Imaynatam preparakuchwan revistakunata munachinapaq
1. ¿Imanasqam allin kanman revistakunata munachinapaq sapakama preparakuyninchik Reinopaq Servicionchikpi kaqllata rimanamantaqa?
1 “¿Revistakunata munachinapaq preparakuy? ¿Imapaq?, ñataq Reinopaq Servicionchikpi imayna predicanapaqqa kachkanña”, ichapas chaynata tapukunki. Arí, achka wawqe-paninchikkunatam chayqa yanaparqa, chayna kaptinpas sapakamam allinta preparakunanchik. Revistakunata imayna munachinapaq rimaykuna huk lawpi yanapakuqqa ichapas huk lawpiqa mana yanapakunmanchu, chayraykum Reinopaq Servicionchikpi nisqanman hinallataqa mana munachinanchikchu. Chay yanapakuyta servichikuspapas ancha allinmi kanman rimasqanchikman hinalla munachiyninchikqa.
2. ¿Imakunatam rurananchik revistapa mayqan yachachikuyninmanta rimanapaq?
2 Akllay revistapa huk kaqnin yachachikuyninta: Revistata puntata leeruspayki, huk kaqnin gustasusqayki yachachikuyninta akllay predicanayki lawpaq hina. Convencesqa hinaspa kusikuywan revistata munachisqaykim ichapas runakunata yanapanman leenankupaq. Chaynataq huk kaqnin sumaq yachachiyninmanta rimayta munaspaykipas allinmi kanman revistapa lliw yachachiyninkunata reqsiyniki, chaynapim aswan yachay munaqwan tuparuspayki mayqan yachachikuyninmantapas predicayta atinki.
3. Predicaptikichik, ¿imayna rimay qallariynikichikmi yanapasunkichik runakuna uyarisunaykichikpaq?
3 Huk tapukuyta ruray: Chaymantañataq, piensariy imaynatam rimayta qallariwaq. Qallariypi imayna rimayninchikmi ancha allin kanqa runamasinchik uyariwananchikpaq. Ichapas piensarinanpaq hinaspa yachayta munananpaq hina tapukuykunata rurachwan. Ancha allinmi piensarinanpaq hina tapukuykunata rurayqa. Ichaqa amayá hukmanyanankupaq hina otaq atipanakunapaq hina tapukuykunataqa rurasunchu.
4. Runakunawan rimaspanchik, ¿imanasqataq Bibliapa textonta leenanchik?
4 Bibliapa huk textonta leey: Tukunapaqñataq Bibliamanta huk textonta akllay runamasiykiman leepunaykipaq, ichapas revistapi rikurimuq textonta. Bibliapa textonta leespanchikmi runamasinchikta qawachinchik Diospa Palabranpi yachachisqanchik takyasqanta (1 Tes. 2:13). Manaña revistata chaskiwaptinchikpas Bibliapa textonta leesqanchikwanmi predicachkanchikña. Wakin wawqe-paninchikkunam runakunapa yachay munayninkuta masyachirqaku Bibliapa textonta leespanku manaraq tapukuykunata rurachkaspanku. Wakinkunañataq kaynata qallarinku: “Ima niwaqtaq Bibliapa kay textonmanta”, nispa. Chaymantañataq qawachinku revistapa yachachisqanwan tupasqanta hinaspam manaraq revistata munachichkaspanku chaymanta rimanku runakunapa yachay munayninkuta masyachinankupaq.
5. ¿Imakunatam yuyarinanchik revistakunata munachinapaq preparakuspanchik?
5 Revistakunata imayna munachinapaqqa manam Reinopaq Servicionchikpi nisqanman hinallachu munachinanchikqa. Allinmi kanman pisi rimayllawan hinaspa rimasqaykiman hinalla munachiyqa. Chaymantapas mana sasa palabrakunawanmi rimawaq aswanqa runamasiyki uyarisunaykipaq hina palabrakunawanmi. Piensariy revistanchikkuna sumaq yachachiyniyoq kasqanpi hinaspa kusikuywan rimariy. Allinta preparakuspaykiqa ‘wiñay kawsanankupaq [...] kaqkunapa’ makinpim saqenki La Atalaya hinaspa ¡Despertad! revistakunata (Hech. 13:48).