Octubre

Ancianocunapish, superintendentecunapish, Cuerpo Gobernantemanta huauquicunapishmi huaquin instruccioncunata cuncuna. Maipica chai instruccioncunata mana tucuita intindinchijchu. ¿Chaipica imatataj rurashun? ¿Chai instruccioncuna juchayuj huauquicunamanta shamushcatachu yuyashun? Ñucanchij ricushcallapi, yuyashcallapi confianapaj randica Jehová Dios paipaj pueblota ñaupajman pushacushcapimi confiana canchij. Chaimantami mana quejarishpa utca cazuna canchij (Hebreos 13:17). Cazujcuna cashpaca congregación ucupi tandalla cachunmi ayudashun (Efesios 4:​2, 3). Pushaj huauquicuna juchayuj cajpipish cazunami canchij. Chaimi Jehová Diosca achcata bendicianga (1 Samuel 15:22). Paipaj pueblopi imata corregina cashpaca Jehová Diosllatajmi chaitaca ruranga. w25.03 págs. 23, 24 párrs. 13, 14

Cunan punllacunapi achca profeciacuna pajtaricujta ricushpaca cushillami sintirinchij. Por ejemplo, “ura lado llajtata jatun mandaj”, “janaj lado llajtata jatun mandajhuan” mundo enterota mandasha nishpa ima shina paicunapura macanacucushcatami ricunchij (Daniel 11:40). Shinallataj cunan punllacunapica tucui muyundij Allpapimi huillacunchij. Chaimantami huaranga huaranga gentecunaca Jehová Diosta sirvinata agllashcacuna (Isaías 60:22; Mateo 24:14). Ashtahuanpish minishtishca tiempopimi Jehová Diosmanta shamuj achca yachaicunata chasquicunchij (Mateo 24:​45-47). Jehová Diosca shamuj punllacunapi ima tucunataca asha ashami intindichicun (Proverbios 4:18). ¿Jatun llaqui punllacuna callarijpica ñucanchij huauqui panicunahuan Jehová Diosta tandalla sirvishpa catingapaj imata ruranata yachashunchu? Ari. Chaitaca tucui shunguhuanmi crinchij. Shinapish shamuj punllacunapi ima tucunataca cunan punllacunapica manaraj tucuita yachanchijchu. w24.05 pág. 8 párrs. 1, 2

Rey David nishca shinaca ñucanchij cꞌalluhuan pitapish mana yangamanta llaquichinachu canchij. Maijancunaca shuj runa mana alli cashcata crichingapajmi paimantaca llullacunata nincuna. Shinallataj Salmo 15:​3-pi nishca shinaca Jehová Diospaj carpa huasipi cajcunaca ‘pitapish millaitaca mana ruranachu can’. Shinallataj paicunapaj amigocuna mana allicuna cashcata shujtajcuna yuyachunca paicunamantaca mana huashalla rimanachu can (Salmo 15:1). ¿Ñucanchijpish mana cuidadota charishpaca ñucanchij amigocunataca ima shinataj llaquichi tucunchij? Maijan ratoca mana munashpami ñucanchij rimashcacunahuan shujtajcunata llaquichi tucunchij. Por ejemplo, ¿shuj pani precursora canata saquijpi, shuj cusa huarmi Betelpi sirvinata saquijpi o shuj huauqui anciano, siervo ministerial shina sirvinata saquijpica imatataj rurana canchij? ¿“Caimantachari o chaimantachari chashna sirvinata saquircacuna” nishpachu shujtajcunahuan parlanacuna canchij? Mana. Ashtahuanpish paicunapaj causaimanta mana tucuita yachashcatami yuyarina canchij. Shinallataj Jehová Diospaj carpa huasipi cajcuna pitapish millaita mana rurana cashcata, mana huashalla rimana cashcatami yuyarina canchij. w24.06 págs. 11, 12 párrs. 11-13

Manaraj ima decisionta japishpaca Jehová Diospaj munai maijan cashcatami yuyarina canchij. Chashnami paita shungumanta manchashcata ricuchishun. Shinallataj Bibliata liyicushpaca: “Ñucapish chaipi cashca cashpaca, ¿imatataj ruraiman carcani?” nishpami tapurina cangui. Por ejemplo, Canaanman rij 10 runacunata canpish uyacushca cashpaca, ¿imatataj ruranguiman carca? ¿Paicuna nishcacunata crishpa canpishchu mancharinguiman carca? ¿O Jehová Diosta cꞌuyashcamanta paipaj ñaupajpi alli ricurinata mashcanguimanchu carca? Tucui israelitacunami Josué y Caleb verdadta nicushcataca mana crircacuna. Chaimantami paicunaca Jehová Dios cusha nishca allpamanca mana yaicui tucurcacuna (Números 14:​10, 22, 23). w24.07 pág. 10 párr. 7

