Junio

Jesús huañushcamantaca ñami achca bendicioncunata chasquishcanchij. Por ejemplo, Jesús huañushcamantami Yaya Diosca ñucanchij juchacunata perdonan. Paica mana obligado cashcallamantachu ñucanchijta perdonan. Ashtahuanpish ñucanchijta perdonasha nishcamantami chaitaca ruran (Salmo 103:​3, 10-13). Maijancunaca: “Jehová Dios ñucata perdonachunca mana mericinichu” nishpami yuyancuna. Tucuicunami Jehová Dios ñucanchijta perdonachunca mana mericinchij. Apóstol Pablopish: “Apóstol nishcallapish mana caipajmi cani. Shinapish Dios yallitaj llaquij cashcata ricuchishcamantami ñucaca apóstol cani” nircami (1 Corintios 15:​9, 10). Ñucanchij juchacunamanta arrepintirijpica Jehová Diosca ñucanchijtami perdonan. Pero paica ñucanchijta perdonachun mericishcamantaca mana perdonanchu. Ashtahuanpish ñucanchijta cꞌuyashcamantami perdonan. Chaimantami Jehová Dios canta perdonachun mana mericishcata yuyashpaca Jehová Dios jucha illaj gentecunamanta huañuchun paipaj Churita mana cushcata yuyarina cangui. Paica juchayuj gentecunamanta huañuchunmi paipaj Churita curca. Juchayuj gentecuna paicunapaj juchacunamanta arrepintirishpaca Jehová Diospaj perdontami chasqui tucuncuna (Lucas 5:32; 1 Timoteo 1:15). w25.01 págs. 26, 27 párrs. 3, 4

Shujtajcuna imata rurashcata, imata nishcataca mana controlai tucunchijchu. Pero ñucanchij nishcacunata, ñucanchij rurashcacunataca controlai tucunchijmi. Por ejemplo, ¿ñucanchijta llaquichijpica imatataj rurana canchij? Paicunatami perdonana canchij. Jehová Diosta cꞌuyashcamantami chaitaca rurana canchij. Paica perdonajcuna cachunmi munan. Pero resentidos saquirishpaca mana alli yuyashpami imatapish ruranata munashun. Ñucanchij saludtapishmi llaquipi churashun (Proverbios 14:​17, 29, 30). Ama llaquilla causangapajca resentirishca canatami saquina canchij. Resentirishca canata saquishpaca tranquilo, sumaj causaitami chari tucushun. Pi canta llaquichijpi ama llaquilla sintiringapajca ¿imatataj rurana cangui? Asha tiempo pasachunmi saquina cangui. Shuj accidenteta charij runapi yuyashun. Paica doctorpajman rishca qꞌuipaca alli tucungapajca tiempo pasachunmi saquina can. Ñucanchijpish ama llaquilla sintiringapaj, shungumanta perdonangapajca asha tiempo pasachunmi minishtinchij (Eclesiastés 3:3; 1 Pedro 1:22). Shungumanta perdonangapajca Jehová Diostami mañana canchij. w25.02 págs. 15-17 párrs. 8-11

¿‘Cristomanta punta yachaicunaca’ maijancunallataj can? Por ejemplo, Diosmanta yachai callarishpaca juchacunamanta arrepintirina cashcata, sinchi feta charina cashcata, bautizarina cashcata, huañushcacuna causarina cashcatapishmi yacharcanchij (Hebreos 6:​1, 2). Chai punta yachaicunatami tucuicuna alli intindina canchij. Chaimi apóstol Pedroca Pentecostés fiestapica achca gentecunaman chai punta yachaicunata yachachirca (Hechos 2:​32-35, 38). Jesusta catijcuna tucungapajca chai punta yachaicunata chasquinaca minishtirishcami can. Chaimantami Pabloca: ‘Huañushcacuna causarina cashcata mana crijpica cancunapaj crishcapish yangallami canman’ nirca (1 Corintios 15:​12-14). Shinapish cai punta yachaicunallata yachashpaca mana saquirinachu canchij. ‘Cristomanta punta yachaicunapish’, sinchi yachaicunapishmi tiyan. Chai yachaicunaca sinchi micunacuna shinami can. ¿Sinchi yachaicunaca imacunallataj can? Por ejemplo, Jehová Dios cushca mandashcacunata, consejocunatami charinchij. Chai consejocunami Jehová Dios ima shina yuyashcata alli intindichun ayudan. Pero chai yachaicunata alli intindingapajca Bibliatami alli estudiana canchij, imata liyishcapipishmi yuyana canchij. Ashtahuantajca ñucanchij causaipi pajtachingapajmi esforzarina canchij. Chashnami alli decisioncunata japishpa Jehová Diospaj shunguta cushichishun. w24.04 pág. 5 párrs. 12, 13

