Agosto

Yaya Diostaca “alli shungu gentecuna ñucanchijta uyashpa cambaj puebloman yaicuchun ayudapai” nishpami mañanchij. Pero, cai rato mana uyasha nij gentecunahuan ¿imataj tucunga? Babilonia jatun pueblo tucurijta ricushpaca tal vez maijancunaca Jehová Diostami sirvisha ningacuna. Jehová Diosca tal vez paicunatapishmi quishpichinga. Caita intindishcamantami cunan punllacunapi Diosmanta huillana imamanta importante cashcata cuentata cunchij. Tal vez chai punllacunapica paicunaca ñucanchijcuna paicunaman imata huillashcatami yuyaringacuna (Ezequiel 33:​33-tapish ricui). Ñucanchij nishcacunata yuyarishpaca tal vez paicunaca Jehová Diosta ñucanchijhuan sirvinatami decidingacuna. Filipos llajtapi tiyaj carcelta cuidaj runaca shuj jatun terremoto tiyajpimi paica Jehová Diosta sirvinata decidirca. Babilonia jatun pueblo tucurijpica gentecunapajca shuj jatun terremoto tiyashca shinami canga. Chaimantami tal vez maijancunaca Jehová Diosta sirvinata decidingacuna (Hechos 16:​25-34). w24.05 págs. 16, 17 párrs. 9, 10

Hebreo huauqui panicunaman apóstol Pablo quillcashca cartapipish shuj sumaj yuyaitami yachai tucunchij. Maijancunaca espiritualmente sinchiyashpa catingapajca mana esforzarircacunachu. Chaimi Pabloca: “Cancunaca sinchi micunata micunapaj randica llullu huahuacuna shinami lecheta cutin minishtinguichij” nirca (Hebreos 5:12). Paicunaca Jehová Dios yachachishca mushuj yuyaicunataca mana yachanata munarcacunachu (Proverbios 4:18). Por ejemplo, Jesús huañujpimi Moisesman cushca leyca tucurirca. Pero 30 huatacuna pasashca cajpipish achca hebreo huauqui panicunaca chai leyta cazuna cashcatami yuyashpa caticurcacuna (Tito 1:10). Chaimantami Pabloca chai yuyaita cambiashpa Jehová Dios yachachishca mushuj yuyaicunata yachachun ayudasha nirca. ¿Pero imamantataj sinchi yachaicunatapish intindingapaj esforzarina carcacuna? Chai sinchi yachaicunata yachashpaca Jesús huañushcamanta Jehová Diosta ashtahuan alli adorai tucushcatami cuentata cugrircacuna. Shinallataj mana manchashpa Diosmanta huillashpa catingapajmi chai sinchi yachaicunata yachana carcacuna (Hebreos 10:​19-23). w24.04 pág. 6 párr. 15

Adán y Eva Jehová Diospaj contra tucushca punllamantami huaranga huaranga gentecunaca huañushcacuna. ¿Chai tucui gentecunahuanca imataj tucunga? Jehová Diosta alli sirvij 144.000 ungidocunaca mana tucurij causaita charingapajmi jahua pachapi causaringacuna (Apocalipsis 14:1). Shinallataj achca gentecunaca Jehová Diosta alli sirvishpami huañushcacuna. Bibliapica paicunataca “cashcata rurajcuna” ninmi. Paicunaca paraisopimi cutin causaringacuna. Jesús cai allpata mil huatacunata mandacujpi Jehová Diosta tucuipi cazushpa, tucuri pruebatapish pasashpaca paicunaca huiñai huiñaita causana oportunidadtami charingacuna (Daniel 12:13; Hebreos 12:1). Shinallataj Jesús cai allpata mil huatacunata mandacujpica cashcata mana rurajcunapishmi causaringacuna. Paicunaca Jehová Diosta sirvina oportunidadtaca mana charircacunachu. Ashtahuancarin maijancunaca mana alli cosascunata rurashpami causarcacuna. Pero paraisopi causarishpaca paicunapaj ñaupa causaita saquishpami Jehová Diosta sirvina oportunidadta charingacuna (Juan 5:29; Lucas 23:​42, 43). Shinallataj maijancunaca manaraj huañushpaca yallitaj millaicunami carcacuna. Chaimantami Yayitu Diosca paicunataca mana cutin causachinga (Lucas 12:​4, 5). w24.05 pág. 2 párr. 3; pág. 6 párr. 15; pág. 7 párr. 17

