“Qamqa allin precursormi kawaq”
1. ¿Ima ninmi huk iñiqmasinchik precursor hina llamkasqanmanta?
1 Kathe B. Palm sutiyoq precursoram nin: “Kayna kusichiwaqniy llamkaytaqa manam maypipas tariymanchu karqa, manataqmi Dios serviyniypiqa yanapawanmanchu karqa”, nispa. Payqa Chile nacionpim tukuy lawpi unay watakunaña predicarqa. Precursorkuna kayna kusichiq llamkayniyoq kasqankupi piensaspanku wakinqa yaqapaschá nisurqanki: “Qamqa allin precursormi kawaq”, nispa.
2. Willay Dios serviyqa imanasqam ancha kusikunapaq kasqanta.
2 Kusisqa kawsakuymanta. Jesuspaqqa Taytanpa munaynin rurayqa mikuynin hinam karqa (Juan 4:34, NM). Chaymi Jesusqa yacharqa imamanta rimasqanta, qatiqninkunatam yachachirqa cheqap kusikuyqa Jehová Dios serviymanta kasqanta. Hinaptinqa Diospaq allin kaqkunata pipas ruraspanqa, kusisqam tarikun. Chaymantapas, runamasinta yanapananpaq tiemponta, kallpanta hinaspa kapuqninkunata servichikuspanqa aswan kusisqaraqmi tarikunqa (Hech. 20:31, 35).
3. ¿Ima kusikuytam tarichwan astawan predicaspaqa?
3 Chaymantapas astawan predicaspaqa, astawanmi Bibliamanta estudiokunata qallarispa yachachisunchik, chaymi astawan kusichiwanchik. Qallariypiqa runakuna mana uyariq hina rikchakusuptikipas, astawan predicayta yachaspaykim musyakunki runakuna aswan yachay munasqankuta. Precursor hina huk wata serviruspaykim aswanraq yanapakuyta chaskinki Precursorkunapaq Escuelapi, chayqa allintam predicaynikipi yanapasunki (2 Tim. 2:15). Diospa cheqap yachachiyninmanta hinalla willakuptikiqa, tiempopa risqanman hinam Diosta servinmanku (Ecl. 11:6).
4. ¿Imatam tanteanmanku colegionkuta tukunankupaqña kaq mozo-sipaskunaqa?
4 Mozo-sipas, piensariy. Sichu colegioykita tukunkiña, hinaspaqa ¿piensarunkiñachu tiempoykiwan ima ruranaykipaq? Kunankamaqa tiempoykitam astawan servichikurqanki tareaykikunata ruranaykipaq. Colegioykita tukuruspayki, ¿imatam ruranki tareaykikunata ruranaykipaq tiempopi? Tukuy punchaw llamkayman qokunaykimantaqa, ¿imanasqataq orakuruspayki mana tanteankichu precursor regular kanaykipaq? Lliw runakunaman predicasqayki, predicanaykipaq sasachakusqaykita atipasqayki, tiempoykita allinta servichikusqayki hinaspa allin yachachiq kanaykipaq kallpanchakusqaykiqa tukuy vidaykipim yanapasunki.
5. ¿Imaynatam tayta-mamakunawan congregacion kaqkunapas precursor kanapaq kallpanchanmanku?
5 Tayta-mamakuna, ¿kallpanchachkankichikchu warmaykichikta precursor kanankupaq? Rimapayasqaykichik hinaspa rurasqaykichikmi yanapanqa Diospa munayninta puntapi churanankupaq (Mat. 6:33). Ray sutiyoq iñiqmasinchikmi colegionta tukuruspan precursor kayta qallaykurqa, paymi nin: “Mamaymi piensaqpuni precursor kayqa ancha kusikunapaq kasqanta”, nispa. Wakin iñiqmasinchikkunapas yanapanmanmi rimasqankuwan hinaspa rurasqankuwanpas. España nacionmanta José sutiyoq iñiqmasinchikmi nin: “Congregacionniypi kaq iñiqmasinchikkunam precursor kaymantaqa niqku mozo-sipaskunapaq aswan allin llamkay kasqanta. Precursor kayta chaninchasqanku hinaspa yanapawasqanku anchata kallpanchawaptinmi precursor kayta qallaykurqani”, nispa.
6. ¿Imatam rurawaq precursor regular kayta sonqoykipi mana munaspaykiqa?
