Biblia yachachishcacunaca mana llullachu

1. ¿Bibliapi tiyaj yachachishcacunaca imatataj ricuchin?

TESTIGO de Jehovacunaca siempremi gentecunamanca Bibliapi tiyaj yachachishcacunata yachachinchij. ¿Bibliapi tiyaj yachachishcacunaca imatataj ricuchin? Ñucanchij crishcacunata, Diosta ima shina adoranata, ima shina causana cashcatami ricuchin. Bibliapi mana llullata yachashpa, Biblia yachachishcata cazushpami panda religioncunapaj yuyaicunata ña mana crinchij. Chaimantami juchayujcuna cashpapish cushilla causanchij (Juan 8:32).

2. ¿Maijancunaca imata ricushpataj Bibliata yachanata decidishcacuna?

² Jesusca paita catijcunataca: “Caishuj chaishuj cꞌuyanacujpimi, cancunataca ñuca yachacujcunataj cashcata tucuicuna rijsingacuna” nircami (Juan 13:34, 35-ta liyipai). Chaimantami huaquincunaca testigo de Jehovacuna alli comportarijta, cꞌuyaita ricuchijta ricushpaca Bibliamanta yachanata decidishcacuna (1 Pedro 2:12). Maijancunaca punta cutin tandanacuiman rishpaca ima yachachishcataca manachari yuyarincuna. Ashtahuanpish huauqui panicuna cꞌuyaita ricuchishcatachari yuyarincuna. Pero sinchi feta charingapajca cꞌuyaita ricuchishcallataca mana ricunachu canchij. ¿Imatataj ashtahuan rurana canchij?

3. ¿Huauqui panicuna cꞌuyanacujta ricushpallaca ima laya fetataj charishun?

³ Huauqui panicuna cꞌuyaita ricuchishcata ricushpallaca ñucanchij feca mana sinchiyaringachu. ¿Imamanta? Tal vez shuj huauqui, shuj anciano, o shuj precursorchari ima juchapi urman. Mana cashpaca ñucanchijtachari llaquichin. O testigo de Jehovacunaca pandatami yachachin nishpachari llullai callarin. ¿Caicunata ricushpaca Diosta sirvinatachu saquinchijman? ¿Caimantaca imatataj yachanchij? Sinchi feta charingapajca mana shujtajcuna imata rurashcatachu ricuna canchij. Ashtahuanpish Dioshuan alli apanacushpallami sinchi feta charishun. Ñucanchij feca shuj huasi shinami can. Shuj huasita lodo jahuapi shayachijpica ratomi urmai tucun. Chashnallatajmi Biblia yachachishcacunata alli intindingapaj mana esforzarijpica ñucanchij feca rato chiriyai tucun. Chaimantami ñucanchijllataj Bibliapi yachachishcacuna verdad cashcata intindingapaj esforzarina canchij (Romanos 12:2).

4. Mateo 13:3 al 6, 20, 21-pi nishca shinaca ¿llaquicuna ricurijpica maijancunapaj feca imataj tucun?

⁴ Jesusca ‘maijancunaca Diosmanta yachanataca cushicushpami chasquingacuna. Pero llaquicuna shamujpica paicunapaj feca chiriyangami’ nircami (Mateo 13:3-6, 20, 21-ta liyipai). Paicunaca Jesusta catijcuna llaquicunata charina cashcataca mana intindincunachu (Mateo 16:24). Mana cashpaca Diosta sirvijcunaca problemacunataca mana charingachu. Ima problemacunatapish Diosmi anchuchinga nishpami yuyancuna. Pero cai millai mundopi causacushcamantami achca llaquicuna ricurin. Mana yuyashcapimi ñucanchij causaica cambiai tucun. Chaimi llaquilla sintiri tucunchij (Salmo 6:6; Eclesiastés 9:11).

5. ¿Achca huauqui panicunaca Biblia yachachishcacunapi crishcataca ima shinataj ricuchincuna?

⁵ Achca huauqui panicunaca tucui shunguhuanmi Bibliapi yachachishcacuna verdad cashcata crincuna. Chaimantami shuj huauqui paicunata llaquichijpi o mana allita rurajpica Diospi crinataca mana saquincuna (Salmo 119:165). Chaipaj randica paicunapaj fetami ashtahuan sinchiyachincuna (Santiago 1:2-4). ¿Ñucanchijpish sinchi feta charingapajca imatataj rurana canchij?

DIOSMANTA ALLI YACHASHUNCHIJ

6. ¿Jesusta punta catijcunaca imamantataj sinchi feta charircacuna?

