Septiembre

Espiritualmente sinchi tucungapaj esforzarinaca allimi can. Pero huahuacuna shina ama cutin tucungapajpishmi esforzarishpa catina canchij (1 Corintios 10:12). Espiritualmente sinchi tucucushcata cuentata cungapajca ‘ñucanchijllatajmi alli ricurashpa catina canchij’. Colosaspi causaj huauqui panicunataca apóstol Pabloca espiritualmente sinchi tucuchunmi animarca. Shinallataj espiritualmente sinchi cajpipish cuidarishpa catichunmi animarca. Colosaspi causaj huauqui panicunaca ñami espiritualmente sinchicuna carca. Pero ‘cai pachapaj yuyaicunata’ ama cringapajmi esforzarishpa catina carcacuna (Colosenses 2:​6-10). Epafrasca paicunataca allimi rijsirca. Chaimantami espiritualmente sinchi cashpa catichun paicunamanta Yaya Diosta mañaj carca (Colosenses 4:12). ¿Caimantaca imatataj yachanchij? Espiritualmente ama chiriyangapajmi esforzarishpa catina canchij. Shinallataj Jehová Dios ñucanchijta ayudachunmi minishtinchij. Pablopish, Epafraspish chaitaca allimi yacharcacuna. Chaimantami “jarcaicuna ricurijpipish esforzarishpa catichij” nishpa Colosaspi caj huauqui panicunataca animarcacuna. w24.04 págs. 6, 7 párrs. 16, 17

¿Jehová Diosta manchanaca imatataj nisha nin? Jehová Diosta cꞌuyashcamanta pai mana munashca ruraicunata mana rurana cashcatami nisha nin. Shinallataj Diospaj ñaupajpi alli ricuringapajca ima alli cashcata, ima mana alli cashcata, ima verdad cashcata, ima llulla cashcatapishmi yachana canchij (Proverbios 2:​3-6; Hebreos 5:14). Gentecunata Jehová Diosta yalli manchashpaca paicuna nishca llullacunatami cri callarishun. Jehová Dios cusha nishca allpa ima shina cashcata 12 runacuna ricunaman rijpi ima tucushcata ricushun. 10 runacunaca Jehová Diosta yallimi cananeocunataca mancharcacuna. Chaimantami paicunaca: “Chai llajtapi causajcunamari ñucanchijta yalli cꞌari cꞌaricuna. Chashna cashcamanta chai llajtaman huichiyashpapish, manataj mishai tucushunchu” nircacuna (Números 13:​27-31). Cananeocunaca israelitacunata yallimi sinchicuna carca. Pero “paicunataca mana mishai tucushunchu” nishpaca chai 10 runacunaca Jehová Diospi mana confiashcatami ricuchircacuna. w24.07 págs. 9, 10 párrs. 5, 6

¿Jehová Diosca gentecunata juzgacushpaca siemprechu cashcata rurashpa juzgan? Ari. Ñucanchijca Abrahán shinami cai allpata juzgaj Jehová Dios jucha illaj cashcata, cꞌuyaj, llaquij, yachaisapa cashcataca seguros canchij. Jehová Diosca gentecunata juzgachunca Jesusmanmi mingashca. Shinallataj ima shina juzgana cashcataca paimanca allimi yachachishca (Juan 5:22). Jehová Diospish, Jesuspish gentecunapaj shungu ima shina cashcatami ricui tucuncuna (Mateo 9:4). Chaimantami paicunaca siempre cashcata rurangacuna. Jehová Diosca siempremi alli yuyashpa imatapish alli decidin. Chaimantami paipi confiana canchij. Ñucanchijca alli juezcunaca mana cai tucunchijchu. Pero Jehová Diosca ima shina juzganataca allimi yachan (Isaías 55:​8, 9). Jehová Diospish Jesuspish alli juezcuna cashcata yachashcamantami paicunapaj decisioncunapi confianchij. Ñucanchijta mandaj Jesusca Jehová shinallatajmi cꞌuyaj, cashcata ruraj can. Chaimantami paipipish tucui shunguhuan confianchij (Isaías 11:​3, 4). w24.05 pág. 7 párrs. 18, 19

Llullana yuyaita mana charij shunguta charinaca valishcami can. Caita alli intindingapajca Natanael shuti runapi yuyashun. Felipemi paitaca Jesusta rijsichirca. Jesusca Natanaelta mana rijsishpapish: “Ricuichij, cai israelita runata, paipica ima umana yuyaica mana tiyanchu” nircami (Juan 1:47). Natanaelca Jesuspaj discipulocunatapish yallimi honrado carca. Natanaelca ñucanchij shina juchayuj cashpapish siempremi honrado carca. Chaimantami Jesusca paita felicitarca. Salmo capítulo 15-pica shujtajcunata ima shina tratana cashcatami ashtahuanca parlan. Por ejemplo, Salmo 15:​3-pica: ‘Paipaj cꞌalluhuan pita mana yanga llaquichij, pitapish millaita mana ruraj, paipaj cꞌuchullapi causajcunatapish llaquichishpa mana rimajllami Diospaj carpa huasipica causagringa’ ninmi. Caipi nishca shinaca ñucanchij cꞌalluta jarcarinata mana yachashpaca shujtajcunatami llaquichishun (Santiago 1:26). w24.06 pág. 10 párr. 7; pág. 11 párrs. 9, 10