Salmo 15:​2-pi nishca shinaca Jehová Diosca ‘llullana yuyaita shungupi mana charijcunatami’ paipaj carpa huasiman yaicuchun invitan. Jehová Diosca llullacunata ama nichunllaca mana munanchu. Ashtahuanpish paica tucuipi honrados cachunmi munan (Hebreos 13:18). Chaita ruranaca valishcami can. ¿Imamanta? ‘Jehová Diosca millaita rurajtaca, manataj ricunachinchu. Ashtahuanpish cashcata rurajcunahuanmi tandalla causan’ (Proverbios 3:32). Maijancunaca shujtajcunahuan cashpallami Jehová Diospaj mandashcacunata cazuncuna. Pero paicunalla cashpaca Diospaj mandashcacunataca mana cazuncunachu. Chashna cashcamantami paicunaca llullana yuyaita shungupi charishcata ricuchincuna. ¿Chai gentecunaca ima shinataj millaicuna tucurcacuna? Tal vez paicunaca Jehová Diospaj huaquin mandashcacuna mana alli cashcatami yuyai callarircacuna (Santiago 1:​5-8). Chaimi paicunaca uchilla ruraicunapi Jehová Diosta cazunata saquircacuna. Chaita rurashcamanta ima mana tucushcata ricushpami paicunaca jatun juchacunapi urmai callarircacuna. Paicunaca Diospaj ñaupajpi alli ricurishcatami yuyancuna. Pero Jehová Diosca paicunataca ña mana chasquinchu (Eclesiastés 8:11). Ñucanchijca paicuna shinaca mana canata munanchijchu. Ashtahuanpish tucuipi honrados cashcatami ricuchishun ninchij. w24.06 págs. 10, 11 párrs. 7, 8

Ñucanchijca Diospaj Shimipi tiyaj yachachishcacunataca achcatami valoranchij. Chai yachachishcacunapica tucui shunguhuanmi crinchij (Romanos 10:17). Shinallataj congregacionta Jehová Dios huiñachishcatapishmi crinchij. “Congregacionmi pilar shina mana llullataca sinchita chariracun, cuidacunpish” (1 Timoteo 3:15). Diabloca Bibliapi nishcacunapi mana crichun, shinallataj Diospaj organización cushca instruccioncunata mana cazuchunmi munan (Efesios 4:14). Diabloca achca llajtacuna Diospaj contra tucuchunmi ñalla llullacunata nishpa paicunataca pandachinga (Apocalipsis 16:​13, 14). Paica Diosta sirvijcunatapishmi pandachisha ninga (Apocalipsis 12:9). Chaimantami ima verdad cashcata, ima llulla cashcata alli yachana canchij. Ashtahuanpish Diospaj yachachishcacunata tucuipi cazunatami yachana canchij (Romanos 6:17; 1 Pedro 1:22). Jatun llaqui punllacunapi ama huañungapajmi chaitaca rurana canchij. w24.07 pág. 8 párrs. 1-3

Jehová Dios israelitacunaman mandashcacunata cujpica paicunaca chai mandashcacunata cazunatami ari nircacuna. Chai ari nishcata pajtachijpica Jehová Diosca ‘cancunataca cuidashami, bendiciashami’ nircami. Pero Jehová Diosca ‘ñucamanta caruyashpa rurashcalla dioscunata adorajpica cancunataca ña mana cuidashachu’ nircami. ¿Israelitacunaca Diospaj ñaupajpi cutin alli ricuringapajca imatataj rurana carca? Paicunaca Jehová Dios ima nishcata uyashpami paipajman tigrana carcacuna (Deuteronomio 30:​1-3, 17-20). Jehová Diosca ‘cancunapaj juchacunamanta arrepintirijpica ñucaca cancunapajman cꞌuchuyashpami cutin ayudasha’ nircami. Jehová Dios agllashca puebloca paipaj contrami tucurca. Chaimantami llaquicunata aparcacuna. Pero Jehová Diosca paipajman tigrachunmi paicunata ayudashpa catirca. Chaimi profetacunata cacharca. Profetacunami israelitacuna paicunapaj juchacunamanta arrepintirishpa Jehová Diospajman tigrachun animarcacuna (2 Reyes 17:​13, 14). w24.08 pág. 9 párrs. 4, 5

Jesús huañushca qꞌuipaca hebreo huauqui panicunaca achca llaquicunahuanmi chꞌimbapurarcacuna. Por ejemplo, Jerusalenpi congregación tiyai callarishca qꞌuipallami paicunataca catirashpa llaquichi callarircacuna. Shinallataj más o menos 20 huatacuna qꞌuipa Judeapi achca pobreza, achca yaricaicuna tiyashcamantami huauqui panicunaca achca llaquicunata charircacuna (Hechos 11:​27-30). Pero más o menos huata 61-pica paicunataca ña mana tanto llaquichircacunachu. Chai punllacunapica paicunaca apóstol Pablo cachashca cartatami chasquircacuna. Chai cartaca minishtishca tiempopimi chayarca. Chai qꞌuipaca paicunaca ashtahuan llaquicunatami apana carcacuna. Hebreo huauqui panicuna ñalla apagrishca llaquicunata ahuantachunmi apóstol Pabloca paicunaman cachashca cartapica sumaj consejocunata curca. w24.09 pág. 8 párrs. 1, 2

