caita yachachirca. Shinallataj Mateo libropi nishca shinaca alli huillaicunata muyundij Allpapi huillashca qꞌuipami cai pachapaj ruraicunaca “tucuringa” (Mateo 24:14). Cai versopica Diablopaj culpamanta tiyashca ruraicuna tucurina cashcatami nicun. Shinallataj Jehová Diosca paipaj punlla ima hora, ima punlla shamunataca ñami agllashcata charin (Mateo 24:36; Hechos 1:7). Chaica cada punllami ashtahuan quichquiyamucun (Romanos 13:11). Chaita yachashcamantami Diosmanta huillanataca manataj saquina canchij. Tucuicunami “¿Diospaj gobiernomanta alli huillaicunataca imamantataj huillana canchij?” nishpa tapurina canchij. Ashalla shimicunapi nishpaca cꞌuyaimantami huillana canchij. Diosmanta huillashpaca alli huillaicunata, gentecunata, ashtahuantajca Jehová Diosta cꞌuyashcatami ricuchinchij. w24.05 págs. 14, 15 párrs. 2, 3

Yaya mamacuna cancunapaj huahuacunata cai Allpapi, jahua pachapi imalla tiyashcacunata ricuchun animaichij. Chaitaca campopi paseacushpa, chagrapi trabajacushpami rurai tucunguichij. Por ejemplo, Jehová Dios rurashcacunaca achcacunami caracol shina redondo formata charin. Chaicunata ricushpami mana yangamanta tiyai callarishcata, ashtahuanpish Yayitu Dios chaicunata rurashcata cuentata cunchij. Cientificocunaca chai formataca achca huatacunatami estudiashcacuna. Por ejemplo, Nicola Fameli nishca biofisicoca: “Cai Allpapi, jahua pachapi imalla tiyashcacunaca maijancunaca shuj uchilla circulomanta callarishpa jatun círculo tucungacamami mirarishpa catin” nircami. Chaitaca sucesión de Fibonacci nishpami rijsincuna. Por ejemplo, jahua pachapi tiyaj galaxiacuna, nautilo nishca conchacuna, huaquin plantacunapaj pꞌangacuna, girasol nishca sisacuna, shujtaj cosascunapishmi chai formataca charincuna. w24.12 pág. 16 párr. 7

Moisespish, Davidpish, Juanpish ñaupa punllacunapimi causarcacuna. Pero ñucanchij shinallatajmi paicunaca Diosta sirvircacuna. Paicuna shinallatajmi Jehová Diosta mañanchij, paipi confianchij, paipaj ayudata mashcanchij. Jehová Dios paita cazujcunata bendiciaj cashcatapishmi yachanchij. Cai mayorlla runacuna cushca consejocunata catishpa Jehová Diospaj mandashcacunata cazushunchij. Chashna rurajpimi Diosca ñucanchijtaca tucuipi ayudanga, ‘huiñai causaitapish cunga’. Yaya Diosta cushichishpaca ñucanchijllatajmi cushilla sintirishun. Paica ñucanchijmanca achca bendicioncunatami cunga (Efesios 3:20). w24.11 pág. 13 párrs. 20, 21

Punta siglopica maijan huauquicunataca siervo ministerialcuna cachunmi nombrarcacuna (1 Timoteo 3:8). Paicunamanta parlashpami apóstol Pabloca ‘paicunaca shujtajcunata ayudajcunami can’ nishcanga. Siervo ministerial huauquicuna huaquin trabajocunata rurashpa ayudashcamantami anciano huauquicunaca huauqui panicunata yachachinapi, animanapi ocupari tucurcacuna. Por ejemplo, siervo ministerialcunaca Diospaj Shimita copiashpa, mana cashpaca Diospaj Shimita copiangapaj imalla minishtirishcata randishpami ayudashcangacuna. ¿Siervo ministerialcunaca cambaj congregacionpica ima shinallataj ayudancuna? (1 Pedro 4:10). Huaquin siervo ministerialcunaca contribucioncunata tandachishpa, cuentasta rurashpa, huauqui panicuna maipi huillanata organizashpa, congregacionpi publicacioncuna tiyachun ricurashpa, huauqui panicunaman publicacioncunata cushpa, audio y videopipishmi ayudancuna. Tandanacuna Huasita pꞌichanata, allichinatapishmi organizancuna. Cai trabajocunaca congregacionpi tucui ordenpi cachunmi ayudan (1 Corintios 14:40). w24.10 pág. 19 párrs. 4, 5

