Microfonota servichikunapaq

IÑIQMASINCHIKKUNAQA tiempochakuspa hinaspa kallpanchakuspam huñunakuykunaman hamunku. Yachachikuykunawan yanapachikunankupaqqa chuyay-chuyaytam uyarinanku.

Israelitakunapa tiemponpiqa manam karqachu microfonowan rimanapaq aparatokunaqa. ¿Imaynatataq millonnintin israelitakunaqa Diospa prometesqan allpaman manaraq yaykuchkaptinku Moab sutiyoq pampapi Moisespa nisqakunata uyarinmanku karqa? Yaqapaschá Moisesqa tanteasqan sitiokunapi akllasqan runakunata churarqa uyarisqankuta hichpanpi kaqkunaman willakunankupaq (Deut. 1:1; 31:1). Jordan mayupa chimpanpi intipa seqaykunan lawpi allpakunata dueñochakuyta qallaykuptinkum israelitakunata Josuey huñunachirqa Gerezim hinaspa Ebal sutiyoq orqokunapa hichpanpi, Leviy casta runakunaqa yaqapaschá chimpankupi tarikurqaku. Chay sitiopim llapallanku uyarirqaku Dios bendecinanmanta chaynataq ñakasqa kanankumantapas, chaymi kasukunankupaq tantearqaku (Jos. 8:33-35). Chay kutipipas Josueyqa yaqapaschá Moises hina runakunata churarqa uyarisqankuta hichpanpi kaqkunaman willanankupaq, chaymantapas yaqapaschá allinta uyarinankupaq orqokunapa yachapayasqan yanaparqa.

Yaqa 1.500 watakuna pasaytam Galilea lamar qochapa patanpi ‘achkallaña runakuna’ huñunakurqaku Jesusta uyarinankupaq, payñataqmi yakupa hawanpi boteman seqaruspan rimayta qallaykurqa (Mar. 4:1, 2). ¿Imanasqataq botepi tiyaykuspan rimarqa? Yaqapaschá yakupa hawanmanta rimasqan astawan uyarikunanrayku.

Ñawpa watakunapiqa discurso qoqpa voznin imayna kasqanman hinam tanteaqku hayka runakuna uyarinankupaq. Ichaqa 1920 watakunamantapacham Jehova Diospa testigonkunaqa parlanteyoq aparatokunata servichikunku asambleankupi rimasqanku allinta uyarikunanpaq.

Rimasqanchikta uyarichiq aparatokuna. Kay aparatokunaqa yanapanmi rimasqanchik allinta uyarikunanpaq. Chaymi discurso qoqkunaqa manaña llumpaytachu kallpanchakunku rimanankupaqqa, uyariqninkunapas mana sasachakuspam uyarinqaku.

Jehova Diospa testigonkunaqa allintam servichikunchik parlanteyoq aparatokunata asambleanchikpi rimasqanchikkuna allinta uyarikunanpaq. Huñunakusqanchik Salonpipas chayna aparatokunatam servichikunchik discursota qonapaq otaq leenapaq. Wakin salonkunapiqa kantaqmi rimarinankupaq microfonokuna. Congregacionnikipi chayna aparatokuna kaptinqa yachanaykim imayna servichikuyta.

Microfonota imayna servichikunapaq. Kayta allinta servichikunaykipaqqa qatiqnin consejokunapi reparay: 1) Microfonoqa simikimantam mana llumpay karupichu kanan (10-15 cm.). Simikiman llumpayta asuykachiptikiqa manam allintachu entiendekunqa, karumanta rimaptikiqañataqmi mana allintachu uyarikunqa. 2) Microfonoqa ñawpaqnikipim kanan, manam waqtaykipichu. Maylawman qawanayki kaptinpas microfonomanta ama llumpayta karunchakuspa rimay. 3) Imayna rimasqaykimantaqa kallpawan rimay ichaqa ama qaparichkaq hinachu, parlantekunam yanapasunki rimasqaykita lliw uyarisunaykipaq. 4) Oqonayasuptikiqa otaq hachinyanayki kaptinqa microfonomanta muyuriy.