Yaya Diosca Jonasmanca ‘chai gentecuna ima alli cashcata, ima mana alli cashcata mana yachashcatami’ yuyachirca (Jonás 1:​1, 2; 3:10; 4:​9-11). Jesusca Yaya Dios cashcata ruraj, yallitaj llaquij cashcata yachachingapajca Ninivepi causaj gentecunamantami parlarca. ¿Nínive llajtamanta gentecunaca ima horataj cutin causaringacuna? Jesusca shamuj punllacunapi huaquin gentecuna “juzgashca cangapaj” causarinatami huillarca (Juan 5:29). Pai mil huatacunata mandacujpimi “cashcata rurajcunapish, cashcata mana rurajcunapish causaringacuna” (Hechos 24:15). Cashcata mana rurajcunaca “juzgashca cangapajmi causaringacuna”. ¿Chaica imatataj nisha nin? Jehová Diospish, Jesuspish chai gentecuna paicunapaj causaipi Diospaj mandashcacunata pajtachijta o mana pajtachijtami ricungacuna. Nínive llajtamanta shuj runa causarishpaca Jehová Diospaj mandashcacunata manataj cazusha nijpica huañungapajmi sentenciashca canga (Isaías 65:20). Pero Jehová Diosta tucuipi cazushpaca paraisopi huiñai huiñaita causana oportunidadtami charinga (Daniel 12:2). w24.05 págs. 5, 6 párrs. 13, 14

Jesusca Jehová Dios yallitaj cꞌuyaj, llaquij cashcatami ricuchirca (Juan 14:9). Chaitaca paipaj rimaicunahuan, ruraicunahuanmi ricuchirca. Paica gentecuna juchamanta quishpirichun Jehová Dios ayudasha nishcatami ricuchirca. Jesusca juchayuj gentecuna mana allita ruranata saquishpa paita catichunmi ayudarca (Lucas 5:​27, 28). Jesusca paihuan ima tucuna cashcataca allimi yacharca. Chaimi shuj discípulo paita traicionagrishcata, racu caspipipish huañuna cashcata paipaj discipulocunaman huillarca (Mateo 17:22; 20:​18, 19). Shinallataj Jesusca paipaj causaita cushpa cai pachamanta juchata anchuchigrishcatami yacharca. Shinallataj Jesusca pai huañushca qꞌuipa ‘tucui laya gentecuna’ paimanta yachana cashcataca allimi yacharca (Juan 12:32). Juchayuj gentecunaca Jesusmanta yachashpa, paipaj ejemplota catishpami Diospaj ñaupajpica alli ricuri tucurcacuna. Chaita rurashpallami paicunaca juchamanta quishpiri tucurcacuna (Romanos 6:​14, 18, 22; Juan 8:32). Chaita yachashcamantami Jesusca llaquinaita sufrishpa huañurca (Juan 10:​17, 18). w24.08 págs. 5, 6 párrs. 11, 12

¿Bibliata estudiai callarishpaca ima shinataj sintirircangui? Bibliapica Jehová canta cꞌuyashcata, paita sirvichun munashcata, huañuitapish, nanaicunatapish tucuchigrishcatami yacharcangui. Shinallataj paraisopi huañushca gentecunata causachinatami yacharcangui (Marcos 10:​29, 30; Juan 5:​28, 29; Romanos 8:​38, 39; Apocalipsis 21:​3, 4). Tucui chai yachachishcacunaca shungu ucucamami chayarca (Lucas 24:32). Chashnami Bibliapi nishcacunata cꞌuyai callarircangui. Chaimantami can yachashcata tucuicunaman huillasha nircangui (Jeremías 20:​9-tapish ricui). Bibliapi ima yachashcacunata cꞌuyashpaca shujtajcunamanmi huillanata munashun (Lucas 6:45). Ñucanchijcunapish primer siglopi causaj Jesuspaj discipulocuna shinami sintirishun. Paicunaca: “Ñucanchijca imata ricushcata, imata uyashcata huillanataca manataj saqui tucunchijchu” nircacunami (Hechos 4:20). Caipi ricushca shinaca Bibliapaj yachaicunata cꞌuyashcamantami tucui gentecunaman huillana canchij. w24.05 pág. 15 párr. 5; pág. 16 párr. 7

Ñucanchijca Jehová Diosta cꞌuyashcamantami huillanchij. Pero huaquincunapajca Diosmanta huillashpa purinaca sinchimi can. ¿Imamanta? Maijan huauqui panicunaca achca pingaitami charincuna. Shinallataj mana alli yachachijcuna cashcatami yuyancuna. Cutin shujtajcunaca “gentecunaca ñucanchijta mana rijsishcamantami mana alli chasquingacuna” nishpami sustarincuna. Shujtajcunacarin “gentecunataca mana molestanachu canchij” nishpami yuyancuna. Cai huauqui panicunapajca mana rijsishca gentecunaman huillanaca sinchimi can. ¿Diosmanta cushicushpa huillanaca cambajpishchu sinchi can? Chashna sintirishpaca mana desanimarinachu cangui. Huaquinpica humilde cashcamantami predicacionman llujshinata manchanchij. Tal vez “gentecunaca ñuca jatun tucushca cashcata yuyachunca mana munanichu” nishpachari yuyangui. Shinallataj gentecunahuan mana pꞌiñanacusha nishcamantachari chashna sintiringui. Gentecunata ayudasha nishca jahua mana alli tratachunca pipish mana munanchu. Predicacujpi jarcaicunahuan chꞌimbapurai tucushcataca Yayitu Diosca allimi yachan. Chaimantami cantaca ayudasha nin (Isaías 41:13). w24.04 pág. 14 párrs. 1, 2

