Sapakamapi interesakusun imayna kasqankuman hina
1 Apóstol Pabloqa Diospa allin noticiantam runakunaman yachachirqa vidankupi imayna kasqankuman hina, chaymanta imayna piensasqankuman hina (1 Cor. 9:19-23). Kay sumaq ejemplotam ñoqanchikpas qatipakunanchik. Tumpallatapas yuyaymanaspaqa, yachasunmi Reinopaq Servicionchik nisqanpi allin presentacionkunata vecinokunapa ima necesitasqanman hina rurayta. Manaraq punkuta takachkaspa, ichapas cuentata qokuchwan wasiyoqta imam interesasqanta, hinaspa chay musyasqanchikmanta rimachwan. Chaywanpas, kachkanraqmi imayna kasqankuman hina predicacionpi ruranapaq.
2 Atencionwan uyarisun runakunapa kutichisqanta: Predicaspanchikqa, yaqa llapanpim huk tapuyta runakunaman ruranchik, hinaspam yanapanchik piensasqanta niwananchikpaq. ¿Imaynatam qawanki kutichisqanta? ¿Rimasqanta mana kasuspachu hinalla presentación preparakusqaykita rimanki? ¿Icha kutichisusqaykiman hinachu presentación rurasqaykita rimanki? Sichu allinta estimanki runakunapa piensasqanta, ichapas tapukuykunata cuidadollawan rurawaq yachanaykipaq cheqaptapuni ima piensasqanta (Pro. 20:5). Chaynatam, atinki piensayta Diospa Reinonmanta noticia imayna uyariqpa llakinkunawan tupasqanta.
3 Chaypaqa listom kananchik parlanapaq puntamanta mana piensasqanchik temakunamantapas. Ejemplopaq, ichapas qallarichwan willayta noticiapi sasachakuykuna lloqsimusqanmanta, ichaqa uyariwaqninchikñataq willakunman kikinpa asuntonkunamanta otaq llaqtanpi ima llakichisqanmantapas. Chayna kaptinqa, paypi anchata interesakusqanchikraykum, bibliamanta parlayta qallaykusun payta aswan llakichisqanmanta (Fili. 2:4).
4 Predicasqanchik musyasqanchikman hina kachun: Sichum runamasinchik huk tapuyta ruranqa, ichapas allin kanman huk punchawña chaymanta rimay, allinta tapukusqanmanta yachaykuspaña. Chaymantapas atichwanmi qoyta publicacionkunata astawan rimasqanchikmanta yanapaqta. Kaynata ruraspanchikqa, qawachisunmi cheqaptapuni runamasinchik yanapay munasqanchikta Jehová Diosta reqsinankupaq (2 Cor. 2:17).