Julio

Achca huauqui panicunaca yuyajlla cashcamanta, ungushca cashcamanta o discapacitado cashcamantami llaquilla sintirincuna. Paicunaca: “Jehová Diosca ñucataca ña manachari valoranga” nishpami yuyancuna. Salmo 71-ta quillcaj runapishmi maipica llaquilla sintirij carca. Chaimantami Yaya Diostaca: “Fuerza illaj tucujpipish ama ñucallata saquingui” nishpa mañarca (Salmo 71:​9, 18). Chashna sintirishpapish salmistaca Jehová Diosta tucui shunguhuan sirvishpa catingapajmi esforzarirca. Paica Jehová Dios paita ayudanata, ñaupajman pushanatami seguro carca. Jehová Diosca ñucanchij esfuerzocunata ricushpaca cushillami sintirin. Salmistaca chaitaca allimi yacharca (Salmo 37:​23-25). Yuyajlla huauqui panicunaca Jehová Diospaj valishca cashcataca manataj cungarinachu can. Canca yuyajlla cashpapish, ungushca cashpapish Jehová Diosta sirvishpami cati tucungui (Salmo 92:​12-15). Chaimantami imata ña mana rurai tucushcata yuyanapaj randica Jehová Diosta sirvishpa catingapaj imata rurai tucushcata yuyana cangui. w24.10 págs. 28, 29 párrs. 14-16

Espiritualmente mana sinchi cajcunapajca Bibliapi imata ruranata mana nijpica shuj alli decisionta japinaca sinchimi can. Shinallataj maijancunaca paicunapaj munashcata ruranalla cashcatami yuyancuna. Shujtajcunaca mana minishtirishca cajpipish shuj mandashcata churachunmi munancuna. Por ejemplo, Corintopi causaj huauqui panicunaca yanga dioscunaman cushca micunacunata micui tucushcata o mana micui tucushcata yachangapajca shuj mandashcata churachunmi apóstol Pablota mañashcangacuna. Pero chaita ruranapaj randica Pabloca cada uno chaita decidina cashcatami intindichirca. Shinallataj cada uno alli decisionta japichunca Bibliapi nishcacunatami yuyachirca. Chashnami concienciapi tranquilo sintirichun, shujtajcunatapish ama ñitcachichun paicunataca ayudarca (1 Corintios 8:​7-9). ¿Pabloca imamantataj chaita rurashcanga? Paica mandashcacunallapi yuyashpa ama decidichun, ashtahuanpish Diospaj mandashcacunapi yuyashpa imatapish alli decidichunmi paicunataca ayudasha nirca. w24.04 pág. 5 párr. 14

Jonaspaj punllacunapica Ninivemanta gentecunallami arrepintirina oportunidadta charircacuna. Ashtahuanpish Jesusca “mana allita rurajcunaca juzgashca cangapajmi causaringacuna” nircami (Juan 5:29). Shinashpaca Sodoma Gomorra llajtacunamanta gentecunaca shuj esperanzatapishmi charij yuyachin. Paicunamanta maijancunaca tal vez paraisopimi causaringacuna. Chaipimi ñucanchijcunaca Jehovamanta, Jesusmanta yachachun paicunataca ayudai tucushun. Jehová Diosca tucuicunapaj shunguta, yuyaitami callarishpa ricun. Paica cada uno imata rurashcata, ima shina causashcata ricushpami paicunata causachinata o mana causachinata decidinga. Chashnami paica cꞌuyaj, llaquij cashcata ricuchinga. Shinaca Bibliapi maijan runa manataj causarinata nijllapimi chai runa mana causarinata seguro canchij. Pero Bibliapi shuj runa causarinata o mana causarinata mana nijpica chai runa causarinata o mana causarinataca mana seguro cai tucunchijchu. w24.05 pág. 6 párrs. 15, 16

Jehová Diosca ñaupa tiempopi paita sirvijcunaman imata rurachun mingashpaca sumaj shimicunahuanmi sinchiyachij carca. Profeta Jeremiaspi yuyashun. Jehová Dios ñucamanta huillagri nishpa mandajpica paica achca manchaitami charirca. Jeremiasca: “Ñucaca alli rimanallatapish manaraj yachaj huambramari cani” nirca (Jeremías 1:6). Pero Jeremiasca ¿ima shinataj manchaitaca misharca? Jehová Diosmi alaja shimicunahuan paitaca sinchiyachirca. Chaimi Jeremiasca: “Jehová Diostaca cambaj shimica ñuca shungupica, tullucama nina rupachij shinami tucurca. Ñuca shungullapi charisha yuyashpapish manataj upajlla saquiri tucurcanichu” nirca (Jeremías 20:​8, 9). Jeremías causashca punllacunapi Diosmanta huillanaca sinchimi carca. Pero Jehová Diospaj nishcacunata yuyaipi charishcamantami paica mana manchashpa huillai tucurca. Ñucanchijpish Bibliata liyishpami Diosmanta huillashpa catingapajca animota japinchij. Apóstol Pabloca huauqui panicunataca: ‘Diosmanta yachanami paita cushichichun, shinallataj alli ruraicunata rurachun ayudanga’ nircami (Colosenses 1:​9, 10). w24.04 págs. 14, 15 párrs. 2-4