Bibliapi tucui imata liyishcata chai rato pajtachingapaj esforzarinapaj randica asha asha cambiocunata rurashpa catingapajmi esforzarina cangui. Tal vez ima cambiocunallata rurasha nishcataca shuj listapimi anotashpa chari tucungui. Chai huashaca chai listamantaca shuj o ishqui cambiocunallatami agllai tucungui. Chai cambiocunata rurashca qꞌuipaca chai listamanta shujtaj cambiocunata rurangapajmi agllai tucungui. Pero ¿ima cambiocunallatataj puntaca rurana cangui? Puntapica pajtachinalla metacunatami churari tucungui. Mana cashpaca canllataj imapi mejorana cashcata ricushpami shuj metata churari tucungui. Chaita rurashca qꞌuipaca chai metata pajtachingapaj imallata rurana cashcatami investigana cangui. Shinallataj chai metata pajtachina munaita, fuerzatapish charingapajca Yaya Diostami mañana cangui (Filipenses 2:13). Chai huashaca imallata investigashcata pajtachingapajmi esforzarina cangui. Shuj metata ña pajtachishcata ricushpaca shujtaj metacunatapish pajtachinatami munangui. Ashtahuanpish imapi ña mejorashca cashpaca shujtaj cambiocunatapish ruranaca ashtahuan jahuallami canga. w24.09 págs. 6, 7 párrs. 13, 14

Shujtajcunata llaquichishcamantachari maipica llaquilla sintirishun. Chashna sintirishpaca paicunahuan alli tucungapajmi esforzarina canchij. Chaipajca shungumantami perdonta mañana canchij. Shinallataj Yayitu Jehová Diostami “ñuca llaquichishca gentecunata ayudapangui” nishpa mañana canchij. Chashna mañajpimi paica ñaupajman catichun, tranquilo sintirichunpish ñucanchijta, paicunatapish ayudanga. Cutin ama chaillapitaj pandaringapajmi esforzarishpa catina cangui. Shinallataj Jehová Dios imata rurachun mandajpipish tucui shunguhuan chaita pajtachingapajmi esforzarina cangui. Jonastaca Yayitu Diosca Nínive llajtaman richunmi mandarca. Pero Jonasca shujtaj ladomanmi rirca. Chaita rurashcamanta Jehová Dios disciplinajpica Jonasca shungumantami arrepintirirca (Jonás 1:​1-4, 15-17; 2:​7-10). Pero ¿Jehová Diosca paita sirvishpa catichun Jonasmanca shujtaj oportunidadtachu curca? Ari. Chaimi Jehová Dios Nínive llajtaman cutin richun mandajpica Jonasca rato chaitaca rurarca. Jonasca ñaupa punllacunapi pandarishca cashpapish cushicushpami Jehová Dios paiman mingashcata rurarca (Jonás 3:​1-3). w24.10 pág. 9 párrs. 10, 11

Jehová Diosca ñucanchij juchacunataca dibicunata ama pagachun nij shinallaca mana perdonanchu. Ashtahuanpish paica tucui ñucanchij dibicunata borraj shinami perdonan. Caipi yuyashun. Shuj runaca shujtaj runa mashnata dibishcataca shuj papelpichari anotashcata charin. Chai dibita perdonashpaca paica mashnata dibishcatami tachan. Pero chaita tachajpipish mashna dibishcaca ricurishpami catin. Jehová Diosca ñucanchij juchacunataca tachaj shinallaca mana perdonanchu. Ashtahuanpish tucuita borraj shinami perdonan. Ñaupa punllacunapica quillcana tintataca carbonhuan, gomahuan, yacuhuanmi rurajcuna carca. Shuj shutujlla esponjahuan chai tintahuan quillcashcata borranaca jahuallami carca. Chaimi mashnata dibishcata borrajpica tucui chingarij carca. Ima dibita nunca mana charishca shinami carca. Jehová Dios tucui ñucanchij juchacunata borraj shina perdonaj cashcamantaca, ¿manachu agradecidos sintirinchij? (Salmo 51:9). w25.02 pág. 10 párr. 11

Jehová Dios tucuita ricucushcatami yuyarina canchij. Pai ñucanchij charishca problemacunata allichinatapish segurosmi cana canchij. Chaimantami pi ñucanchijta mana alli tratajpipish Yaya Diospaj ayudahuan ahuantashpa catina canchij. Shinami mana yallitaj pꞌiñarishun, llaquichijcunatapish mana pꞌiñashun. Shujtajcunahuan pꞌiñarishpaca mana allicunatami tal vez rurashun. Chashna rurashpaca Jehová Diosmantapishmi caruyashun. Juchayujcuna cashcamantami Jesuspaj ejemplotaca mana tucuipi cati tucunchij. Chaimantami imatapish rurashpa, imatapish nishpa pandarinchijlla (Santiago 3:2). Shujtajcuna mana alli tratajpica mana cungari tucunchijchu, llaquillami sintirinchij. Chashna sintirishpaca Jehová Dios ñucanchijmanta preocuparishcatami yuyarina canchij. Jesuspish ñucanchijtaca allimi intindin. Paitapishmi mana alli tratarcacuna (Hebreos 4:​15, 16). Jehová Diosca shujtajcuna llaquichijpi imata rurana cashcata yachachunmi alli consejocunata Bibliapi quillcachishca. w24.11 pág. 6 párrs. 12, 13