¿Llaquicunata ahuantangapajca imatataj yuyarina canchij? Jehová Dios causaj Dios cashcata, llaquicunata ahuantangapaj ayudaj cashcatapishmi yuyarina canchij. Pai tucui poderta charishcamantami ima llaquicunata ahuantachun fuerzasta cui tucun. Llaquicunata charishpaca chaitami yuyarina canchij. Shinallataj Jehová Dios uchilla problemacunata ahuantangapaj ima shina ayudashcata ricushpami jatun problemacunatapish ahuantangapaj Jehová Dios ayudanata seguros cashun. Rey Davidca jovenraj cajpi ishqui cutin Jehová Dios paita ima shina ayudashcata yuyarishpami paipi confianata yacharca. Shuj cutinca shuj leonmi paipaj yayapaj ovejata apashpa rirca. Shujtaj punllaca shuj osomi shujtaj ovejata apashpa rirca. Pero Davidca chai ovejitacunata salvangapajca mana manchashpami leontapish, osotapish catishpa rirca. Davidca Jehová Dios chaita rurachun fuerzata cushcatami yacharca. Chaimantami paillataj alabarinapaj randica Jehová Diosta alabarca (1 Samuel 17:​34-37). Davidca Jehová Dios paita ayudashcataca siempremi yuyarij carca. Chaimantami Jehová Dios shamuj punllacunapi paita ayudanata seguro carca. w24.06 pág. 21 párrs. 5, 6

Can mana tanto rijsishca huauqui o pani shuj fiestaman invitajpica ¿imatataj ruranguiman? Tal vez chai fiestapi imata ruragrishcatapish manachari tucuita yachangui. Chashna cajpica cashna nishpami tapurina cangui: “¿Chai fiestaca ima hora, maipitaj canga? ¿Mashna gentecunataj chaipi canga? ¿Chai fiesta alli llujshichunca pitaj ricuranga? ¿Picunallataj chaipi cangacuna? ¿Imacunallatataj rurangacuna? ¿Trago tiyangachu?”. Chashna tapurishpami alli decisionta agllangui. Tucuita ña yachashca qꞌuipaca imata rurana cashcatami alli yuyana cangui. Por ejemplo, chai fiestapi cutin yuyashun. Chai fiestaman Diosta mana sirvijcunapish rigrishcatami yachaj chayangui. O invitadocuna mashna tragota ubyacushcata pi mana ricugrishcatachari yachaj chayangui. Chaicunata yachaj chayashpaca ¿imatataj ruranguiman? ¿Nachu chai fiestaca maipishcachun fiesta tucunga? (1 Pedro 4:3). Chaicunapi yuyashpami alli decisionta japi tucungui. w25.01 pág. 15 párrs. 4, 5

Jehová Dios paipaj Churita cushpa ñucanchijta ima shina perdonaj cashcata intindingapajca shuj chꞌimbapuraita ricushun. Amsa puca colorhuan o pucanicuj colorhuan mapayachishcata anchuchinaca sinchimi can. Pero cai ejemplota churashpami Jehová Diosca ñucanchij juchacunata perdonashcamanta paipaj ñaupajpi ima juchata mana rurashca shina ricuri tucushcata intindichin. Ñucanchij juchacunaca dibicuna shinami can (Mateo 18:​32-35). Chaimantami ima juchata rurashpaca Jehová Dioshuan ashtahuan dibiyacushca shina can. Pero Jehová Diosca ñucanchij juchacunata perdonashpaca chai dibicunata ña mana pagachun nishca shinami can. Ñucanchij juchacunamanta ña mana pagana cashcata yachashpami tranquilos sintirinchij. w25.02 pág. 10 párrs. 9, 10

