¿Yanapachikuchkankichu Diospa llaqtanpi escuelakunawan?

1. ¿Imatam munan Jehová Diosqa serviqninkunapaq?

¹ Allin ‘yachachikuq’ Jehová Diosqa munanmi serviqninkuna yachachisqa kanankuta (Isa. 30:20). Piwi Churinta unanchaspanmi yachachiq kasqanta qawachirqa (Juan 8:28). Adan huchallikusqan qepatapas hinallam kuyakuywan yachachiwanchik pantaq kaptinchikpas (Isa. 48:17, 18; 2 Tim. 3:14, 15).

2. ¿Imataq admirakuypaq Allpantinpi rurakuchkan?

² Kay tiempopim Jehová Diosqa ima tiempomantapas astawanraq serviqninkunaman yachachichkan. Isaiaspa willakusqanman hinam millonnintin runakuna enteron Allpa pachapi ‘[Jehová] Diospa templonpa kasqan orqoman’ otaq cheqap yupaychayninman yaykuchkanku (Isa. 2:2). ¿Imarayku? Jehová Diospa munasqanman hina yachachisqa kanankupaqmi (Isa. 2:3). Septiembre 2009 watamanta agosto 2010 watakamam Testigokuna predicarqaku hinaspa Diosmanta yachachirqaku 1.600 millon horakunata. Chaymantapas sapa semanam Diosmanta yachachisqa kanku 105.000 congregacionkunapi enteron Allpa pachapi, allin yuyayniyoq sirvientem qellqakunata rurachin 500 masnin idiomakunapi.

3. ¿Imaynatam yanapasunki Jehová Diospa yachachikuyninkuna?

³ Allin yachachisqam kachkanchik. ¡Mayna allintam yanapawanchik Diospa yachachikuyninkunaqa! Chayraykum yachanchik Diospa sutinta hinaspa ñoqanchikpi interesakusqantapas (Sal. 83:18, NM; 1 Ped. 5:6, 7). Chaymantapas allintam entiendenchik kayna tapukuykunamanta: ¿Imanasqataq ñakarinchik hinaspa wañunchik? ¿Imaynatam tarichwan cheqap kusikuyta? ¿Imapaqtaq kawsanchik? Jehová Diosqa yachachiwanchiktaqmi imaynata kawsaspa allin kananchikpaqpas (Jos. 1:8).

4. ¿Ima escuelakunawantaq Jehová Diosqa llaqtanpi yanapawanchik hinaspa imaynatam astawan yanapachikuchwan?

⁴ Jehová Diosqa astawanraqmi wakin serviqninkunata yachachin payta astawan servinankupaq. Kay qellqapa 4 hinaspa 6 paginankunapim escuelakunamanta lista kachkan ichapas atiwaq mayqenpipas kayta. Sichum wakin escuelakunapi kayta mana atispaykiqa, kallpanchakuy atisqayki kaqkunapi Diospa yachachikuyninkunata astawan yachanaykipaq. ¿Ima nichwantaq mozo-sipaskunamantaqa? Yaqa sapa kutim profesorninkuna otaq hukkunapas hikutanku universidadpi estudianankupaq. Chaypaq tanteakunaykichikmantaqa Jehová Diospa llaqtanpi mayqen escuelamanpas rinaykichikpaqmi kallpanchaykiku. Jehová Diospa llaqtanpi escuelankunawan allinta servichikuptinchikqa yanapawasunmi kay tiempopipas hinaspa hamuq tiempopas kusisqa kawsakunanchikpaq (Sal. 119:105; Juan 17:3).

Jehová Diospa llaqtanpi yanapawananchikpaq wakin escuelakuna

Clases de alfabetización (Leeytawan qellqayta yachanapaq escuela)

• Imapaqtaq: Leeytawan qellqayta yachaspanku kikinku Bibliata estudiaspa hukkunamanpas yachachinankupaqmi.

• Hayka tiempotaq kanan: Chayqa necesitasqankuman hinam.

• Maypitaq kanan: Huñunakunanchik Salonpim.