Oseaspaj huarmi Gomerca shujtaj cꞌaricunahuanmi huainayashca carca. ¿Jehová Diosca Gomerca mana nunca cambiangachu nishpachu yuyashcanga? Mana. Jehová Diosca cada unopaj shungu ima shina cashcatami yachan. Chaimantami Oseasmanca: ‘Shujtaj cꞌarihuan cꞌuyanacushpa huainayashpa causacuj cambaj huarmita cꞌuyagri. Israelitacunaca chai shinallatajmi Mandaj Diosta saquishpa shujtaj dioscunata adorancuna. Chashna cajpipish Mandaj Diosca cꞌuyanmi’ nirca (Oseas 3:1; Proverbios 16:2). Oseaspaj huarmica juchata ruranataca manaraj saquishcachu carca. Shinapish Jehová Diosca paita perdonashpa paihuan cutin alli tucuchunmi Oseastaca mandarca. Chashna layallatajmi Yayitu Diosca israelitacuna achca juchacunata rurashca cajpipish paicunata cꞌuyanataca manataj saquirca. Ashtahuanpish paica paicunapaj juchacunamanta arrepintirishpa paipajman tigrachunmi ayudarca. Shinami shuj runa jatun juchata ruracujpipish Yayitu Diosca maquita chutaj shina paipaj juchamanta arrepintirichun ayudai tucun. w24.08 pág. 10 párr. 7

Apóstol Pablo cachashca cartata chasquij huauqui panicunaca manaraj Jesusta catishpaca judío religiontami catijcuna carca. Chaimantami huaquin cambiocunata ruranaca paicunapajca sinchi carca. Por ejemplo, judiocunami Jehová Dios agllashca pueblo carcacuna. Shinallataj achca huatacunatami Israelta mandajcunaca Jerusalenmanta mandajcuna carca. Diospaj huasipish Jerusalenpimi carca. Tucui judiocunami Moisesman cushca mandashcacunata, religionta pushajcuna cushca mandashcacunatapish cazujcuna carca. Shinallataj paicunaca micunamanta, circuncisionta ruranamanta, shujtaj llajtacunamanta cajcunata ima shina tratana cashcamantami mandashcacunata chasquircacuna. Shinapish Jesús huañushca qꞌuipaca templopi Diosman sacrificiocunata cunaca ña mana minishtirircachu. Shinallataj shujtaj cambiocunapishmi tiyarca. Chaimantami chai huauqui panicunapajca chai cambiocunata ruranaca sinchi carca (Hebreos 10:​1, 4, 10). Apóstol Pedropajpish, pai shina espiritualmente sinchi caj huauquicunapajpish mana jahuallachu carca (Hechos 10:​9-14; Gálatas 2:​11-14). Shinallataj huauqui panicuna judío religionta saquishcamantami chai religionta pushajcunaca paicunata catirashpa llaquichi callarircacuna. w24.09 pág. 9 párr. 4

Jehová Diosca paita sirvijcunaman ima trabajota mingashpaca ordenpi rurachunmi munan (1 Corintios 14:33). Por ejemplo, paica muyundij Allpapi paimanta huillachunmi munan (Mateo 24:14). Pero chai obrata pushachunca Jehová Diosca Jesusmanmi mingashca. Jesusca chai obra ordenpi rurarichunmi Diospaj pueblota pushacun. Por ejemplo, punta siglopica Jerusalenpi caj apostolcuna, ancianocunami decisioncunata japishpa, instruccioncunata cushpa congregacioncunapi orden tiyachun ayudarcacuna (Hechos 15:2; 16:4). Shinallataj congregacioncunata ñaupajman pushachun, instruccioncunata cuchunca ancianocunatami nombrajcuna carca (Hechos 14:23). Huauqui panicuna pushaj huauquicunapaj instruccioncunata cazushcamantami “crishcapi sinchiyarishpa, punllanta mirarishpa catircacuna” (Hechos 16:5). w24.04 pág. 8 párr. 1

16 de nisán tutamanta ladotaca huaquin huarmicunami Jesusta churashca jutcuman rircacuna (Lucas 24:​1, 10). Jesuspaj cuerpo chai jutcupi mana cashcata ricushpaca María Magdalenaca Pedroman, Juanmanmi rato huillanaman rirca. Chai huashaca paicuna chai jutcuman ricujpimi Mariaca paicunata catishpa rirca. Paicunapish Jesús chai jutcupi mana cashcata ricushpaca huasimanmi tigrarcacuna. Pero Mariaca chai jutcupimi huacashpa saquirirca. María huacacujta ricushpaca Jesusca llaquillami sintirirca. Chaimi Mariata animangapajca paihuan parlanacurca. Chai huashaca pai causarishcata caishuj discipulocunaman huillagrichunmi privilegiota curca. Chaita rurashpami Mariaca achcata animarishcanga (Juan 20:​17, 18). w24.10 pág. 13 párr. 7