Llaquilla cai horasca huauqui panicuna ñucanchijta cushichijpimi Jehová Dios ñucanchijta cꞌuyaj cashcata cuentata cushun. Shinallataj huauqui panicunaca ñucanchijcuna ima shina sintirishcata uyashpa o ñucanchij ladopi cashpami animai tucuncuna. Huaquinpica shuj versopi ima nishcata yuyachishpa o ñucanchijhuan mañashpami cꞌuyaita ricuchingacuna (Romanos 15:4). Cutin, maijan ratoca huauqui panicunaca Jehová Dios yuyashca shina yuyachunmi animangacuna. Shinallataj huaquinpica micunitata, imalla minishtishcata cushpami ayudangacuna. Shujtajcuna ñucanchijta ayudachunca huaquinpica paicunapaj ayudata mañanami minishtiringa (Proverbios 17:17). Ñucanchijcuna ima shina sintirishcata, imata minishtishcataca manachari cuentata cungacuna (Proverbios 14:10). Chaimantami shungupi llaquilla sintirishpaca experienciata charij huauqui panicunaman ima shina sintirishcata parlana cangui. Imata minishtishcatapishmi paicunamanca huillana cangui. Tal vez canhuan alli apanacuj shuj o ishqui ancianocunahuanmi parlai tucungui. Huaquin panicunaca experienciata charij panicunahuan parlashpami tranquilo sintirishcacuna. w24.10 págs. 10, 11 párrs. 15, 16

Achca gentecunami alli saludta charingapajca sano micunata micuncuna, ejerciciotapish punllanta rurancuna. Pero paicunaca: “Chaita rurashpapish huiñai huiñaitaca mana causashunchu” nincunami. Cutin shujtajcunaca “yuyajyashpaca achcatami sufrishun” nishpami huiñai huiñaita causanataca mana munancuna. Shinapish Jesusca gentecunataca huiñai huiñaita cushilla causai tucushcatami nirca. Por ejemplo, Juan 3:16 y 5:​24-pimi chaitaca yachachirca. Shuj punllaca Jesusca shuj milagrota rurashpami ashalla tandacunahuan, ashalla pescadocunahuan achca gentecunaman cararca. Chaita ricushpaca gentecunaca mancharishcami saquirircacuna. Pero cayandij punlla Jesús ima nishcata uyashpaca paicunaca ashtahuanmi mancharishcangacuna. Chai gentecunaca Jesustaca Capernaúm llajtacamami catishpa rircacuna. Chaipimi Jesusca huañushca gentecuna cutin causarishpa huiñai huiñaita causai tucushcata nirca (Juan 6:​39, 40). Jesús nishca shinaca achca gentecunami cutin causaringacuna. Paicuna causarijpica huiñai huiñaitami paicunahuan cushilla causashun. w24.12 págs. 8, 9 párrs. 1, 2

Organización Mundial de la Salud nishca shinaca achca cusacunaca paicunapaj huarmicunataca macashpa, maltratashpami charincuna. Paicunaca shujtajcunahuan cashpaca paicunapaj huarmicunataca allimi tratancuna. Pero paicunalla cashpaca maipishcachunmi tratancuna. ¿Huaquin cusacunaca imamantataj paicunapaj huarmicunataca maltratancuna? Tal vez paicuna uchillaraj cashpaca paicunapaj yayacuna paicunapaj mamacunata maltratajtami ricurcacuna. Chaimi paicunaca huarmicunata maipishcachun tratana normal cashcata yuyancuna. Cutin shujtajcunaca: “Ñuca huarmita mana alli tratajllapimi ñucataca respetanga” nishpami yuyancuna. Shujtaj cusacunaca pꞌiñarinamanta mana jarcarinata yachashcamantami jahualla pꞌiñarincuna. Shinallataj maijan cusacunaca pornografiata ricujcuna cashcamantami huarmicunataca imapaj mana valishcata shina ricuncuna. Maijan gentecunaca: “COVID-19 pandemia tiyai callarishcamantami chai llaquicunaca ashtahuan mirarishca” nincunami. Chashnapish Yayitu Jehová Diosca cusacuna huarmicunata llaquichichunca mana munanchu. w25.01 pág. 8 párrs. 2, 3

Jesusca Jehovata cꞌuyachun mandashca tucuimanta yalli valishca cashcatami intindichirca. Paica: “Jehová Diostaca cambaj tucui shunguhuan, cambaj tucui causaihuan, cambaj tucui fuerzahuan, cambaj tucui yuyaihuan cꞌuyangui” nircami (Lucas 10:27). Chaimantami imata munashpapish, imata ruragrishpapish Jehová Diosta cꞌuyashcata siempre ricuchina canchij. Ashtahuancarin ñucanchij yuyashcacunahuanmi Diosta cꞌuyashcata ricuchina canchij. Jehová Diosta cꞌuyashcamantami pai shina yuyangapaj esforzarina canchij. Pero Diospaj yuyaita mana tucuita intindi tucushpapish Jesuspaj yuyaitami intindi tucunchij. Paica paipaj Yaya shinami yuyaj carca (1 Corintios 2:16). w25.03 pág. 8 párr. 1

