Tapukuykunapaq kaq

◼ ¿Allinchu kanman huk lawpi kaq mana riqsisqanchik runakunawan internetnintakama bibliamanta yachachiyninchik?

Huk lawkunapim Diosmanta willakuyta mana atinchikchu utaq testigokuna mana kanchu, chaykunaraykum wakin iñiqmasinchikkunaqa internetta servichikunku bibliamanta yachachinankupaq. Wakinpiqa achkam chaynintakama Diosta riqsirunku. Ichaqa, sasachakuypim tarikunchikman mana riqsisqanchik runakunawan internetnintakama rimaspanchikqa (qaway 2007 julio Diospaq Llamkayninchik pag. 3). Allin sunquyuq runakunaman Diosmanta willayta munaspanchikpas mana allin amistadkunawan hinaspa Diosta qipanchaq runakunawanmi rimayta qallaykuchwan (1 Cor. 1:19-25; Col. 2:8). Diosmanta willakuyta mana atisqanchik lawkunapi cartakunata utaq mensajekunata apachisqanchikta autoridadkuna yacharuspankum, maymanta chay hamusqanta yachanankupaq tukuyta ruwanmanku. Chayna ruwasqankum chay lawpi yachaq iñiqmasinchikkunata sasachanman. Chayraykum, huk lawpi yachaq runakunaman Diosmanta willayta munaspapas manam internetnintakamaqa maskananchikchu.

Huk lawmanta hamuq runakunata purisqanchik lawpi Diosmanta willaptinchikqa, yachachinanchikmi jw.org nisqanman yaykunanpaq hinaspa chaypi kaq yachachikuykunata qawanankupaq utaq yachasqan lawpi Jehova Diospa testigonkunapa betel wasinta tarinankupaqpas, chaynapim Diosmanta yachayta hinalla atinqaku. Yachasqan lawpi testigokunapa huñunakunankupaq wasi kaptinqa chayman rinanpaqmi kallpanchananchik. Wasinman testigokuna watukunanta munaptinqa huntachichwanmi Persona que mostró interés (S-43) niq papelchata hinaspa secretario kaq ancianoman quchwan, payñam betel wasiman apachinqa jw.org nisqantakama. Chay runapa yachasqan lawpi betel wasiqa, Diosmanta willakuy imayna apakusqanta yachasqankuraykum allinta chay runata yanapanqa (qaway 2014 junio Diospaq Llamkayninchik pag. 7; hinaspa 2011 noviembre Diospaq Llamkayninchik pag. 2).

Sichu watukusqanchik runa huk lawman astakuptin, utaq huk lawmanta kaq mana riqsisqanchik runata internetnintakama bibliamanta yachachispanchikqa hanaypi niqtam ruwananchik. Chayna kaptinpas pipas watukunankamam Diosmanta hinalla yachachiyta atichwan. Ichaqa yachasqan lawpi Diosmanta willakuy sasa kaptinqa utaq gobierno mana munaptinqa allintam cuidakunanchik bibliamanta paywan telefonontakama rimaspa, cartakunata qillqaspa utaq internetnintakama mensajekunata apachispapas (Mat. 10:16).