Moisesca profeta, juez, soldadocunata pushaj, quillcajmi carca. Paica Egipto llajtamantami israelitacunata llujshichirca. Shinallataj Jehová Dios achca milagrocunata rurajtami ricurca. Jehová Diosca Moisesmanca Bibliapi tiyaj callari pichca librocunata escribichunmi yuyaita curca. Moisesca Salmo 90, Salmo 91, Job librotapishmi escribishca yuyachin. Moisesca 120 huatacunata charishpami ñalla huañugrirca. Chaimi paica tucui israelitacunata tandachishpa Jehová Dios imallata rurashcata yuyachirca. Paicunaca Jehová Dios achca milagrocunata rurashcatami ricurcacuna. Shinallataj egipciocunata castigashcatami ricurcacuna (Éxodo 7:4). Paicunaca Jehová Dios Puca mama cuchata chaupijpimi chaita pasarcacuna. Faraonpaj soldadocunata tucuchijtapishmi ricurcacuna (Éxodo 14:​29-31). Shinallataj chaquishca pambapi cashpaca Jehová Dios paicunata ima shina cuidajtami ricurcacuna (Deuteronomio 8:​3, 4). Cunanca israelitacunaca ñallami Dios cusha nishca allpaman yaicugrircacuna. Chaipimi Moisesca tucuri shimicunata nishpa paicunata animarca. w24.11 págs. 8, 9 párrs. 3, 4

¿Jesusca Galileapi cashpa achca gentecunaman yachachicushpaca ungidocunamantachu parlacurca? Mana. Huata 32-pi Galileapi cashpaca Jesusca tandata carachun nij judiocunahuanmi parlacurca. Shinapish Jesusca chai tandatapish yalli valishca micunamantami paicunamanca parlarca. Chai micunami paicunamanca huiñai causaita cui tucurca. Ashtahuanpish Jesusca huañushcacuna cutin causarishpa huiñai causaita chari tucushcatami parlarca. Paica ashalla gentecuna chasquigrishca bendicionmantaca mana parlacurcachu. Por ejemplo, Galileapi cashpaca tucui gentecuna chasqui pudishca bendicionmantami parlacurca. w24.12 págs. 11, 12 párrs. 10, 11

Jehová Diosca shujtajcunata llaquichijcunatami pꞌiñan (Salmo 11:5). Ashtahuancarin paicunapaj huarmicunata macaj cusacunataca manataj ricunachinchu (Malaquías 2:16). Cusacuna paicunapaj huarmicunata mana alli tratajpica Jehová Diosca paicunamantami caruyanga. Paicuna imalla mañashcacunatapish manachari uyanga (1 Pedro 3:7). Huaquin cusacunaca pꞌiñarishpaca llaquichij shimicunahuanmi paicunapaj huarmicunataca rimancuna. Pero Jehová Diosca ‘yallitaj pꞌiñarijcunata, colerajcunata, caparijcunata, llaquichij shimicunata rimajcunataca’ manataj ricunachinchu (Efesios 4:​31, 32). Paicunapaj huarmicunata llaquichij shimicunahuan rimaj cusacunaca familia ucupica achca llaquicunatami charingacuna. Ashtahuancarin Jehová Diospaj ñaupajpica mana alli ricuringacunachu (Santiago 1:26). Pornografiata ricujcunaca Jehová Diospaj ñaupajpica mana alli ricurincunachu. Shinallataj chaita ricuj cusacunaca paicunapaj huarmicunata mana respetashcata, mana valorashcatami ricuchincuna. Jehová Diosca cusacuna paicunapaj ruraicunahuan, paicunapaj yuyaicunahuan paicunapaj huarmicunata cꞌuyashcata, respetashcata ricuchichunmi munan. Jesusca: “Maijanpish chayarina munaihuan shuj huarmita ricushpa saquirijca, ñami paipaj shungupica huainayashca” nircami (Mateo 5:​28, 29). w25.01 págs. 9, 10 párrs. 6-8

Bibliapi nishca shinaca Jehová Diosta sirvijcunaca cashcata rurajcuna shinami paipaj ñaupajpi ricurincuna. ¿Chaica imatataj nisha nin? Jehová Diosca ñucanchij juchacunamanta pagachunca ña mana mañanchu. Pero ¿Jehová Diosca paipaj mandashcacunata ladoman saquishpachu chaita ruran? Mana. Jehová Diosca juchataca manataj ricunachinchu. Shinallataj paica ñucanchijcuna allita rurashcallamantaca mana cashcata rurajcunata shinachu ricun. Ashtahuanpish paipish, Jesuspish ñucanchijta quishpichingapaj tucui imalla rurashcata crijpimi Jehová Diosca ñucanchij juchacunata perdonan (Romanos 3:24). ¿Jehová Diospaj ñaupajpi cashcata rurajcuna shina ricurishcamantaca ima bendicioncunatataj charinchij? Maijancunaca jahua pachapi Jesushuan mandangapajmi agllashca cashcacuna. Paicunaca Jehová Diospaj huahuacunami tucushcacuna (Tito 3:7; 1 Juan 3:1). Paicunapaj juchacunamanta perdonashca cashcamantami chai juchacunata nunca mana rurashca shina can. Chaimantami paicunaca Diospaj Gobiernopi mandai tucuncuna (Romanos 8:​1, 2, 30). Cutin shujtajcunaca cai Allpapi huiñaita causana esperanzatami charincuna. Paicunaca Jehová Diospaj amigocunami tucushcacuna. Paicunapaj juchacunamantapishmi perdonashca cashcacuna (Santiago 2:​21-23). w25.02 pág. 5 párr. 17; pág. 6 párr. 18