Jesusca Adán shina jucha illajmi carca (1 Corintios 15:45). Chaimantami Adán chingachishca oportunidadta gentecuna cutin charichun ayudai tucurca (Romanos 5:19). Chashnami “último Adán” tucurca. Paica gentecunata “huiñaicama” ayudangapajmi shuj cutinlla sacrificiota shina curirca (Hebreos 7:27; 10:12). Chaimantami shujtaj jucha illaj runa ñucanchij juchacunamanta huañuchunca ña mana minishtirin. ¿Jehová Dioshuanca imamantataj alli apanacui tucunchij? Paica ñucanchij juchacuna perdonashca cachunmi imata ruranata alli yuyarca. Chaimantami paipaj Churipaj causaita curca. Jesusca mashnata pagana cashcata pagaj shinami paipaj jucha illaj causaita cushpa ñucanchijta randishpa quishpichirca (Hebreos 9:14). w25.02 págs. 4, 5 párrs. 12, 13

Jehová Dios causaj Dios cashcata yuyaipi charishpaca llaquicuna ricurijpipish paitami jatunyachishpa catishun. Satanás Diabloca “Jehová Diosta sirvijcunata llaquicuna japijpica paita sirvinatami saquingacuna” ninmi (Job 1:​10, 11; Proverbios 27:11). Pero Jehová Diosta sirvinata mana saquishpaca Satanaspaj nishcacuna llulla cashcata, ashtahuanpish Jehová Diosta cꞌuyashcatami ricuchishun. Gobiernocuna catirashpa llaquichijpi, gentecuna mana uyasha nijpi, cullqui illajpi, o shujtaj llaquicuna japijpica ¿imatataj yuyarina cangui? Chai llaquicunata ahuantashpa Jehová Diosta jatunyachingapaj shuj oportunidadta charishcatami yuyarina cangui. Jehová Diosca ñucanchij apai pudishca llaquicunallata apachunmi saquinga. Paimi llaquicunata ahuantachun ayudanga. w24.06 pág. 22 párr. 9

¿Can ima mana alli munaicunata charishcata yachanguichu? “Ñucaca mana alli munaicunataca mana charinichu. Chaimi juchapica nunca mana urmasha” nishpaca mana yuyanachu canchij (1 Juan 1:8). Apóstol Pablo nishca shinaca espiritualmente sinchi cashpapish tucuicunami mana alli ruraicunapi ama urmangapaj cuidarina canchij (Gálatas 6:1). Chaimantami imapi pandarijllacuna cashcata humildadhuan reconocina canchij (2 Corintios 13:5). Ima mana alli munaicunata charishcata cuentata cushpaca, ¿imatataj rurana canchij? Chaicunapi ama urmangapajmi esforzarishpa catina canchij. Caipi yuyashun. Ñaupa ciudadcunata cuidangapajca tucui muyundijtami pircajcuna carca. Pero, tucui muyundijta pircashca cajpipish mana cuidadota charijpica enemigocunaca pungucunatami chaimanca yaicui tucurcacuna. Chaimantami gentecunaca tucuimanta yallica pungucunata cuidana carcacuna. Ñucanchijcunapish pungucunata cuidaj shinami mana alli munaicunapi ama urmangapaj cuidarina canchij (1 Corintios 9:27). w24.07 págs. 15, 16 párrs. 5-7

Cai punllapaj versopica alli ruraicuna nishpaca predicacionmantami parlacun. Shinashpaca Bibliata liyishpa, chaipi nishcacunapi yuyashpaca ñucanchij fetami sinchiyachishun. Ashtahuanpish alli huillaicunata huillana imamanta valishca cashcatami intindishun. Diospaj Shimipi nishcacunata alli intindingapajca mana jahua jahuallachu estudiana canchij. Por ejemplo, Bibliata liyicushpaca shuj versota mana intindishpaca ¿imatataj rurana canchij? Shujtaj versoman pasanapaj randica mana intindishca versota alli intindingapajca Índice de las publicaciones Watch Tower, mana cashpaca Guía de estudio para los testigos de Jehová nishca publicacioncunapi chai verso ima nisha nishcata investigai pudinchij. Diospaj Shimita estudiangapaj tiempota surcushpaca chaipi nishcacuna ciertotaj cashcatami seguros cashun (1 Tesalonicenses 5:21). Bibliapi nishcacuna mana llulla cashcata seguro cashpaca cushicushpami shujtajcunamanpish yachachishun. w24.04 pág. 15 párrs. 4, 5