Huiñai causaita charingapajca Jesuspimi crina canchij (Juan 3:​16-18, 36; 17:3). Judiocunaca Jesuspi feta churana cashcataca mana crircacunachu. Chaimi Jesustaca: “¿Ima milagrotataj ruragringuiyari, chaita ricushpa canpi cringapajca?” nishpa tapurcacuna (Juan 6:30). Shinallataj judiocunaca Moisespaj punllacunapi causajcunaman Jehová Dios shuj milagrota rurashpa maná nishca micunata carashcatami nircacuna (Nehemías 9:15; Salmo 78:​24, 25). Chaita nishpaca judiocunaca micunallamanta preocuparishcatami ricuchircacuna. Maná nishca micunaca israelitacunamanca huiñai causaitaca mana curcachu. Pero ‘jahua pachamanta tandami’ huiñai causaita cui tucurca. Shinapish Jesús chaimanta parlajpica judiocunaca pai imata nisha nicushcataca mana tapurcacunachu (Juan 6:32). w24.12 págs. 5, 6 párrs. 10, 11

Huahuacunaca escuelapica jahua pachapi, cai Allpapi imalla tiyashcacunaca ordenpi huiñajcuna cashcatami yachancuna. Por ejemplo, ¿casi tucui yuracunaca ima shinataj huiñan? Troncomantaca puntaca jatun ramacunami huiñan. Chai jatun ramacunamantaca shujtaj ramacunami huiñan. Y chai ramacunamantaca uchilla ramitacunami huiñan. Chai ordentaca patrón fractal nishpami rijsincuna. Pero ¿yuracuna chashna ordenpi huiñachunca pitaj rurarca? Cambaj huahuacuna chaita alli intindishpaca Yayitu Jehová Dios tucui imalla tiyashcacunata rurashcatami seguros cangacuna. Shinallataj huahuacunataca: “Jehová Dios cai Allpapi imalla tiyashcacunataca ordenpi huiñachunmi rurashca. ¿Manachu ñucanchijtapish paipaj mandashcacunata cazushpa ordenpi causachun rurashcanga?” nishpami tapui tucunguichij. Chai qꞌuipaca Bibliapi valishca mandashcacunata Jehová Dios cushcatami ricuchi tucunguichij. w24.12 pág. 16 párr. 8

Jehová Dios yuyachijpimi apóstol Pabloca paipaj juchacunamanta mana arrepintirijta congregacionmanta llujshichichun nishpa quillcarca (1 Corintios 5:13). ¿Huauqui panicunaca congregacionmanta llujshichishca runataca ima shinataj tratana carcacuna? Pabloca paihuan ‘ama tandanacuchunmi’ mandarca. Shinallataj: “Paihuanca micungapajllapish ama tiyaringuichijchu” nircami (1 Corintios 5:11). Micungapaj pihuan tiyarishpaca paihuan parlanacunaca jahuallami can. Chaimantami apóstol Pabloca congregacionmanta llujshichishca runahuan micungapajllapish ama tiyarichun nishpa mandarca. Chashnami huauqui panicunaca pai shina ama yuyangapaj cuidarircacuna (1 Corintios 5:​5-7). Shinallataj huauqui panicuna paihuan ña mana tandanacujta ricushpaca juchata rurajca Diosmanta achcata caruyashcatami cuentata cushcanga. Ashtahuanpish paipaj mapa ruraicunamanta pingarishpa arrepintiringapajmi oportunidadta charirca. w24.08 pág. 15 párrs. 4, 5

Israelitacunaca huatapica shuj cutinmi shuj fiestata rurajcuna carca. Chai fiestaca Juchacunata perdonana punllami carca. Chai punllapica sacerdotecunata jatun mandajca israelitacunapaj juchacuna perdonashca cachunmi animalcunataca sacrificiota shina cuj carca. Pero gentecunaca chai animalcunata yalli valishcami can. Chaimantami chai sacrificiocunaca israelitacunapaj tucui juchacunata por completo perdonangapajca mana valirca. Chashna cajpipish israelitacuna arrepintirishpa, pai munashca sacrificiocunata cujpica Jehová Diosca paicunata perdonangapajmi listo carca (Hebreos 10:​1-4). Juchacunata perdonana punllapi, israelitacuna sacrificiocunata cushpaca juchayujcuna cashcatami yuyarijcuna carca. ¿Jehová Diosca gentecunapaj juchacunata perdonangapajca imatataj rurarca? Paica ‘achcacunapaj juchacunata apashpa shuj cutinlla curichunmi’ paipaj Churita cai Allpaman cacharca (Hebreos 9:28). Shinashpaca Jesusca paipaj causaita cushpa achcacunata randishpa quishpichingapajmi shamurca (Mateo 20:28). w25.02 pág. 4 párrs. 9, 10