Predicacionman llujshingapaj alli prepararishpaca ashtahuan tranquilomi huillai tucungui. Jesusca paita catijcunata huillanaman manaraj cachashpaca ima shina huillana cashcatami alli yachachirca (Lucas 10:​1-11). Paicunaca Jesuspaj yachachishcacunata pajtachishpaca cushicushpami achca gentecunaman huillai tucurcacuna. ¿Predicacionman llujshingapajca ima shinataj prepararina canchij? Chaipajca ñucanchij propio shimicunahuan ima shina huillanatami yuyana canchij. Shinallataj gentecuna jarcaicunata churajpi imata ninatami repasana canchij. Chashnami paicunahuan parlacushpaca tranquilo, cushi ñahuihuan parlai tucushun. w24.04 pág. 16 párrs. 6, 7

Tucuimanta yallica Jehová Diosta, paipaj shutitapish cꞌuyashcamantami Diospaj Gobiernomanta alli huillaicunata huillashpa purinchij. Shinallataj predicashpami Yaya Diosta jatunyachinchij. Ñucanchijpish jahua pachapi caj angelcuna shinami Yaya Diostaca: “Canmi jatunyachishca canatapish, alli nishca canatapish chasquina cangui” nishpa jatunyachinchij. ¿Jehová Diostaca ima shinataj jatunyachinchij? Chaipajca Jehová Dios tucui imalla tiyashcacunata rurashcata, ñucanchijcunaman causaita cushcata imamanta seguro cashcatami gentecunamanca alli yachachina canchij. Shinallataj ñucanchij pudishcacama tucui shunguhuan, tucui fuerzahuan huillashpa catingapajmi esforzarina canchij (Mateo 6:33; Lucas 13:24; Colosenses 3:23). Caipi ricushca shinaca Yayitu Jehová Diosta cꞌuyashcamantami predicanchij. Pero paipaj shuti maijan cashcata, ima nisha nishcatapishmi yachachina canchij. w24.05 pág. 17 párr. 11

Jehová Diosca cunan punllacunapica tranquilo, cushilla causachunmi ayudan. Shamuj punllacunapicarin huiñai causaita cushpami bendicianga. Jehová Dios ñucanchijta bendiciasha nishcata, chaita rurangapaj poderta charishcataca segurosmi canchij. Chaimantami ñaupa punllacunapi Diosta sirvijcuna rurashca shina ñucanchijpish paita tucui shunguhuan sirvingapaj esforzarinchij. Cunanca Timoteo Jehová Diosta ima shina sirvishcatami ricushun (Hebreos 6:​10-12). Timoteoca causaj Jehová Diospimi paipaj shunguta churarca (1 Timoteo 4:10). Paica Jehová Diospaj bendicionta chasquinatami seguro carca. Chaimantami Jehová Diospajta rurangapaj, shujtajcunata ayudangapajpish sinchita esforzarirca. Por ejemplo, apóstol Pabloca Timoteotaca alli yachachij cachun, conferenciacunata alli cuj cachun, jovencunaman, mayorllacunaman alli ejemplota cuchunmi animarca. Shinallataj Timoteoca huaquin sinchi mingashcacunatami pajtachina carca. Por ejemplo, maijan huauqui panicuna paicunapaj yuyaita cambiachunmi cꞌuyaihuan paicunataca cunana carca (1 Timoteo 4:​11-16; 2 Timoteo 4:​1-5). Timoteo Diospajta rurangapaj sinchita esforzaricushcataca maijancunaca manachari cuentata curcacuna. Shinapish Timoteoca Jehová Dios paita bendicianatami tucui shunguhuan crirca (Romanos 2:​6, 7). w24.06 págs. 22, 23 párrs. 10, 11

Jehová Diosca profetacunata cachashpami israelitacuna arrepintirichun ayudaj carca. Por ejemplo, Jehová Dios yuyaita cujpimi Jeremiasca, ‘mana cazuj Israel ñucapajman tigrari. Ñucaca ña mana ashtahuan pꞌiñarishpa llaquichishachu. Ñucaca llaquij Diosmari cani, mana huiñaita pꞌiñalla cashachu. Ñucatamari mana cazushpa pꞌinachircangui. Chai juchata rijsiyari’ nirca (Jeremías 3:​12, 13). Shinallataj Jehová Dios yuyaita cujpimi profeta Joelca, ‘llaquirishpa tucui shunguhuan ñucapajman cutirichij’ nishpa quillcarca (Joel 2:​12, 13). Cutin, profeta Isaiasca, “maillarichij, chuyayaichij. Ñuca ñaupajpi cancuna millaita rurashcata anchuchichij. Millaita ruranata saquichij” nircami (Isaías 1:​16-19). Jehová Diosca Ezequieltapish cashna nishpa quillcachunmi mandarca: ‘Ñucaca ñucata mana manchaj runa huañuchunca, mana munanichu. Millaita ruranata saquishpaca causanguichijmi’ nircami (Ezequiel 18:​23, 32). Jehová Diosca gentecuna huiñai huiñaita causachunmi munan. Chaimantami gentecuna arrepintirijpica cushilla sintirin. w24.08 págs. 9, 10 párrs. 5, 6