Rey Davidca Jehová Diosmanta parlashpaca: “Jatun Dios quiquinca allimari cangui, perdonajmari cangui” nircami (Salmo 86:5). Cutin Miqueasca: “Taita Dioslla, can shina Diosca manamari pi shujtajca tiyanchu. Canca can agllashcacunapuramanta saquirijcuna millaita rurashcatapish cungarijmi cangui. Paicunapaj juchatapish perdonajmi cangui” nircami (Miqueas 7:18). Profeta Isaiaspish: “Diosta mana rijsij cambaj ñanta saquishpa, Mandaj Diosman cutiri. Millai runa millai yuyaita saquishpa, Mandaj Diosman cutiri. Paimi paitaca llaquinga. Ñucanchij Diospaj perdonca yallitaj jatunmi” nircami (Isaías 55:7). Corintomanta huauqui panicunaca Jehová Dios shina cashcata ricuchingapajca arrepintirij huauquitaca allimi chasquina carcacuna. Shinallataj paita cꞌuyashcatami ricuchina carcacuna. Chaita rurashpami paicunaca ‘tucuipi cazujcuna cashcata’ ricuchircacuna. Chai huauquita congregacionmanta llujshichishca punllamantaca huaquin quillacunallami pasashca carca. Shinapish paica tucui shunguhuanmi arrepintirishca carca. Chaimantami paita congregacionpi cutin chasquingapajca ashtahuan tiempota shuyanaca mana minishtirirca. w24.08 págs. 17, 18 párrs. 12, 13

Ñallami achca profeciacunaca pajtaringa. Por ejemplo, Jesusca ñallami tucui gentecunata juzganga. Pero chai punlla manaraj chayajpimi shujtaj profeciacunapish pajtarina can. Jesusca pai tigramuna punllacuna ña chayamucushcata, cai pachapaj ruraicunapish ñalla tucurina cashcata cuentata cuchunca imalla tucuna cashcatami nirca (Mateo 24:3). Cai profeciacunaca Mateo 24 y 25-pimi can. Shinallataj chai profeciacunataca Marcos capítulo 13 y Lucas capítulo 21-pimi ricui tucunchij. Jesusca Diospaj punlla shamuna yuyailla causana cashcata yachachingapajca quimsa chꞌimbapuraicunatami churarca. Chai chꞌimbapuraicunapica ovejacunamanta, chivocunamanta, alli yuyaiyuj solteracunamanta, yuyai illaj solteracunamanta, talento cullquimantapishmi parlarca. Chai chꞌimbapuraicunaca shamuj punllacunapi gentecuna paicunapaj ruraicunamanta juzgashca canatami yachachin. w24.09 pág. 20 párrs. 1, 2

Jesucristoca paipaj yayatapish, gentecunatapishmi achcata cꞌuyarca. Chaimantami humilde trabajocunata rurashpa shujtajcunata sirvirca (Mateo 20:28; Juan 13:​5, 14, 15). Huauquicunapish Jehová Diosta, shujtajcunata cꞌuyashcamanta siervo ministerial shina sirvisha nijpica chai metata pajtachichunmi Diosllataj ayudanga (1 Pedro 5:5). Maijancunaca importante tucushca gentecunatami alli tratancuna. Pero Jehová Diospaj pueblopica mana chaita ruranchijchu. Por ejemplo, Jesús shina shujtajcunata cꞌuyaj huauquica mana shujtajcunata yalli cashcatachu yuyan. Importante cashcata yuyaj huauquita congregacionpi shujtajcunata sirvichun nombrajpica paica jatun tucushca cashcamantami humilde trabajocunataca mana rurasha ninga (Juan 10:12). w24.11 pág. 15 párrs. 6, 7

Muyundij Allpapimi ashtahuan pushaj huauquicunata minishtinchij. Paicunaca Jehová Dios cushca “regalocuna” shinami can (Efesios 4:8). ¿Can ña bautizado cashpaca ayudai tucunguichu? (Proverbios 3:27). ¿Siervo ministerial cangapaj imalla minishtishcata pajtachisha ninguichu? ¿Mana cashpaca anciano shina congregacionpi ayudanata munanguimanchu? ¿O tal vez, Escuela para Evangelizadores del Reinoman ringapaj imalla minishtishcata pajtachi tucunguichu? Chai escuelaman rishpami Jesús mingashca trabajocunata pajtachingapaj allichirishca cangui. Manchaita charishpaca Yayitu Diostami ima asignacionta cujpipish alli pajtachingapaj “ayudahuai” nishpa mañana cangui (Lucas 11:13). Jesusca pushaj huauquicunata churashpami cai tucuri punllacunapi ñucanchijta ñaupajman pushacushcata ricuchin. Chai huauquicunaca ‘valishca regalocuna’ shinami can (Mateo 28:20). Cꞌuyaj, mana mitsaj, alli pushajcunata Jesús churashcamantaca ¿manachu cushilla sintirinchij? w24.10 pág. 23 párrs. 16, 17

¿Diosta sirvijcunaca ima shinataj sintiringacuna? Jehová Diosca “ñaupajman llaquita apashcacunataca cungarishcami canga. Tucui llaquimi ñuca ñaupajmantaca ña illanga” ninmi (Isaías 65:16). Cai versopi nishca shinaca paraisopi causacushpaca cunan punllacunapi apashca llaquicunata yuyarishpaca ña mana llaquilla sintirishunchu. Tandanacuicunapi cashpaca ñucanchij llaquicunatami cungarinchij. Chaimantami tranquilo, cushilla sintirinchij. ¿Ñucanchij huauqui panicunapish tranquilo sintirichunca imatataj rurana canchij? Chaipajca espiritupaj granotami ricuchina canchij. Por ejemplo, cꞌuyajcuna, cushicujcuna, sumajta causajcuna, alli shungucuna, manso shungucuna cangapajmi esforzarina canchij (Gálatas 5:​22, 23). ¡Jehová Diospaj pueblo ucupi canaca valishca bendicionmi can! Cai pueblomanta ama llujshingapaj esforzarishunchij. Chashnami shamuj punllacunapi Jehová Dios ‘mushuj jahua pachata, mushuj allpata’ ima shina rurajta ricushun. w24.04 pág. 22 párrs. 9, 10

