Kimsa punchaw asambleanchikqa tukuypim yanapawanchik
1. ¿Imakunapitaq israelitakunaqa yuyaymananmanku karqa Diospa kamachisqan fiestakunapi kaspanku?
1 Ñawpaq tiempopi israelitakunam watapi kimsa kutita huñunakuqku Diospa kamachisqan fiestakunata ruranankupaq. Chay fiestakunaman qarikunalla rinanku kaptinpas yaqa lliwmi familiapi kaqkunaqa kusisqa riqku Jerusalenman (Deu. 16:15, 16). Chaypim Diospa cheqap yachachikuyninkunamanta allinta yuyaymanaqku. Chaypichá yuyaymanaqku Jehová Diosqa siervonkunata kuyakuywan yanapaq kasqanpi (Deu. 15:4, 5), yachachiwasqanchik chaynataq cuidawasqanchik confianapaq kasqanpi (Deu. 32:9, 10), hinaspa Diospa akllasqan llaqtan kasqankurayku Pay hina allin ruraq kasqanta imayna qawachinankupipas (Deu. 7:6, 11). Chaynam kunan tiempopi kimsa punchaw asambleanchikpas yuyaymanananchikpaq yanapawanchik.
2. ¿Imaynatam asambleapi yachachikuykuna yanapawanchik cheqapmanta allinta entiendenapaq?
2 Yachachikuyninkunam astawan yanapawanchik allinta entiendenapaq. Kimsa punchaw asambleapi kaq discursokuna, qawanapaq dramakuna, demostracionkuna chaynataq wawqe-paninchikkunata tapusqankum anchata yanapawanchik Bibliapa nisqanta allinta entiendenanchikpaq (Juan 17:17). Jehová Diospa llaqtanqa anchatam kallpanchakun Diosmanta allin yachachikuykunata enteron pachapi runakuna chaskinankupaq (Mat. 24:45-47). ¿Manachu kusikuwaq imakuna yachanaykimanta piensaspayki?
3. ¿Imaynatam anchata yanapachikuchwan asambleapi yachachikuykunawan?
3 Yachachikuykunawan allinta yanapachikunapaqqa chay asamblea apakusqan punchawkunam mana faltakuspa rinanchik hinaspam yachachikuykunata allinta uyarinanchik. Llamkapakuspaykiqa patronnikimantam permisota mañakuwaq asambleaman rinaykipaq. Asamblea apakusqan punchawkunapi sumaqta uyarinaykipaqqa allin puñusqam rinayki. Achka iñiqmasinchikkunatam yanaparqa yachachimuqta allinta qawasqankuwan uyarisqankuta pisillapi qellqasqankuqa. Celularnikiwan otaq chayman rikchakuq huk aparatokunawanpas ama hukkunataqa sasachaychu. Asamblea apakusqan horapiqa amataq rimaychu, mensajekunata apachiychu nitaq mikuypaschu.
4. ¿Imaynatam tayta-mamakunaqa warmankuta yanapanmanku asambleawan yanapachikunankupaq?
4 Sapa qanchis watam israelitakunaqa huñunakuqku Ramada Fiestapi Diospa kamachikuyninkuna leesqankuta uyarinankupaq. Yaqa lliw familiakunam ‘wawakunapiwan’ kuska huñunakuqku uyarinankupaq hinaspa yachanankupaqpas (Deu. 31:12). Kunanpas ancha kallpanchasqam tarikunchik familiakuna warmankupiwan kuska asambleapi yachachikuykunata sumaq atencionwan uyariptinku. Wakinpiqa allinmi kanman asambleapi yachasqankumanta sapa tuta familiawan kuska yuyariyninkuqa. ‘Warmakuna yanqakunallapi piensaq’ kasqankuraykum tayta-mamakunaqa mana saqenankuchu munasqankuman hina ruranankutaqa. Paykunataqa allintam qawananku mozo-sipasña kaptinkupas, mikuy horapi chaynataq hotelpi kaspankupas (Pro. 22:15; 29:15).
5. ¿Imaynatam Diosmanta yachachisqanchikta sumaqyachin allin portakusqanchik?
5 Allin portakuyninchikwanmi Diospa yachachisqanta sumaqyachinchik. Asambleapa apakusqan llaqtapi imayna portakusqanchikwanmi Diosmanta yachachisqanchikta sumaqyachinchik (Tito 2:10). Hotelpi llamkapakuqkunaqa qawanku samapakuqkuna kuyakuq, respetakuq chaynataq mana hatunchakuq kasqankutam (Col. 4:6). Qayna wata, Jehová Diospa testigonkuna hotelta chaypi samanankupaq niptinkum chaypi llamkaq warmi kaynata nirqa: “Jehová Diospa testigonkuna kay hotelpi samapakunankutam munaniku, qamkunaqa kankichik kuyapayakuq chaynataq sumaq portakuyniyoqmi. Chaymantapas, kay hotelpi llamkaqkunatam allin respetowan qawankichik hinaspa kaypi tukuy ima kaqkunatapas sumaqta cuidankichik”, nispa.