Jehová Diosca tucui paipaj sirvijcunamanmi sumaj yachaicunata cun. Paicunataca tucuipimi cuidacun. Shinallataj Jehová Dios tucuicunata igual trataj cashcamantami cunan punllacunapica muyundij allpapi causaj gentecunaca Bibliataca paicunapaj propio shimipi liyi tucuncuna. Yuyashun. Bibliata quillcajcunaca Bibliataca hebreo, arameo y griego shimipimi quillcarcacuna. Pero ¿chai shimicunapi Bibliata liyijcunallachu Jehová Dioshuan ashtahuan alli apanacui tucuncuna? Mana (Mateo 11:25). Estudiashca cashcallamanta o ñaupa hebreo, griego, arameo shimicunata yachashcallamanta Jehová Diospaj ñaupajpi alli ricuri tucushcataca mana yuyanachu canchij. ¿Imamanta? Jehová Diosca paimanta yachana oportunidadtaca mana estudiashca gentecunallamanchu cushca. Ashtahuanpish estudiashca cashpapish o mana estudiashca cashpapish tucuicunami Diosmanta yachana oportunidadta charinchij. Shinallataj tucui llajtacunamanta gentecuna Diosmanta yachana oportunidadta charichunca Jehová Diosca Bibliataca huaranga huaranga shimicunapimi traducichishca (2 Timoteo 3:​16, 17). w24.06 págs. 6, 7 párrs. 13-15

Jesús huillashca shinami Jerusalentaca ñalla tucuchigrircacuna. Paicunaca paicunapaj feta sinchiyachingapaj, llaquicunata ima shina ahuantanata yachangapaj tiempotami aprovechana carcacuna (Hebreos 10:25; 12:​1, 2). Hebreo huauqui panicunaca achca llaquicunahuanmi chꞌimbapurarcacuna. Shinapish ñucanchijcunaca ñallami paicunata yalli llaquicunahuan chꞌimbapurashun (Mateo 24:21; Apocalipsis 16:​14, 16). Chaimantami Jehová Dios paicunaman cushca consejocunaca ñucanchijpajpish valishca can. ¿Jehová Diosca paicunamanca imallatataj nirca? Apóstol Pabloca hebreo huauqui panicunataca Diosmanta ashtahuan yachashpa catichunmi animarca (Hebreos 5:​14–6:1). Shinallataj paica Ñaupa Testamentopi nishcacunatami yuyachirca. Chashnami Jesús yachachishcacuna judiocuna yachachishcacunata yalli valishca cashcata intindichirca. Pabloca hebreo huauqui panicuna ima verdad cashcata, ima llulla cashcata cuentata cungapaj Diosmanta yachashpa catina cashcatami yacharca. Paicunaca panda yachachishcacunapi ama cringapaj, Diosmanta ama caruyangapajmi paimanta yachashpa catina carcacuna. w24.09 págs. 8, 9 párrs. 2, 3; pág. 10 párr. 6

Jesuspaj discipulocunaca animotami minishtircacuna. ¿Imamanta? Maijancunaca Jesusta catingapajca paicunapaj huasita, familiacunata, negociocunatami saquishcacuna carca (Mateo 19:27). Shujtajcunataca Jesusta catij tucushcamantami maltratajcuna carca (Juan 9:22). Discipulocunaca Jesús Mesías cashcata tucui shunguhuan crishcamantami tucuita saquircacuna (Mateo 16:16). Chaimi Jesús huañujpica Jesús paicunata ña mana ayudai tucushcata yuyashpa llaquilla sintirircacuna. Pi huañujpica llaquilla sintirinaca normalmi can. Chaimantami discipulocunaca Jesús huañushcamanta llaquilla carcacuna. Chaita ricushpaca Jesusca paicunaca mana sinchi feta charinchu nishpaca mana yuyarcachu. Ashtahuanpish pai cutin causarishca punllallatajmi discipulocunataca animai callarirca. Por ejemplo, Jesús pambana jutcupi María Magdalena huacacujpimi Jesusca paiman ricurirca (Juan 20:​11, 16). Shinallataj Jesusca Emausman ricushpami ishqui discipulocunaman ricurirca. Apóstol Pedromanpishmi ricurirca. w24.10 pág. 13 párrs. 5, 6

