‘Runakunapa achkinmanta’ rimasun runamasinchikman
1. ¿Ima hatun achki qawakunantam Diospa Palabran nirqa? ¿Imata yuyarispam runakunapa achkin kuyasqanchikta qawachisun?
1 Isaías profetantakamam Jehová Dios nirqa: “Tutayaypi kawsaqkunam hatun achkiyta rikururqa. Llumpay tutayaypi yachaqkunamanmi achkiy rikuriykurqa” (Isa. 9:2). Chay ‘hatun achkiqa’ Jesucristopa rurayninkunapim qawakurqa. Kay Pachapi predicasqan hinaspa runakunapa rantinpi wañusqanmi kallpancharqa espiritual tutayaypi kaqkunata. Hina chay achkitam kunan kaq espiritual tutayaypi runakuna necesitanku. Jesuspa wañukusqan yuyariymi ancha allin kanqa ‘runakunapa achkinmanta’ rimanapaq (Juan 8:12). Qayna watam tunpa iñiyninkullatapas rikuchirqaku wara-waranqantin runakuna Jesuspa kay kamachikusqanta kasukuspanku: “Chaynatam qamkunapas rurankichik ñoqata yuyariwaspa” (Luc. 22:19). Hichpaykamuchkanñam Jesuspa wañukusqan punchaw kay watapi yuyarinapaq, chaynaqa ¿imaynatam yanapachwan Jehová Diospa hatun kanchariq achkinta hukkunapas qawanankupaq? (Fili. 2:15.)
2. ¿Rantinchikpi Jesuspa wañukusqan kuyasqanchikta imaynatam wiñachichwan, hinaspa imaynatam yanapawasunchik?
2 Kuyakuyninchikta wiñachisun: Jesuspa wañukusqan punchaw yuyariymi allinpuni yuyaymananapaq Jehová Diospa hinaspa Jesuspa ancha kuyakuyninpi, rantinchikpi Jesús wañukusqanrayku (Juan 3:16; 2 Cor. 5:14, 15). Rurasqankupi yuyaymanaymi astawan wiñachinqa kay sumaq respetasqa huñunakuy kuyakusqanchikta. Jehová Diospa lliw siervonkunam tiempota horqonanku yuyaymananankupaq Examinando las Escrituras diariamente nisqan folletopi Jesuspa wañukusqanmanta willaq textonkunapi. Rantinchikpi churin wañusqanpim Jehová Diospa suma-sumaq kayninkunata qawanchik, chayna Diosninchik kaptinmi anchata kusikunchik. Chaymantapas, sapakamata imayna Jesuspa wañukusqan yanapawasqanchikpi yuyaymanaspaqa, sonqomanta Diostawan Churinta kuyayninchikmi yapakunqa hinaptinmi kallpanchasqa kasun Munayninta ruranapaq (Gál. 2:20).
3. ¿Imaynatam qawachichwan ancha valorniyoq Jesuspa wañukusqan punchaw kasqanta?
3 Diospa salvaq regalonta anchata kuyaspanchikqa, kusikuyninchikmi yanapanqa Biblia estudiaqkunata, sapakuti watukusqanchikkunata, ayllunchikkunata, vecinonchikkunata, estudiaqmasinchikkunata, llamkaqmasinchikkunata, hukkunatapas Jesuspa wañukusqan punchawta yuyarinankupaq (Luc. 6:45). Chaynaqa yuyarinankupaqyá allinta kallpanchakusun lliw runamasinchikkunaman invitacionta qospa. Mana pitapas qonqanankupaqmi achka wawqe-paninchikkuna sapa wata mosoq listata rurakunku sapakuti invitasqankunamanta. Kay ruraypaq allinta allichakuspam Jehová Dios agradecekusqanchikta qawachisun “mana explicay atina qokuyninmanta” (2 Cor. 9:15).
4. ¿Imakunataq yanapawachwan predicayninchikta masyachinapaq marzopiwan abril killakunapi?
4 Predicayninchikta masyachisun: ¿Marzopiwan abril killapi masyachichwanchu predicayninchikta? Hukkunaman “Cristopa sumaq kayninmanta” willakunapaq kallpanchakusqanchiktam Jehová Dios cheqaptapuni bendecinqa. Paymantam Lloqsimun espiritual kanchayqa chaymi kay kamachikuyta qorqa: ‘Tutayaymanta kancharimuchun achki’ (2 Cor. 4:4-6). Allin kaptinqa, congregacionpi ancianokunam arreglota ruranqaku predicanapaq huñunakuykunata sapaq horakunapi maypi predicanamantapas, chaymantapas kikinkum ejemplo kananku aswan predicaq munaqkunapaq. Ichapas achikyayta predicachwan callekunapi, negociokuna lawpi otaq paraderokunapipas. Predicayninchikta masyachiyta munaspaqa, hayka hora predicanatam tanteakunanchik hinaspa tukuy atisqanchikkunata rurasun cumplinanchikpaq. Sonqomanta Jehová Diosta serviyqa precursor auxiliar hina predicaymi achka wawqe-paninchikkunapaqqa (Col. 3:23, 24).
