Marzo 17 punchawmantam invitacion aypuyta qallarisun
1. ¿Ima ruraytam qallarisun marzo 17 punchawmanta?
1 Jesuspa wañukusqanta watan-watan yuyarispam paymanta “willakunkichik” (1 Cor. 11:26). Chaymi munanchik chay huñunakuypi achka runa kananta hinaspa kuyawasqanchikrayku librawananchikpaq Diospa qowasqanchikmanta uyarinankutapas (Juan 3:16). Kay watam Jesuspa wañusqanmanta yuyarinapaq marzo 17 sabado punchawmanta invitacion aypuyta qallarisun. ¿Imakunapim reparachkananchikña chay ruraypi astawan yanapakunapaq?
2. ¿Imaynatam invitacionta qochwan?
2 Imaynatam invitacionta qochwan. Allinmi kanman pisilla rimayninchikqa. Ichapas kaynata nichwan: “Imaynallam, invitaciontam apamuchkayki qampaq chaynataq familiaykipaqpas, 5 abril punchawtam Allpantinpi sumaq huñunakuy kanqa. Bibliapa nisqanman hinam yachachinqaku Jesucristo imarayku wañusqanmanta chaynataq kay tiempopi ima rurasqanmantapas. Chay huñunakuyqa manam qollqepaqchu, kaypim nichkan maypim hinaspa imay hora kananmanta”, nispa. Allin kaptinqa munachichwanmi revistakunatapas sabadonpi otaq domingonpi predicaspaqa.
3. ¿Imaynatam invitacionta lliwman chayachichwan?
3 Lliwmanmi chayachinanchik. Munanchikmi chay huñunakuyman achka runakuna hamunankuta. Chaynaqa invitamusunyá kaqmanta watukusqanchikta, Biblia estudiachisqanchikta, vecinonchikta, llamkaqmasinchikta otaq escuelapi kaqmasinchikta chaynataq pi reqsisqanchiktapas. Enteron predicananchik lawpi invitacionta imayna aypunapaqqa ancianokunam tanteanqaku. Pasaq watakunapim chayna rurasqanchikqa allinpi tukurqa. Jesuspa wañusqanta yuyarinapaq huñunakuymanmi huk señora qayna wata chayarurqa hinaptinmi chay huñunakuypi chaskiq iñiqmasinchik invitaqninta tariysinanpaq nirqa, ichaqa chay señoraqa manam pitapas reqsisqachu. Chay huñunakuy punchawmi wasin-wasin predicaq invitacionta saqesqa.
4. ¿Imanasqataq invitacionta aypuypi tukuy sonqonchikwan yanapakunanchik?
4 Ichapas chay huñunakuymanqa chayaramunman invitacionta chaskiwaqninchik mayqen runapas. Mana chayna kaptinpas kallpanchakusqaykiqa allinpim tukunqa. Invitacionkunata aypusqanchikqa Jesucristo atiyniyoq Rey kasqanmantam willakunqa. Tukuy sonqonchikwan yanapakusqanchikqa hukkunamanpas iñiqmasikikunamanpas qawachinqam librawananchikpaq Jehová Diospa rurasqan chaninchasqanchikta (Col. 3:15).