Abiatar Diosmanta caruyajpipish Sadocca Diosmantaca mana caruyarcachu. Chaimantami Davidca paipi confiashpa catirca. Adonías rey tucusha nishcata yachaj chayashpaca Davidca Salomonta reyta rurangapajca Sadoc, Natán, Benayapaj ayudatami mashcarca (1 Reyes 1:​32-34). Sadocca Jehová Diosta, Davidtapish alli sirvijcunapaj ejemplota ricushpami animarirca. Por ejemplo, Natanmantami achcata yacharca. Sadoc alli runa cashcamantami Salomón rey tucushpaca Abiatarpaj puestopi sirvichun paitaca churarca (1 Reyes 2:35). ¿Sadocpaj ejemplota catingapajca imatataj rurana canchij? Shuj familia o shuj amigo Jehová Diosmanta caruyajpipish Jehová Diosmantaca mana caruyanachu canchij (Josué 24:15). Yayitu Diosllatajmi chaita rurachunca fuerzasta, valorta cunga. Shinallataj paitami siempre mañana canchij. Huauqui panicunamantapish mana caruyanachu canchij. Chashna rurajpimi Jehová Diosca achcata bendicianga (2 Samuel 22:26). w24.07 págs. 6, 7 párrs. 16, 17

Salmo 15:​2-pi nishca shinaca Jehová Diospaj amigocunaca ‘ima pandata mana rurashpa’, ashtahuanpish ‘cashcata rurashpami’ causana can. Chaita ruranataca manataj saquinachu canchij. Pero ¿gentecunaca ima pandata mana rurashpa causai tucunchijchu? Ari. Tucuicunami chaitaca rurai tucunchij. Juchayujcuna cashpapish Jehová Diosta tucuipi cazungapaj esforzarishpaca paipaj ñaupajpica ima pandata mana rurajcuna shinami ricurishun. Jehová Diosman mingarishpa, bautizarishpaca alli ñanpimi puri callarinchij. Pero Jehová Diospaj carpa huasipi cangapajca mana chaillachu minishtirin. Caipi yuyashun. ¿Israelitacunaca Israelpi huacharishcallamantachu Diospaj amigocuna carca? Mana. Maijan israelitacunaca Jehová Diosta mañajcuna cashpapish paicunaca ‘mana tucui shunguhuanchu’ mañajcuna carca. Ashtahuanpish mana allicunata rurashpami causajcuna carca (Isaías 48:1). Israelitacunaca Jehová Dioshuan alli apanacusha nishpaca paipaj mandashcacunata yachashpa, pajtachishpami causana carcacuna. ¿Caimantaca imatataj yachanchij? Jehová Diospaj ñaupajpi alli ricuringapajca bautizarishca canalla, Diospaj pueblopi canallaca mana minishtirinchu. Ashtahuanpish ima alli cashcatami rurashpa catina canchij. w24.06 pág. 9 párr. 4; pág. 10 párr. 6

¿Jehová Diosca cuj cashcataca ima shinataj ricuchin? Por ejemplo, paica ñucanchijcuna imalla minishtishcacunatami cun. Mana achca cosascunata charishpapish Jehová Dios ayudashcallamantami la mayoriaca micunata, churanata, maipi causanatapish charinchij (Salmo 4:8; Mateo 6:​31-33; 1 Timoteo 6:​6-8). ¿Pero Jehová Diosca cuna cashcallamantachu ñucanchijcuna imalla minishtishcacunataca cun? Mana. Jehová Diosca ñucanchijta cꞌuyashcamantami tucui imata minishtishcata cun. Mateo 6:​25, 26-pi Jesús imata nishcata ricushun. Jesusca pajaritocunamanta parlashpaca cashnami nirca: “Paicunaca mana tarpunchu, mana tandanchu, granocunatapish mana huaquichinchu. Shinapish jahua pachapi caj cancunapaj Yayaca paicunamanca caranllami. ¿Manachu cancunacarin chai pajarocunatapish yalli valishca canguichij?” nircami. ¿Caimantaca imatataj yachanchij? Jehová Diosca animalitocunamanca paicuna imalla minishtishcacunatami cun. Chaimantami Yayitu Dios ñucanchijtapish cuidanata seguros canchij. Paica yallitaj cꞌuyaj Yaya cashcamantami paipaj huahuacunamanca tucui imalla minishtishcata cun (Salmo 145:16; Mateo 6:32). w24.09 págs. 26, 27 párrs. 4-6

Siervo ministerialcunataca espíritu santopaj ayudahuanmi agllancuna. Paicunaca congregacionpimi ancianocunata ayudancuna. Siervo ministerialcunaca ashtahuantajca Jehová Diostami cꞌuyancuna. Pai cushca leycunatapish cazushpami causancuna. Shinallataj huauqui panicunatami achcata cꞌuyancuna (Mateo 22:​37-39). ¿Shuj bautizarishca huauquica imamantataj siervo ministerial cangapaj esforzarina can? Bibliapica siervo ministerial cangapaj ima requisitocunata pajtachina cashcatami huillan (1 Timoteo 3:​8-10, 12). Siervo ministerial casha nishpaca chai requisitocunatami Bibliapi estudiana cangui. Causaipipishmi pajtachina cangui. Pero imamanta siervo ministerial casha nishcatami alli yuyarinaraj cangui. w24.11 págs. 14, 15 párrs. 4, 5