Yaya mamacuna cancunapaj huahuacunata paicunapaj crishcacunata ima shina difindinata yachachichij. Chaipajca jw.org paginaman yaicushpa “Los jóvenes preguntan” nishca parteta mashcai. Chaipica “Creación o evolución” nishca temacunaman yaicui. Chai temacunata estudiashca qꞌuipaca huahuacunataca: “¿Cai temacunamantaca Jehová Dios tiyashcata ricuchingapajca maijantataj ashtahuan munangui?” nishpami tapuna canguichij. Huahuacunapaj compañerocuna uyanata munajpica jahualla shimicunahuanmi paicunapaj crishcacunata explicana can. Por ejemplo, tal vez shuj compañeroca: “Diostaca nunca mana ricushcanichu. Chaimi pai tiyashcataca mana crini” ningami. Chashna nijpica cancunapaj huahuacunaca: “Sacha ucupi puricushcata yuyai. Chaipica shuj alaja yacu tanquetami taringui. Chaita ricushpaca, ¿manachu shuj runa chai tanqueta rurashcata seguro canguiman? Jahua pachapi, cai Allpapi imalla tiyashcacunaca chai yacu tanqueta yallimi sumaj can. Chaimantami alli yachaita charij Yaya Dios chaita rurashcata seguro cani” nishpami cutichi tucuncuna. w24.12 pág. 18 párr. 16

Tucuicunami alli decisioncunata agllangapajca ayudachun minishtinchij. Ñucanchijtaca huauqui ancianocuna, experienciata charij huauqui panicunami ayudai tucun. Pero ñucanchijta yalli mayorcuna cajpipish paicunapaj consejoca mana ayudai tucunchu nishpaca mana yuyanachu canchij. Ashtahuanpish Jehová Diosca mayorlla huauqui panicunamanta yachachunmi munan. Paicunaca achca tiempota causashcamantami experienciatapish, alli yachaitapish charincuna. Ñaupa punllacunapica Jehová Diosca paipaj pueblota animachun, ñaupajman pushachunca alli sirvij mayorlla runacunatami agllarca. Por ejemplo, Moisesta, Davidta, apóstol Juantami paica agllarca. Paicunaca chꞌican chꞌican tiempopimi causarcacuna. Ña mayorlla cashpapish ashtahuan jovencunatami Jehová Diosta cazuna importante cashcata intindichircacuna. Jovencunapish, mayorcunapishmi paicuna cushca consejocunamantaca yachai tucunchij (Romanos 15:4; 2 Timoteo 3:16). w24.11 pág. 8 párrs. 1, 2

Noepaj punllacunapica Jehová Diosca ‘yahuartaca mana micunachu canguichij’ nishpami mandarca (Génesis 9:​3, 4). Qꞌuipaca israelitacunamanpishmi yahuarta ama micuchun nishpa mandarca. “Maijanpish yahuarta micushpaca huañunami can” nircami (Levítico 7:27). Jesús cai Allpapi cashpaca Moisespaj mandashcacunatami cazurca (Mateo 5:​17-19). Chaimantami Jesús paipaj aichata micuchun, paipaj yahuarta ubyachun mana nicushcata yachanchij. Capernaumpi caj gentecunamanca shuj chꞌimbapuraihuanmi yachachicurca. Paica samaritana huarmihuan parlacushpapish shuj chꞌimbapuraihuanmi yachachirca. Jesusca samaritana huarmimanca: “Ñuca cushca yacuca, huiñai causaitami cunga” nircami (Juan 4:​7, 14). Jesusca samaritana huarmi pai ricuchishca pugyumanta yacuta ubyashpalla huiñai causaita charinataca mana nicurcachu. Chashnallatajmi Capernaumpi cajcuna paipaj aichata micushpa, paipaj yahuarta ubyashpa huiñai causaita chari tucushcatapish mana nicurca. w24.12 págs. 9, 10 párrs. 4-6

Jehová Diosta mana sirvij huaquin cusacunaca huarmicuna imapaj mana valishcatami yuyancuna. Pero Jehová Diosta sirvij cusacunaca paicuna shina ama yuyangapajmi cuidadota charina can. ¿Imamanta? Huarmicuna imapaj mana valishcata yuyashpaca tal vez paicunataca maipishcachunmi tratai callaringacuna. Punta siglopi tiyaj Roma congregacionpica ungido huauqui panicunami tiyarca. Paicunaca achca huatacunatami Jehová Diostaca ña sirvicurcacuna. Shinapish apóstol Pabloca paicunataca: “Cai pacha gentecunapaj ruraicunataca ama rurashpa catichijchu” nishpami cunarca (Romanos 12:​1, 2). Chai ungido huauqui panicuna Jehová Diosta mana sirvijcuna shina yuyanata mana saquishcamantachari apóstol Pabloca chashna consejarca. Cunan punllacunapica apóstol Pablo cushca consejotaca cusacunapishmi catina can. ¿Imamanta? Jehová Diosta sirvij huaquin cusacunaca huarmicuna imapaj mana valishcata yuyashcamantami paicunataca maipishcachun tratai callarishcacuna. w25.01 pág. 9 párr. 4

