¿Kallpanchakusunchu?
Jesuspa wañukusqan punchawta yuyariyqa agradecekusqanchikta qawachinapaqmi
1. ¿Imapaqmi yanapawasun Jesuspa wañukusqanta yuyariyqa?
1 Abril killapa 14 punchawninpi Jesuspa wañukusqanta yuyariyqa, yanapawasunmi Jehova Diospa kuyawasqanchikmanta agradecekusqanchikta qawachinapaq. Lucas 17:11-18 willakusqanmi sutillata qawachiwanchik chayna kanapaq Jehova Dioswan Jesus munasqankuta. Chaypi willakusqanman hinaqa, leprawan onqoq chunka runakunamantam huklla hampisqa kasqankumanta agradecekurqa. Rantinchikpi Jesuspa wañukusqanraykum, hamuq tiempopi lliw onqoykuna chinkachisqa kanqa hinaspapas wiñaypaqmi kawsasun. Hinaptinmi, Jehova Diospa bendicionninkunamanta sapa punchaw agradecekusun. Ichaqa, ¿imaynatam agradecekusqanchikta qawachichwan hamuq semanakunapi?
2. ¿Imataq yanapawachwan agradecekuq kanapaq?
2 Agradecekuq kasun. Agradecekuq kanapaqqa, imayna piensayninchikmantam kanqa. Agradecekuq kanapaqmi yanapawachwan chay punchawkunapaq akllasqa textokunata leeyninchik. Chayqa kachkan calendarionchikpi hinaspa Diospa Palabranta sapa punchaw estudianapaq folletonchikpim. ¿Kallpanchakuwaqchu familiaykiwan kuska leenaykipaq? Chayta ruwayqa yanapawasunmi Jesuspa wañukusqanmanta aswan agradecekuq kanapaq. Kayqa yanapawasuntaqmi chayna kasqanchikta qawachinapaq (2 Cor. 5:14, 15; 1 Juan 4:11).
3. ¿Imakunata ruwaspam agradecekuq kasqanchikta qawachichwan?
3 Agradecekuq kasqanchikta qawachisun. Agradecekuq kasqanchikqa ruwasqanchikpim qawakun (Col. 3:15). Leprawan onqosqanmanta sanoyaruq runaqa, Jesustam maskarqa agradecekunanpaq. Payqa kusikuywanchá sanoyachisqa kasqanmanta lliw runakunaman willarqa (Luc. 6:45). ¿Yaqachu agradecekuq kasqanchik ñoqanchiktapas tanqawasun Jesuspa wañukusqanta yuyarisqanchik killapi Diosmanta astawan willakunapaq? Agradecekuq kasqanchiktaqa qawachichwantaqmi precursor auxiliar kaspa otaq chay killapi astawan Diosmanta willakuspa. Chay yuyarinapaq tutapipas, agradecekuq kasqanchikqa tanqawasunmi lliw hamuq runakunata allinta chaskiykunapaq hinaspa imapas tapukuyninkuta kutichinapaq.
4. ¿Imata ruwanapaqmi kallpanchakuchwan?
4 ¿Kay kutillapiñachu Jesuspa wañukusqanta yuyarisun? (1 Cor. 11:26.) Chaymantaqa manam yachanchikchu. Ichaqa chay punchaw pasaruspanqa manañam kutimunqañachu agradecekuq kasqanchikta qawachinapaqqa. Hinaptinqa, ¿kallpanchakusunchu agradecekuq kasqanchikta qawachinapaq? Agradecekuspa rimasqanchikpas chaynataq piensasqanchikpas Diospa agradonpaqyá kachun, paymi Jesusta kachamurqa ñoqanchikrayku wañunanpaq (Sal. 19:14).