• Pikunapaqtaq: Diosta serviqpaq otaq yachay munaqpaqmi.

• Imaynatam chaypi kanmanku: Ancianokunam chaytaqa tanteananku congregacionninkupi necesitakusqanman hina, hinaspam chaypi kay munaqkunata invitanku.

Diosmanta Yachachinapaq Escuela

• Imapaqtaq: Testigokuna hukkunaman allinta yachachinankupaq hinaspa sapakama allin yachachiq kanankupaqmi.

• Hayka tiempotaq kanan: Sapa kutim.

• Maypitaq kanan: Huñunakunanchik Salonpim.

• Pikunapaqtaq: Lliw Testigokunapaqmi. Invitasqataqmi kachkan Diospa yachachisqanman hina kawsaspa ñoqanchikwan sapa kuti huñunakuqkunapas.

• Imaynatam chaypi kanmanku: Rimay Diosmanta Yachachinapaq Escuelapi cuentallikuq ancianowan.

Curso de idiomas (Huk idiomata yachanapaq escuela)

• Imapaqtaq: Testigokunatam yachachin huk idiomapi predicanankupaq.

• Hayka tiempotaq kanan: Tawa otaq pichqa killam. Sapa yachachikuymi huk otaq iskay hora kan, yaqa sapa kutim sabado punchawpi rurakun.

• Maypitaq kanan: Yaqa sapa kutim huñunakunanchik Salonpi.

• Pikunapaqtaq: Allin portakuq hinaspa huk idiomapi predicay munaq Testigokunapaqmi.

• Imaynatam chaypi kanmanku: Necesitakusqanman hinam Betel wasi tantean.

Construcción de Salones del Reino (Huñunakunanchik Salonkuna rurakunanpaq)

• Imapaqtaq: Salonkunata ruranankupaq otaq allichanankupaqmi. Kayqa manam wakin escuela hinachu ichaqa Salonkuna ruraypi imata ruraspa yanapakunankupaqmi munaqkunata yachachinku.

• Hayka tiempotaq kanan: Yanapakuy munaqpa necesitasqanman hinam.

• Maypitaq kanan: Maypipas Comité Regional de Construcción kamachisqanman hinam. Chaymantapas ima desgraciapas pasakuptinqa yanapakuy munaqkunatam invitanku chaypi yanapakunankupaq.

• Pikunapaqtaq: Chaypaqqa bautizasqa hinaspa ancianokunapa recomendasqanmi kananku. Kanmanmi warmipas otaq qaripas, experiencianku mana kaptinpas manam imananchu.

• Imaynatam chaypi kanmanku: Cuestionario para trabajadores voluntarios en Salones del Reino (S-82) nisqanta congregacionnikipi ancianokunamanta mañakuy hinaspa huntachiy.

Escuela del Servicio de Precursor (Precursorkunata Yanapaq Escuela)

• Imapaqtaq: Precursorkunatam yanapan ‘imam ruranankuta’ allinta cumplinankupaq (2 Tim. 4:5).

• Hayka tiempotaq kanan: Iskay semanam.

• Maypitaq kanan: Chaytaqa Betel wasim tantean, yaqa sapa kutim huñunakunanchik Salonpi rurakun.

• Pikunapaqtaq: Huk wataña precursor regular kaqkunapaqmi

• Imaynatam chaypi kanmanku: Congregacionkunata watukuq ancianom chay escuelamanqa invitan.

Escuela de Nuevos Betelitas (Betel wasipi Servinankupaq Escuela)

• Imapaqtaq: Kay escuelaqa chayraq nombrasqa betelitakunatam yanapan Betel wasipi allinta servinankupaq.

• Hayka tiempotaq kanan: Tawa killam, sapa semanam huk horalla.

• Maypitaq kanan: Betel wasipim.

• Pikunapaqtaq: Nombrasqa betelitakunapaq otaq wata masnin invitasqa kaqkunapaqmi.

• Imaynatam chaypi kanmanku: Betel wasim chay escuelapi kanankupaqqa tantean.

