Astawan yachay munaqkunapaq
¿Ima niytataq Jesusqa munachkarqa “ama piensaychikchu kay pachapi hawkayay kananpaq hamusqaytaqa” nisqanwanqa?
Jesusqa yachachirqa piwanñapas hawkalla kawsakunapaqmi. Ichaqa, huk kutipim apostolninkunata nirqa: “Ama piensaychikchu kay pachapi hawkayay kananpaq hamusqaytaqa, manam hawkayay kananpaqchu hamurqaniqa, aswanqa runakunata rakinachiqmi. Hamurqaniqa qaripas taytanpa contranpi kananpaqmi, warmi wawapas mamanpa contranpi kananpaqmi chaynataq llumchuypas suegranpa contranpi kananpaqmi”, nispa (Mat. 10:34, 35). ¿Ima niytataq Jesusqa munachkarqa chayna nisqanwanqa?
Jesusqa manam familiakunata rakinaytachu munarqa. Ichaqa, yachachisqanta kasukuqkunaqa familiankuwanmi sasachakuypi tarikunanku karqa. Bautizakuyta munaqkunaqa chaypim yuyaymanananku. Wakinpim bautizakunankupaq tantiakuptinku familiankuqa harkakunku, wakinpiqa qusankum utaq warminkum utaqmi mayqan familiankupas harkakunku. Chayna kasqanraykum bautizakuqpaqqa sasa Jesuspa nisqanman hina kawsakuyqa.
Jesuspa qatiqninkunatam bibliapi nin: “Kallpanchakuychik llapallan runakunawan hawkalla kanaykichikpaq”, nispa (Rom. 12:18). Ichaqa Jesuspa yachachisqankunaqa wakin familiakunatam rakin. Familiamanta hukkaqnin Jesuspa qatiqnin kayta qallaykuptinmi wakin familiakunaqa harkakunku, wakinñataq piñakunku. Chaynapim hina ‘wasinpi kaqkunalla’ chiqniyta qallaykunku (Mat. 10:36).
Jesuspa qatiqninkunaqa sasachakunkutaqmi ayllunku huk religionpi kaptin. Sasachakunkum Jehova Diospawan Jesuspa nisqanman hina kawsanankupaq. Wakinpiqa familiankum ima fiestatapas ruwanankupaq hikutanku. Chayna kaptinqa tantiakunankum pita puntapi churanankupaq. Jesusmi nirqa: “Pipas tayta-mamanta ñuqamanta aswan kuyaqqa manam qatiqniyqa kanmanchu”, nispa (Mat. 10:37). Chaywanqa Jesusqa nichkarqa manam tayta-mamanchikta mana kuyanamantachu aswanqa nichkarqa imata puntapi churanamantam. Jehova Diosta servinanchikta harkakuq familianchiktapas ñuqanchikqa kuyanchikmi, ichaqa imamantapas puntataqa Diosninchiktam kuyanchik.
Familianchikkunapa harkakusqankuqa sasachawanchikmi. Ichaqa, Diosta serviqkunaqa sumaqtam yachanchik “pipas ñakarichiqnin qirunta qipispan mana qipayta qatiwaqqa manataqmi qatiqniyqa kanmanchu” nispa Jesuspa nisqanta (Mat. 10:38). Chaynaqa, ñuqanchikqa sumaqtam yachanchik Jesusta qatikusqanchikrayku ñakarinanchikmantaqa. Wakinpiqa ayllunchikkunam harkakuwasun, chayna kaptinpas hinallam allinta kawsakunanchik. Chayta qawaspanku ichapas ayllunchikkunaqa qipa punchawman Diosta serviyta qallaykunmanku (1 Ped. 3:1, 2).