Tiempopa kasqanman hinalla ruranapaq

ALLINTA yachachinaykipaq kallpanchakuspapas hayka minutopi ruranaykipaq kasqanman hinallam preparakunayki. Huñunakuyninchikkunaqa tiempollanpim qallarinan chaynataq tukunanpas, chaymi discursota qonapaq otaq demostracionta ruranapaq tupawaptinchikqa tiemponchikpa kasqanman hinalla rurananchik.

Kay tiempopiqa manam ñawpaq tiempopi hinañachu tiempotaqa tanteanku. Ñawpa tiempopim niqku: ‘Yaqa chawpi punchawta’ otaq ‘yaqa inti seqaykuyta’, nispa (Mat. 20:3-6; Juan 1:39). Imata ruraspankupas manam tanteaqkuchu hayka minutopi ruranankupaqqa, wakin llaqtakunapiqa hinallaraqmi chaynata tanteanku.

Wakin llaqtakunapi chayna costumbreyoq kaptinkupas otaq munasqankuman hina tiemponkuta tanteaptinkupas ñoqanchikqa hayka minutopi rurananchikpaq kasqanman hinallam rurananchik. Chaypaqmi Bibliapa kayna nisqan yanapawachwan, “chaynaqa tukuy imayá rurasqa kachun respetowan hinaspa ordenninpi” (1 Cor. 14:40).

Tiemponchikpa kasqanman hinalla ruranapaq. Chaypaqqa allintam preparakuna. Discurso qoqkuna yachachinapaq kaqta mana preparakuspankuqa sasachakunkum tiempollanpi tukunankupaq, ichapas tiempowan mana preparakusqankurayku. Discurso qonapaq otaq demostracionta ruranapaq tupawasqanchikta tiempowan allinta preparakuspaqa hayka minutopi rurananchikpaq kasqanman hinallam rurasunchik.

¿Leenaykipaqchu tupasuchkanki? Chaynaqa kay libropa 4-7 yachachikuyninkunata puntata leey, chaypi yachachikuykunam yanapasunki tupasqanman hina samarispa, mana pantaspa chaynataq kallpawan leenaykipaq, chayna leesqaykiqa yanapasunkim entiendechinapaq kaqta otaq aswan allinnin kaq yachachikuykunamanta allinta entiendechinaykipaq. Chayman hina kallpawan leey. Relojwan tiempoykita tanteay, ¿apurawmanchu leenayki kanqa tiempollanpi tukunaykipaq? Aswan allinnin kaq yachachikuykunataqa allillamanta leey wakinta ichaqa apurawman. Achka kutikama chaynata leey allinta leenaykikama, chaynata ruraspaqa hayka minutopi leenaykipaq kasqanman hinallam leenki.

¿Bosquejowan yanapachikuspachu yachachinki? Yachachinaykipaq kaqta achkata qellqaruspaqa otaq bosquejopa nisqanman hina sapa palabramanta rimaspaqa manam atinkichu hayka minutopi kasqanman hinalla ruraytaqa. Kay libropa 25 kaq yachachikuyninman hina kaynata preparakuy: 1) Yachachisqaykiwan tupaq kaqkunallata akllay ichaqa ama achkatachu. 2) Aswan allinnin kaq yachachikuykunamanta allinta entiendey, ichaqa ama llapantachu umaykipi takyarachiy. 3) Sapa yachachikuyta hayka minutopi yachachinaykipaq kasqanman hina bosquejoykipi anotay. 4) Tiempollanpi tukunaykirayku preparakusqaykipi tanteay mayqen yachachikuykunamanta manaña rimanaykipaq, hinaspa 5) allinta practicay.

Practicaspaykiqa tiempoykita relojwan tanteay. Achka kutikama chaynata ruray tiempoykipa kasqanman hinalla tukunaykipaq. Ama achka yachachikuykunamantaqa bosquejoykipi qellqaychu mana chayqa tiempoykim llallirusunkiman.

Imaynatam tiempoykita haypachikuwaq. Hayka minutopi rimanayki kaptinpas sapa yachachikuypaqmi tiempoykita tanteanayki. Yachachisqaykipi aswan allinnin kaq yachachikuykunapaq astawan tiempochakuy. 38 kaq yachachikuypa nisqanman hinam rimayta qallarinaykipaq kaqkunaqa pisillapi kanan. 39 kaq yachachikuypa nisqanman hinataqmi tukunaykipaqña kaqkunapas pisilla kanan.

Hayka minutopi yachachinaykipaq otaq ruranaykipaq kasqanman hinalla ruraspaqa huñunakuykunapipas uyarisuqnikikunata respetaq kasqaykitam qawachinki.