6. ¿Imaynatam Diosmanta yachachisqanchikta sumaqyachinman asamblea apakusqan llaqtapi imayna pachakuyninchik?
6 Qasqonchikpi apasqanchik tarjetaqa manam pi kasqanchikta wawqe-paninchikkuna yachanallankupaqchu nitaq asamblea apakunanmanta runakuna yachanallankupaqchu, aswanqa Diosmanta willakunapaqwanmi. Achka runakuna llutan pachakunawan pachakuptinkupas iñiqmasinchikkunaqa sumaq arreglasqa chaynataq humildadwanmi pachakunku, chayna pachakusqankuqa sutillam qawakun (1 Tim. 2:9, 10). Chayraykum, asambleapa apakusqan llaqtapi kaspanchikqa otaq hotelman chayllaraq chayaspanchikqa imayna pachakuyninchikta qawakunanchik. Poloyoq hinaspa moqollapiña pantaloyoq chayman chayayqa manam allinchu kanman Jehová Diosta serviqpaqqa. Estadiopi asambleanchik apakuptinpas allin tanteowanmi pachakunanchik. Asambleanchik tukuruptin mayman mikuq rispanchikpas manam llutan pachakunawanqa hinakunanchikchu.
7. ¿Imaynatam wawqe-paninchikkunawan astawanraq reqsinakuchwan asamblea apakusqan punchawkunapi?
7 Israelitakunaqa fiesta rurasqankupiqa huklaw llaqtayoq chaynataq huklaw nacionniyoq wawqe-paninkuwanmi kusirikuqku, chaywanmi aswan huñulla kaqku (Hech. 2:1, 5). Chaynallataqmi kimsa punchaw asambleakunapipas sutillata qawakun wawqe-panintin huñulla kasqanchikqa. Chayna huñulla kasqanchikwanmi runakuna admirakunku (Sal. 133:1). Ñoqanchikqa kallpanchakunchik astawan iñiqmasinchikkunata reqsinanchikpaqmi, chaypaqqa asambleamanta hawaman lloqsinamantaqa paykunawanmi kuska mikunanchik.
8. ¿Imanasqataq asambleapi kikinchikmanta yanapakuyqa ancha allin?
8 Asambleanchik ordenninpi apakusqanwanmi runakunaqa admirakunku, astawanraqmi mana imallapaq yanapakuqkunata qawaspankuqa. ¿Qampas ‘kikikimanta’ yanapakuyta munawaqchu asamblea allinta apakunanpaq? (Sal. 110:3.) Achka tayta-mamakunam wawa-churinkupiwan kikinkumanta yanapakunku, chay rurasqankuwanmi warmankuta yachachinku hukkunata yanapanankupaq. Penqakuq kasqaykirayku mana piwanpas amistadta armayta atiptikiqa, asambleapi yanapakusqaykim yanapasunki. Huk cristianam kaynata nirqa: “Familiaymantawan huk-iskay amistadniykunamanta hukkunataqa manam pitapas reqsiqchu kani asambleapiqa. Limpiaypi kikiymanta yanapakuspaymi ichaqa achka iñiqmasiykunata reqsirurqani. ¡Anchatamá chay rurasqayqa kusichiwarqa!”, nispa. Asambleapi achka wawqe-paninchikkunawan imapipas yanapanakuspaqa astawanmi amistadta armasun hinaspapas ancha kusisqam tarikusun (2 Cor. 6:12, 13). Sichu chayta mana haykapipas ruraspaqa, ancianokunata tapukuy imakunatam rurawaq chaypi yanapakunaykipaq.
9. ¿Imatam rurananchik asambleaman hukkunata invitananchikpaq?
9 Hukkunatapas invitay hamunankupaq. Pasaq watakunapi apakusqanman hinam, asambleapaq kimsa semana faltachkaptin invitacionta runakunaman aypusunchik asambleaman hamunankupaq. Congregacionkunam chay invitaciontaqa maymi predicananku lawkunaman cheqechinqaku (“¿Ima nispataq invitacionta qonanchik?” niq recuadrota qaway). Puchuq invitacionkunatañataqmi asambleaman apananchik, chaynapi asambleaman hamuqkunapas Diosmanta maypipas willakuspa servichikunankupaq.
