Salvasqanku Moises wawamanta

QAWAY chay wawachaqa sipaspa dedonta hapispan waqachkan. Chay wawachaqa Moisesmi. ¿Yachankichu pitaq chay buenamoza sipasqa kanman? Egipto nacionpi warmim, kikin Faraonpa warmi churinmi.

Moisespa mamanmi wawachanta pakarqa kimsa killachankama, Egipto runakuna wawanta mana wañuchinankupaq. Wawachanta tarirunankuta musyakuspanmi salvaykunanpaq kayta rurarqa.

Canastillata rurarqa yaku mana yaykunanpaq hina. Hinaptinmi Moisesta chay canastillapi churaykuspa Nilo mayupa patanpi tuturakunapa chawpinpi saqeykurqa. Hinaspa Moisespa panin Mariata nirqa karullapi sayaspa imam pasasqanta qawananpaq.

Chaylla Faraonpa warmi churinqa Nilo mayuman bañakuq hamururqa. Hinaptinmi tuturakunapa chawpinpi canastillata qawaykurqa. Chaymi huknin sirvientanta nirqa: ‘Aparamuwaychik’ nispa. Faraonpa warmi churin canastillata kicharuptinmi, ¡suma-sumaq wawacha kachkasqa! Chay wawachaqa waqachkasqa, hinaptinmi Faraonpa warmi churinqa wawata llakipayarqa. Chaymi Faraonpa warmi churinqa mana munarqachu wawata wañuchinankuta.

Dibujopi qawasqaykiman hina Mariaqa hamururqa. Hinaspam Faraonpa warmi churinta tapuykurqa: ‘Kay wawata ñuñupusunaykipaq, ¿qayarapamuykimanchu hebreo casta warmita?’ nispa.

‘Ari qayaramuyá’ nispam Faraonpa warmi churinqa nirqa.

Chaymi Mariaqa kallparqa maman qayamuq. Moisespa maman hamuruptinmi, Faraonpa warmi churinqa nirqa: ‘Apay kay wawata hinaspa ñuñupamuway ñoqam pagapusqayki’ nispa.

Chaymi Moisestaqa kikin mamallanmi uywamurqa. Chaymanta, Moises wiñaruptinmi Faraonpa warmi churinqa apakurqa wawachakuspan uywakunanpaq. Hinaptinmi Moisesqa Faraonpa ayllunña rikurirurqa.