Sumaqta rimanapaq

YACHACHISQANCHIKMAN hina tupaqnin palabrakunapi kallpawan otaq tumpallamanta, allillamanta otaq utqayman chaynataq rakuniqmanta otaq llañuniqmanta rimaspaqa uyariwaqninchikkunatam yanapasun allinta entiendenankupaq. Chaymantapas tukuy sonqowan rimasqanchiktam sutillata qawachinqa. Chayna rimasqanchikqa uyariwaqninchikkunatam kallpanchanqa huñunakuypipas otaq predicaptinchikpas.

Rimayninchikqa mayna allinmi runakunapa sonqonman chayananpaq. Discursota qospa allinta rimaptinchikqa uyariwaqninchikkunam kallpanchasqa kanqaku tukuy sonqonkumanta kasukunankupaq. Rimanaykipaq kaqkunataqa manam señalanaykiraqchu sumaqta rimanaykipaqqa. Chaynata ruraptikiqa manam sonqoykimantachu rimasqaykiqa kanqa, uyarisuqnikikunapas hukmanmi sientekunmanku. Sumaqta rimayninchikqa sonqonchikmantam kanan.

Rimasqanchikpi tupasqanman hina kallpawan otaq tumpallamanta, allillamanta otaq apurawman chaynataq rakuniqmanta otaq llañuniqmanta rimasqanchikqa manam hukkuna alabawananchikpaqchu kanan aswanqa imamanta yachachisqanchikta kusikuywan uyarinankupaqmi.

Kallpawan otaq tumpallamanta rimay. Rimasqanchik sumaqta uyarikunanpaqmi kallpawan otaq tumpallamanta rimana. Ichaqa manam kaypi-chaypichu sapa kutilla kallpawan otaq tumpallamanta rimana, chaynata ruraspaqa yachachisqanchiktam yanqacharuchwan. Qaparichkaq hina sapa kutilla rimaptikiqa manataqmi allinchu kanman.

Imamantapas yachachisqanchikman hinam kallpawan otaq tumpallamanta rimana. Apocalipsis 14:6, 7 hinaspa 18:4 nisqanpi chaylla kasukunapaq kamachikuymanta leespaykiqa kallpawanmi leenayki, Exodo 14:13, 14 nisqanta leespapas chaynatam leenayki. Diospa juicionmanta Jeremias 25:27-38 nisqanpi willakusqanmanta leespaykiñataqmi tupasqanman hina kallpawan leenayki.

Reparaytaq imapaq yachachisqaykipipas. ¿Kasukunankupaqchu kallpanchayta munanki? ¿Aswan allinnin kaq yachachikuykunatachu sutillata qawachiyta munanki? Chaypaqqa tupasqanman hinam kallpawan rimanayki. Ichaqa manam allinchu kanman kuyakuywan rimanaykipaq kaqta kallpawan rimaynikiqa. Kaymantam astawan yachasunchik 11 kaq yachachikuypi.

Yachachisqanchikman hina tupaqnin kaq palabrakunapi kallpawan otaq tumpallamanta rimasqaqa qatiqninmantapas atencionwan uyarinankupaqmi yanapan. Tumpallamanta rimachkaspa kallpawan qonqayta rimasqaqa hukmanyanapaq otaq manchakuypaq hinam kanman. Tumpallamanta rimaspataqmi qawachinchik aswan allinnin kaq yachachikuykunamanta mana chayna kaq yachachikuykunata. Sapa kutilla tumpallamanta rimaspaqa qawachichwanmi iskayrayasqanchikta otaq imaynanpatapas yachachisqanchikta. Chaymi rimasqanchikpi tupasqanman hina tumpallamanta rimanapaqqa allinta tanteana.

Apurawman otaq allillamanta rimay. Reqsisqanchik runawan rimaspaqa manam sasachakunchikchu. Imamantapas kusisqa willakuspaqa utqayllamanmi rimanchik, rimasqanchikta yuyanankuta munaspam ichaqa allillamanta.

Chayraq discursayta yachaqkunam ichaqa yaqa llapanta utqayllamanña otaq allillamanta rimanku. Chaynataqa rimanku imayna palabrakunawan rimanankupaq llumpayta piensasqankuwanmi, wakinpiqa chay palabrakunatam qellqankuraq. Discursonkupaq qellqasqankuta mana leespankupas yaqa llapantam umallankumanta rimanku, chaymi llapanta derechollata rimanku. Chaynata mana rimanankupaqqa bosquejopi kaqtam servichikunanku.