Jesusca: “Runaca allita ruranatami munan. Shinapish paipaj aichaca shaicurinllami” nircami (Mateo 26:41b). Chaita nishpaca Jesusca gentecuna juchayujcuna cashcamanta pandarijllacuna cashcatami nicurca. Shinallataj Jesusca mana ñucanchijllapitaj confiarina cashcatapishmi yachachisha nirca. Jesús chai shimicunata manaraj nijpica paipaj discipulocunaca: “Cantaca manataj saquishunchu” nishcacunami carca (Mateo 26:35). Pero paicunaca tentacioncuna ricurijpi allita rurashpa catina mana jahualla cashcataca mana cuentata curcacunachu. Chaimi Jesusca paicunataca cai punllapaj versopi nishcata nirca. Jesusta prezu japijpica, ¿paipaj discipulocunaca imatataj rurarcacuna? Paicunaca mana rijcharishca cashcamantami tentacionpi urmarcacuna. Mana yuyashcapi tentación ricurijpica paicunaca mana rurasha nishcatami rurarcacuna. Chashnami Jesusta saquishpa rircacuna (Mateo 26:56). w24.07 pág. 14 párrs. 1, 2

Adán y Evaca huiñaita causana oportunidadtami pirdircacuna. Shinallataj Jehová Dioshuan alli apanacuna oportunidadtapishmi pirdircacuna. Juchata manaraj rurashpaca paicunaca Jehová Diospaj familia ucupimi carcacuna (Lucas 3:38). Pero Jehová Diosta mana cazushpaca paipaj familia canatami saquircacuna. Paicuna huahuacunata manaraj charijpimi chashna tucurca (Génesis 3:​23, 24; 4:1). Adanpaj huahuacuna cashcamantami ñucanchijca Jehová Dioshuan cutin alli tucuna canchij (Romanos 5:​10, 11). Shuj libropi nishca shinaca griego rimaipi “Jehová Dioshuan cutin alli apanacuna” nishpaca “shuj enemigohuan amigo tucunatami” nin. Pero Jehová Diosrajmi ñucanchijcunahuan cutin alli apanacunata mashcarca. ¿Chaitaca ima shinataj rurarca? Jehová Diosca juchayuj gentecuna cutin paihuan alli apanacuchunca tucuitami rurarca. Adán Jehová Diosmanta caruyashpaca valishca cosascunata chingachishca shinami carca. Chaimi Jehová Diosca ñucanchijcuna Adán chingachishcata cutin charichunca chai valorllatataj charij cosascunahuan pagarca. w25.02 págs. 3, 4 párrs. 7, 8

Apóstol Pabloca: “Juchata ruraj runataca ñami sinchita cunashcanguichij. Chaimanta paitaca chasquipaichijlla” nircami (2 Corintios 2:​5-8). Congregacionmanta llujshichishca runaca paipaj lamamahuan huainayashpa causacunamanta arrepintirina cashcatami cuentata curca (1 Corintios 5:1). Shungumanta arrepintirijpimi huauqui panicunaca cutin paitaca alli chasquircacuna (Hebreos 12:11). Pabloca Corinto congregacionmanta huauqui panicunataca: ‘Tucui shunguhuan perdonashpa paita cushichichij. Paita cꞌuyashcata ricuchichunmi cancunataca rogapani’ nishpami quillcarca. Pabloca chai huauquita congregacionpi cutin chasquina cashcallataca mana nicurcachu. Ashtahuanpish arrepintirishca huauquita paicunapaj rimaicunahuan, ruraicunahuan shungumanta perdonashcata, cꞌuyashcata ricuchichunmi munarca. Chaita rurashpami paicunaca congregacionpi paita cushilla chasquicushcata ricuchircacuna. w24.08 pág. 15 párr. 4; págs. 16, 17 párrs. 6-8

Apóstol Pabloca llaquicunata ahuantangapaj imata rurana cashcataca allimi yacharca. Chaimantami paicunallapi confianapaj randi Jehová Diospi confiachun huauqui panicunataca animarca. Shinallataj: “‘Jehová Diosmi ñucata ayudajca. Mana manchashachu’ nishunchij” nishpami animarca (Hebreos 13:6). Cunan punllacunapica achca huauqui panicunatami catirashpa llaquichicuncuna. Paicunata cꞌuyashcata ricuchingapajca paicunamantami mañana canchij. Shinallataj pudishpaca paicunatami ayudana canchij. Bibliapica: “Cristo Jesusta catijcuna shina Diosta tucui shunguhuan adorashpa causasha nijcunataca tucuicunatami catirashpa llaquichingacuna” ninmi (2 Timoteo 3:12). Shinashpaca tucuicunami llaquicunata ahuantangapaj allichirina canchij. Shinallataj ima llaquicuna shamujpipish Jehová Dios ñucanchijta ayudanatami confiana canchij. Paica minishtishca horasmi ñucanchijta ayudanga (2 Tesalonicenses 1:​7, 8). w24.09 pág. 13 párrs. 17, 18

