Profetakunaq ruwasqanqa allinninchispaqmi: Amós
1. ¿Imaynapin Amosmanta yachasqanchis kallpachawasunman?
1 ¿Hayk’aqllapas yuyaykurqankichu: “Manachus hina predicayta atiymanchu ñoqaqa wakchan kani mana educacionniyoqtaq kanpas”, nispa? Chhayna kaqtinqa profeta Amosmanta yachaymi kallpachasunkiman. Payqa wakchan karqan ovejata michiq chakrallapi llank’aq, chaywanpas Jehová Diosmi kamachirqan llaqtanman willakuyninta apananpaq (Amós 1:1; 7:14, 15). Kunanpas Jehová Diosqa wakcha runakunawanmi Siminta willachimushan (1 Cor. 1:27-29). ¿Imakunatawanmi yachasunman Amosmanta predicayninchispi yanapawananchispaq?
2. ¿Imaraykun mana upallakunanchischu predicayninchista pipas hark’awaqtinchis?
2 Hark’ashaqtinkupas manan upallakurqanchu. Amosmi Israelpa chunka ayllunkunaman Diospa nisqanta willasharqan, hinan sacerdote Amasiasqa Amosta hark’arqan, nirqantaq wak llaqtaman ripunanpaq, paykuna huk religionniyoqña kasqankurayku (Amós 7:12, 13). Amasiasqa mana kaqta Amospa ruwasqanmanta willarqan, chaymi rey Jeroboam hark’allarqantaq (Amós 7:7-11). Amosmi ichaqa mana upallakurqanchu. Kunan tiempopipas religionkunapi umalliqkunan autoridadkunawan yanapachikuspa Diospa llaqtan contra sayarinku. Jehová Diosmi ichaqa niwanchis imataña ruwaqtinkupas mana atipawananchista (Is. 54:17).
3. ¿Ima iskay willakuytan runakunaman apanchis?
3 Diospa phiñakuyninmanta sumaq kawsaymantawan willarqan. Amosqa Israelpa chunka ayllunkuna thunisqa kananmanta willarqanña chaypas, sutinta apaq qelqapin willallarqantaq Jehová Dios llaqtanta hukmanta hatarichinanta bendecinantapas (Amós 9:13-15). ‘Allin willakuykunamanta’ predicashaspaqa willanchismi Diospa ‘hatun taripay p’unchayninmanta’, ichaqa manan chayllamantachu willamunchis (2 Ped. 3:7; Mat. 24:14). Jehová Dios Armagedón guerrapin millay runakunata wañuchinqa, chay qhepamanmi Hallp’anchista sumaq paraisoman tukuchinqa (Sal. 37:34).
4. ¿Pin yanapawasun predicay llank’ayninchista hunt’anapaq?
4 Runakunaña hark’awashaqtinchispas Diospa Gobiernonmanta willashallayqa rikuchinmi Diosta kasukusqanchista, munayninta ruwananchispaq prometekusqanchistapas hunt’asqanchista (Juan 15:19). Jehová Diosninchisqa yanapawasunpuni munayninta hunt’ananchispaq imaynan Amosta yanaparqan hinata (2 Cor. 3:5).