10. Willariy asambleapaq invitacion aypusqanchikkuna allinpi tukusqanmanta experienciakunata.
10 ¿Allinpichu tukun invitacionta aypusqanchikqa? Huk asambleapim iñiqmasinchikkunata chaskiq huk casarasqa warmi-qarita tiyanankuman pusarqa, paykunam nirqaku: “invitacionta chaskispaykum hamurqaniku” nispanku. Nirqakutaqmi chay invitacionta chaskiruspanku yachayta munaspa risqankumantapas. Chay asambleaman chayanankupaqqa yaqa 300 kilometro masnintam carrowan rirqaku. Chaynallataqmi wasin-wasin predicaq paninchikpas huk runaman invitacionta qorqa. Chay runa atencionwan uyarisqanraykum paninchikqa chay invitacion ima rimasqanmanta yachachirqa. Chaymantam paninchikqa chay invitasqan runata asambleapi rikururqa amistadninpiwan kuska mosoq qellqa apayniyoq purichkaqta.
11. ¿Imanasqataq ancha allin kimsa punchaw asambleaman sapa wata riyninchikqa?
11 Israelitakunapa rurasqanku fiestakunaqa Diospa regalo qosqanmi karqa, chaykunam yanaparqa ‘Diosta respetaspa cheqap sonqowan payta adoranankupaq’ (Jos. 24:14). Chaynallataqmi kunan tiempopi kimsa punchaw asambleanchikkunapas ‘yanapawanchik’ Diospa yachachikuyninkunaman hina kawsananchikpaqwan payta yupaychananchikpaq (3 Juan 3). Jehová Diosyá bendecichun Palabran kuyaqkunatawan asambleaman hamunankupaq kallpanchakuqkunata.
[4 kaq paginapi suti rikuylla kaq willakuy]
Asambleapa apakusqan llaqtapi imayna portakusqanchikwanmi Diosmanta yachachisqanchikta sumaqyachinchik
[5 kaq paginapi suti rikuylla kaq willakuy]
Asambleapaq kimsa semana faltachkaptinmi invitacionta runakunaman aypusunchik asambleaman hamunankupaq
[5-6 kaq paginakunapi recuadro]
2012 watapi kimsa punchaw asambleapaq yuyarichiykuna
◼ Imay hora qallarinanmanta. Asambleapi yachachikuykunaqa kimsantin punchawmi qallarinqa 9.20 tempranomanta. Punkukunam kichasqaña kanqa 8.00 a.m. horamanta. Asambleanchik sumaqta qallarinanpaqmi uyarinallapaq taki qallaykuptinqa maymi tiyananchikpiña llapallanchik kananchik. Viernes hinaspa sabadotaqa tukunqa 4.55 tardeta, domingotañataq 3.40 tardeta (Ayacucho lawpiqa iskay punchawllam asambleaqa apakunqa, chaymantañam asamblea imay hora qallarinanmantaqa congregacionpi willakuy kanqa).
◼ Carrokuna maypi saqenamanta. Kikinchikpa localninchikpi otaq alquilasqanchik localpi carro saqenapaq sitio kaptinqa manam pagasunchu, chayasqanchikman hinataqmi ordenninpi saqesun. Chaymantapas, mana puriy atiqkunapaq sapaqchasqa sitiopiqa carronkutam saqenmanku paykunata apamuq kasqanmanta letreroyoq kaq carrokunallata. Carro saqenapaq sitiokuna taksalla kasqanraykum kallpanchaykiku huk carrollapi achka rinaykichikpaq.
◼ Tiyanamanta. Tiyananchikpaqmi sapaqchachwan carronchikpi ñoqanchikwan riqkunallapaq, wasinchikmanta riqkunallapaq chaynataq ñoqanchikwan Biblia estudiaqkunallapaq (1 Cor. 13:5).
◼ Mikuy apanamanta. Chawpi punchawpi mikuyta rantiq lloqsinanchikmantaqa sapakamam mikuyninchikta apakunanchik. Imapas taksalla kaqpim apananchik tiyananchik ukupi kamaqllata, manam llumpay hatun kaqkunapiqa apanachu. Manataqmi imapas pakiq kaqkunataqa apanachu.
◼ Qollqewan yanapakunamanta. Asambleamanta agradecekusqanchiktam qawachichwan sonqonchikmanta qollqenchikta qospa, chaywanmi enteron pachapi predicakunanpaq yanapasun. Chequepi qoyta munaspaqa “Asociación de los Testigos de Jehová” niqtam qellqananchik. Kay wata qallarisqanmantapacham bancontakama débito hinaspa crédito nisqa tarjetakunawan qoyta atichwan.
◼ Imapas qonqaymanta pasaruwaptinchik. Asambleapi qonqayta imapas pasaruwaptinchikqa otaq pipas mana allinta sientekuptinqa chaylla willakuy hichpallaykipi kaq acomodadorman, payñam willanqa Primeros Auxilios kaqkunaman. Mana atiendeyta atispankuqa 911 nisqa numeromanmi qayanqaku. Chaynapim 911 nisqapi yanapakuqkunata mana sasachasunchu kikinchikmanta qayapayaspanchik.