Shuj cutinca apóstol Pedroca Jehová Dios shina mana yuyashcatami ricuchirca. Jesusca paipaj apostolcunataca Jerusalenman rijpi paita japishpa llaquinaita huañuchina cashcatami huillarca (Mateo 16:21). Pedroca Dios agllashca Quishpichij Mesías, Jesús cashcataca allimi yacharca. Chaimi paica: “Jehová Diosca Jesús huañuchunca manataj saquingachu” nishpa yuyashcanga (Mateo 16:16). Chashna yuyashpami Pedroca Jesustaca: “Amito, ama chaita nichu, canca chai llaquicunataca mana charinguichu” nirca (Mateo 16:22). Chashna nishpami Pedroca Jehová Dios shina, Jesús shina mana yuyashcata ricuchirca. Jesusca Jehovapaj munaita pajtachingapaj sufrina, huañuna cashcataca allimi yacharca. Chaimanta apóstol Pedro “chai llaquita mana charinguichu” nishpa alli munaihuan nijpipish Jesusca chaitaca mana uyarcachu. Chai qꞌuipami apóstol Pedroca Jehová shina yuyana cashcata intindirca. Ñucanchijpish Jehová shina yuyanatami yachana canchij. w25.03 pág. 9 párrs. 5, 6

¿Shuj cꞌuyashca amigo, o familiachu canta llaquichirca? Chashna llaquichijpipish Jehová Dios canta achcata cꞌuyashcatami yuyarina cangui. Chaimanta, shujtajcuna llaquichijpipish Jehová Dios canta ña mana cꞌuyashcata ama yuyaichu. Pi canta llaquichishcamanta llaquilla cashpaca cai punllapaj versopi rey David imata quillcashcatami yuyarina cangui. Shuj diccionariopica: “Cai versopi espiritupi llaquilla cajcunamanta parlashpaca ‘llaquicunallahuanmi causashun’ nishpa yuyajcunamantami parlacun” ninmi. ¿Chashna yuyajcunataca Yayitu Diosca ima shinataj ayudan? Chai salmopi nishca shinaca Jehová Diosca llaquilla cajcunapaj cꞌuchullapimi can. Ima shinami shuj yaya paipaj huahua llaquilla cajpi paita ugllashpa cushichin, chashnallatajmi Yayitu Diosca ñucanchijcunamanta llaquirishpa utca ñucanchijta ayudasha nin. Shinallataj ñucanchij llaquicunata ahuantashpa catichunca sumaj bendicioncunata ñalla chasquinatami yuyachin (Isaías 65:17). w24.12 pág. 23 párrs. 13, 14

Cunan punllacunapica congregacionta pushaj ancianocunaca Timoteo shinami Jehová Diosta tucui shunguhuan sirvingapaj esforzarincuna. Paicunaca Jehová Dios paicunapaj esfuerzota valorashcatami yuyarina can. Maijan ancianocunaca congregacionpi alli yachachingapaj, predicacionman llujshingapaj esforzarishpapish shujtaj trabajocunatapish rurangapajmi esforzarincuna. Por ejemplo, maijan ancianocunaca construccionpi, llaquipi caj huauqui panicunatapishmi ayudancuna. Shujtajcunaca Grupo de Visita a Pacientes, Comité de Enlace con los Hospitales nishcacunapimi ayudancuna. Anciano huauquicunaca congregacionpi caj huauqui panicunaca Jehová Diospaj cashcatami yachancuna. Chaimantami paicunaman mingashcacunata tucui shunguhuan pajtachingapaj esforzarincuna. Ashtahuanpish paicunaca chaita rurashcamanta Jehová Dios bendicianatami seguros cancuna (Colosenses 3:​23, 24). Mana tucuicunachu ancianocuna cai tucunchij. Pero tucuicunami Jehová Diosta sirvingapaj esforzari tucunchij. Ñucanchij esfuerzocunata ricushpaca Jehová Diosca cushillami sintirin. Por ejemplo, Diospaj obra ñaupajman catichun ashalla cullquihuan ayudajpipish Jehová Diospajca achca valishcami can. Ashtahuancarin Jehová Diospaj shunguta cushichingapajca ñucanchijta llaquichijcunatami perdonana canchij. Caipi ricushca shinaca Jehová Diosta sirvingapaj pꞌichillata rurai tucujpipish Jehová Diosca ñucanchij esforzarishcataca achcatami valoran. Paica ñucanchijta cꞌuyashcamantami sumaj bendicioncunata cunga (Lucas 21:​1-4). w24.06 págs. 23, 24 párrs. 12, 13