Maijan gentecunaca: “Ñucaca achca cutincunami Bibliata liyishcani” nincunami. Shinapish ¿chai gentecunaca Bibliapi nishcacunapica crincunachu? ¿Chaipi nishcacunataca paicunapaj causaipi pajtachishcacunachu? La mayoría gentecunaca chaitaca mana rurashcacunachu. Pero Diosta sirvijcunaca mana chai gentecuna shinachu canchij. Ashtahuanpish Diospaj Shimipi nishcacunata ñucanchij causaipi pajtachingapajmi esforzarinchij. Diospaj Shimita liyina, chaipi imalla nishcacunata pajtachinaca mana facilchu can. Bibliata liyingapaj tiempota surcunapish maipica sinchimi can. Cutin huaquinpica Bibliata rato liyishcamantami mana tucuita intindinchij. Shinallataj achca cambiocunata rurana cashcata cuentata cushcamantami huaquinpica llaquilla sintirinchij. Pero Yayitu Jehová Diospaj ayudahuanmi chai tucui jarcaicunata chꞌimbapurai tucushun. Chaimanta Diospaj Shimita pajtachijcuna cangapaj esforzarishunchij. Jehová Diosmi chaita rurachun ayudanga. Diospaj Shimita liyingapaj, ñucanchij causaipipish pajtachingapaj esforzarishpaca cushillami causashun (Santiago 1:25). w24.09 pág. 7 párrs. 15, 16

Ñucanchijta achcata llaquichishca cajpi o ñucanchij familiacuna huañujpica Yayitu Diosca espíritu santota cushpami ayudan. Canpish jatun llaquicunahuan chꞌimbapuracushpaca Yayitu Diostami cutin cutin rogarishpa mañana cangui (Salmo 86:3; 88:1). Shinallataj cutin cutinmi Yayitu Diostaca espíritu santota cuchun mañana cangui. Paica can imalla mañashcataca cutichingatajmi. ¿Ima jatun llaquita apashcamantaca shaicushca, fuerza illajchu sintirishcangui? Jehová Diosmi espíritu santota cushpa paita sirvishpa catichun ayudai tucun (Efesios 3:16). ¿Espíritu santota cuchun Yaya Diosta mañashca qꞌuipaca imatataj rurana cangui? Tandanacuicunaman ringapaj, predicacionman llujshingapajpishmi esforzarina cangui. Shinallataj Jehová Diospaj yuyaicunata yachangapajca Bibliatami liyina cangui. Caicunata rurashpami espíritu santota chasquingui (Filipenses 4:​8, 9). Shinallataj Bibliata liyicushpaca Diosta sirvijcuna ima llaquicunallata apashcata, Jehová Diospish paicunata ima shina ayudashcatapish yuyai. w24.10 págs. 9, 10 párrs. 12-14

Ñucanchijca Jehová Dios shina, Jesús shinami gentecunataca achcata cꞌuyanchij (Proverbios 8:31). Chaimantami gentecuna ima esperanzata mana charishcata, Jehová Diostapish mana rijsishcata ricushpaca llaquirinchij (Efesios 2:12). Chai gentecunaca achca llaquicunata charishcamantaca yacupi ahogaricuj shinami causacuncuna. Pero ama chashna causangapajca Diospaj Gobiernomanta alli huillaicunata uyanatami minishtincuna. Shinallataj gentecunata cꞌuyashcamantami paicunaman Diosmanta yachachingapaj sinchita esforzarinchij. Paicunaca Diosmanta yachashpami shuj esperanzata chari tucuncuna. Shinallataj cunan punllacunapipish alli causaitami chari tucuncuna. Ashtahuancarin shamuj punllacunapica paraisopi huiñaita causana oportunidadtami charingacuna (1 Timoteo 6:19). Gentecunata cꞌuyashcamantami millai ruraicuna ñalla tucurigrishcata huillashpa purinchij (Ezequiel 33:​7, 8). Chai llaqui punllacunapi ima tucugrishcata yachachunmi munanchij. Chai punllacunapica tucui panda religioncunami tucuringa. Shinallataj Armagedonpica tucui millai ruraicunaca huiñaipajmi chingachishca canga (Apocalipsis 16:​14, 16; 17:​16, 17; 19:​11, 19, 20). w24.05 págs. 16, 17 párrs. 8, 9