Ancianocunaca tucui shunguhuan huillashpami alli ejemplota cuncuna (2 Timoteo 4:5). Paicunaca maipi huillanata ricuchishpa, Bibliamanta ima shina yachachina cashcata yachachishpami ayudancuna. Shinallataj maijan huauqui o pani jatun juchata rurajpica cꞌuyaihuanmi Jehová Diospaj ñaupajpi cutin alli ricurichun ayudancuna. Chashnami congregacionpi mapa ruraicuna ama tiyachun ricurancuna (1 Corintios 5:​12, 13; Gálatas 6:1). Ashtahuantajca ancianocunaca alli michijcunami can (1 Pedro 5:​1-3). Chaimi paicunaca Bibliamanta alaja conferenciacunata cuncuna. Huauqui panicunata alli rijsingapajpishmi esforzarincuna. Paicunata animangapajpishmi visitancuna. Huaquin ancianocunaca tandanacuna huasicunata shayachishpa, allichishpami ayudancuna. Cutin shujtaj ancianocunaca Comité de Enlace con los Hospitales nishca grupocunapi, hospitalpi caj huauqui panicunata visitashpa, jatun tandanacuicunata organizashpa, shujtaj asignacioncunata pajtachishpami ayudancuna. Paicunaca ñucanchijta ayudangapajmi sinchita trabajancuna. w24.10 pág. 20 párr. 9

Bibliapi nishca shinaca Jesús paipaj causaita cushpa ñucanchijta randishcamantami juchamanta cacharichishca canchij. Apóstol Pedroca: “Cancunapaj ñaupa yayacuna saquishca yanga causaimantaca chingarijlla cullquihuan, chingarijlla orohuanca mana cacharichishca o randishca carcanguichijchu. Chaitaca yachanguichijmi. Ashtahuanpish achcata valij Cristopaj yahuarhuanmi cacharichishca carcanguichij. Cai yahuarca sano, ima mapa illajlla malta ovejapaj yahuar shinami can” nircami (1 Pedro 1:​18, 19; nota). Juchamanta, huañuimantaca achcatami sufrinchij. Pero Jesús paipaj causaita cushcamantami chaicunamanta quishpichishca canchij (Romanos 5:21). Jesús paipaj sumaj yahuarhuan ñucanchijta quishpichishcamantami paitapish, Jehová Diostapish achcata agradicinchij. w25.02 pág. 5 párrs. 15, 16

¿Tentacioncunapi ama urmangapajca imatataj rurana canchij? Chaipajca Proverbios capítulo 7-pi nishcatami yachana canchij. Chaipi nishca shinaca shuj jovenca huainayaj huarmihuanmi juchapi urmarca. Verso 22-pi nishca shinaca chai jovenca “ari nishcahuanmi” chai huarmita catishpa rirca. Shinapish punta versocunapica chai joven asha asha juchapi urmashcatami intindichin. ¿Chai jovenca ima shinataj juchapi urmarca? Puntapica paica tuta horasmi chai huarmipaj huasi cꞌuchullata pasarca. Chai qꞌuipaca ‘pai ricushca ñanmanta chꞌimbashpami’ chai huarmipaj huasiman rirca (Proverbios 7:​8, 9). Huarmi ricurijpica mana chaimanta tigrashpa rircachu. Ashtahuanpish paita muchachunmi saquirca. Shinallataj chai huarmica alli huarmi cashcata crichingapajmi ‘Dioshuan alli cangapajmi sacrificiocunata cumuni’ nirca (Proverbios 7:​13, 14, 21). Chai jovenca juchapi ama urmangapajca tucui chaicunataca mana ruranachu carca. w24.07 pág. 16 párrs. 8, 9; pág. 19 párr. 19

Yaya Dios paipaj pueblo ucupi mapa ruraicuna tiyachun manataj saquij cashcatami intindinchij. Maijancunaca tal vez “juchata rurajcuna mana arrepintirijpipish paicunaman cꞌuyaita ricuchingapajmi Diospaj pueblopi cachun saquinalla canchij” nishpachari yuyancuna. Pero Jehová Diosca chaitaca mana munanchu. Yaya Jehová Diosca perdonaj, llaquij cashpapish mapa ruraicunataca manataj ricunayachinchu. Paipaj mandashcacunatapish manataj cambianchu (Judas 4). Ashtahuanpish paicunapaj juchacunamanta mana arrepintirijcunata congregacionmanta mana llujshichijpica paicunaca tal vez shujtaj huauqui panicunatapishmi pandachingacuna (Proverbios 13:20; 1 Corintios 15:33). Shinallataj Jehová Dios shujllapish mana chingarichun munashcatami yachashcanchij. Chaimantami paica tucuicunata ayudasha nin. Juchata rurajcuna paicunapaj juchacunamanta arrepintirishpa paipajman tigrajpica Jehová Diosca cutinmi paicunataca alli chasquinga (Ezequiel 33:11; 2 Pedro 3:9). Jehová Diosca Corintomanta runa salvarichunmi munarca. ¿Paipaj juchacunamanta arrepintirishpa mana allita ruranata saquijpica Jehová Diosca imatataj rurarca? Huauqui panicuna paita perdonashpa congregacionpi cutin chasquina cashcata intindichunmi apóstol Pabloman shuj cartata quillcachun mingarca. w24.08 pág. 16 párr. 7; págs. 18, 19 párrs. 14, 15