Mana cuidadota charishpaca tucuicunami juchapi urmai tucunchij. Maijan huauqui o panica jatun juchapi urmashca qꞌuipaca “juchapi urmagrishcataca mana cuentata curcanichu” nishpachari yuyanga. Pero alli yuyarishpaca asha asha juchapi urmashcatami cuentata cunga. Tal vez paica mana alli amigocunahuanmi tandanacurca. Mana cashpaca mana alli diversioncunatami agllashcanga. Internetpipish mana alli paginacunamanmi yaicushcanga. Mana rina lugarcunamanpishmi rishcanga. Shinallataj Yaya Diosta mañanata, Bibliata liyinata, tandanacuicunaman rinata, predicacionman llujshinatapishmi saquishcanga. Chaimi Proverbios libropi parlaj joven shina asha asha juchapi urmashcanga. Caipi yachashca shinaca juchapi ama urmangapaj esforzarina cashpapish juchaman apaj ruraicunamantapishmi caruyana canchij. Salomonca chai jovenmanta parlashpaca chaitami yachachisha nirca (Mateo 5:​29, 30). w24.07 pág. 16 párrs. 10, 11

¿Chai valishca obraca imataj can? Diospaj Reinomanta huillanami chai valishca obraca can. Diosmanta huillashpami shujtaj gentecunapish quishpirichun ayudanchij (2 Corintios 4:1). Cutin, ñucanchijcunaca allpa puñucuna shinami canchij. ¿Imamanta? Pablo causashca punllacunapica gentecunaca valishca cosascunatami allpa puñucunapi apajcuna carca. Por ejemplo, micunacunata, vinota, cullquitami allpa puñucunapi apajcuna carca. Caimantaca ¿imatataj yachanchij? Ñucanchijca valishca cosascunata apaj puñucuna shinami alli huillaicunataca gentecunaman yachachinchij. Jehová Dios ayudajpimi tucui shunguhuan huillashpa catingapaj fuerzasta charinchij. Huaquinpica “gentecunaca rimangacunami” nishpami huillanata manchashcanchij. Pero ¿ama manchangapajca imatataj rurana canchij? Autoridadcuna ama huillachun jarcasha nijpi apostolcuna imata rurashcatami yuyarina canchij. Paicunaca ama manchangapajca Jehová Diostami, “mana manchashpa cambaj shimimanta huillashpa catichun ayudahuai” nishpa mañarcacuna. Yaya Diosca paicunapaj mañaitaca chai ratomi cutichirca (Hechos 4:​18, 29, 31). Ñucanchijpish manchaita charishpaca Jehová Diostami mañana canchij. Chashnami gentecunata manchanapaj randica paicunapish quishpirichun huillashpa catishun. w24.04 págs. 16, 17 párrs. 8, 9

Jehová Diosta cꞌuyashcamantami paipaj shutita jatunyachishun ninchij. Diabloca Jehová Diosmantaca achca llullacunatami nishca. Pero ñucanchijcunaca Diablo imalla nishcacuna mana cierto cashcatami ricuchishun ninchij (Génesis 3:​1-5; Job 2:4; Juan 8:44). Diosmanta huillashpami alli shunguta charij gentecunata Diablopaj llullacunapi ama crichun ayudanchij. Ashtahuanpish tucui gentecuna Jehová Dios yallitaj cꞌuyaj cashcata, alli mandaj cashcata, paipaj gobierno ñalla tucui llaquicunata tucuchishpa sumaj causaita cugrishcatami huillashpa purinchij (Salmo 37:​10, 11, 29; 1 Juan 4:8). Chaita rurashpami Jehová Diospaj shutita jatunyachinchij. Ashtahuanpish testigo de Jehovacuna nishca shutita charishcamantapishmi huillana canchij. w24.05 pág. 18 párr. 12

“Cꞌuyaihuan chasquij” cashcata ricuchi. Mana cambaj amigocunallatachu ayudana cangui. Shujtajcunapajpishmi allicunata rurana cangui (1 Pedro 4:9). Shuj diccionariopica: “Cꞌuyaihuan chasquij runaca paipaj shunguta pascashpami mana rijsishca gentecunataca paipaj huasipi cushicushpa chasquin” ninmi. Shinaca cashna tapuri: “¿Visitanaman shamujcunataca alli chasquij cashcatachu ricuchini?” (Hebreos 13:​2, 16). Cꞌuyaihuan chasquij runaca tucui laya gentecunatami ayudanata munan. Por ejemplo, superintendente de circuito huauquicunata, conferenciata cunaman shamuj huauquicunata, pobre huauquicunatapishmi cushicushpa chasquin (Génesis 18:​2-8; Proverbios 3:27; Hechos 16:15; Romanos 12:13). w24.11 pág. 21 párr. 6

Jesusca cai chꞌimbapuraipica chunga solteracuna noviota tupanaman llujshishcatami nirca (Mateo 25:​1-4). Tucui solteracunami bodapi noviota compañasha nircacuna. Paicunamantaca pichcaca alli yuyaiyujcuna, pichcaca yuyai illajcunami carca. Alli yuyaiyuj solteracunaca noviotaca allichirishcami chapacurcacuna. Noviota tuta horascama shuyana cajpipish paicunaca shuyarcacunallami. Tutapi achijyachingapajca paicunaca lamparacunatami apashcacuna carca. Shinallataj chai lamparacunapi churangapajmi ashtahuan aceiteta apashcacuna carca. Chaimantami paicunapaj lamparacunahuan achijyachishpa catingapaj allichirishca carcacuna (Mateo 25:​6-10). Novio chayamujpica alli yuyaiyuj solteracunaca paihuanmi bodaman yaicurcacuna. Chashna layallatajmi espiritualmente rijcharishca, tucuipi Jehová Diosta cazuj ungidocunaca Jesús shamujpica jahua pachapi paihuan tandanacungacuna (Apocalipsis 7:​1-3). w24.09 pág. 21 párr. 6