Pihuan novioyanaca alajami can. Pero mana shuj pugllaillachu can. Ashtahuanpish solterocunaca cazaranata o mana cazaranata decidingapajmi noviocuna tucun. Cazaranata decidishpaca noviocunaca Diospaj ñaupajpimi huañungacama cꞌuyanata, respetanata ari nincuna. Chaimantami imatapish manaraj ari nishpaca alli yuyanaraj canchij. Noviocunaca noviocuna cai horasmi alli rijsinacui tucuncuna. Chashnami shuj alli decisionta japi tucuncuna. Paicunaca cazaranata o mana cazaranatami agllai tucuncuna. Pero mana cazaranata decidishpaca yangamanta noviocuna tucushcataca mana yuyanachu can. Ashtahuanpish noviocuna tucushcamantami paicunaca shuj alli decisionta japi tucurcacuna. Shuj soltero, shuj soltera imapaj noviocuna tucushcata intindinaca importantemi can. ¿Imamanta? Solterocuna chaita alli intindishpaca pugllangapajlla pihuanpish mana novioyangacunachu. w24.05 págs. 26, 27 párrs. 3, 4

Huaquin jovencitocunapajca paicunapaj crishcacunata difindinaca huaquinpica sinchimi can. Por ejemplo, profesorcuna “gentecunaca evolucionmantami shamunchij” nijpica huaquin jovencitocunapajca chai nishcacuna mana cierto cashcata intindichinaca asha sinchimi can. Pero ¿paicunapaj crishcacunata mana manchashpa difindichunca yaya mamacunaca ima shinataj ayudai tucuncuna? Huahuacunaca Jehová Dios tucuita rurashcata crishcamantaca mana pingarinachu can. Achca cientificocunapish cai Allpapi tucui imalla tiyashcacuna mana ñapish yangamanta ricurishcatami crincuna. Ashtahuanpish tucui imalla tiyashcacuna yallitaj sumaj cashcata ricushpaca shuj Ruraj chaita rurashcata cuentata cuncuna. Chaimantami chai cientificocunapish evolucionpi mana crincuna. Huahuacunaca paicunapaj crishcacunata sinchiyachingapajca shujtaj huauqui panicunapish Yaya Dios tucuita rurashcata seguros cangapaj imata rurashcatami investigana can. w24.12 pág. 18 párrs. 14, 15

Jesusca alli huillaicunata gentecuna uyanatami crirca. Chaimantami mana desanimarishpa cushicuihuan huillashpa catirca. Pai huillai callarishca shuj huata qꞌuipami achca gentecuna alli huillaita uyanata munajta ricurca. Chaimantami paicunataca ñalla cosechana granohuan compararca (Juan 4:35). Qꞌuipaca Jesusca paita catijcunamanca: “Granota tandanaca achcami” nircami (Mateo 9:​37, 38). Shujtaj cutinca Jesusca: ‘Granota tandanaca achcami. Chagrayuj Amota ashtahuan tandajcunata cachachun mañaichij’ nircami (Lucas 10:2). Jesusca achca gentecuna alli huillaicunata uyana cashcata yachashpaca cushillami sintirirca. Jesusca paita catijcunataca ama desanimarishpa, cushilla huillashpa catichunmi ayudarca. w25.03 págs. 18, 19 párrs. 15, 16

Jehová Diosca ñucanchij miticuna Rumi shinami can. Shuj jatun acapana tiyajpica shuj jutcupi, mana cashpaca shuj jatun rumi ucupimi miticui tucunchij. Chashna layallatajmi jatun llaquicunahuan chꞌimbapuracushpaca Jehová Diospi miticui tucunchij. Paimi ñucanchijtaca ayudanga. Huiñaita sufrichunpish manataj saquingachu. Y mana chaillachu. Shamuj punllacunapica tucui ñucanchij apacushca llaquicunatami tucuchinga (Ezequiel 34:​25, 26). Jehová Diospi miticungapajca paitami shungumanta mañana canchij. Chaita rurajpimi Yayitu Diosca sumaj causaita cushpa shungupi, yuyaipi tranquilo sintirichun ayudanga (Filipenses 4:​6, 7). Ima shinami shuj jatun rumi o shuj jatun urcuca siempre chai puestollapitaj can, chashnallatajmi Jehová Diosca ñucanchijta ayudangapajca siempre listo canga. Paica ‘huiñai huiñaita jatun pirca’ o jatun rumi shinami can. Chaimantami paipi confiai tucunchij (Isaías 26:​3, 4 ). Jehová Diosca mana nunca huañungachu. Chaimantami paica paipaj nishcacunataca pajtachingataj. Shinallataj ñucanchij mañaicunata uyangapaj, ñucanchijta ayudangapajpish siempremi listo canga. Yayitu Diosca paita tucui shunguhuan cazujcunataca manataj saquingachu (2 Samuel 22:26). Ashtahuanpish paimanta tucui imallata rurashcata manataj cungarishpami sumaj bendicioncunata cunga (Hebreos 6:10; 11:6). w24.06 pág. 27 párrs. 4-6