Jesusca ungidocunata apoyashcata o mana apoyashcata ricushpami gentecunataca juzganga (Mateo 25:​31-46). Jesusca Armagedón manaraj shamujpi, ‘jatun llaqui’ punllacunapimi chaitaca ruranga (Mateo 24:21). Ima shinami michijca ovejacunata chivocunamanta chꞌicanyachin, chashnallatajmi Jesusca ungidocunata apoyajcunataca ungidocunata mana apoyajcunamanta chꞌicanyachinga. Bibliapi nishca shinaca Jehová Diosca Jesustami cashcata rurashpa gentecunata juzgachun churashca (Isaías 11:​3, 4). Paica gentecuna ima shina comportarijta, ima shina causajta, imacunallata parlajta, ungidocunatapish ima shina tratajtami ricucun (Mateo 12:​36, 37). Chaimi Jesusca gentecunata juzgacushpaca picunalla ungidocunata apoyashcata yachanga. Ovejacuna shina cajcunaca alli huillaicunata huillashpami ungidocunata apoyancuna. w24.09 págs. 20, 21 párrs. 3, 4

Ñucanchij yuyaicuna cierto cashcata yachangapajca Bibliapi nishcacunahuanmi chꞌimbapurana canchij. Por ejemplo, shuj jovenca: “Jehová Dios ñucamantaca mana sustarinchu” nishpachari yuyan. Chai yuyaicuna cierto cashcata o mana cierto cashcata yachangapajca chai jovenca Bibliapimi Jehová Dios chaimanta imata yuyashcata ricuna can. Bibliata liyishpaca Jehová Dioshuan parlacushca shinami can. Pero Jehová Dios ñucanchij dudacunamanta imata yuyashcata yachangapajca, ¿imatataj ashtahuan rurana canchij? Bibliapimi ñucanchijta ayudaj versocunata mashcana canchij. Jehová Diospaj organización cushca publicacioncunapipish investiganami canchij (Proverbios 2:​3-6). Pero manaraj investigashpami Yayitu Diostaca: “Ñuca dudacunamanta can imata yuyashcata yachangapaj ayudahuai” nishpa mañana canchij. Chai huashaca Bibliapimi ñucanchij dudacunamanta imata nishcata mashcana canchij. w24.10 pág. 25 párrs. 4, 5

Jehová Diosca jatun tucushcacunataca mana bendicianchu (1 Corintios 10:​24, 33; 13:4). Jesuspaj alli amigocunapishmi maipica importante puestocunata charinata yuyarcacuna. Por ejemplo, Santiagohuan, Juanhuan ima tucushcata ricushun. Paicunaca Jesustaca paipaj Gobiernopi alli puestocunata cuchunmi mañarca. Pero Jesusca chaita rurana mana alli cashcatami paicunamanca yachachirca. Chaimantami 12 apostolcunamanca: “Maijanpish cancunapuramanta jatun casha nishpaca shujtajcunatami sirvina canguichij. Shinallataj maijanpish cancunapuramanta puntapi casha nishpaca tucuicunata sirvij runa shinami cana canguichij” nircami (Marcos 10:​35-37, 43, 44). Huauqui panicunata cꞌuyashcamanta sirvisha nij huauquicunaca congregacionpica shuj bendicionmi can (1 Tesalonicenses 2:8). w24.11 págs. 15, 16 párrs. 7, 8

Cꞌuyajcuna cashpaca ñucanchijllapi yuyanapaj randica shujtajcunapimi yuyashun. Mana pinganayajta churarina cashcatapishmi yuyaipi charishun (1 Corintios 10:​23, 24, 32; 1 Timoteo 2:​9, 10). Shuj importante decisionta agllacushpaca, “¿Ñuca decidishcata pajtachingapajca imallatataj minishtisha?” nishpami yuyana cangui. Jesusmi chaita rurachun yachachirca (Lucas 14:28). Por ejemplo can decidishcata pajtachingapaj mashna tiempota, mashna cullquita minishtishcatami alli yuyana cangui. Huaquinpica can imalla decidishcacuna alli llujshichunca cambaj familiahuanpishmi parlanacuna cangui. ¿Chaita ruranaca imamantataj alli can? Tal vez paicunaca cambaj decisión alli llujshichunmi huaquin cambiocunata rurana cashcata ningacuna. Shinallataj paicuna ima yuyashcata alli uyajpica can imalla decidishcacuna alli llujshichunmi ayudangacuna. w25.01 págs. 18, 19 párrs. 14, 15