Alli huahuacunaca yaya mama yuyajyajpica cullquihuanpish, charishca cosascunahuanpishmi ayudancuna (1 Timoteo 5:4). Shinapish Diosta sirvij yaya mamacunaca paicunallapi yuyanapaj randica paicunapaj huahuacuna Diosta sirvichun ayudana yuyaillami causana can. Chashnami yaya mamacunapish, huahuacunapish achcata cushicungacuna (3 Juan 4). Cꞌuyashca yaya mamacuna, cancunapaj huahuacuna uchilla cai horasmantami mantiniringapaj sinchita trabajachun asha asha yachachishpa rina canguichij. Pero tucuimanta yallica Jehová Diospi confiachunmi yachachina canguichij (Proverbios 29:21; Efesios 4:28). Paicuna escuelapi o colegiopi cajpica alli yachangapaj esforzarichunmi ayudana canguichij. Ña colegiota tucuchigrijpica imata ashtahuan estudianata, imata ruranata alli decidichunmi Bibliapaj consejocunata ricuchina canguichij. Cancunapaj huahuacunataca achca cullquita charichun ayudanapaj randica mantiniringapajlla shuj trabajota japichunmi ayudana canguichij. Chashnami paicunaca ashtahuan predicangapaj, precursor tucungapajpish tiempota charingacuna. w25.03 págs. 30, 31 párrs. 15, 16

Isaías capítulo 65-pica Jehová Diosca paita sirvijcuna paraisopi shina causanatami huillarca. Paipaj nishcacunaca puntaca huata 537 Jesús manaraj huacharijpimi pajtarirca. Chai huatapica judiocunaca Babilonia llajtamanta llujshishpami Israelman tigrarcacuna. Paicunaca paicunapaj juchacunamantaca shungumantami arrepintirishcacuna carca. Jerusalenman chayashpaca paicunaca Jehová Diospaj ayudahuanmi cutin chai llajtataca sumajta allichircacuna. Shinallataj Jehová Diosta adorangapajmi templotapish allichircacuna (Isaías 51:11; Zacarías 8:3). ¿Isaías 65-pi nishcacunaca cunan punllacunapica ima shinataj pajtarishca? Chaipi nishcacunaca Diosta sirvijcuna 1919 huatapi Babilonia jatun pueblomanta llujshijpimi pajtari callarirca. Chai punllamantami Diosta sirvijcunaca asha asha paraisopi shina causai callarircacuna. Paicunaca tucui shunguhuan huillashcamantami achca congregacioncuna tiyachun ayudarcacuna. Chaimi achca gentecunaca mapa causaita saquishpa Jehová Diosta sirvi callarishcacuna. Paicunaca ‘mushuj causaita churarij shinami’ Jehová Dios munashca shina causai callarircacuna. w24.04 págs. 20, 21 párrs. 3, 4

Huaquin llajtacunapica yaya mamacuna o shujtaj familiacunami solterocuna pihuan cazaranata agllancuna. Shujtaj llajtacunapica familiacuna, amigocunami shuj soltero o soltera pihuan cazaranata mashcashpa ayudancuna. Shinallataj paicunapura alli rijsinacuchunmi arreglocunatapish rurancuna. Chashnami chai solterocunallataj cazaranata o mana cazaranata agllai tucuncuna. Shuj soltero o solterapaj novio, noviata mashcashpa ayudachun ñucanchijta mañajpica ¿imatataj rurana canchij? Chai solterocuna ima laya cusata, ima laya huarmita munashcata, shinallataj paicuna imata minishtishcatami yuyaipi charina canchij. ¿Ñucanchij familiapaj o ñucanchij amigopaj shuj alli opcionta tarishcata yuyashpaca imatataj rurana canchij? Chai soltero o soltera ima laya cashcata, ima cualidadcunata charishcata, espiritualmente ima shina cashcatami alli ricuna canchij. Espiritualmente sinchi canami cullquiyuj canata, estudiashca canatapish yalli valishca can. Shinallataj chai solterocunallataj cazaranata o mana cazaranata agllana cashcatami yuyarina canchij. w24.05 pág. 23 párr. 11