Jehová Diosta tucui shunguhuan cꞌuyangapajca mana alli diversioncunamanta, ashtahuan charina munaimanta, mana alli amigocunamantapishmi caruyana canchij. Diosmanta caruyacushcata cuentata cushpaca ratomi cambiocunata rurana canchij (Mateo 5:​29, 30). Shinallataj Jehová Diostaca mana ishqui shungu tucushpachu sirvina canchij. ¿Chaica imatataj nisha nin? Diospajta ruranapi achca ocupados cashcallamanta Diablo ñucanchijta Diosmanta mana caruyachi tucushcataca mana yuyanachu canchij. Chiri punllapi canllapi puricushcata yuyai. Cambaj huasiman chayashpaca seguramente cunuj churanatami churaringuiman ¿nachu? Pero ¿huasi pungutaca pascashcachu saquinguiman? Chaita rurajpica tucui huasimi chiriyanga. Ñucanchijpish chiri punllapi puricuj shinami cai millai mundopica causacunchij. Pero espiritualmente cunujlla shina cangapajca cunuj churanata churarij shinami Diospajta ruranapi ocuparinchij. Shinapish mana chaillatachu rurana canchij. Ashtahuanpish huasi punguta huichcaj shinami tucui mana alli ruraicunamanta caruyana canchij. Chaita rurashpallami Jehová Diostaca tucui shunguhuan sirvi tucushun (Efesios 2:2). w24.07 pág. 21 párrs. 6, 7

Jesús mashnata sufrishcataca mana intindi tucunchijchu. Shinapish paita llaquichijpica paica mana chashnallataj llaquichircachu. Jesusca achca llaquicunata charishpapish Jehová Diosmantaca mana caruyarcachu. Paita llaquichijcunata maldicinapaj randica: “Yayitu, paicunataca perdonahuailla. Paicunaca imata ruracushcataca mana yachancunachu” nishpami mañarca (Lucas 23:34). Ñucanchijta mana alli tratajcunamanta mañashpaca tranquilomi sintirishun. Paicunahuan pꞌiñarishca canatapishmi saquishun. Cai millai mundopi causashcamantami maipica shujtajcunaca ñucanchijtaca mana alli tratangacuna. Pero chashna cajpipish Jehová Dios ayudachunmi mañana canchij. Shinallataj Jesuspaj ejemplota catingapajmi esforzarina canchij. Ashtahuancarin Jehová Dios paipaj Shimipi imata yachachishcatami ñucanchij causaipi pajtachina canchij. Chaita rurajpimi Jehová Diosca ñucanchijta bendicianga (1 Pedro 3:​8, 9). w24.11 pág. 6 párr. 16; pág. 7 párr. 17; pág. 7 párr. 19

Jehová Diosca millai ruraicunataca manataj ricunachinchu (Salmo 5:​4-6). Paica ñucanchijcuna ima shina causanata yachachunmi Bibliapica mandashcacunata churashca. Yayitu Diosca chai mandashcacunata cazuchunmi munan. Pero imapipish nunca mana pandarichunca mana shuyanchu (Salmo 130:​3, 4). Shinapish ‘maijan gentecunaca Dios yallitaj llaquij cashcata yachashpapish, millai ruraicunataca mana pingashpami ruranllacuna’. Jehová Diosca paicunataca manataj ricunachinchu (Judas 4). Bibliapi nishca shinaca “millai gentecunaca” Armagedón macanacuipimi tucuchishca canga (2 Pedro 3:7; Apocalipsis 16:16). Jehová Diosca shujllapish ama chingarichunmi munan. Paica “tucuicuna arrepintirichunmi” munan (2 Pedro 3:9). Anciano huauquicunaca Jehová Diospaj ejemplota catishpami juchata rurajcuna arrepintirishpa Jehová Diospajman cutin cꞌuchuyachun pacienciahuan ayudancuna. w24.08 pág. 26 párrs. 1, 2