Ama qonqayllamantaqa utqayman rimaychu, chayqa rikchakunmanmi allillamanta puriq misi allqota rikuruspan chaylla pawaruqman. Utqayllamanña rimaptikiqa manataqmi imamanta rimasqaykipas entiendekunqachu.

Utqayman otaq allillamanta rimaynikiqa manam tanteasqaykiman hinallachu kanan. Chayna kaptinqa yachachisqaykim yanqachakurunman. Utqayman otaq allillamanta rimayqa imapaq chaynataq imamanta yachachisqaykiman hinam kanan. Kusikunapaq kaqmanta rimaspaykiqa reqsinakusqaykiwan rimachkawaqpas hina utqayman rimay. Allintaqmi kanman mana ancha allinniq kaq yachachikuymanta otaq imamantapas wakillanmanta willaspa utqayman rimayqa. Chaynata ruraspaqa sumaqtam yachachisun ichaqa manam hatunchakuchkaq hinachu. Allillamantataqmi rimana aswan allinnin kaq yachachikuymanta, tukunallapaqña kaq yachachikuymanta chaynataq piensarichinaykipaq kaqmanta willaspaqa.

Tupasqanman hina rimasqaykipi voznikita cambiay. Piensariy huk horapuni hina kaq tonollawan pipas arpa tocasqanpi. Ichapas puntataqa llumpayta waqachinman chaymantañataq tumpallamanta, hinaspañataq apurawman. Chaynata tocaptinpas tonon hina kaqllata uyarikuptinqa manam sonqotaqa kusirichinmanchu. Chaynam kanman vozninchikta mana cambiaspa hina kaqllata rimaptinchikqa.

Rimasqanchikpi vozninchikta cambiasqanchikqa imamantapas rimasqanchikman hinam sapakamata entiendechinman. Ejemplopaq, vozninchikmi cambian entiendechinapaq kaqta kallpawan rimaptinchik, tapukuptinchik, kamachiptinchik otaq imatapas mañakuptinchik.

Kusikuypaq kaqmanta rimaspaqa kallpawanmi rimana, llakikuypaq kaqmantañataqmi tumpallamanta. Yachachiq chaynata rimaptinqa uyariqninkunapa sonqonmanmi chayanman. Kusikuypaq otaq llakikuypaq willakuy kasqanmanta qawachinapaqqa manam rimasqanchikpi tupaqnin palabrakunata rimayllachu. Imayna rimasqaykiwanmi qawachinki kusikuywan otaq llakikuywan sonqoykimanta rimasqaykita.

Sumaqta rimanaykipaq kaykunapi reparay. Yachachinaykipaq kaqkunata imayna rimanaykipaq tanteay. Piensarichinapaq otaq kamachinapaq kaqkunallamanta rimanaykipaq tanteaptikiqa sasachakunkipaschá sumaqta rimanaykipaq. Mana chayna kananpaqmi imamanta yachachinaykipaq kaqpi reparanayki chayman hina allinta yachachispa kallpanchanaykipaq.

¿Imatataq rurawaq uyarisuqnikikuna aburrikusqankumanta musyaspaykiqa? Rimanallaykimantaqa uyarisuqnikikunata kallpanchay Bibliapi hukkaqnin textota kuska leenaykichikpaq. Imamantapas willaylla-willanaykimantaqa piensarinankupaq tapuy, qatiqnin yachachikuykunamanta rimanaykipaqñataq samariykuspa kaqmanta kallpawan rimay. Yachachiwaqtaqmi rikchanachiykunawanpas. Allinta yachachiqkunaqa chaynatam ruranku, qampas chaynatam rurawaq yachachinaykipaq kaqta allinta preparakuspayki hayka kutitaña yachachiq kaspaykipas.

Discurso qosqanchikpi sumaqta rimayqa kachichanwan tupachisqa gustoyoq mikuy hinam. Kay yachachikuypi yachamusqanchikman hina sumaqta rimaspaqa uyariwaqninchikkunatam kallpanchasun ganaswan uyarinankupaq.