Revistakunata chaskiqkunawan Bibliamanta estudiota qallarisun
1. ¿Imaraykutaq revistakunata munachinchik?
1 Sabado punchawkunapim La Atalaya hinaspa ¡Despertad! revistakunawan predicayta yachanchik. Kay ruraymi ichaqa ruray munasqanchikpa qallariyllan: cheqap yachachikuymanta yachay munaq runakunaman yachachiy. Imayna predicanamanta yachachikuykuna qatiqnin parrafokunapi rikurimuqmi yanapawasun chaylla-chaylla watukuyninchikpi Enseña nisqa librota munachinapaq, chaynapi Bibliamanta estudiota qallarinanchikpaq. Chay yachachikuykunataqa predicananchik lawpi predicanapaq hinam allichachwan hinaspa rimasqanchikman hinataq, otaq huk yachachikuykuna yanapawasqanchikwanmi yanapachikuchwan.
2. ¿Imaynatam Bibliamanta estudiota qallarichwan Enseña nisqa libropa qallariq paginankunapi nisqanta servichikuspa?
2 Qallariq paginakunapi nisqanta servichikusun. Watukuspanchikqa kaynatam nichwan: “Revistakuna saqesqayqa Bibliamantam astawan yachachin. Qawariy imanasqataq allinpuni kanman leeyninchikqa”, nispa. Leesun Isaias 48:17, 18; Juan 17:3, otaq huk allin tupaq textotapas. Enseña nisqa librota munachisqanchik qepamanñataqmi hukninta saqeykuspa kaynata nichwan:
◼ “Bibliaqa hamuq tiempopaqmi cheqap suyakuyta qowanchik”, nispa. 4 hinaspa 5 kaq paginankunapi nisqanta qawachispanchikmi kaynata tapuchwan: “Kay promesakunamanta, ¿mayqan kaq cumplikunantataq munawaq?”, nispa. Bibliapa promesankuna rimasqanchikmanta libropa yachachiq capitulonta kichaykusunchik hinaspa huk otaq iskay parrafonpa nisqanmanta pisillapi willasun wasiyoq munaptinqa.
◼ Kaynatapas nichwantaqmi: “Bibliaqa kawsakuymanta aswan allin kaq tapukuykunatam kutichin”, nispa. Libropa 6 kaq paginanta kichaykuspam tapuykunchik sichu haykapipas tapukurqa kay paginapa tukupayninpi kaq tapukuykunata. Hinaspañataqmi chay tapukuymanta Enseña nisqa libropa kutichiq capitulonta kichaykuspa pisillapi yachachinchik huk otaq iskay parrafonpa nisqanmanta.
◼ Chaymantapas libropa listanpi kaq yachachikuykunatam qawachichwan hinaspam tapuchwan mayqan kaq yachachikuykunamanta yachay munasqanta. Hinaspañataqmi chay yachachikuymanta Enseña nisqa libropa yachachiq capitulonta kichaykunanchik hinaspam pisillapi yachachinanchik Bibliata imayna estudianamanta.
3. ¿Imaynatam Bibliamanta estudiota qallarichwan revistakuna saqesqanchik kaykunamanta yachachiptin a) enteron pachapi sasachakuykuna astawan yapakusqanmanta? b) ayllupi kawsakuymanta c) Bibliapa yachachisqan confiakunapaqpuni kasqanmanta?
3 Kutichinapaq tapukuyta punta kaq watukuyllapi saqesunchik. Sapa watukuptinchik hinalla yachananpaqmi uyariwaqninchikta punta kaq watukuyllapi yanapananchik Bibliamanta yachayqa allinpuni kasqanta musyakunanpaq. Revistakunawan qepakuptinqa tapukuyta ruraspam ninchik yapamanta watukuspaña kutichinapaq. Haykapi tupananchikpaqmi tanteanakunanchik hinaspam cumplinanchikpaqpuni kallpanchakunanchik (Mat. 5:37). Yapamanta kutispanchikqa tapukuy saqesqanchikmanta yuyarichispanchikmi Enseña nisqa libropa kutichisqanman hina pisillapi yachachinchik. Hinaspam kay librota qoykunchik yachachisqanchikta kikinpuni qawananpaq. Qatiqninpim tapukuykuna kachkan imayna tapunanchikmanta:
◼ Sichu revista saqesqanchik enteron pachapi sasachakuykuna astawan yapakusqanmanta yachachin hinaptinqa kaynatam tapuchwan: “¿Imakunatataq Diosqa kay Allpa pachapi tikranqa? Kutimuptiymi kay tapukuyta Bibliawan kutichisun”, nispa. Qatiqnin watukuypaqmi servichikuchwan libropa 4 hinaspa 5 kaq paginanpi nisqanta hinaspam tapuchwan: “¿Diospa munasqanchu kanman desgraciakuna pasakusqanqa?”, nispa. Kutispanchikñataq libropa 1 kaq capitulonpi 7 hinaspa 8 kaq parrafonkunapa nisqanta qawachisun.
◼ Sichu ayllupi kawsakuymanta revista yachachiptinqa, manaraq pasakuchkaspam tapuchwan: “¿imatataq familiapi sapakama ruranmanku llapallanku kusisqalla kawsakunankupaq?”, nispa. Qatiqnin watukuypiñataq 14 kaq capitulonpi 4 kaq parrafonpa nisqanmanta estudiasun.
◼ Sichu revista saqesqanchik Bibliapa yachachisqan confiakunapaqpuni kasqanmanta yachachiptinqa qatiqnin watukuypi kutichinapaqmi kay tapukuyta rurachwan: “¿Yachaysapa runakunapa nisqanwanchu Bibliapa yachachisqanqa tupanman?”, nispa. Yapamanta watukuspañataqmi 8 kaq capitulonpi 2 kaq parrafonpa nisqanmanta yachachisun.
4. ¿Imatataq rurachwan Enseña nisqa librota mana chaskiwaptinchikqa?
4 Sapa watukuypim tapukuyta rurananchik yapamanta watukuspaña kutichinapaq. Bibliata estudianapaq arreglota ruraruspañataq qallariyninmanta tukupayninkama libro estudiayta qallaykusun. ¿Enseña nisqa librota mana chaskiyta munaptinqa? Atichwanmi revistakunata hinalla apayta hinaspa Bibliamanta yachachiytapas. Yachay munasqanta astawan masyachiptinchikqa ichapas Biblia estudiayta munanman.
5. ¿Imanasqataq astawanraq kallpanchakuchwan revistakuna saqenallamantaqa?
5 La Atalaya hinaspa ¡Despertad! revistakunam runakunata kallpanchanman imatapuni Biblia yachachisqanmanta yachanankupaq. Chaynaqa sonqomantapuniyá kallpanchakusun revistakunata chaskiqkunawan Bibliamanta estudiokunata qallarinapaq. Chaynapim kasukusunchik Jesuspa “qatiqninkunaña kanankupaq” hinaspa ‘yachachinapaq’ kamachikuyta (Mat. 28:19, 20).