Apóstol Pabloca: ‘Dios pꞌiñarishca cashcata ricuchichun saquichijlla’ nircami. Cai consejota catishpaca Jehová Dios pai agllashca tiempopi, pai munashca shina cashcata rurashpa juzgachunmi saquishun. Huauqui Johnca shujtaj huauqui paita mana alli tratajpica: “Paihuan pꞌiñarishpa mana allita ama rurangapajmi controlarina carcani. Pero chaita ruranaca mana facilchu carca. Shinapish Romanos 12:​19-ta liyishpami pacienciata charinata, Jehovapi confianatapish yacharcani” nircami. Shuj problemata ñucanchijllataj allichisha nishpaca ashtahuanmi sustarishun. Pero tucuita Jehová Diospaj maquipi saquishpaca tranquilomi sintirishun. Jehová Diosca: “Shuyailla, ñucami cai problemataca allichisha” nicuj layami ñucanchijtaca cushichin. Shinallataj paica: “Ñucami paicuna japina cashcata cusha” ninmi. Chaimantami pai tucuita alli ruraj cashcata yachashpaca ñucanchijta llaquichijcunahuan ña mana pꞌiñarishca cashun. w24.11 pág. 6 párrs. 14, 15

Ashtahuan charinallapica mana yuyanachu canchij. Apóstol Pablo Corintopi causaj huauqui panicunaman imata nishcata yuyarishunchij. Paica israelitacuna chaquishca pambapi puricushpa mana allicunata rurashcata, shinallataj Sinaí urcupi imata rurashcatapishmi yuyachirca. Corintomanta huauqui panicunaca “paicuna shinallataj millaita ruranata ama munangapajmi” paicunapaj mana alli ejemplomanta yachana carcacuna (1 Corintios 10:​6, 7, 11). Israelitacunaca micuna yuyailla causashcamantami Jehová Dios cushca micunataca mana alli aprovecharcacuna (Números 11:​4-6, 31-34). Shinallataj oro bizita rurashpaca achcata micushpa, ubyashpami cushicurcacuna (Éxodo 32:​4-6). Jerusalenpish, templopish ñallami tucuchishca cana carca. Chaimi apóstol Pabloca Corintopi causaj huauqui panicunaman israelitacunapaj ejemplomanta yachachirca. Ñucanchijpish tucuri punllacunapimi causacunchij. Chaimantami apóstol Pablo cushca consejocunata pajtachingapaj esforzarina canchij. w24.12 pág. 6 párr. 13

Jehová Diosca ‘cushi Diosmi’ can. Paica ñucanchijpish cushilla causachunmi munan (1 Timoteo 1:11). Chaimantami ñucanchijmanca achca regalocunata cushca (Santiago 1:17). Por ejemplo, cazaranami Dios cushca regalo can. Shuj cꞌari, shuj huarmi cazarashpaca paicunapura cꞌuyanacunata, respetanacunata, cuidanacunatami ari nincuna. Cusa huarmica ishquindijcuna alli apanacushcamantami cushilla causancuna. Shinapish cunan punllacunapica achca cusa huarmicunaca paicunapaj ari nishcacunataca mana pajtachincunachu. Chaimantami paicunaca llaquilla causancuna. Pero ¿Yayitu Jehová Diosca cusacuna paicunapaj huarmicunata ima shina tratachuntaj munan? Jehová Diosca cusacuna paicunapaj huarmicunata alli nichunmi munan. Chaipajca cusacunaca paicunapaj huarmicunatami respetana, cꞌuyana can (1 Pedro 3:7). w25.01 pág. 8 párrs. 1, 2; pág. 9 párrs. 4, 5

Hebreo huauqui panicunaca Apóstol Pablo cachashca cartata liyishcamantami jatun llaquicunata ahuantangapaj allichirishca carcacuna. Pabloca Diospaj Shimita ashtahuan yachashpa, intindishpa catichunmi animarca. Chashnami paicunaca panda yachachishcacuna maijancuna cashcata yachangapaj, chaicunamanta caruyangapajpish allichiri tucurcacuna. Shinallataj Jesús cushca instruccioncunata, Diospaj organizacionta pushajcunatapish cazungapajca paicunapaj crishcacunata sinchiyachina cashcatami intindichirca. Ashtahuanpish Yaya Dios paicuna mejorashpa catichun llaquicunata apachun saquishcatami intindichirca. Ñucanchijpish Pablo cushca consejocunata pajtachishpaca tucuringacamami ahuantashpa catishun (Hebreos 3:14). w24.09 pág. 13 párr. 17; pág. 13 párr. 19

Bibliapi nishca shinaca ñucanchij juchacuna perdonashca cachun, shinallataj Jehová Diospaj amigocuna cutin cai tucuchunmi paica shuj preciota paganata decidirca. ¿Pero Adán chingachishcata gentecuna cutin charichunca Jehová Diosca mashnatataj pagana carca? Adán y Evaca jucha illajcuna shina huiñai huiñaita causana oportunidadtami chingachircacuna. Gentecuna cutin chai oportunidadta charichunca Jehová Diosca mashna minishtirishcatami pagana carca (1 Timoteo 2:6). Shuj runa chai preciota pagangapajca jucha illajmi cana carca. Shinallataj cai Allpapi huiñai huiñaita causana oportunidadtami charina carca. Gentecunamanta paipaj causaita sacrificiota shina cuna munaitapishmi charina carca. ¿Jesusca imamantataj ñucanchijta randishpa quishpichi tucurca? 1) Paica jucha illajmi carca, ‘ima juchatapish mana rurarcachu’. 2) Chaimantami paica cai Allpapi huiñai huiñaita causana oportunidadta charirca. 3) Ñucanchijmanta huañushpa paipaj causaita cunatapishmi munarca (1 Pedro 2:22; Hebreos 10:9). w25.02 págs. 4, 5 párrs. 11, 12

