Sonqomanta interesakusqanchikta qawachisun tapukuyta ruraspa hinaspa uyarispa
1 Yaqa llapan runakunam munan piensasqallankuta yachachiyta, ichaqa piñakunkum pipas yachachiyta munaptin otaq tapuptin. Chayraykum, cristianokunaqa yachananchik sumaq tapukuykunata rurayta uyariwaqninchikkuna rimanankupaq (Pro. 20:5).
2 Tapukuyninchikkunaqa manam runata manchachinanchu, aswanqa invitananmi rimarinanpaq. Wasin-wasinta rispam huk hermano tapurqa: “¿Chayaramunmanchu punchaw llapallanchik sumaq respetowan rimananchikpaq?”. Kutichisqanman hina, ninpunitaq: “¿Creesqaykiman hina imataq faltan chay ruranapaq?”, otaq “¿Imanasqataq chaynata ninki qam?”. Huk hermano callekunapi predicaspa otaq maypipas predicaspa, wawa-churiyoq kaqkunatam tapun: “¿Imataq tayta kasqaykimanta aswan gustasunki?”. Chaymantañataq nin: “¿Imataq aswan llakichisunki?”. Kay tapukuykunaqa uyariqkunapa piensasqantam rimachin mana obligaspa. Runaqa sapakama sasachakuyniyoqmi, chayraykum rimasqanchik hinaspa tapusqanchik paykunapaq hina kanan predicasqanchikpi.
3 Imaynatam yanapachwan rimanankupaq. Sichum runakuna rimayta munanku, uyariy pacienciawan mana rimasqanta upallachispa (Sant. 1:19). Agradecekuy rimasqankunamanta (Col. 4:6). Yaqapaschá nichwan kaynata: “Kay nisqaykiqa ancha allinmi”. Sonqoykimanta kallpanchay atisqaykiman hina. Kuyapayakuywan huk tapukuykunatapas rurawaq piensasqanta yachanaykipaq hinaspa imanaptin chaynata riman. Rimay paykunapa yachasqankuman hina. Bibliapa nisqanta rikuchinaykipaq, niwaqmi: “¿Haykapipas kay nisqanpi piensarqankichu?”. Ama tercochu kay, nitaq kutipakuqchu (2 Tim. 2:24, 25).
4 Tapukuyninchikta uyariwaqninchik kutichisqanqa ñoqanchik imayna uyarisqanchikman hinam kanqa. Runakunaqa musyankum sichum atencionwan uyarichkanchik. Huk viajaq ancianom nirqa: “Sichum uyariy munasqanchikta qawachisun yanapanqam allinta rimasqanchikta uyarinankupaq hinaspa allin kanqa sonqomanta kuyasqanchikta rikuchinanchikpaq”. Runakunata uyarispaqa respetasqanchiktam qawachinchik, yaqapaschá yanapanqa atencionwan uyarinankupaq sumaq noticia apasqanchikta (Rom. 12:10).