◼ Hampikunamanta. Doctorpa nisusqayki hampita tomanayki kaptinqa ama hina kaspa tomanaykipaq kaqllata apay, asambleapiqa chay hampikunataqa manam qonqakuchu. Diabetes onqoywan onqosqaykirayku vacunachikunaykipaq kaqta apaspaykiqa manam asambleapiqa nitaq hotelpiqa wikapanaykichu, kikikim chinkachinayki; mana chayqa pipas tuksikurunmanmi.
◼ Zapatomanta. Asambleapim sapa wata urmanku zapatonku mana allin kasqanrayku. Chaymi zapatonchikqa kanan gradaspi otaq maypiña puriptinchikpas mana urmachiwananchikpaq hina.
◼ Karu uyariqkunamanta. Discursokunam uyarikunqa FM radiopi, chayqa kanqa local ukullapim. Chayta allinta servichikunaykipaqqa audifonoyoq radiochatam apakuwaq.
◼ Wawata apanapaq kaqkunamanta. Wawata apanapaq coche nisqankutaqa manam asambleamanqa apanachu. Wawata tiyachinapaq sillachata apaspaqa tiyasqanchikpa waqtanpi kamaqllatam apana.
◼ Perfumemanta. Yaqa llapan asambleakunam apakun mana ancha wayrapa yaykunan localpi. Chaymi perfumepa olorninwan mana allin sientekuqkunapi piensaspa llumpay olorniyoq perfumekunawan hinakuspaqa asllata hinakuna (1 Cor. 10:24).
◼ Sírvase visitar (S-43) nisqamanta. Allinmi kanman hukta otaq iskayta Sírvase visitar nisqa papelta apayninchik, pimanpas predicaspanchik astawan yachayta munaptinqa sutintawan maypi yachasqanta chaypi qellqananchikpaq. Hinaspam Departamento de Publicaciones niqman otaq congregacionpi secretarioman asambleamanta kutimuspa qonanchik (2011 watapa mayo killanpi Diospaq Llamkayninchikpa 3 kaq paginanta qawariy).
◼ Restaurantekunamanta. Restaurantekunapi allinta portakuptinchikqa Jehová Diospa sutinmi hatunchasqa kanqa. Propina qonapaq costumbre kaptinqa qowaqmi.
◼ Hotelkunamanta.
1) Ama sapaqchaychu mana servichikunaykipaq cuartokunataqa, cuartopi haykata samachinapaq nisqankuman hinalla samachiy.
2) Imapas mana urgente atiendenayki kaptinqa ama yanqaqa hotelpi samapakunaykipaq nisqaykitaqa yanqachaychu, imapas pasakuptinqa hotelpi cuentallikuqmanmi chaylla willanayki (Mat. 5:37).
3) Samapakusqayki hotelpi llamkaqkunawan rimaspaykiqa allin portakuq kasqaykita qawachiy. Paykunaqa achka runakunata atiendesqankuraykum munanku entiendeq, pacienciakuq hinaspa kuyapayakuq kananchikta.
4) Tayta-mamakunaqa warmankutam allinta cuidananku hotelpi kaspankuqa.
5) Lista de hoteles recomendados nisqa papelpi rikuriq preciokunaqa huk punchawllapaqmi. Sapaqmi impuesto cobrasqankuqa. Cuartomanta astawan cobrayta munasuptikiqa ama qoychu, aswanqa chaylla willay asambleapi Departamento de Alojamiento nisqa cuentallikuqkunaman.
6) Samapakusqayki cuartopi ima sasachakuypas kaptinqa Departamento de Alojamiento nisqamanmi willanayki.
◼ Servicio voluntariomanta. Yanapakuy munaqkunaqa rinman Servicio Voluntario nisqamanmi. Manaraq 16 watanpi kaq warmakunapas yanapakunmankum, ichaqa tayta-mamanwan kuska otaq tayta-mamanpa permisasqan yuyayniyoq kaqwanmi.
[5 kaq paginapi recuadro]
¿Ima nispataq invitacionta qonanchik?
Predicananchik lawpi lliw runakunaman invitacionta qonanchikpaqqa ichapas pisillata rimarispa qochwan. Nichwanmi kaynata: “Imaynallam. Enteron pachapim kay invitacionta runakunaman qochkaniku. Chaymi qanmanpas apamuchkayki. Kaypim astawanraq yachanki imamanta kasqanta”, nispa. Kusikuywan rimariy. Semana tukuyta invitacionta aypuspaykiqa qowaqtaqmi revistakunatapas.