Bautizaringapajca achca jarcaicunatachari charingui. Pero Jehová Diosca cantaca achcatami cꞌuyan, canpish paita sirvichunmi munan. Jesusca paipaj discipulocunataca: “Cancuna, uchilla mostaza muyu valilla feta charishpaca cai urcutapish ‘Caimanta chaiman ri’ nijpica, ringallami. Imatapish rurai tucunguichijllami” nircami (Mateo 17:20). Jesusca asha huatacunallatami paipaj discipulocunahuan carca. Chaimantami paicunapaj feta ashtahuan sinchiyachishpa catina carcacuna. Shinallataj Jesusca ‘Jehová Diosmi jatun urcucuna shina jarcaicunata chꞌimbapurachun ayudanga’ nircami. ¡Cantapish jarcaicunata chꞌimbapurachunca Jehová Diosmi ayudanga! Bautizaringapaj jarcaicuna tiyajpica rato cambiocunata rurangapaj esforzari. Chashnami Diosta tucui vida sirvingapaj, bautizaringapajpish fuerzasta, animota japingui. Jehová Diosta sirvinaca tucuimanta yalli valishcami can. w25.03 pág. 7 párrs. 18-20

Llaquicunata ahuantangapajca Rey Davidpaj ejemplotami catina canchij. Paica Jehová Dios paita ayudangapaj listo cashcatami yuyarij carca. David shina confiangapajca ñaupa tiempopi Jehová Dios imata rurashcatami yuyarina canchij (Isaías 37:​17, 33-37). Shinallataj cunan punllacunapi huauqui panicunata Jehová Dios ima shina ayudashcata yachangapajca jw.org paginapi llujshishca informaciontami liyina canchij. Ashtahuancarin cada unota Jehová Dios ima shina ayudashcatami yuyarina canchij. Shinallataj Jehová Dios paipaj amigocuna cachun oportunidadta cushcatami yuyarina canchij (Juan 6:44). Cambaj mañaicunata ima shina cutichishcata, minishtishca horaspi ima shina ayudashcata yuyaringapaj Jehová Diosta mañai. Chaita rurashpaca canta siempre ayudaj cashcatami seguro cangui. w24.06 pág. 21 párr. 8

Ñucanchijca Diosmanta imapish caruyachichunca mana saquisha ninchijchu. Pero juchayujcuna cashcamantami maipica mana allita ruranata munashun (Romanos 7:​21-23). Mana yuyashcapi tentacioncuna ricurijpica chaicunata mishanaca sinchi layami ricuringa. Pero Jehová Diosmanta, Jesusmanta mana caruyasha nishpaca Jesús ima nishcatami yuyarina canchij. Shinami siempre rijcharishca cashun. Tucuicunami tentacioncunahuan chꞌimbapurana canchij. Pero cada unomi shujtaj shujtaj mana alli munaicunata charinchij. Por ejemplo, maijancunaca huainayana jatun juchapi ama urmangapajmi esforzaricuncuna. Shujtajcunaca paicunapaj charishcacunata japirishpa mapa cosascunata ama rurangapaj, pornografiata ama ricungapajpishmi esforzaricuncuna. Cutin maijancunaca ama jatun tucungapaj, ama ñapish pꞌiñaringapaj, runacunata ama manchangapajpishmi esforzaricuncuna. w24.07 pág. 14 párr. 3; pág. 15 párr. 5

¿Anciano huauquicuna arrepintirij huauquita congregacionpi mana chasquishca cajpica paica ima shinataj sintirinman carca? O ¿congregacionpi cutin chasquijpipish huauqui panicuna paiman cꞌuyaita mana ricuchishca cajpica paica ima shinataj sintirinman carca? Seguramente paica yallitajmi llaquirinman carca. Ashtahuanpish Jehová Diospaj ñaupajpi cutin alli ricuringapaj esforzarishpa catinatami saquinman carca. Maijan huauqui panicunaca arrepintirij huauquitaca manachari perdonasha nishcangacuna. Pero paita mana perdonashca cashpaca paicunaca Jehová Diosmantami caruyanman carcacuna. ¿Imamanta? Jehová Diosca paicunapaj juchacunamanta arrepintirijcunataca cꞌuyaihuanmi perdonan. Pero Diabloca mana chashnachu can. Chaimantami huauqui panicuna arrepintirij huauquita mana perdonashca cashpaca Diablo shina millaicuna cashcata ricuchinman carca. Ashtahuanpish Diabloca chai huauqui panicunata utilizashpami arrepintirij huauquitaca desanimachinman carca (2 Corintios 2:​10, 11; Efesios 4:27). w24.08 pág. 17 párr. 7; pág. 17 párrs. 10, 11