Alli huillaicuna muyundij Allpapi causaj gentecunata ayudacushcata ricushpami achcata cushicunchij. Por ejemplo, cada huatami achca gentecunaca Jesús huañushcata yuyarina tandanacuiman shamuncuna, ñucanchijhuan Bibliata estudiai callarincuna. Shinallataj achcacunami predicanaman llujshishpa bautizarincuna. Mashna gentecuna alli huillaicunata chasquina cashcataca mana yachanchijchu. Pero Jehová Diosmi jatun llaqui punllamanta quishpirichun achca gentecunata tandachicun (Apocalipsis 7:​9, 14). Jehová Diosmi chagra dueñoca can. Paimi mashna gentecuna alli huillaicunata uyana cashcata yachan. Chaimantami ñucanchijca cushicuihuan predicashpa catinalla canchij (Lucas 10:2). Jesusta alli catijcunaca siempremi cushicushpa predicanchij. Por ejemplo, gentecunaca apostolcuna mana manchashpa cushicuihuan huillajta ricushpaca paicuna “Jesushuan purijcuna cashcatami cuentata curcacuna” (Hechos 4:13). Ñucanchijtapish Jesusta ricushca shinallataj richunmi munanchij. Chaimantami cushicuihuan huillashpa catina canchij. w25.03 pág. 18 párr. 15; pág. 19 párrs. 17, 18

Bibliapica huaquin gentecuna imapaj mana valij shina ricurijpipish Jehová Diospajca achca valishca cashcatami yachachin. Por ejemplo, Jehová Diosca Israel llajtata mandachunca Jesepaj ocho churicunamantaca shujtami agllashca carca. Chaimi pai agllashca mandajpaj umapi aceiteta tallichun profeta Samuelta cacharca. Samuel Jesepaj huasiman chayajpica Jeseca paipaj siete churicunallatami cayarca. Pero paipaj último churi Davidtaca mana cayarcachu. Shinapish Jehová Diosca Davidtami rey cachun agllashca carca (1 Samuel 16:​6, 7, 10-12). Jehová Diosca David shungu ucupi ima shina cashcatami ricurca. Paica Jehová Diostaca shungumantami cꞌuyaj carca. Jehová Dios canmanta sustarishcata ima shina ricuchishcata yuyai. Por ejemplo, paica can minishtishca consejocunatami cun (Salmo 32:8). Canta alli rijsishcamantami paica chashna consejocunata cun (Salmo 139:1). Jehová Dios cushca consejocunata cambaj causaipi pajtachishpa cushilla causacushcata ricushpaca Jehová Dios canmanta sustarij cashcatami cuentata cungui (1 Crónicas 28:9; Hechos 17:​26, 27). Shinallataj Yaya Diosca cambaj esfuerzocunatami ricun. Shungu ucupi can alli cashcata ricushpaca paica cambaj amigomi tucusha nin (Jeremías 17:10). w24.10 págs. 25, 26 párrs. 7-9

Canca Jehová Diostami cꞌuyangui. Shinallataj shujtajcunatapishmi sirvinata munangui. ¿Shujtajcunata sirvina munaita charingapajca imatataj rurana cangui? Huauqui panicunata sirvishpa cushilla cai tucushcatami yuyarina cangui. Jesusca: “Cujmi chasquijtapish yalli cushicun” nircami (Hechos 20:35). Jesusca cai versopi nishca shinami rurashpa causarca. Paica shujtajcunata sirvishpami cushilla sintirirca. Shujtajcunata sirvishpa Jesús cushilla cashcatami yuyarina canchij (Marcos 6:​31-34). Shuj punllaca Jesuspish, paipaj apostolcunapish shaicushcami carcacuna. Chaimantami paicunaca ashata samaringapaj shuj chulunlla pushtuman rircacuna. Pero paicuna manaraj chayajpimi achca gentecunaca Jesús paicunaman yachachichun chaiman chayarcacuna. Jesusca: “Ñucapish, ñuca amigocunapish micungapajllapish tiempota mana charishcanchijchu” nishpami gentecunata tigrachishpa cachanman carca. Mana cashpaca Diosmanta ashata yachachishpami tigrachishpa cachanman carca. Pero paica gentecunata cꞌuyashcamantami chishicama yachachirca (Marcos 6:35). w24.11 pág. 16 párrs. 9, 10