Ancianokunapaqwan Siervo Ministerialkunapaq Escuela

• Imapaqtaq: Ancianokunatawan siervo ministerialkunatam yachachinku congregacionpi ima rurayninkutapas astawan allinta ruranankupaq (Hech. 20:28). Kay escuelaqa rurakun Diospa Llaqtanpi Punta Apaqkunapa tanteasqan watakunapim.

• Hayka tiempotaq kanan: Achka watakunañam ancianokunapaqqa huk punchaw parten, siervo ministerialkunapaqñataq huk punchawlla.

• Maypitaq kanan: Yaqa sapa kutim rurakun huñunakunanchik Salonpi otaq Asambleapaq localpi.

• Pikunapaqtaq: Ancianokunapaq otaq siervo ministerialkunapaqmi.

• Imaynatam chaypi kanmanku: Congregacionkunata watukuq ancianom invitan.

Congregacionmanta Ancianokunapaq Escuelaa

• Imapaqtaq: Ancianokunatam yanapan congregacionpi rurayninkuta allinta cumplinankupaq.

• Hayka tiempotaq kanan: Pichqa punchawmi.

• Maypitaq kanan: Chaytaqa Betel wasim tantean, yaqa sapa kutim rurakun huñunakunanchik Salonpi otaq Asambleapaq localpi.

• Pikunapaqtaq: Ancianokunapaqmi.

• Imaynatam chaypi kanmanku: Betel wasim paykunataqa invitan.

Escuela para Superintendentes Viajantes y sus Esposas (Congregacionta Watukuq Ancianokunapaqwan Señorankupaq Escuela)b

• Imapaqtaq: Congregacionkunata watukuq ancianokunata hinaspa paykunamanta cuentallikuq ancianokunatam yanapan allinta willakunankupaq hinaspa yachachinankupaq, chaynapi congregacionpi kaqkunata allinta yanapanankupaq. (1 Tim. 5:17; 1 Ped. 5:2, 3).

• Hayka tiempotaq kanan: Iskay killam.

• Maypitaq kanan: Chaytaqa Betel wasim tantean.

• Pikunapaqtaq: Congregacionkunata watukuq otaq paykunamanta cuentallikuq ancianokunapaqmi.

• Imaynatam chaypi kanmanku: Betel wasim paykunataqa invitan señorankutawan.

Escuela Bíblica para Varones Solteros (Solterokunapaq Bibliamanta Escuela)c

• Imapaqtaq: Soltero kaq ancianokunawan siervo ministerialkunatam yanapan congregacionninkupi ima rurayninkutapas allinta ruranankupaq. Yaqa llapan chayman riqkunam kamachisqa kanku nacionninkupi predicaqkuna necesitakusqan congregacionpi yanapanankupaq. Atiqkunataqa wakintam huk law nacionpi servinankupaq kamachinku.

• Hayka tiempotaq kanan: Iskay killam.

• Maypitaq kanan: Chaytaqa Betel wasim tantean, yaqa sapa kutim huñunakunanchik Salonpi otaq Asambleapaq localpi.

• Pikunapaqtaq: 23-62 watayoq solterokunapaqmi. Chaypaqqa allinmi saludninku kanan, iñiqmasinchikkuna yanapaytam munananku, chaymantapas predicaqkunapa necesitakusqanpim serviyta munananku (Mar. 10:29, 30). 2 wata otaq masninmi anciano otaq siervo ministerial kananku.

• Imaynatam chaypi kanmanku: Iskay punchawpaq wakin asambleakunapim chay escuelaman riy munaqkunapaq huk huñunakuy kan.

Escuela Bíblica para Matrimonios Cristianos (Casarasqa warmi-qaripaq Bibliamanta escuela)d

• Imapaqtaq: Casarasqa warmi-qarikuna allin yachachisqa kaspanku Jehová Diospa llaqtanpi astawan yanapakunankupaqmi.Yaqa llapallan chayman riqkunatam nacionninkupi predicaqkuna necesitakusqan llaqtaman rinankupaq kamachinku. Yaqapaschá wakinqa huk law nacionpi servinankupaq kamachisqa kanmanku.