Jesusca shujtaj trabajotapish rurachunmi huaquin cꞌaricunata agllarca. Pai yuyaita cujpimi Jerusalenpi caj ancianocunaca superintendentecuna cachun Pablotapish, Bernabetapish agllarcacuna (Hechos 11:22). Paicunaca siervo ministerialcuna shina, anciano huauquicuna shinami congregacioncunata sinchiyachina carcacuna (Hechos 15:​40, 41). Superintendente de circuito huauquicunaca ocupadosmi pasancuna. Maijancunaca congregacioncunata visitangapajca achca horascunatami viajana can. Shinallataj cada semanami huaquin discursocunata cuncuna. Huauqui panicunatapishmi animancuna. Precursorcunahuan, ancianocunahuanpishmi tandanacuncuna. Predicacionman llujshingapaj grupotapishmi pushancuna. Jatun tandanacuicunatapishmi organizancuna. Shinallataj chaipica conferenciacunatami cuncuna. Escuela para precursorestapishmi organizancuna. Circuitopi sirvij precursorcunahuanpishmi shuj especial tandanacuita charincuna. Shinallataj maipica sucursalmanta huauquicunaca huaquin trabajocunata utca rurachunmi mañancuna. w24.10 págs. 21, 22 párrs. 12, 13

Cai punllapaj versopi nishca shinaca profeta Jeremiasca Jehová Diospaj nishcatami nirca. Apóstol Pabloca, Jehová Dios Jeremías 31:​34-pi ima nishcatami yuyachirca. Paica: ‘Jehová Diosca, paicunapaj juchacunatapish mana ashtahuan yuyarishachu ninmi’ nircami (Hebreos 8:12). ¿Chaita nishpaca Jehová Diosca imatataj nisha nicurca? Bibliapica yuyarina nishpaca ñaupa punllacunapi ima tucushcata yuyarinallataca mana ninchu. Ashtahuanpish huaquinpica shujtajcunata ayudanamanta o imata ruranamantapishmi parlacun. Por ejemplo, jatun caspipi Jesús huañucujpica paipaj ladopi caj runaca: “Can ña mandaj cashpaca ñucata yuyaripangui” nircami (Lucas 23:​42, 43). Chai runaca Jesús paita yuyarichunllaca mana mañacurcachu. Ashtahuanpish paita ayudachunmi mañacurca. Jesuspish chai runata causachina cashcatami nirca. Shinashpaca Jehová Dios “cancunapaj juchacunata manataj yuyarishachu” nishpaca ñucanchijta perdonashcamanta cunan punllacunapi, shamuj punllacunapipish ña mana llaquichinatami nicun. w25.02 pág. 11 párrs. 14, 15

Cai versopi nishca shinaca alli yuyaita charingapajca Jehová Diospaj cualidadcunatami alli rijsina canchij. Shinallataj paipaj munai maijan cashcata, ima ruraicunata munashcata, ima ruraicunata pꞌiñashcatapishmi alli rijsina canchij. Jehová Diosta alli rijsishpaca alli decisioncunata japishpami paita cushichishun (Efesios 5:17). Jehová Diosta tucui shunguhuan sirvingapaj esforzarijta ricushpaca maipica huaquin familiacuna, amigocunami ñucanchijtaca mana alli ricungacuna. Cai chꞌimbapuraipi yuyashun. Tal vez maijan yaya mamacunaca paicunapaj ushushi tucuita charichun munashpa o paicunapish tucui ima minishtishcata charisha nishpami achca cullquita charij huauquihuan cazarachun obligasha ningacuna. Shinapish chai huauquica manachari Diostaca alli sirvin. Huahuacuna alli causaita charichun sustarinaca allimi can. Pero ¿chai huauquihuan cazarajpica paicunapaj ushushica Jehová Diospajmanca ashtahuanchu cꞌuchuyanga? Shinallataj yaya mamacunaca Jehová Diospaj ima ashtahuan importante cashcatami yuyarina can. Chaitaca Mateo 6:​33-pimi yachai tucuncuna. Chaipi nishca shinaca Diosta sirvijcunaca Diospaj Gobiernotami punta lugarpi churana canchij. Ñucanchij yaya mamata cꞌuyana, ñucanchij comunapi causajcunata respetanaca valishcami can. Pero Jehová Diospaj shunguta cushichinami tucuimanta yalli valishca can. w25.01 pág. 17 párrs. 9, 10

Cunan punllacunapish achca jarcaicunatami charinchij. Chaimantami cushilla huillashpa catingapaj Jehová Dios ayudachun minishtinchij (Apocalipsis 12:17). Jesusca paipaj apostolcunata cuidachunmi Diosta mañarca. Chai mañaitaca Juan capítulo 17-pimi ricui tucunchij. Jehová Diosca pai mañashcataca uyarcami. Hechos libropica apostolcuna jarcaicunata ahuantachun, cushilla huillashpa catichunpish Jehová ayudashcatami parlan. Jesusca alli huillaicunapi feta churajcunatapish cuidachunmi Jehová Diosta mañarca. Chashna mañashpaca ñucanchijmantapishmi mañarca. Jehová Diosca Jesús mañashcatami cutichishpa catinga. Chaimi ñucanchijtapish apostolcunata ayudashca shinallataj cushicuihuan huillashpa catichun ayudanga (Juan 17:​11, 15, 20). Tucuri punlla chayamucushcamantami huillanaca sinchi canga. Pero Jesusca ayudata charina cashcatami huillarca (Lucas 21:​12-15). w25.03 págs. 17, 18 párrs. 13, 14