¿Corintocuna bautizarichunca imataj ayudarca? (2 Corintios 10:​4, 5). Jehová Diosca paipaj Shimita yachachishpa, espíritu santota cushpami corintocunapaj causaita cambiachun ayudarca (Hebreos 4:12). Paicunaca Yaya Diospaj alli huillaicunata chasquishpami machanata, shuhuanata, cꞌaripura, huarmipura huainayanatapish saquircacuna (1 Corintios 6:​9-11). Huaquin corintocunaca bautizaringapajca achca cambiocunatami rurana carcacuna. Shinapish paicunaca “mana pudishunchu” nishpaca mana yuyarcacunachu. Ashtahuanpish paicunaca huiñai causaiman apaj ñanpi purishpa catingapajmi esforzarircacuna (Mateo 7:​13, 14). ¿Canpish mana alli ruraicunata, mana alli viciocunata mishangapajchu esforzaricungui? Chashna cashpaca mana shaicurishpa Jehová Diosta mañashpa cati. Paimi chai mana alli munaicunapi ama urmachunca paipaj espíritu santota cushpa ayudanga. w25.03 págs. 6, 7 párrs. 15-17

Jehová Diosca “mana mitsashpa, mana rimashpami tucuicunaman” alli yachaita cun. Pai alli yachaita cushcamantami ñucanchij decisión alli cashcata o mana alli cashcata yachai tucunchij. Jehová Dios canta ayudachun mañashca qꞌuipaca can mañashcata ima shina cutichijta ricungapajmi atento cana cangui. Cai chꞌimbapuraipi yuyai. ¿Maita puricushpa chingarishpaca imatataj ruranguiman? Seguramente chai lugarpi causajcunatami maita rina cashcata tapunguiman ¿nachu? Pero ¿paicuna manaraj imata nijpichu chaimanta ringuiman? Mana. Ashtahuanpish paicunata alli uyashca qꞌuipami purishpa catinguiman. ¿Caimantaca imatataj yachanchij? Jehová Dios ñucanchijta ayudachun mañashca qꞌuipaca pai imata nishcata uyangapajmi atentos cana canchij. Chaipajca Jehová Diospaj mandashcacunatami Bibliapi mashcana canchij. Por ejemplo, ¿shuj fiestaman rinata o mana rinata decidingapajca imatataj rurana cangui? Bibliapimi maipishcachun fiestacunamanta, mana alli gentecunahuan apanacunamanta imata nishcata mashcana cangui. Shinallataj ñucanchij munashcata ruranapaj randica Jehová Diospaj Gobiernota punta lugarpi churana cashcatami yuyarina cangui (Mateo 6:33; Romanos 13:13; 1 Corintios 15:33). w25.01 pág. 16 párrs. 6, 7

Isaiasca Diosta sirvijcunapish, Diosta mana sirvijcunapish ima shina causanatami huillarca. Jehová Diosca paimanta yachashpa catichunca tucui imalla minishtishcacunatami cun. Por ejemplo, paica espíritu santota, paipaj Shimita, chꞌican chꞌican yachaicunatapishmi cun. Chai tucuita charishcamantami mishqui micunacunata micuj shina, mishqui vinota ubyaj shina cushilla sintirinchij (Apocalipsis 22:​17-ta ricui). ¿Pero Diosta mana sirvijcunaca ima shinataj causancuna? Paicunaca Diospaj yachachishcacunata mana charishcamantami espiritualmenteca yaricaihuan, yacunaihuan, pingaihuan causancuna (Amós 8:11). Jehová Dios yuyaita cujpimi profeta Joelca ‘Diospaj puebloca trigotapish, vinotapish, aceitepishmi charingacuna’ nishpa huillarca (Joel 2:​21-24). Chaita nishpaca Joelca Diosta sirvijcuna espiritualmente tucui imalla minishtishcata charinatami nisha nirca. ¿Chai shimicunaca cunan punllacunapica ima shinataj pajtaricun? Jehová Diosca Bibliata, publicacioncunata, jw.org paginata, tandanacuicunata, asambleacunatami cushca. Chai yachaicunata charishcamantami espiritualmente sinchi cai tucunchij. w24.04 pág. 21 párrs. 5, 6

¿Pihuan novio, novia tucusha nishpaca paimanca ima shinataj ni tucungui? Gentecuna tiyan ladopimi paihuanca parlai tucungui. Mana cashpaca telefonopimi cayai tucungui. Paihuan parlanacushpaca paita munashcata, paita ashtahuan rijsisha nishcatapish claritomi nina cangui (1 Corintios 14:9). “Ari o mana ningapaj tiempota cuhuai” nijpica aceptanami cangui (Proverbios 15:28). Mana munanichu nijpipish paipaj decisiontami respetana cangui. “¿Ñuca novio, novia canata munanguimanchu?” nishpa canta tapujpica ¿imatataj rurana cangui? Chai solteropaj, solterapaj canta chaita tapunaca mana jahuallachu cashcanga. Chaimantami paitaca respetohuan tratana cangui. Alli yuyangapaj tiempota cuchun minishtishpaca ninallami cangui. Pero mana yallitaj demorashpami ari o mana nishpa cutichina cangui (Proverbios 13:12). Paihuan mana purisha nishpaca claritomi “mana munanichu” nishpa cutichina cangui. Chaitaca respetohuanmi nina cangui. Pero canpish chai solteropaj o solterapaj novio o novia tucusha nishpaca can ima shina sintirishcatami alli explicana cangui. Shinallataj noviocuna cashpaca imallata ruranata, imallata mana ruranatami alli parlanacuna canguichij. w24.05 págs. 23, 24 párrs. 12, 13