Isaiasca Diosta sirvijcuna imamanta cushilla cana cashcatami intindichirca. Jehová Diosmi cunan punllacunapi paraisopi causacushca shina cushilla causachun ayudan (Isaías 65:​18, 19). Panda religioncunata catijcunaca chaquishca pambapi causacushca shinami llaquilla causancuna. Chaimi Jehová Diosca chai gentecunata ayudachun munan. Chashnami paicunapish paraisopi causacushca shina cushilla causangacuna. ¿Diospaj pueblopi cashcamantaca manachu cushilla sintirinchij? Chaimanta Jehová Dios cusha nishcacunamanta shujtaj gentecunaman yachachingapaj esforzarishunchij (Jeremías 31:12). Diospaj pueblo ucupi cajcunaca shamuj punllacunapi sumaj causai tiyanata yachashcamantami agradecidos sintirinchij. Bibliapi nishca shinaca paraisopi causajcunaca “huasicunatami shayachingacuna. Chaipimi causangacuna. Uvacunatami tarpungacuna. Chaipi pꞌucushcacunatami micungacuna”. Ashtahuanpish Jehová Dios bendiciashcamantami “mana yanga trabajangacuna”. Shinallataj Yayitu Diosca tucui gentecuna tranquilo, cushilla causanatami huillashca. Paica: “Paicuna manaraj cayajpimi ñucaca cutichisha” ninmi (Isaías 65:​20-24; Salmo 145:16). w24.04 págs. 22, 23 párrs. 11, 12

Jehová Dios ñucanchij jatun Rumi shina cashcata ricuchingapajca paipimi ñucanchij shunguta churana canchij. Jatun llaquicunahuan chꞌimbapuracushpapish chaitami rurana canchij (Isaías 48:​17, 18). Jehová Dios ñucanchijta ima shina ayudacujta ricushpaca paipimi ashtahuan confiashun. Shinallataj ñucanchijlla mana ahuantai tucushca llaquicunata ahuantangapajmi allichirishca cashun. Jehová Diosca jatun rumicuna, urcucuna sinchi, mana cuyuchipajmi can. Chashnallatajmi Jehová Diosca sinchi, mana cambiaj Dios can. Paica siempremi cꞌuyaj, llaquij canga. Ashtahuanpish pai rurasha nishcacunataca pajtachingatajmi (Malaquías 3:6). Adán y Eva Jehová Diospaj contracuna tucujpipish Jehová Diosca paipaj munaitaca mana cambiashcachu. Chaimi apóstol Pabloca “Diosllatajca mana negari tucunchu” nirca (2 Timoteo 2:13). ¿Chaica imatataj nisha nin? Ima tucujpipish Jehová Diosca pai rurasha nishcacunata, paipaj mandashcacunatapish manataj cambiangachu. Chaita yachashcamantami llaquicunata apacushca horas Jehová Dios siempre ayudanata seguros canchij. Ashtahuanpish Jehová Dios pai rurasha nishcacunata pajtachinatami tucui shunguhuan crinchij (Salmo 62:​6, 7). w24.06 págs. 27, 28 párrs. 7, 8

¿Cambaj noviohuan, noviahuan cazaranata o mana cazaranata alli decidingapajca imatataj rurana cangui? Paitami alli rijsina cangui. Manaraj noviocuna tucushpaca seguramente pai ima shina cashcataca ñachari ashata rijsircangui. Pero cunanca ‘shungu ucupi’ ima shina cashcatami alli rijsina cangui. Chaipajca pai ima shina cashcata, imata yuyaj cashcata, espiritualmente ima shina cashcatami ashtahuan rijsina cangui. Paita ashtahuan ashtahuan rijsishpa catishpaca cashna nishpami tapurina cangui: “¿Paica ñucapajca alli cusa, alli huarmichu canga?” (Proverbios 31:​26, 27, 30; Efesios 5:33; 1 Timoteo 5:​6, 8). “¿Cꞌuyaihuan tratanacui tucushunchu? ¿Paipaj pandarishcacunataca perdonai tucushachu?” nishpapishmi tapurina cangui (Romanos 3:23). Shinallataj cambaj novio, novia tucuipi can layallataj cachunca mana shuyanachu cangui. Ashtahuanpish paihuan cushilla causasha nishpaca pai tucuipi mana can laya cashcatami reconocina cangui. w24.05 pág. 27 párr. 5