⁶ Apostolcuna causan punllacunapi Diosta sirvijcunaca Diospaj Shimita estudiashcamanta, Jesús yachachishcacunata chasquishcamantami sinchi feta charircacuna (Gálatas 2:5). Jesusta catijcunaca pai ñucanchijmanta huañushcata, pai causarishcatapishmi crinchij. Apóstol Pabloca cai yachachishcacuna verdadtaj cashcatami crirca. Paica, ‘Diospaj Shimi ima nicushcata huillashpa Cristoca llaquita apashpa huañushcacunapaj chaupimanta causarinatajmi carca’ nishpami alli intindichirca (Hechos 17:2, 3). Jesusta punta catijcunaca chai yachachishcacunatami chasquircacuna. Shinallataj Bibliata alli intindingapajca Jehová Dios paipaj espíritu santohuan ayudachunmi mañarcacuna. Apóstol Pablo yachachishcacuna verdad cashcata yachangapajmi Diospaj Shimita estudiarcacuna (Hechos 17:11, 12; Hebreos 5:14). Paicunaca huauqui panicunahuan cushilla, alli pasashcallamantaca Diostaca mana sirvircacunachu. Ashtahuanpish Diosmanta yachashpami paicunapaj feta sinchiyachircacuna (Colosenses 1:9, 10, QC, 1989).

7. ¿Biblia yachachishcacunata tucui shunguhuan crishpaca ima shinataj beneficiarishun?

⁷ Biblia yachachishcacunaca huiñaipajmi can (Salmo 119:160). Shuj huauqui jatun juchapi urmajpi, ñucanchijta llaquichijpi o ñucanchij ima problemata charijpipish Bibliapi yachachishcacunaca mana pandarinchu. Mana nunca cambianchu. Chaimantami Bibliataca alli estudiana canchij. Chaipi yachachishcacunapish cierto cashcatami tucui shunguhuan crina canchij. Chashnami llaquicuna ricurijpipish Diosmantaca manataj caruyashun. ¿Biblia yachachishcacuna verdad cashcata ashtahuan cringapajca imatataj rurana canchij?

BIBLIA YACHACHISHCACUNA VERDAD CASHCATA CRISHUNCHIJ

8. ¿Timoteoca Biblia yachachishcacuna verdad cashcata cringapajca imatataj rurarca?

⁸ Timoteoca Biblia yachachishcacuna verdad cashcataca tucui shunguhuanmi crirca. ¿Chaitaca ima shinataj yachanchij? (2 Timoteo 3:14, 15-ta liyipai). Puntapica paipaj mama, paipaj abuelami Diospaj quillcachishcacunataca paiman yachachircacuna. Pero Dios quillcachishcacunata estudiangapajca Timoteoca paillatajmi tiempota, fuerzata llujchirca. Chaimantami pai yachashcacunaca verdad cashcata intindirca. Qꞌuipacarin paipish, paipaj mamapish, paipaj abuelapish Jesusmanta yachachishcacunatami yachaj chayarcacuna. Jesusta catijcuna paicunapura cꞌuyaita ricuchijta ricushpaca Timoteoca cushillami sintirishcanga. Shinallataj huauqui panicunahuan pasanata, paicunata cuidanatami munashcanga (Filipenses 2:19, 20). Pero paipaj feca huauqui panicunata cꞌuyashcallamantaca mana sinchichu cashcanga. Ashtahuanpish Biblia yachachishcacuna verdad cashcata tucui shunguhuan crishcamantami sinchi feta charirca. Chaimantami Diospaj amigo canata munarca. Ñucanchijpish Jehovamanta yachachishcacunata tucui shunguhuan cringacamami Bibliata estudiashpa catina canchij.

9. ¿Ima quimsa yachachishcacunatataj tucui shunguhuan crina canchij?

⁹ Jehová Diosmanta yachachishcacunataca tucui shunguhuan crishunchij. Puntapica, Jehová Dios tucuita ruraj Dios cashcatami crina canchij (Éxodo 3:14, 15; Hebreos 3:4; Apocalipsis 4:11). Ishquipica, Jehová Dios ñucanchijta yachachingapaj Bibliata cushcatami crina canchij (2 Timoteo 3:16, 17). Quimsapica, testigo de Jehovacuna paita adorachun Dios agllashca pueblo cashcata, Jesús ñaupajman pushacushcatami tucui shunguhuan crina canchij (Isaías 43:10-12; Juan 14:6; Hechos 15:14). Caicunata verdad cashcata cringapajca Bibliamanta tucuita yachanataca mana minishtinchijchu. Ashtahuanpish alli estudiajcunami cana canchij (Romanos 12:1).