Jehová Dios tucuita cushcamantami tucui shunguhuan paitaca cushicushpa cantanchij. ¿Imamantataj chashna sintirinchij? Diospaj Shimipi sumaj yachaicunata, animachij profeciacunata liyishcamantami chashna sintirinchij. Ashtahuanpish Jesús huañushcamanta shamuj punllacunapi sumaj causai tiyanata tucui shunguhuan crishcamantami cushilla sintirinchij. Ñucanchij huauqui panicunahuan chai sumaj yachaicunamanta parlanacushpacarin ashtahuanmi cushicunchij (Salmo 34:8; 133:​1-3). Diosta sirvijcunaca shuj shinalla, cꞌuyaita ricuchinacushpami tandalla causanchij. Chashna causacushcamantami paraisopi ña causacushca shina sintirinchij. Shinallataj paraisopi causana ima shina canatami ricui tucunchij. Chaipica cunan punllacunatapish yallimi cꞌuyaita ricuchishpa tandalla, cushilla causashun (Colosenses 3:14). Canpish cushilla causasha nishpaca Diospaj pueblo partemi tucuna cangui. Diosta mana sirvijcunaca yangamantami testigo de Jehovacunataca llaquichincuna, juchachincuna. Pero paicuna chashna juchachijpipish Diospaj ñaupajpi alli ricurishcamantami cushilla sintirinchij (Isaías 65:15). w24.04 págs. 21, 22 párrs. 7, 8

¿Cazarana munaita charij solterocunataca ima shinataj ayudai tucunchij? Puntapica manaraj imata nishpaca allimi yuyarinaraj canchij (Efesios 4:29). Shinallataj cashna nishpami tapurina canchij: “¿Pugllacunillami nishpachu solterocunataca mana alli sintichini? ¿Shuj soltero shuj solterahuan parlanacucujta ricushcallamantachu ña noviocuna cashcata yuyani?” (1 Timoteo 5:13). Shinallataj solterocunataca “cushilla causangapajca cazaranatajmi cangui” nishpaca mana ninachu canchij. Soltero huauqui panicunata desanimachinapaj randica alaja shimicunahuanmi animana canchij. ¿Shuj soltero shuj solterahuan alli pareja cai tucushcata yuyashpaca imatataj rurana canchij? Bibliapi yachachishca shinaca shujtajcuna ima shina sintirishcatami yuyaipi charina canchij (Romanos 15:2). Achca soltero huauqui panicunaca shujtaj solterocunata presentachunca mana munancunachu. Paicuna mana munajpica respetanami canchij (2 Tesalonicenses 3:11). Cutin shujtaj solterocunaca ashata ayudachunmi munancuna. Pero paicuna ayudachun mañajllapimi ayudana canchij (Proverbios 3:27). w24.05 págs. 24, 25 párrs. 14, 15

Cai millai mundopi causacushcamantami jatun llaquicunaca mana yuyashcapi japi tucun. Chashna jahuapish Jehová Dios tucuipi ñucanchijta ayudaj cashcata yachashcamantami tranquilo sintirinchij. Pai ñucanchijta ayudajta ricushpaca David shinami ‘Jehová Diosca causaj Diosmari can’ nishun (Salmo 18:46). Shinapish Davidca Jehová Dios ‘causaj Dios’ cashcata nishca qꞌuipaca Jehová Dios causaita mana charij ‘jatun Rumi’ shina cashcatami nirca. ¿Imamantashi chaita nishcanga? Bibliapica Jehová Dios shuj jatun rumi shina cashcata nishpaca pai sumaj cualidadcunata charishcatami nin. Por ejemplo, Deuteronomio 32:​4-pica Jehová Dios shuj ‘jatun Rumi’ shina cashcatami nin. Shinallataj Anaca Jehová Diosta mañacushpaca: “Ñucanchij Dioslla, canllami shuj rumi shina sinchi cangui” nircami (1 Samuel 2:2). Profeta Habacucpish Jehová Diostaca: ‘Ñuca jatun Rumimari cangui’ nircami (Habacuc 1:12). Salmo 73-ta quillcaj runapish Jehová Diosca “ñuca shungu samarina rumica Jatun Diosmari” nircami (Salmo 73:26). Ashtahuancarin Jehová Diosllatajmi ‘ñucaca shuj jatun rumi shinami cani’ nirca (Isaías 44:8). w24.06 pág. 26 párr. 1; pág. 27 párr. 3

Jehová Diospaj ñaupajpi alli ricurij mandajcunaca paitami tucui shunguhuan cꞌuyarcacuna. Cutin Bibliapica mandaj Josiasmanta parlashpaca ‘paipaj ñaupaca pai shina Diospajman tigrajca pi shujtaj reyca mana tiyarcachu’ ninmi (2 Reyes 23:25). Shinapish rey Salomonca paipaj mandana ña tucuricujpica mana allicunatami rurarca. Chaimantami paica Jehová Diostaca mana tucui shunguhuan sirvirca (1 Reyes 11:4). Shinallataj Diospaj ñaupajpi mana alli ricurij mandaj Abiyammanta parlashpaca Bibliapica: ‘Paica Jehová Diostaca mana tucui shunguhuan sirvircachu’ ninmi (1 Reyes 15:3). Bibliapica shungumanta parlashpaca cada uno shungu ucupi ima shina cashcatami nicun. Por ejemplo, cada uno chꞌican chꞌican munaicunata, yuyaicunata, metacunatami charinchij. Shinallataj cada unomi chꞌican chꞌican cosascunata ruranata yachanchij. ¿Diosta tucui shunguhuan sirvishcataca ima shinataj ricuchinchij? Jehová Diostaca mana sirvina cashcallamantachu sirvina canchij. Ashtahuanpish paita tucui shunguhuan cꞌuyashcamantami sirvina canchij. w24.07 pág. 21 párrs. 4, 5

