¿Allintachu servichikuchkanki?
1 “¡Amalaya predicachkaymanña kay revistawan!”, chaynatam nirqa 1 de enero 2008 watapaq Llaqta Cuidaq revistata leeyta tukuruspan huk paninchik. Kay revistapa yachachikuyninqa ancha allinpunim runamasinchikkunapaqpas. Enero 2009 watamantaqa sapa kimsa killam runamasinchikkunaman predicanallapaq quechuapi lloqsimunqa. ¿Leechkankichu quechuapi revistata? ¿Imaynatataq servichikuwaq predicaspa?
2 “Jesuspa yachachisqan”: Kay yachachikuywanqa Bibliamantapas estudiachichwanmi, ¿aw? Sichum manaraq estudiachispaqa kallpanchakuy: qallariypi leepuy imamanta yachachisqanta hinaspa piensarichiy qallariypi kaq parrafopi Jesuspa yachachisqanwan. Yachayta munaptinqa qatiqninpi tapukuykunawan yachachiy. Niwaqtaqmi piensasqanta willasunaykipaq, chaymantañataqmi dibujonkunawan as rimayllapi yachachispa qatiqnin parrafomanña pasawaq. Chayllaraq watukuspaqa iskay-kimsa parrafollamantam yachachiwaq wakintañataq yapapi watukuspaña. Riy estudio qallarinaykipaq Yachachiq librowan preparakuspa.
3 “Familiapaq consejo”: Kay yachachikuykunaqa yanapanqam casarasqakunata chaynataq wawa-churiyoqkunatapas Bibliapa yachachisqanwan sasachakuyninkuta atipanankupaq. Yanapanmantaqmi runamasinchikkunatapas Bibliapa yachachisqanta entiendenankupaq (2 Tim. 3:16, 17).
4 Mozo-sipaskunapaq: “Mozo-sipaschakunapaq” nisqanqa manam Bibliamanta estudianallankupaqchu aswanqa kikinkupa piensasqankuta qellqanankupaqmi. Kayqa ancha allinmi predicasqanchik lawpi mozo-sipaschakuna Bibliapa nisqanta estudianankupaq (Sal. 119:9, 105). Tayta-mamakunata predicaspaqa qawachichwanmi “wawa-churikiwan parlarinapaq” nisqa yachachikuyta, kayqa allinpunim Dios ñawpa tiempopi serviqkunamanta yachachinanchikpaq. Chaynaqa, tanteay wawa-churikiwan estudianaykipaq.
5 Wakin yachachikuykuna: “Yachay munaqkunapa tapukusqan” nisqa yachachikuytaqa runamasinchikkunapaschá tapukunku. Predicachwanmi kaywanpas. “. . . cartan” nisqanpiñataqmi willawanchik misionerokuna otaq huk iñiqmasinchikkuna Dios servisqankupi sasachakuyninkuta imayna atipasqankumanta. Kay cartakunam Diosmanta yachay munaqkunata qawachinqa Jesuspa nisqanman hina Diosmanta allin noticia allpantinpi predicakusqanta (Mat. 24:3, 14).
6 Diosmanta Willakunapaq Yachachiq Escuelapi sapa semana Biblia leesqanchikmantam “Diosman asuykuychik” nisqa yachachikuyqa kallpanchanqa allin sonqoyoq runakunatam Jehová Diosmanta astawan yachanankupaq. “Iñiyninkupi takyaqkunamanta” nisqañataqmi Dios ñawpa tiempopi serviqkunapa rurasqankuta yachaspa kay tiempopi sasachakuyninkuta atipanankupaq yanapanqa.
7 ¡Mayna kusikunapaqmá Llaqta Cuidaq revistapi kayna yachachikuyninkunaqa, hamuq watapiqa predicananchikpaqmi sapa kimsa killa lloqsimunqa kayna yachachikuyniyoqkuna! Chaymi kallpanchakunanchik revistapa yachachikuyninkunata reqsinanchikpaq hinaspa predicacionpipas allinta servichikunanchikpaq.