BIBLIAMANTA YACHACHINGAPAJ ALLICHIRISHUNCHIJ

10. ¿Bibliapi yachachishcacunata tucui shunguhuan crishca huashaca imatataj rurana canchij?

¹⁰ Jehová Diosmanta, paipaj Shimimanta, paipaj pueblomanta yachachishcacunata ña tucui shunguhuan crishpaca, shujtajcunapish chaita crichunmi Bibliahuan yachachina canchij. ¿Imamanta? Diosta sirvijcunaca Bibliapi yachashcacunata shujtaj gentecunaman yachachina responsabilidadtami charinchij (1 Timoteo 4:16).b Chaita rurajpica ñucanchij femi ashtahuan sinchiyanga.

11. ¿Yachachicushpaca ima shinataj Pablopaj ejemplota cati tucunchij?

¹¹ Apóstol Pabloca gentecuna Jesuspi crichun ayudangapajca Moisés mandashcatapish, profetacuna huillashcatapish intindirinallatami huillarca (Hechos 28:23). ¿Ima shinataj apóstol Pablopaj ejemplota cati tucunchij? Biblia ima nishcallataca mana de memoria ninachu canchij. Ashtahuanpish Bibliamanta yachacujcunataca alli estudiachun, imalla yachashcapi alli yuyarichunmi ayudana canchij. Chaita rurajpimi paicunaca Diospajman cꞌuchuyanga. Ñucanchijta respetashcallamanta Bibliapi yachachishcacunata crichunca mana munanchijchu. Ashtahuanpish paicunallataj Diosmanta yachashcacuna verdad cashcata intindichunmi munanchij.

12, 13. ¿Yaya mamacuna cancunapaj huahuacuna Diosta sirvishpa catichunca imatataj rurana canguichij?

¹² Yaya mamacuna cancunapaj huahuacuna Diosta sirvinata ama saquichunmi munanguichij. Tal vez cancunaca ñucanchij huahuacuna congregacionpi alli amigocunata charishpami sinchi feta charinga nishpachari yuyanguichij. Pero cancunapaj huahuacuna sinchi feta charichunca alli amigocunallata charinaca mana minishtirinchu. Ashtahuanpish paicunallatajmi Dioshuan alli apanacuna can. Shinallataj Bibliapi verdadta yachachishcatami crina can.

¹³ Yaya mamacuna cancunapaj huahuacunaman Diosmanta yachachisha nishpaca cancunarajmi Bibliata alli estudiashpa alli ejemplota cuna canguichij. Shinallataj liyishcapi cutin cutin yuyaringapajmi tiempota surcuna canguichij. Chashnami cancunapaj huahuacunapish chaita ruranata yachangacuna. Shinallataj JW Library® aplicacionta, publicacioncunata, videocunata utilizachunmi alli yachachina canguichij. Chaita rurajpica cancunapaj huahuacunaca Jehová Diostami cꞌuyangacuna. Shinallataj alli cazuj, alli yuyaiyuj huauquicunata utilizashpa Jehová Dios Bibliata intindichun ayudacushcatami cringacuna (Mateo 24:45-47, QC, 1989). Yaya mamacuna cancunapaj huahuacunamanca Bibliamanta jahualla yachachishcacunallata yachachinapaj randica Jehová Diosta ashtahuan rijsichunmi ayudana canguichij. Chaimi Diospi ashtahuan cringacuna. Pero cancunapaj huahuacuna ima edadta charishcata, mashnata intindi tucushcatami alli ricuna canguichij (1 Corintios 2:10).

BIBLIAPI TIYAJ PROFECIACUNATA ALLI ESTUDIASHUNCHIJ

14. ¿Imamantataj Bibliamanta profeciacunataca alli estudiana canchij? (“¿Cai profeciacunataca allichu intindichinata yachanchij?” nishca recuadrota ricui).