Davidca jatun juchatami rurarca. Pero profeta Natán mana allita rurashcata ricuchijpica Davidca mana jatun tucushpami arrepintirirca (Salmo 51:​3, 4, 17). Rey Ezequiasca Diospaj ñaupajpica mana allicunatami rurarca (2 Crónicas 32:25). Pero Ezequiasca David shinami mana jatun tucushpa arrepintirirca (2 Crónicas 32:26). Chaimantami Bibliapica: ‘Ezequiasca Diospaj ñaupajpica allicunatami ruraj carca’ nin (2 Reyes 18:3). Caicamaca ñucanchij juchacunamanta arrepintirishpa ama cutin chaillapitaj urmangapaj esforzarina cashcatami yachashcanchij. Chaimanta ancianocuna ñucanchijman shuj consejota cujpica chai consejota mana minishtishcataca mana yuyanachu canchij. Shinallataj ancianocuna chai consejota cushcamanta ñucanchijcuna Diospaj ñaupajpi ña mana alli ricurishcataca mana yuyanachu canchij. Ancianocuna ñucanchijta pꞌiñashcamanta chaita nishcatapish mana yuyanachu canchij. Israelta mandaj alli reycunapishmi huaquinpica consejota cuchun minishtircacuna (Hebreos 12:6). Chaimantami ñucanchijta corregijpica puntapica humildadta ricuchina canchij. Ishquipica cambiocunatami rurana canchij. Y quimsapica Jehová Diostami tucui shunguhuan sirvishpa catina canchij. Ñucanchij juchacunamanta shungumanta arrepintirijpimi Yayitu Diosca perdonanga (2 Corintios 7:​9, 11). w24.07 pág. 21 párrs. 8, 9; pág. 22 párr. 11

Ancianocuna cutin cutin arrepintirichun paita ayudasha nijpipish juchata rurajca mana uyasha nijpica congregacionmanta llujshichishcami cana can (2 Reyes 17:​12-15). Ashtahuanpish paipaj ruraicunahuanmi Jehová Diospaj mandashcacunata manataj cazusha nishcata ricuchin (Deuteronomio 30:​19, 20). Mana arrepintirisha nij runa congregacionmanta llujshichishca cajpica ancianocunaca tucui congregacionmanmi chai runa testigo de Jehová canata saquishcata huillancuna. Pero ¿paita pingaipi churangapajchu chaita huillancuna? Mana. Ashtahuanpish huauqui panicuna congregacionmanta llujshichishcacunata Bibliapi mandashca shina tratana cashcata yuyarichunmi chaitaca huillancuna. Bibliapica congregacionmanta llujshichishcacunahuanca ‘ama tandanacunguichijchu. Paicunahuanca micungapajllapish ama tiyaringuichijchu’ ninmi (1 Corintios 5:​9-11). ¿Bibliapica imamantataj chaita rurachun nin? Apóstol Pabloca: “¿Ashalla levadura tucui masata pꞌunguillichij cashcataca manachu yachanguichij?” nircami (1 Corintios 5:6). Chai versopi nishca shinaca paicunapaj juchacunamanta mana arrepintirijcunaca caishuj huauqui panicunatapishmi Jehová Diosmanta caruyachi tucuncuna (Proverbios 13:20; 1 Corintios 15:33). w24.08 págs. 26, 27 párrs. 3, 4

Ñucanchijca Jehová Dios shinaca shujtajcunamanca mana poderta cui tucunchijchu. Pero Jehová Dios ñucanchijman cushca fuerzahuanmi shujtajcunata ayudai tucunchij. Por ejemplo, yuyajlla, ungushca huauqui panicunatami mandadocunata rurashpa o paicunapaj huasicunata pꞌichashpa ayudai tucunchij. Mana cashpaca Tandanacuna Huasita pꞌichashpa, allichishpapishmi ayudai tucunchij. Ñucanchij rimashcacunahuanpishmi shujtajcunamanca fuerzasta, animota cui tucunchij. ¿Canca pitataj alaja shimicunahuan felicitai o animai tucungui? ¿Paitaca ima shinataj ayudai tucungui? Tal vez paita visitanaman rishpa, telefonopi cayashpa, shuj tarjetitata o shuj mensajeta cachashpami animai tucungui. Achca shimicunata nishpa animanaca mana minishtirinchu. Ashtahuanpish shungumanta ashalla shimicunata nishpami paitaca animai tucungui. Chashna ayudajpimi chai huauqui panica Jehová Diosmanta ama caruyangapaj, llaquicunatapish ahuantashpa catingapaj fuerzasta charinga (Proverbios 12:25; Efesios 4:29). w24.09 pág. 28 párrs. 8-10

Siervo ministerial shina sirvicushpaca anciano shina sirvingapajmi alli cualidadcunata ña charingui. ¿Anciano shina huauqui panicunata sirvinata munanguichu? ¿Ancianocunaca congregacionpica ima trabajotataj rurancuna? Paicunaca huillanaman llujshishpami alli ejemplota churancuna. Shinallataj huauqui panicunata yachachingapaj, cuidangapajmi esforzarincuna. Paicunapaj rimashcacunahuan, rurashcacunahuanmi shujtajcunata sinchiyachincuna. Chaimantami Bibliapica ancianocunataca ‘shuj regalomi’ can nin (Efesios 4:8). Caipi yuyashun. Shuj trabajota charingapajca imatapish alli ruraj canallami minishtirin. Pero ¿anciano cangapajca imatataj rurana cangui? Alli huillaicunata alli huillaj, alli yachachij cashcatami ricuchina cangui. Pero ashtahuantajca Bibliapi nishca cualidadcunatami charina cangui (1 Timoteo 3:​1-7; Tito 1:​5-9). w24.11 pág. 20 párrs. 1-3