6 Sasachakuyta imayna atipanamanta. Ichaqa, ninkipaschá ‘precursor kayta munayqa sonqoykipi mana kasqanta’. Chaynata piensaspaykiqa Jehová Diosman imayna sientekusqaykita willaspa niy: “¿Precursor kayta atiymanchu imaynaya?, ichaqa munasqaykitam rurayta munani”, nispa (Sal. 62:8; Pro. 23:26). Hinaspa yanapakuyta maskay Bibliapi chaynataq qellqanchikkunapipas. Achka precursor regular kaqkunam puntapiqa precursor auxiliar kaspanku kusikuyta tarirqaku, hinaspam precursor regular kaytaña qallaykurqaku (Sal. 34:8).
7. Sapa killa qanchis chunka hora cumplinaykimanta iskayrayaspaqa, ¿imatam rurawaq?
7 Ichapas iskayrayachkanki sapa killa 70 hora cumpliyta mana atinaykimanta. ¿Imanasqataq chayna sasachakuq precursorkunawan mana rimankichu? (Pro. 15:22.) Hinaspa tanteay ima punchawkuna predicanaykita. Yaqapaschá predicanaykipaq allinta tiempochakuspaqa musyakunki mana sasa kasqanta (Efe. 5:15, 16).
8. ¿Imanasqataq allin kanman imayna tarikusqanchikta wakinpi qawakuyqa?
8 Imayna tarikusqaykita qawakuy. Vidanchik cambiasqanraykum allin kanman imayna tarikusqanchikta wakinpi qawakuyqa. Ichapas llamkaynikimanta jubilakuytaña piensachkanki. Randy sutiyoq iñiqmasinchikmi llamkayninmanta lloqsikuruspan kaynata nin: “Chay tanteasqaymi yanapawarqa señoraywan kuska precursor kanaykupaq, chaymi astakurqaniku predicaqkunapa mana ancha kasqan lawman. Achka bendicionkunatam chaskirqani... chaykunamantapas aswan allinqa concienciaypi hawka tarikusqaymi”, nispa.
9. ¿Imatam casarasqakuna tanteananku?
9 Wakin casarasqakunam allinta piensaspanku tantearunku, iskayninku tukuy punchaw mana llamkanankupaq. Arí, chaypaqmi familiaqa kapuqllanwan contentakunan, chayqa allinninkupaqmi kanqa. Qaynakunallam John sutiyoq iñiqmasinchikpa señoran astawan predicananpaq tukuy punchaw llamkayninta saqerurqa. Johnmi nin: “Ancha kusisqam tarikuni señoray tukuy punchaw Dios servisqanmanta yachaspay”, nispa.
10. ¿Imataq cristianokunata kallpanchan precursor kayta piensanankupaq?
10 Iñisqaykitawan kuyasqaykita qawachiy. Jehová Dios tanteasqanraykum predicaymanta aswan allin rurayqa mana imapas kanmanchu. Pisi tiempollamantañam kay Pachapi mana allinkuna chinkachisqa kanqa, ichaqa Jehová Diospa sutinta rimaqkunallam salvasqa kanqaku (Rom. 10:13). Tukuy sonqonchikmanta Jehová Diosta kuyaspaqa chaynataq ñoqanchikrayku rurasqanmanta agradecekuspaqa, predicanapaq Churin Jesuspa kamachisqantam kusikuywan kasukusun (Mat. 28:19, 20; 1 Juan 5:3). Tukupay tiempopi kawsasqanchikmanta seguro kasqanchikqa, kallpanchawasunmi tiempo kachkaptinraq Dios serviyninchikpi tukuy atisqanchikta rurananchikpaq (1 Cor. 7:29-31).
11. ¿Imatam rurawaq, allin precursor kanaykimanta pipas nisuptikiqa?
11 Precursor kayqa manam hayka hora predicayllachu, aswanqa tukuy sonqonchikmanta Dios yupaychasqanchikta qawachiymi. Chayrayku, sichu pipas nisunki: “Qamqa allin precursormi kawaq”, nispa, hinaptinqa allinnikipaq kasqantayá piensay. Jehová Diosman orakuspaykiyá tanteay precursorkunawan kuska, qampas Diosta kusisqa servinaykipaq.
[4 kaq paginapi suti rikuylla kaq willakuy]
Tayta-mamakuna, warmaykichikta kallpanchaychik precursor kanankupaq.
[5 kaq paginapi suti rikuylla kaq willakuy]
Jehová Dios tanteasqanraykum predicaymanta aswan allin rurayqa mana imapas kanmanchu.