• Hayka tiempotaq kanan: Iskay killam.

• Maypitaq kanan: Chay escuelaqa qallarirqa Centro Educativo de la Watchtower nisqapim. Chayqa tarikun Patterson (Nueva York) llaqtapim. Tiempopa risqanman hinam Betel wasipa tanteasqanman hina huk law nacionkunapipas rurakunqa, yaqapaschá huñunakunanchik Salonpi otaq Asambleapaq localpi.

• Pikunapaqtaq: Iskayninkum 25-50 watayoq kananku, allin saludniyoq hinaspa iskay watañam precursor, chaymantapas Isaias hinam ninanku: “Kayqaya ñoqa kaypi kachkani” “Ñoqatayá kachaway”, nispa (Isa. 6:8). Chaymantapas 2 watañam casarasqa kananku, manataqmi imawanpas harkachikunankuchu predicaqkunapa necesitakusqan llaqtaman rinankupaq.

• Imaynatam chaypi kanmanku: Huk punchawpaq wakin asambleapim chayman riy munaqkunapaq huk huñunakuy rurakun.

Escuela Bíblica de Galaad de la Watchtower

• Imapaqtaq: Precursorkunatawan tukuy tiemponkuwan Dios serviqkunatam misionero kanankupaq yanapan.

• Hayka tiempotaq kanan: Pichqa killam.

• Maypitaq kanan: Centro Educativo de la Watchtower nisqapim. Chayqa tarikun Patterson (Nueva York) llaqtapim.

• Pikunapaqtaq: Casarasqakunapaqmi. Chayllaraq solicitaspankuqa iskayninkum iskay wataña tukuy tiemponkuwan Diosta servinanku, kimsa wata bautizasqam kananku, 2 wataña casarasqa hinaspa 21-38 watayoqmi kananku. Iskayninkum saludninkupi allin kananku hinaspapas yachanankum ingles rimayta. Kayman hina tarikuspankuqa solicitanmankum huk law nacionpi serviq precursorkuna, congregacionkunata watukuqkuna, Betel wasipi llamkaqkuna, Solterokunapaq Bibliamanta Escuelapi yanapasqa kaqkuna hinaspa Casarasqa warmi-qaripaq Bibliamanta escuelapi yanapasqa kaqkunapas.

• Imaynatam chaypi kanmanku: Kimsa punchawpaq wakin asambleakunapim chayman riy munaqkunapaq huk huñunakuy kan. Nacionnikipi chayna huñunakuy mana kaptinqa, chay escuelaman riyta munaspaqa nacionnikipi Betel wasiman qellqay, imakuna necesitasqaykimanta willasunaykipaq.

Escuela para Miembros de Comités de Sucursal y sus Esposas (Betel wasimanta Encargakuqkunapaqwan Señorankupaq Escuela)

• Imapaqtaq: Chay escuelapa yanapakuyninwanmi Betel wasimanta encargakuqkunaqa: Betel wasipi llamkaqkunamantam cuentallikunku, congregacionkunapi iñiqmasinchikkunatam yanapanku, congregacionkunata watukuq hinaspa paykunamanta cuentallikuq ancianokunatam yanapanku, qellqakuna tikrasqa kananpaqmi tanteanku, qellqakuna fabricamanta lloqsinanpaqmi tanteanku hinaspa wakin ruraykunamantapas cuentallikunku (Luc. 12:48b).

• Hayka tiempotaq kanan: Iskay killam.

• Maypitaq kanan: Centro Educativo de la Watchtower nisqapim apakun. Chayqa tarikun Patterson (Nueva York) llaqtapim.

• Pikunapaqtaq: Betel wasimanta encargakuqkunapaq otaq huk law nacionpi predicacionmanta cuentallikuq ancianokunapaqmi.

• Imaynatam chaypi kanmanku: Diospa Llaqtanpi Punta Apaqkunam paykunata invitan señorankutawan

[Willakuykuna]