¹⁴ Bibliapica valishca profeciacunami tiyacun. Caicunata estudiashpaca Jehová Diospimi tucui shunguhuan crishun. ¿Ima profeciacunata estudiashpataj cambaj feta sinchiyachishcangui? Tal vez canca tucuri punllacunamanta parlaj profeciacunatachari yuyaringui (2 Timoteo 3:1-5; Mateo 24:3, 7). Pero ña pajtarishca profeciacunapishmi ñucanchij fetaca sinchiyachi tucun. Por ejemplo, ¿Daniel capítulos 2 y 11-pi tiyaj profeciacuna ima shina pajtarishcata, ima shina pajtaricushcataca intindichi tucunguichu?c Bibliapi yachachishcacunata tucui shunguhuan crishpaca ima llaquicuna ricurijpipish ahuantai tucushunmi. Alemania llajtapi causaj huauqui panicunata yuyarishun. Segunda Guerra Mundialpi paicunata catirashpa llaquichijpipish ahuantarcacunami. Paicunaca tucuri punllacunamanta parlaj profeciacunata mana tucuita intindishpapish Diospaj Shimipimi tucui shunguhuan crircacuna.

15-17. ¿Nazi politicocuna llaquichijpipish huauqui panicunaca Bibliata estudiashcamantaca imatataj rurai tucurcacuna?

¹⁵ Nazi politicocuna Alemania llajtapi mandacushpaca achca huauqui panicunatami campos de concentración nishcacunaman cacharcacuna. Hitler y autoridadta charij Heinrich Himmler soldadoca, testigo de Jehovacunatami achcata pꞌiñajcuna carca. Shuj punllaca huaquin panicunaman cai soldado ima nishcatami shuj panica huillarca. Himmlerca: “Cancunapaj Jehová Diosca jahua pachapichari mandacun, pero ñucanchijmi cai Allpapica mandacunchij. Cunanmi yachashun picuna tiyashpa catinata, cancuna o ñucanchij” nircami. ¿Chai tiempopica Diosta sirvijcuna ñaupajman catichunca imataj ayudarca?

¹⁶ Chai tiempopica Bibliamanta Estudiajcunaca 1914 huatamanta Diospaj Gobierno ña mandai callarishcatami yacharcacuna. Chaimantami paicunata jarcashpa catirana cashcata yacharcacuna. Shinallataj Diospaj munai pajtarichun ni maijan gobierno mana jarcai tucushcatami yacharcacuna. Hitlerca Diosta sirvijcunata, Diospaj Gobiernotaca mana tucuchi tucurcachu. Chai huauqui panicunaca Hitlerpaj gobierno ima horapish tucurina cashcatami yacharcacuna.

¹⁷ Chai huauqui panicuna yuyashca shinami pajtarirca. Asha tiempo qꞌuipallami nazi politicocunaca mandanata saquircacuna. “Ñucanchijmi cai Allpapi mandacunchij” nij Heinrich Himmlerca miticushpami rirca. Pai miticucushpami Lübke shuti huauquihuan tuparca. Chai huauqui prezupi cashcatami yuyarirca. Chaita yuyarishpami Himmlerca paitaca: “Bibliamanta yachacuj, ¿cunanca imataj tucunga?” nishpa tapurca. Chaimi huauquica nazi politicocuna tucurina cashcata, Dios ñucanchijta carcelmanta llujchina cashcatapish allimi yacharcanchij nirca. Chaita uyashpami Himmlerca testigo de Jehovacunamantaca ña imata mana ni tucurca. Qꞌuipacarin Himmlerca paillatajmi huañurca. ¿Caimantaca imatataj yachanchij? Bibliata, chaipi tiyaj profeciacunata estudiashpami sinchi feta charishun. Chashnami ima llaquicuna ricurijpipish jahualla ahuantashun (2 Pedro 1:19-21).

18. Juan 6:67, 68-pi nishca shinaca ¿imamantataj alli yachaita, alli intindinatapish minishtinchij?

¹⁸ Diosta alli sirvijcuna cashcata ricuchingapajca cꞌuyanacushpami causana canchij. Shinallataj Diosmanta alli “yachaita, alli intindinatapishmi minishtinchij” (Filipenses 1:9). Chaita mana rurashpaca caita chaita apaj huaira shina panda yachachishcatami crishun. Shinallataj umashpa yachachijcunata o apostatacunatami crishun (Efesios 4:14). Apostolcuna causan punllacunapica huaquincunaca Jesusta catinatami saquircacuna. Chaimantami Pedroca Jesustaca “canmari huiñai causaita cuj shimicunataca charingui” nirca (Juan 6:67, 68-ta liyipai). Pedroca chai shimicunata mana tucuita intindishpapish Jesús Mesías cashcatami intindirca. Ñucanchijpish Bibliapi yachachishcacuna verdad cashcata tucui shunguhuan crishpaca llaquicuna ricurijpipish sinchi fetami charishun. Shujtajcunatapishmi paicunapaj fe sinchi cachun ayudashun (2 Juan 1, 2).