Discursota qospa. Discurso qonaykipaqmi sayaynikiman hina microfonota churapusunki. Chayta ruranankama derechota sayaspa huñunakuypi kaqkunata qawariy. Rimanaykipaq anotasqaykitaqa qawanaykipaq hina atrilpa hawanpi churay.

Rimayta qallarispaqa parlantentakama rimasqayki imayna uyarikusqanpi reparay. ¿Uma nanaypaq hinachu llumpayta uyarikun? Ichapas microfonomanta tumpa qepachaman suchurinayki kanqa. Rimanayki otaq leenayki kaptinqa microfonoman qawaspa rimay ama kurkurayaspa.

Plataformapi leespa. Allinmi kanman microfonota mana tapaspa Bibliata otaq mayqen qellqatapas leeynikiqa. Microfono ñawpaqnikipi kasqanraykum leenaykipaq kaqta hapinayki ichoq lawpi otaq alleq lawpi, hinaspa microfono lawman tumpachata muyurispa leey.

Willakuq Revistamanta Estudiopi leeqpa ñawpaqninpim microfonoqa kanan. Chaypi derecho sayasqanmi yanapan mana pisipaspa imam kaqta allinta leenanpaq. Revistata huñunakuypi leesqaykiqa ancha allinmi uyarisuqnikikunata yanapananpaq chaymi leesqaykiqa allinta uyarikunan.

Huñunakuypi rimarispa. Huñunakuypi microfonowan rimarinaykipaq kaptinpas kallpawan hinaspa clarota rimanaykipaqmi kallpanchakunayki. Rimarinaykipaq kaptinqa Bibliata otaq estudiasqanchik qellqata tumpata hoqarispa hapiy mana sasachakuspa rimanaykipaq.

Wakin congregacionpiqa kanmi microfonota haywaqkuna rimariy munaqman haywanankupaq. Congregacionnikipi chayna kaptinqa makikita hinalla altoman hoqariy rimanaykipaq nisuptikiqa microfono haywaq maymi kasqaykiman apamunanpaq. Microfonota hapispa rimanayki kaptinqa haywasuqnikimanta chaylla chaskiy. Allinta hapispaykiña rimay hinaspa chaylla kutichiy haywasuqnikiman.

Demostracionta ruraspa. Demostracionkunata ruranapaqqa microfono imayna servichikuytam yachana. Microfono churasqaña kaptinqa Bibliata otaq rimanaykipaq qellqasqaykita hapinaykipaqmi yanapasunki, demostracionta ruraysisuqniki microfonota hapiptinqa Bibliata iskaynin makikiwan hapispa leenaykipaqmi astawan yanapasunki. Demostracionta ruraysisuqnikiwan practicay microfonota allinta hapinanpaq. Ruranaykichikña kaptinqa ama qepanchaychikchu huñunakuypi kaqkunata.

Diosta Servinapaq Huñunakuypiqa achka iñiqmasinchikkunapaschá wakin kutipiqa plataformaman seqaspanku demostracionta rurananku kanqa. Chayna kaptinqa microfonokunatam churana manaraq seqachkaptinku otaq demostracionta ruraqkunamanmi hapichina. Chaymi tiempowan alistana hinaspam maypi kananpaq listota saqena. Demostracionta ruranapaq ensayaspaqa microfonota allinta servichikuytam yachasun. Plataformapi ensayayta mana atispaqa allinmi kanman microfonowanpas rimachkaq hina imawanpas yanapachikuspa ensayayqa. Demostracion tukuytaqa microfonokunatam sitionman churana, cablenkunawan mana urmarunapaqmi allinta waqaychana.

Diospa Palabranta huñunakuykunapi estudiaspam kallpanchanakunchik chaymi microfonokunataqa allinta servichikuna (Heb. 10:24, 25). Chaynata ruraspaqa Diospa Palabranwanmi allinta kallpanchanakusun.