5. ¿Imaynatam precursor auxiliar hina predicana hora pisiyasqan yanaparqa achka wawqe-paninchikkunata?
5 ¿Precursor auxiliar kayta atichwanchu? Precursor auxiliar hina predicana horam pisiyarun qanchis wata hinaña, chaymi achka wawqe-paninchikkuna bendicionkunata tarinku. ¿Haykapipas precursor auxiliar hina servirqankichu? Kanmi sapa wata chayna serviqkuna. Congregacionpi achka wawqe-paninchikkuna precursor auxiliar hina chay tiempopi serviptinkum, mana qonqanapaq hina rurasqankuqa kanqa servicio watapi. ¿Rakiwaqchu huk killata Jesuspa wañukusqan yuyarina tiempopi precursor auxiliar hina kusisqa predicanaykipaq? Achka wawqe-paninchikkunapaqmi aswan allin kanqa abril killa precursor auxiliar hina servinankupaq, pichqa semanayoq kasqanrayku.
6. ¿Ima bendicionkunatawanmi chaskiwaq precursor auxiliar hina servispayki?
6 ¿Watukamunqachu marzo otaq abril killapi congregacionnikita circuito superintendente? Chaynaqa aswan allinraqchá kanqa. Willakurqañam, 2006 servicio watapi circuito superintendente watukamusqanpim precursor auxiliar hina serviqkunapas rinmankum precursorkunapa chawpi kaq huñunakuyman. Cheqaptapunim chay huñunakuypi sumaq yachachiykunaqa achka precursor auxiliar kaqkunata kallpanchanqa ichapas precursor regular hinaña servinankupaq. Chaymantapas, marzo killapim kusikuywan runamasinchikkunata yanapasun espiritual achkimanta yachanankupaq ¿Qué enseña realmente la Biblia? nisqan mosoq librowan. ¿Imanasqataq mana kallpanchakunkichu mosoq librowan Bibliamanta estudiokuna qallariyta?
7, 8. a) ¿Imataq yanapawachwan tiempota rakiptinchik precursor auxiliar hina predicanapaq? b) ¿Imaynatam ayllunchik yanapawanchikman precursor auxiliar kanapaq, hinaspa imaynatam chayqa ayllunchikta yanapanman?
7 Pichqa chunka horata predicanaykipaqmi allin arreglota ruranayki sapa semana chunka iskayniyoq horata cheqap yachachikuymanta willakunaykipaq. Precursor auxiliar hina ñawpa serviqkunawanmi yanapachikuwaq, chaymi paykunatapas kallpanchanqa qanwan kuska precursor auxiliar solicitud niqta huntanaykichikpaq. Allin arreglowanmi achka wawqe-paninchikkuna, mozo-sipaskunapas yuyaqkunapas, pichqa chunka hora predicayta musyanku mana sasa kasqanta. Jehová Diosta mañakuy. Chaymantañataq tukuy atisqaykita ruray hinaspa ¡precursor auxiliar hina servisqaykimanta kusikuy! (Mal. 3:10.)
8 Achka ayllukunapim allinta allichakunku hukkaqninkullapas precursor auxiliar hina servinankupaq. Ejemplopaq, huk ayllupim pichqa bautizasqa kasqaku chaymi pichqanku precusor auxiliar hina servinankupaq solicitud niqta huntarqaku, iskay manaraq bautizasqa warmakunañataqmi predicayninkuta masyachiypi kallpanchakusqaku. ¿Allinninkupaqchu karqa chayna kallpanchakusqanku? Kaynatam qellqarqaku, “Chay killapi predicayniykuqa mana qonqanaykupaqmi: aylluykupim aswan huñulla kunanqa tarikuniku. Diostam anchata agradecekuniku kayna bendicionkunawan kusikusqaykumanta.”
9. ¿Imaynatam Jesuspa wañukusqan yuyarina tiempopi kuyakuyninchikta astawan qawachichwan?
9 ¿Cheqaptapunichu kallpanchawasun marzopiwan abril killapi achka predicayninchik, hinaspa aswantaraqchu asuykachiwachwan hanaq pachapi Taytanchikman? Chaypaqmi, astawan kallpanchakunanchik sonqonchikpi Jehová Diostawan Churin kuyasqanchikta wiñachinapaq hinaspam predicayninchikta masyachinanchik. Salmista hinayá ñoqanchikpas takisun: “Tayta Diosmanmi anchata graciasta qosaq. Ñoqaqa achka runapa qayllanpim payta alabasaq” (Sal. 109:30). Jehová Diosqa bendecinqamá Jesuspa wañukusqan yuyarina tiempopi sonqomanta predicayninchikta, chayraykuyá runakunapa achkinmanta rimasun tutayaymanta achka lloqsinankupaq hinaspa ‘kawsay qokuq achkita’ reqsinankupaq (Juan 8:12).