Davidca huambraraj cashpaca israelitacunapaj soldadocunatami ricunaman rirca. Paica tucui israelitacuna Goliatpaj nishcacunata uyashpa manchaihuan cashcatami ricurca. Goliatca: ‘Ñucahuan macanacuchun israelitacunapaj soldadocunata cachaichij’ nircami (1 Samuel 17:​10, 11). Israelita soldadocunaca Goliat yallitaj jatun cashcata ricushpa, paipaj nishcacunata uyashpami achcata mancharircacuna (1 Samuel 17:​24, 25). Shinapish Davidca mana mancharcachu. Paica Goliat israelita soldadocunallata mana cꞌamicushcata, ashtahuanpish “causaj Diospaj soldadocunata” cꞌamicushcatami cuentata curca (1 Samuel 17:26). Davidca Jehová Dios paita ima shina ayudashcatami yuyarirca. Por ejemplo, ima shinami ovejacunata cuidangapaj ayudarca, Goliattapish mishangapaj ayudanatami seguro carca. Chaimantami Jehová Diospaj ayudahuan Goliattaca huañuchirca (1 Samuel 17:​45-51). w24.06 pág. 21 párr. 7

“¿Jehová Diosta mana rijsishca cashpaca ñuca causaica ima shinataj canman carca?” nishpami yuyana canchij. Chaita rurashpaca Jehová Diosta tucuipi cazunatami munashun. Ashtahuanpish Salmota quillcaj runa shinami sintirishun. Paica: “Ñucapajca, Taita Diospaj cꞌuchupi canami alli” nircami (Salmo 73:28). Ñucanchijca “causaj, mana llulla Diosta sirvijcunami” canchij (1 Tesalonicenses 1:9). Chaimantami ima llaquicuna ricurijpipish ahuantai tucushun. Jehová Diosca causaj cashcamantami ñucanchijmantaca achcata preocuparin. Shinallataj tucuipimi ñucanchijcunataca ayudasha nin. Ima shinami ñaupa punllacunapi paita sirvijcunata ayudarca, chashnallatajmi cunan punllacunapica ñucanchijta ayudashpa catinga. Ñallami mana nunca tiyashca llaquicuna tiyanga. Pero mana ñucanchijllachu cashun. Chaimanta ‘Jehová Diosmi ñucata ayudajca. Mana manchashachu nishunchij’ (Hebreos 13:​5, 6). w24.06 pág. 25 párrs. 17, 18

Bibliapi nishca shinaca 40 yalli runacunami Israel llajtata mandarcacuna. Huaquin mandajcunaca allicuna cashpapish mana alli cosascunatami rurarcacuna. Por ejemplo, rey Davidca alli mandajmi carca. Chaimi Jehová Diosca: “Paica ñuca mandamientocunata cazushpa, ñuca ñaupajpi allicunallata rurashpami ñucataca tucui shunguhuan sirvirca” nirca (1 Reyes 14:8). Shinapish Davidca cazada huarmihuanmi huainayarca. Chai huarmipaj cusata macanacuipi huañuchichunpishmi mandarca (2 Samuel 11:​4, 14, 15). Shinallataj huaquin mandajcunaca mana allicuna cashpapish alli cosascunatami rurarcacuna. Por ejemplo, Rehoboammanta parlashpaca Jehová Diosca: ‘Rehoboamca mana allicunatami rurarca’ nircami (2 Crónicas 12:14). Chashna jahuapish Jehová Dios, “Israelmanta 10 jatun familiacunahuan ama macanacuichu, paicunallataj shuj mandajta agllachun saqui” nishpa mandajpica paica cazurcami. Shinallataj enemigocuna Judá llajtata ama llaquichichunca achca ciudadcunatami allichirca (1 Reyes 12:​21-24; 2 Crónicas 11:​5-12). Pero ¿Diospaj ñaupajpica imamantataj huaquincunalla alli ricurircacuna? ¿Cai mandajcunaca imapitaj chꞌicancuna carca? Chai mandajcunaca Jehová Diosta tucui shunguhuan c’uyashcamanta, paicunapaj juchacunamanta arrepintirishcamanta, paillata adorangapaj esforzarishcamantami paipaj ñaupajpica alli ricurircacuna. w24.07 págs. 20, 21 párrs. 1-3

