¿IMATAQ YANAPAWACHWAN MANAÑA CHIQNINAKUNAPAQ?

1 | Mana sayapakuqyá kasun

Bibliapim nin:

‘Diosqa mana pimanpas sayapakuqmi, Diosqa chaskinmi lliw nacionkunapi respetaqnin hinaspa allin ruwaq runataqa’, nispa (HECHOS 10:34, 35).

¿Imatam yachachwan?

Jehovaa Diosqa maymantaña kaptinchikpas lliw runakunatam kuyawanchik. Payqa manam imayna kasqanchiktachu qawan, aswanqa imayna sunquyuq kasqanchiktam qawan. Bibliam nin: ‘Runaqa qawan hawallantam, ñuqam ichaqa qawani sunqunta’, nispa (1 Samuel 16:7).

Kaypaqyá kallpanchakuy:

Runakunapa sunqunpi ima kasqanta mana yachaspanchikpas Jehova Diosta qatipakuspayá kallpanchakusun sapakamata llakipayananchikpaq. Huklawmanta kasqanrayku utaq imayna kasqanrayku pitapas chiqnispaykiqa Diostayá mañakuy manaña chiqnikuq kanaykipaq (Salmos 139:23, 24). Amayá iskayrayaychu, Diosqa yanapasunkim mana chiqnikuqña kanaykipaq (1 Pedro 3:12).

a Diospa sutinmi Jehova (Salmos 83:18).

“Manaraq bautizakuchkaptiymi gringo kaq testigo wasinpi mikunaykupaq qayaykuwarqa, chaytaqa manam piensayllapas-piensarqanichu”(TITUS).

Vidanmanta willakusqan (TITUS)

Chiqnikuq kaynintam saqirurqa

Titusqa mana allin ruwaq runakunawanmi hukllawakuq. Hukllawakusqan runakunaqa gringokunawan yana kasta runakuna mana hukllawakunankupaq kamachikuy kasqanraykum llumpay piñasqallaña karqaku. Titusmi nin: “Gringokunapa trago tomananku wasimanmi hinaspa samananku wasimanmi riq kaniku paykunawan maqanakunaykupaq”, nispa. Titusqa ninraqmi: “Imamantapas peleaspaykuqa warmi utaq qari kaptinpas ñuqam puntataqa takaruq kani”, nispa.

Titusqa Jehova Diospa testigonkunawanmi bibliamanta yachayta qallaykurqa. Chaymi bibliapi kayna nisqanta yacharurqa: “Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas”, niqta (Apocalipsis 21:3, 4). Chaymi payqa allin runa kananpaqña kallpanchakurqa.

Titusqa qallariypiqa anchatam sasachakurqa chiqnikuqllaña kayninta saqinanpaq. Ichaqa Dios pimanpas mana sayapakuq kasqanmanta yachasqanmi yanaparqa (Hechos 10:34, 35).

¿Imataq Titusta yanaparurqa manaña chiqnikuq kananpaq? Paymi willakun: “Jehova Diospa testigonkunaqa maymantaña kaspankupas llapankum kuyanakunku. Chayta qawasqaymi yanapawarqa chiqap religionpi kasqankumanta mana iskayrayanaypaq. Manaraq bautizakuchkaptiymi gringo kaq testigo wasinpi mikunaykupaq qayaykuwarqa, chaytaqa manam piensayllapas-piensarqanichu”, nispa.