Yaya mamacuna cancunapaj huahuacunata Bibliamanta shujtajcunaman yachachichun animai (Romanos 10:10). Shuj instrumento musicalta ima shina tocanata yachangapajca puntapica jahualla tonocunatami tocana canchij. Pero tiempo pasajpica ashtahuan sinchi tonocunatami tocai tucushun. Ñucanchij crishcacunamanta parlanaca chashna layallatajmi can. Chaimantami huahuacuna jahualla temacunamanta predicai callarichun yachachina canguichij. Por ejemplo, shuj huahuaca shuj compañerotaca: “¿Achca ingenierocuna cai Allpapi tiyashcacuna ima shina cashcata alli ricushpa huaquin cosascunata rurashcata yacharcanguichu? Cai videopimi caimanta ashtahuan yachachin” nishpami predicai tucun. Shinallataj jw.org paginapi “¿Lo diseñó alguien?” nishca partepi tiyaj shuj videota ricuchishca qꞌuipaca: “Cientificocuna cai Allpapi imalla tiyashcacunata copiashpa huaquin cosascunata rurajpipish gentecunaca paicunatami felicitancuna. ¿Manachu cai Allpapi tucui imalla tiyashcacunata rurajtapish felicitana canchij?” nishpami predicai tucuncuna. Jovencitocuna chashna yachachijpimi paicunapaj compañerocunaca Diosmanta ashtahuan yachana munaita charingacuna. w24.12 pág. 19 párrs. 17, 18

Jehová Diosca juchamanta, huañuimanta ñucanchijta quishpichingapajmi paipaj Churita cacharca. Pero ¿huaranga huaranga gentecunataca ima shinataj shujlla runa quishpichi tucurca? Apóstol Pabloca: “Ima shinami shuj runa mana cazushcamanta achca gentecuna juchayuj tucurca. Chashnallatajmi shuj runa cazushcamantaca achca gentecuna cashcata ruraj tucungacuna” nircami (Romanos 5:19; 1 Timoteo 2:6). Cai versopi nishca shinaca, shujlla jucha illaj runa Jehová Diosta mana cazushcamantami tucuicuna juchayujcuna tucurcanchij. Chaimantami ñucanchijta quishpichingapaj shujlla jucha illaj runa huañuna carca. Tal vez maijancunaca: “¿Adán mana cazujpipish imamantataj Jehová Diosca paipaj huahuacuna huiñai huiñaita causashpa catichun mana saquirca?” nishpami yuyancuna. Juchayujcuna cashcamantami ñucanchijcunaca chashna yuyanchij. Pero Jehová Diosca ñucanchijta yallimi cashcata ruraj can. Adanca jatun juchatami rurarca. Chaimantami Yaya Diosca mana maqui cruzashca saquiri tucurca. w25.01 págs. 20, 21 párrs. 3, 4

Apóstol Pabloca huañuna cashcata yachashpapish paipaj causaipi allicunata rurashcamantami cushilla sintirirca. Chaimantami paica: “Callpanatapish tucuchishcanimi. Crishcapipish catishcanimi” nirca (2 Timoteo 4:​6-8). Apóstol Pabloca Jehová Diosta sirvingapajmi paipaj causaitaca utilizarca. Chaimantami Jehová Dios paimanta cushilla cashcata seguro carca. Ñucanchijcunapish Jehová Diosta cushichingapajca alli decisioncunatami japina canchij. ¿Chaitaca ima shinataj rurai tucunchij? Apóstol Pabloca paimanta Jehová Diosta catijcunamantaca caitami nirca: “Ñucanchijca crishcatami catinchij, ñahuihuan ricushcataca mana catinchijchu”. Jehová Diosta sirvijcunaca Diospaj munai maijan cashcata yuyarishpami imatapish decidincuna. Diospi confiashcamantami pai ayudanatapish crincuna. Shinallataj Bibliapi nishcacunata catina valishca cashcatami yuyancuna (Salmo 119:66; Hebreos 11:6). w25.03 pág. 20 párrs. 1, 2

Achca gentecunaca Jehová Diosta manaraj rijsishpaca pꞌiñaj animalcuna shinami carcacuna. Pero espíritu santopaj ayudahuanmi paicunaca cambiai tucushcacuna (Isaías 65:25). Paicunaca manso ovejitacuna shina tucungapajmi sinchita esforzarishcacuna (Efesios 4:​22-24). Shinapish juchayujcuna huacharishcamantami tucuicuna maipica pandari tucunchij. Pero juchayujcuna cashpapish tucuicunami shuj shinalla Jehová Diosta tranquilo sirvi tucunchij. Jehová Dios ayudashcallamantami chashna causai tucunchij (Tito 2:11). Jehová Diospaj nishcacunaca siempremi pajtarin (Isaías 55:​10, 11). Jehová Dios imalla nishcacuna pajtaricushcamantami cunanca shuj paraisopi shina cushilla causacunchij. Shinallataj ñucanchij huauqui panicunahuan tandalla adoracushcamantami cai millai mundopi causacushpapish tranquilo sintirinchij (Salmo 72:7). ¿Shujtaj gentecunapish ñucanchijcuna shina cushilla causachunchu munanchij? Chaipajca Diospaj Shimitami huillashpa, yachachishpa catina canchij (Mateo 28:​19, 20). w24.04 pág. 23 párr. 13; pág. 23 párr. 15