Noviocunata ayudangapajca paicunamanta manaraj imata nishpaca alli yuyarinarajmi canchij. Shinallataj noviocuna cashcata yachashpapish pimanpish ama huillangapajmi jarcarinata yachana canchij (Proverbios 12:18). Shuj soltero shuj solterahuan noviocuna tucushcamanta cushilla sintirishcamantachari noviocuna tucushcata tucuicunaman huillanata munashun. Pero tal vez noviocunallatajmi chaitaca shujtajcunaman huillanata munangacuna. Shinallataj noviocunamantaca mana huashalla parlashpa purinachu canchij. Paicuna imalla decidishcacunamantapish mana criticanachu canchij (Proverbios 20:19; Romanos 14:10; 1 Tesalonicenses 4:11). Shinallataj alli yuyashpa imatapish nijpi, imatapish tapujpica noviocunaca cazarachun obligacushcataca mana sintingacunachu. ¿Shuj pareja noviocuna canata saquijpica imatataj rurana canchij? Imamanta ña mana noviocuna cashcataca mana tapunachu canchij. Shinallataj mana ni pipaj partechu tucuna canchij (1 Pedro 4:15). Shuj pareja noviocuna canata saquijpica yangamanta noviocuna tucushcataca mana yuyanachu canchij. Ashtahuanpish noviocuna tucushcamantami paicunaca shuj alli decisionta japi tucurcacuna. Pero noviocuna canata saquishcamantami paicunaca llaquilla sintiringacuna. Chaimantami paicunataca animana canchij. w24.05 pág. 31 párrs. 15, 16

Shuj familia o amigo Jehová Diosmanta caruyajpica achcatami llaquirinchij (Salmo 78:40). Paicunahuan alli apanacushca cashpaca ashtahuanmi llaquirishun. ¿Canca chashnachu sintirishcangui? Sacerdote Sadocmanta yachashpami animaringui. Abiatar Diosmanta caruyajpipish Sadocca Diosmantaca mana caruyarcachu. Rey David yuyajlla cashpa ñalla huañugricujpimi Adoniasca paipaj mandanata quichusha nirca. Pero Jehová Diosca catij mandaj cachunca Salomontami agllashca carca (1 Crónicas 22:​9, 10). Abiatarca Adoniaspaj partemi tucurca (1 Reyes 1:​5-8). Chaita rurashpami Abiatarca Davidmanta, Sadocmanta, Jehová Diosmantapish caruyashcata ricuchirca. Paica Abiatarhuanca achca huatacuna yallitami sacerdotecuna shina trabajashca carca (2 Samuel 8:17; 15:29; 19:​11-14). w24.07 pág. 6 párrs. 14, 15

¿Juchapi ama urmangapaj esforzarishpa catinaca valishcachu can? Ari. Juchata rurashpaca ashacamallami cushilla causashun. Pero Jehová Diospaj mandashcacunata cazushpaca huiñai huiñaitami cushilla causashun (Hebreos 11:25; Salmo 19:8). Jehová Diosca pai munashcata rurashpa cushilla causachunmi ñucanchijcunataca rurashca (Génesis 1:27). Chaita rurashpallami shuj limpio concienciata charishun. Ashtahuanpish huiñai causaitapishmi charishun (1 Timoteo 6:12; 2 Timoteo 1:3; Judas 20, 21). Ñucanchijca imapipish pandarijllacunami canchij (Mateo 26:41). Pero, Jehová Diosmi ñucanchijta ayudangapaj listo can (2 Corintios 4:7). Bibliapi nishca shinaca Jehová Diosca paipaj poderta cushpami ñucanchijta ayudasha nin. Pero tentacioncunapi ama urmangapajca ñucanchijpish esforzarishpami catina canchij. Chaita rurajpimi Jehová Diosca fuerzata cushpa ñucanchij mañashcacunata cutichinga (1 Corintios 10:13). Jehová Diospaj ayudallahuanmi tentacioncunapi ama urmangapaj rijcharishca catishun. w24.07 pág. 19 párrs. 19-21

