Llapankutapas sumaqta chaskisun
1. ¿Ima huñunakuypin runakunawan astawan rimayta atisunman? ¿Imarayku?
1 Jesuspa Wañupusqanta Yuyarina huñunakuyqa ancha allinmi kanqa runakunawan rimanapaq. Kay watapiqa chunka millón más runakuna hamunankutan munanchis Jehová Diospa Jesuspa ruwasqankumanta yachanankupaq (Juan 3:16; 15:13). Chaypin willakullanqataq askha bendicionkuna chaskisqanchismanta (Is. 65:21-23). Ichaqa manan discurso qoqllachu chaytaqa ruwanqa, aswanpas llapa iñiqmasikuna sumaqta chaskinqaku lliw hamuqkunata (Rom. 15:7).
2. ¿Imata ruwaspan allinta chaskisunman chayllaraq hamuqkunata?
2 Chay huñunakuy qallarinanta suyashanamantaqa, ¿manachu chay runaman qayllaykuspa sutinchista willasunman? Yaqapaschá mana yachankuraqchu imaynas chay huñunakuy aparikusqanta. Chaymi allin kanman kusisqa asuykuy mana manchasqa kashananpaq. Yaqapaschá paykunaqa huk invitacionta chaskikuspa hamurqanku. Chayta astawan yachanapaqqa tapusunmanmi chayllaraqchus hamun otaq pitapas iñiq t’aqapi reqsinchu chaytapas. Chaymantataq invitasunman ñoqanchiswan kuska Bibliata leenanchispaq takinanchis librowanpas takinapaq. Sichus Huñunakuna Wasipi huñukusunchis chayqa, reqsichisunmanmi imakunas chaypi kan chayta. Tapullasunmantaq discursomanta ima tapukuyllanpas kanchu chayta. Sichus huk t’aqaña haykumunan kashan chayqa, usqhayllan tapunanchis maypi tiyasqanta chay huñunakuymanta astawan rimanapaq. Iñiyninkupi chiriyapuq iñiqmasikuna hamuqtinkuqa, umalliqkunan makilla kashananku paykunata kallpachanankupaq.
3. ¿Imaraykun allinpuni chayllaraq hamuqkunata sumaqta chaskiy?
3 Askha runakunan rikunqaku imaynatas Diospa llaqtanpi serviqninkuna huk nisqalla, thak kaypi kusisqa kawsanku chayta (Sal. 29:11; Is. 11:6-9; 65:13, 14). Sichus sapankanchispas kallpachakusun chayllaraq hamuqkunata sumaqta chaskinanchispaq chayqa kusisqan ripunqaku.