¿Manaraj 18 añosta charij bautizarishcacuna jatun juchata rurajpica ancianocunaca imatataj rurana can? Tucui ancianocuna tandanacushpami juchata rurajta ayudachun ishqui ancianocunata agllana can. Chai ishqui ancianocunaca juchata rurajhuan, paipaj yaya mamahuanpishmi tandanacuna can. Ancianocunaca juchata rurajpaj yaya mamataca paicunapaj huahua arrepintirichun ima shina ayudacushcatami tapuna can. Juchata ruraj paipaj yaya mamapaj consejocunata uyashpa cambiocunata ruracushcata ricushpaca chai ishqui ancianocunaca paipaj yaya mamalla paita ayudashpa catichunmi decidi tucungacuna. Bibliapi nishca shinaca Jehová Diosca yaya mamacunamanmi paicunapaj huahuacunata disciplinashpa alli huiñachichun mingashca (Deuteronomio 6:​6, 7; Proverbios 6:20; 22:6; Efesios 6:​2-4). Paicunahuan parlanacushca qꞌuipaca ancianocunaca maijan ratoca yaya mamatami huahuata ayudacushcata ricungapaj tapungacuna. Pero shuj menor de edad manataj arrepintirisha nijpi o millaita rurashpa catijpica shuj comité de ancianosmi paihuan, paipaj yaya mamahuanpish tandanacungacuna. w24.08 pág. 24 párr. 18

Shuj regalota chasquishpaca cushillami sintirinchij. Pero shujtajcunaman imatapish cushpaca ashtahuanmi cushicunchij. Jehová Diosca cushilla causangapaj esforzarishpa catichunmi ñucanchijcunataca rurashca. Chaimantami cushilla causasha nishpaca shujtajcunata ima shina ayudanata mashcana canchij. ¿Yayitu Dios ñucanchijta chashna rurashcamantaca manachu cushilla sintirinchij? (Salmo 139:14). Bibliapi nishca shinaca shujtajcunaman imatapish cushpami cushilla sintirinchij. Shinallataj Bibliapi nishca shinaca Jehová Diosca ‘cushi Diosmi’ can (1 Timoteo 1:11). Jehová Diosrajmi ñucanchijcunamanca allicunata curca. Pai shina cujca pi mana tiyanchu. Apóstol Pablo nishca shinaca “pai causaita cujpimi causanchij, purinchij, paillamantatajmi tiyanchij” (Hechos 17:28). Ashtahuanpish “tucui alli regalocunapish, ima ashtahuan allicunapish” Jehová Diosmantami shamun (Santiago 1:17). Tucuicunami shujtajcunata ayudashpa cushicunata munanchij. Chaipajca Jehová Diospaj ejemplotami catina canchij (Efesios 5:1). w24.09 págs. 26, 27 párrs. 1-4

Huaquin siervo ministerialcunaca anciano shinaca mana nunca sirvi tucushachu. Chaipajca achca cualidadcunata charinami minishtirin nishpachari yuyancuna. Pero Jehová Diospish, paipaj organizacionpish tucuita alli pajtachichunca mana shuyanchu (1 Pedro 2:21). Cai requisitocunata pajtachichunca Jehová Diospaj espiritullatajmi ayudanga (Filipenses 2:13). ¿Imapitaj mejoranata munangui? Shuj cualidadpi ashtahuan mejorasha nishpaca Jehová Dios canta ayudachunmi mañana cangui. Shinallataj chai cualidadmantami ashtahuan estudiana cangui. Shujtaj ancianocunatapish ayudachunmi mañana cangui. Anciano cangapaj esforzarishpa cati. Jehová Diostaca paita sirvingapaj, congregacionpi ayudangapaj imata rurana cashcata yachachichun mañai (Isaías 64:8). Jehová Diosca anciano cangapaj can esforzaricujta ricushpaca bendiciangami. w24.11 págs. 24, 25 párrs. 17, 18

Jehová Diosca paimanta tucui imata rurashcatami yuyarin. Shinapish Jehová Diosta achca huatacunata sirvishcamanta ñucanchijta perdonana cashcataca mana yuyanachu canchij. Paica ñucanchijcuna paita sirvishcallamanta paipaj Churitaca mana curcachu. Ashtahuanpish shuj regalota shinami ñucanchijmanca curca. Chaimanta: “Ñucaca Jehová Diostaca achca huatacunatami sirvishcani. Chaimantami ñucataca perdonanataj can” nishpaca mana yuyanachu canchij. Chashna yuyashpaca Jesús ñucanchijmanta huañuchun mana minishtishcatami ricuchicunchijman (Gálatas 2:​21-tapish ricui). Apóstol Pabloca pai ima allita rurashcallamanta Jehová Dios paita perdonana cashcataca mana yuyarcachu. Chashnapish ¿imamantataj Jehová Diosta sirvishpa catingapaj tucui shunguhuan esforzarirca? Paica Jehová Dios paita perdonashcamanta agradecido cashcata ricuchingapajmi chaitaca rurarca (Efesios 3:7). Jehová Diostaca mana ñucanchijta llaquichunllachu sirvinchij. Ashtahuanpish ñucanchijta perdonashcamanta agradicingapajmi paitaca tucui shunguhuan sirvinchij. w25.01 pág. 27 párrs. 5, 6