Apóstol Pabloca cai punllapaj versopica Timoteotaca: ‘Juchata rurajtaca tucuicunapaj ñaupajpi sinchita cunangui’ nishpami mandarca. Shinashpaca ¿juchata rurajcunaca siemprechu tucui congregacionpaj ñaupajpi cunashca cana can? Chaita ruranaca huaquinpica mana minishtirinchu. Por ejemplo, ¿maijancunalla chai huauqui o pani juchata rurashcata ricushca cajpi, o juchata rurajllataj ima juchata rurashcata shujtajcunaman huillashca cajpica ancianocunaca imatataj rurana can? Ancianocunaca paicunallamanmi juchata ruraj huauquihuan o panihuan ña parlashcata, shinallataj paita ña corregishcata huillana can. Maipica shuj huauqui o pani jatun juchata rurashcataca achcacunachari ña yachancuna. Mana cashpaca juchata rurashcataca tal vez achcacunami yachaj chayangacuna. Chashna tucujpica shuj ancianomi juchata rurajta ancianocuna ña sinchita cunashcata congregacionman huillana can. ¿Ancianocunaca imamantataj chaitaca rurana can? Apóstol Pabloca: “Chashna rurajpimi caishujcunapish juchata ruranata manchangacuna” nircami. w24.08 pág. 24 párrs. 16, 17

Ñucanchijca Jesús tucui millai ruraicunata tucuchingacamami allichirishca shuyashpa catina canchij. Shinallataj talento cullquimanta chꞌimbapuraipica ishqui esclavocuna alli trabajadorcuna cashcatami yachashcanchij. Paicunaca paicunapaj amopajta mana shaicushpa rurashcamantami paipaj ñaupajpica alli ricurircacuna. Shinapish shuj esclavoca qꞌuilla cashcamantami paipaj amopaj ñaupajpica mana alli ricurirca. Ñucanchijpish tucuringacamami Jehová Diospajta ruranataca manataj saquina canchij. Shinallatajmi ungidocunaca chaparashpa catina can (Mateo 24:40). Chaita rurashpami paicunaca jahua pachapi causana bendicionta chasquingacuna. Paicunaca chai bendicionta chasquina yuyaillami causancuna. Armagedón qꞌuipaca paicunaca ‘Malta Ovejapaj jatun micui bodapimi’ participangacuna (2 Tesalonicenses 2:1). Jesús juzgana punlla ñalla chayamugrijpipish mana mancharinachu canchij. Jehová Diosmi paita sirvishpa catichun ñucanchijman fuerzasta cunga. Chashnami ‘Runapaj Churipaj ñaupajpi shayarina’ tucushpaca cashcata rurajcunata shina juzgashca cashun (2 Corintios 4:7; Lucas 21:36). Jahua pachapi o cai Allpapi causana esperanzata charishpapish Jesús yachachishca chꞌimbapuraicunamantami yachana canchij. Chashnami Jehová Diospaj ñaupajpica alli ricurishun. Ashtahuancarin Jehová Dios cꞌuyaj cashcamantami ñucanchij shuticunaca ‘causaita chasquinapaj libropi’ quillcashca cangacuna (Daniel 12:1; Apocalipsis 3:5). w24.09 pág. 25 párrs. 19, 20

Salmota quillcaj runa shinaca canpish tranquilo sintiringapajca, ¿imatataj rurana cangui? Caipi yuyai: Jehová Diosta sirvishcamantami paipaj ñaupajpica alli ricuringui. Shinallataj Jehová Diosta mana sirvijcuna paipaj ayudata mana charishcatami yuyarina cangui. Paicunaca shamuj punllacunapi ima esperanzata mana charishcamantami cunan punllacunapi cushilla causangapaj esforzarincuna. Shinapish canca cunan punllacunapipish, shamuj punllacunapipish Jehová Dios cushca bendicioncunatapish chasquingui (Salmo 145:16). Caitapishmi yuyana cangui: Shujtaj decisioncunata japishca cashpa ñucanchij causai ima laya cana cashcataca mana yachai tucunchijchu. Shinapish Jehová Diosta cꞌuyashcamanta, gentecunatapish cꞌuyashcamanta alli decisioncunata japishpaca siempremi sumaj bendicioncunata chasquingui. w24.10 págs. 27, 28 párrs. 12, 13