Sapakamata kuyapayasunchik rurasqankuta qawaspa
1 Jehová Dioswan Jesucristom yachanku runakunapa tukuy faltapusqantaqa, chaymi pipa yanapakuyninmantapas aswan allintaraq yanapakunku (2 Cró. 16:9; Mar. 6:34). Predicasqanchik runakunapa munasqanta ima llakichisqantawan musyaspaqa, atichwanmi paykunapaq hina allin noticiakunamanta predicayta.
2 Kaqninkunata qawarispa chayman hina predicasunchik: Tukuy qawakuqmi Jesusqa karqa (Mar. 12:41-43; Luc. 19:1-6). Chaynataqmi, punkunta manaraq takachkaptinchik imagenninkunata, carronpi laqasqa letrerochakunatawan otaq pationpi juguetenkunata qawarispaqa, yachasunmi imayna predicayninchik qallariyta allin noticiakunamanta allin willakunapaq.
3 Uyanpi imayna kasqanta rurasqantawan qawaspanchikqa imayna sientekusqantam musyasun (Pro. 15:13). Ichapas kuyasqan ayllun manaña kawsasqanrayku otaq nisyu llakisqanraykupas kallpanchanata munachkan. Agradecekunqapaschá llakisqanpaq hina Bibliamanta akllasqa textokunata leepuptinchikqa (Pro. 16:24). ¿Imatam rurachwan lloqsichkaqña wasiyoqta otaq marqayninpi waqachkaq wawayoqta tarispanchik? Chayna kaptinqa ichapas huk punchaw kutinapaqñam rimapayachwan. Kuyapayaspa paypa sientekusqantawan sientespanchikqa otaq ‘huk sonqolla hinam kawsaspaqa’ kutiriptinchikmi ichapas uyariwanchikman (1 Ped. 3:8).
4 Predicayninchikta qallarisunchik uyariwananchikpaq hina: Atenas llaqtapi huk qellqa “Mana Reqsisqa Diospa Altarnin” niqta rikuspanmi, apóstol Pablo rimarqa paykuna uyarinankupaq hina allin noticiakunamanta hinaspam nirqa: “Chay mana reqsistin adorasqaykichik Diosmantayá willaykusqaykichik”. Kay willakuyninpa allinllawan qallarisqanmi wakinkunata yanaparqa Diospa willakuyninta uyarispanku iñiqña kanankupaq (Hech. 17:23, 34).
5 Chaynataqmi, ñoqanchikpas tukuy qawakuq kaspaqa wakinkunapa munasqankunatam musyasunchik chaymi paykunapaq hina predicaytaqa atisun. Tapuykunata rurasunchik munasqankunata willakuwananchikpaq. Yuyaymanasunchik Bibliamanta akllasqa textokunawan espiritualpi wiñachinapaq (Pro. 20:5). Tukuy qawakuq kaspaqa wakinkunatawan cheqap kuyapayaspaqa allin noticiakunamantam aswan allintaña predicasunchik.