Jehová Diosca ñucanchij juchacunahuan imata ruraj cashcata intindichingapajca shuj chꞌimbapuraitami churarca. Paica: “Can pandarishcacunataca pꞌuyu tapaj shinami chingachisha, cambaj juchacunataca yana amsa pꞌuyu tapaj shinami chingachisha” nircami (Isaías 44:​22, NWT). Shinaca Jehová Diosca ñucanchij juchacunata perdonashpaca shuj jatun pꞌuyuhuan tapacushca shinami can. Chaimantami ñucanchij juchacunataca pi mana cutin ricui tucun. Shinaca Jehová Dios ñucanchij juchacunata ña perdonashca cajpica chai juchacunata rurashcamanta tucui vida llaquirishpa mana causanachu canchij. Paica Jesuspaj yahuarhuan pagaj shinami ñucanchij juchacunata perdonarca. Chaimantami ñucanchijca imata mana pagana canchij. Ashtahuanpish ñucanchij dibicunaca tucuimi chingarishca. Chai juchacunata nunca mana rurashca layami ricurinchij. Caipi ricushca shinaca shungumanta arrepintirijcunatami Jehová Diosca de verdadtaj perdonan. Jehová Dios ñucanchijta perdonashca qꞌuipa cutin ñucanchij alli amigo canatami seguros cana canchij. Chaita yachashcamantami ñucanchij juchacunamanta ña mana llaquirishpalla causanchij. w25.02 págs. 10, 11 párrs. 11-14

Comité de ancianos nishcacunapi ayudaj ancianocunaca congregacionpi mapa ruraicuna ama tiyachunmi ayudancuna. Jehová Diosmi chaita rurachun mandashca (1 Corintios 5:7). Shinallataj paicunaca juchata rurajcuna arrepintirichun ayudangapajmi sinchita esforzarincuna. Chai ancianocunaca juchata rurajcuna manataj cambiai tucushcataca mana yuyancunachu. Ashtahuanpish paicunaca Jehová Diospaj ejemplota catishpami ‘yallitaj cꞌuyajcuna, llaquijcuna’ cangapaj esforzarincuna (Santiago 5:11). Apóstol Juanca cꞌuyaihuanmi: “Ñuca huahuacunalla, juchata ama rurachunmi caicunataca quillcani. Maijanpish juchata rurajpica shuj ayudajtami charinchij. Paica Yaya Diospaj cꞌuchupi caj cashcata ruraj Jesucristomi” nirca (1 Juan 2:1). Shinapish maijan huauqui o pani paipaj juchacunamanta mana arrepintirisha nijpica congregacionmantami llujshichishca cana can. w24.08 pág. 25 párrs. 19, 20

Jehová Dios cambaj esfuerzocunata achcata valorashcatami yuyarina cangui. Tal vez shujtajcunahuan compararinatami munangui. Pero chaitaca mana ruranachu cangui. Jehová Diosca chaitaca mana ruranchu (Gálatas 6:4). Jesusta catij María huarmipi yuyashun. Paica Jesuspaj chaquicunapica achcata valij aceitetami tallirca (Juan 12:​3-5). Cutin shuj huajcha viudaca templopi tiyaj cajacunapica ashallata valij ishqui moneditacunatami churarca (Lucas 21:​1-4). Shinapish Jesusca María chai huajcha viudata yalli rurashcataca mana nircachu. Ashtahuanpish ishquindij sinchi feta charishcata ricuchishcamantami valorarca. Yaya Diospish sinchi feta charishcamanta, paita cꞌuyashcamanta tucui imalla rurashcataca achcatami valoran. Canca Jehová Diosta sirvingapajca ashallata ruracushcatachari yuyangui. Shinapish Yaya Diosca paita cꞌuyashcamanta paita sirvingapaj achcata esforzarijta ricushpaca cushillami sintirin. Tucuicunami maipica dudacunata charinchij. Pero dudacunata ama charingapajmi Bibliata estudiana canchij. Chaimanta dudacunata ama charingapaj esforzari. Chashnami sustarishca canapaj randica Jehová Diospi tucui shunguhuan confiangui. Jehová Diosca cada uno ima shina cashcata, ima shina sintirishcataca allimi yachan. Paica paita sirvingapaj tucui shunguhuan esforzarijta ricushpaca cushillami sintirin. Chaimantami ñucanchijcunaman bendicioncunata cusha nin. Paipajca tucuicunami valishca canchij. w24.10 pág. 25 párr. 3; pág. 29 párrs. 17, 18