Ñucanchijpish shujtajcunata cꞌuyashcamantami Yayitu Dios shina paicuna imalla minishtishcata cuna canchij. Por ejemplo, ¿maijan huauqui o pani micunata, churanata minishtishcata yachaj chayashpaca imatataj rurana canchij? Jehová Diosca llaquipi cajcunata ayudachunmi canmanca yuyaita cui tucun. Diosta sirvijcunaca llaquipi cajcunata ayudashcamantami rijsishca canchij. Por ejemplo, COVID-19 pandemia punllacunapica huauqui panicunaca micunitata, churanata, shujtaj cosascunatapishmi paicunapura convidanacurcacuna. Cutin shujtajcunaca shungumantami Diospaj obra ñaupajman catichun cullquita cushpa ayudarcacuna. Chai cullquihuanmi muyundij Allpapi llaquicunata apacuj huauqui panicunata ayudai tucurcanchij. Huauqui panicunaca chashna ayudashpami Hebreos 13:​16-pi nishcacunata pajtachircacuna. Chaipica: “Shujtajcunapaj allita ruranata, cancuna imalla charishcata shujtajcunaman cunatapish ama cungarichijchu. Cai ruraicunaca shuj sacrificio shinami can. Chai sacrificiomantami Diosca achcata cushicun” ninmi. w24.09 págs. 27, 28 párrs. 6, 7

Caipi yuyai. Cambaj familiata mantiningapaj trabajota mashcacushpa ishqui trabajocunata tarishpaca ¿imatataj ruranguiman? Puntapica ima trabajocuna cashcata, ima horasmanta ima horascama trabajana cashcata, cꞌuchullapi o carupi saquirishcatami alli ricunguiman ¿nachu? Tal vez chai ishqui trabajocunapica Dios mandashcacunata ama cazuchunca manachari canta obligangacuna. Chaimi can ashtahuan munashca trabajota japinata yuyangui. O tal vez maipi ashtahuan cullquita gananata ricushpami decidisha ningui. Pero ¿manaraj shuj decisionta japishpaca imatataj rurana cangui? Cada trabajo ima shina cashcatapishmi alli ricuna cangui. Por ejemplo, ¿shuj trabajota japishpaca tucui tandanacuicunamanchu ri tucungui? O ¿chaipi trabajanaman yaicushpaca cambaj familiaman Diosmanta yachachishpa catingapaj, paicuna cushilla sintirichun ayudangapajchu tiempota charingui? Caicunapi yuyashpaca ima ashtahuan valishca cashcatami cuentata cungui. Jehová Diosta adorana, cambaj familiata ayudanami cullquitapish yalli valishca cana can. Alli yuyashpa decidijpica Yayitu Diosmi canta ayudanga. w25.01 págs. 17, 18 párrs. 11-13

Cantaca achca gentecunachari llaquichishcacuna. Shinapish Jehová Dios canta achcata cꞌuyashcata, achcata valorashcataca mana cungarinachu cangui. Imapaj mana valishcata yuyashpaca Jehová Dios cambaj alli cualidadcunata ricushpa paipajman pushamushcatami yuyarina cangui (Juan 6:44). Yayitu Diosca canta achcata cꞌuyashcamantami canta ayudangapajca siempre listo can. Jehová Dios ima shina cashcata yachangapajca Jesusmantami yachana canchij. Jesusca cai Allpapi cashpaca llaquichishca gentecunatami cꞌuyaihuan ayudarca (Mateo 9:​9-12). Por ejemplo, millai ungüita charij huarmica alli tucunata munashpami Jesuspaj churanapi tuparirca. Chaita ricushpaca Jesusca chai huarmi sinchi feta charishcamantami animarca (Marcos 5:​25-34). Jesusca Yaya Jehová Dios ima shina cashcatami ricuchin (Juan 14:9). Chaimantami Jehová Dios cantapish valorashcataca seguro cana cangui. Paica paita mashnata cꞌuyashcata, sinchi feta charishcatapishmi ricun. w24.10 pág. 7 párrs. 4, 5

Rey Davidca achca llaquicunahuanmi chꞌimbapurarca. Maijancunaca Davidpaj familiacuna, amigocuna cashpapish paitami llaquichisha nircacuna (1 Samuel 19:​10, 11; 2 Samuel 15:​10-14, 30). Chaimi Davidca: “Tucui tutacunami ñuca sauna shutujyajta huacani. Ñuca camapipish ñuca huiquita jichacunillami. Huacana fuerzapish ña mana tiyanchu” nirca (Salmo 6:6). Davidca achca llaquicunata apashca cashpapish Jehová Dios paita cꞌuyaj cashcatami seguro carca. Chaimi: “Ñuca huacashcataca, Mandaj Diosca ñami uyahuashca” nirca (Salmo 6:8). Jehová Dios ñucanchijta cꞌuyaj cashcata, ñucanchijcuna ima shina sintirijta alli intindij cashcataca cai punllapaj versopimi quillcarca. Davidca Yayitu Dios ñucanchij huiquicunata shuj huallupi o capachupi churaj cashcatami nirca. Shinallataj ñucanchij huiquicunata shuj libropi anotaj cashcatapishmi nirca. Chaita nishpaca Yayitu Dios ñucanchijcuna ima shina sufricujta alli yachaj cashcatami nirca. Ashtahuancarin Yayitu Diosca chai llaquicunata apacushcamanta ñucanchijcuna ima shina sintirishcatami alli intindin. w24.12 págs. 22, 23 párrs. 11, 12