Jesusca Jehová Diostaca paipaj tucui yuyaihuanmi cꞌuyaj carca. Paita cushichina yuyaillami causaj carca. Chaimantami llaquita apana cashpapish Diospaj munaita pajtachirca. Chaita pajtachingapaj imapish jarcachunca manataj saquircachu. Pedropish, caishuj apostolcunapish Jesushuan tiempota pasashpami pai ima shina yuyashcata yachai tucurcacuna. Chaimi Pedroca pai quillcashca primera cartapica: “Cancunapish Cristo yuyashca shinallataj yuyangapaj allichirichij” nirca (1 Pedro 4:1). Apóstol Pedroca “allichirichij” nishpaca macanacungapaj shuj soldado allichiricuj shina allichirina cashcatami nicurca. ¿Imapajtaj allichirina canchij? Jesús shina yuyangapaj. Jesús shina yuyashpallami mana alli munaicunamanta, cai mundopi tiyaj mapa ruraicunamantapish anchuri tucushun (2 Corintios 10:​3-5; Efesios 6:12). w25.03 págs. 8, 9 párrs. 1-3

¿Noviocunaca noviocuna cashpaca imataj yachana can? Cambaj noviomanta, noviamanta manaraj ashtahuan enamorarishpaca importante temacunamantami parlanacuna canguichij. Por ejemplo, cada uno ima metacunata charishcatami yachana canguichij. ¿Cambaj noviata, noviota alli rijsingapajca imatataj rurai tucungui? Ishquindijmi imata mana pacashpa parlanacuna canguichij. Shinallataj alli yuyashpami imatapish tapuna canguichij. Cada uno imata nijpipish atencionhuanmi uyana canguichij (Santiago 1:19). Shinallataj ishquindijmi micui tucunguichij. Gentecuna tiyan ladocunapi paseanaman rishpa, predicacionman llujshishpapishmi parlanacungapaj oportunidadta charinguichij. Cancunapaj amigocunahuan, familiacunahuanpishmi paseanaman ri tucunguichij. Shinallataj shujtaj ruraicunatapishmi rurai tucunguichij. Chashnami cada uno ima shina comportarijta ricui tucunguichij. w24.05 págs. 27, 28 párrs. 6, 7

Ñallami jatun llaquicunahuan chꞌimbapurashun. Chaipica Jehová Diospi ashtahuan confianatami minishtishun. Ñaupa punllacunapi, cunan punllacunapipish Jehová Dios paita sirvijcunata ima shina ayudashcata liyishpami chaitaca rurai tucushun. Chai experienciacunata liyicushpaca Jehová Dios chai huauqui panicunaman sinchi Rumi shina cashcata ima shina ricuchishcatami yuyana canchij. Chashnami Jehová Dios ñucanchijpajpish sinchi Rumi shina cashcata seguros cashun. Ashtahuanpish Jehová Dios shina cangapaj esforzarishpaca congregacionpi caj huauqui panicunatami ayudai tucushun. Por ejemplo, Jesusca Simontaca Cefas nishpami shutichirca. Griego rimaipica Cefas shutica Pedromi can. Chai shutica “rumi” nisha ninmi (Juan 1:42). ¿Jesusca imamantataj Simontaca Pedro nishpa shutichirca? Chai shutita churashpami Jesusca Pedro huauqui panicunata animashpa congregacionpi tucuicuna tandalla cachun ayudanata ricuchirca. Shinallataj Bibliapica congregacionta pushaj ancianocunamanta parlashpaca cai huauquicunaca “rupai punllapi llandurina rumi urcu shinami canga” ninmi (Isaías 32:2). Chaita nishpaca ancianocuna huauqui panicunata cuidana cashcatami nin. Pero mana ancianocuna cashpapish tucuicunami Jehová Dios shina cangapaj esforzari tucunchij. Chashnami congregacionpi tucuicuna tandalla cachun ayudashun. w24.06 págs. 28, 29 párrs. 10, 11

Jehová Diospaj ñaupajpi alli ricurij israelitacunapaj mandajcunaca paillata adorangapajmi esforzarircacuna. Diospaj ñaupajpi mana alli ricurij mandajcunaca Jehová Diospaj mandashcacunata ladoman saquishpami yanga dioscunata adorai callarircacuna (1 Reyes 21:​25, 26; 2 Crónicas 12:1). Israelitacunaca yanga dioscunata adorai callarishpaca shujtajcunatami yangamanta llaquichijcuna carca. Jatun juchacunatapishmi rurajcuna carca. Pero ama chashna causachunca mandajcunami Jehová Diosllata adorachun paicunataca ayudana carcacuna. Chaitami Jehová Diosca munarca (Oseas 4:​1, 2). Shinallataj mandajcunapish, israelitacunapishmi Jehová Diosllata sirvingapaj ari ninacushcacuna carca. Chaimantami yanga dioscunata adorai callarishpaca Yaya Diospaj ñaupajpica huainayashca shinallataj ricurirca (Jeremías 3:​8, 9). Caipi yuyashun. Shuj cusa o huarmi huainayana juchapi urmashpaca paipaj cusata o paipaj huarmitami achcata llaquichin. Chashna layallataj ñucanchijcuna Jehová Dioshuan ari ninacushca jahua yanga dioscunata adorai callarishpaca paitaca achcatami llaquichishun (Deuteronomio 4:23). w24.07 págs. 22-24 párrs. 12-15