¿Munakuqchu kanki? Willashallay Diosmanta

1. 2023 watapi reunión anualpi, ¿imakunamantan willakamurqan?

¡MAY kusikunapaqmi karqan 2023 watapi reunión anual aparikusqanqa!a Chaypin sut’inchakamurqan wakin yachachikuykunata, chaymantapas predicacionmantan willakuykuna karqan. Chaypi willakamusqan jina, jatun Babilonia chinkachisqa kasqan qhepamanqa yaqapaschá wakin runakunaqa Jehová Diosman qayllaykuyta atinqakuraq. Chaymantapas chay juñunakuypin willakamullarqantaq imaynas 2023 watamanta, noviembre killamantapacha manaña llapantachu Diosmanta willasqanchismanta informasun chayta. Chhaynaqa, ¿manañachu ñaupaqpi jina Diosmanta willaypi kallpachakunanchis ni usqhayllapas chayta ruwananchis? Manapunin chhaynachu.

2. ¿Imaraykun kunan tiempo Diosmanta usqhaylla willananchis? (Marcos 13:10).

² Kay p’unchaykunapiqa usqhayllan Diosmanta willananchis kashan. ¿Imarayku? Diosmanta willananchis tiempoqa tukurakapushanñan. Yuyaykusun Marcos 13:10 textopi tukukuy p’unchaykunapi Diosmanta willaymanta Jesuspa imachus nisqanpi (leey Marcos 13:10). Mateopas willallarqantaqmi manaraq “tukukuy” chayamushaqtin Diospa gobiernonmanta allin willakuykuna pachantinpi willasqa kananmanta Jesuspa rimasqanta (Mat. 24:14). Tukukuy nispaqa nishan kay pachapi Satanaspa kamachikusqan wiñaypaq chinkachisqa kapunanmantan. Jehová Diosqa churanñan p’unchaytapas horatapas chayta junt’ananpaq (Mat. 24:36; 25:13; Hech 1:7). Sapa p’unchay pasasqanmi rikuchiwanchis pisillaña tiempo kasqanta (Rom. 13:11). Chayraykun chay tukukuy p’unchay chayamunankamaqa predicashanallanchis.

3. ¿Imaraykun Diosmanta willanchis?

³ Llapanchismi tapukunanchis: “¿Imaraykun Diospa gobiernomanta allin willakuykunata willanchis?”, nispa. Chaytaqa ruwanchis munakuq kasqanchisraykun. Arí, Diosmantaqa willanchis allin willakuykunata munakusqanchisraykun, runamasinchistapas munakuspa iman; astawanqa Jehová Diosta sutintapas anchata munakusqanchisraykun chaytaqa ruwanchis. Chaykunamantan kunan yachasunchis.

ALLIN WILLAKUYKUNATA MUNAKUSQANCHISRAYKUN WILLANCHIS

4. ¿Imaynan tarikunchis allin noticiata uyarispa?

⁴ Yuyashankichá jayk’aqllapas allin noticiata uyarisqaykitaqa. Yaqapaschá juj familiayki wawayoq kapurqan otaq maskhasqayki llank’anata tarirqanki. Chayta yacharuspa, ¿imaynan tarikurqanki? Maytachá kusikurqanki, llapa familiaykiman amigoykikunaman imachá willaytapas munarqanki. Chhayna kusisqachá tarikurqanki Diospa gobiernonmanta allin willakuykunata uyarispapas.

5. ¿Imaynan tarikurqanki Bibliata estudiashaspa? (Qhaway kay parrafopaq fotokunata).

⁵ Chaymantapas yuyaykuy imaynas tarikurqanki Bibliata estudiashaspa chayta. Chaypin yacharqanki imaynas Jehová Diosqa munakusunki chayta, imaynas paypa familianmanta kanaykita munan chaytapas. Yachallarqankitaqmi imaynas kay pachapi nanaykuna ñak’ariykunapas tukupunqa chayta, imaynas mosoq pachapi munakusqayki familiaykikunapas kausarimpunqa chaytapas (Mar. 10:​29, 30; Juan 5:​28, 29; Rom. 8:​38, 39; Apo. 21:​3, 4). Chay yachasqaykikunaqa sonqoykimanchá chayarqan (Luc. 24:32). Bibliapi chay yachasqayki yachachikuykunataqa maytachá munakurqanki, chaymi llapa runaman chaykunata willayta munarqanki (tupanachiy Jeremías 20:9 textowan).

6. ¿Imatan yachasunman Ernest hermanonchismanta esposanmantawan?

⁶ Yachasunchis Ernestb hermanonchismanta, chunka watanpi kashaqtinsi papanqa wañukapusqa. Paymi nin: “Taytayoq juj chikuchakunata rikuspan envidiakuq kani. Chaymantapas tapukuqmi kani: ¿Papayqa Janaq pachamanchu ripun, icha wiñaypaqchu chinkapunpas?”, nispa. Payqa yaqa sapa p’unchaysi pantionta riq, jinaspa taytanpa p’ampasqa kasqanpi qonqoriykuspa Diosmanta mañakuq: “Ama jina kaspa Diosníy, yachaytan munani maypin papay kashan chayta”, nispa. 27 watanpi jina kashaqtinsi Biblia estudiayta qallarisqa, chaypi yachasqanqa maytas kusichisqa. Chaypis yachasqa wañusqakunaqa manaña imatapas yachasqankuta, puñushaq jina tarikusqankuta. Chaymantapas yachasqas imaynas wañusqakunaqa kausarimpunqaku chayta (Ecl. 9:​5, 10; Hech. 24:15). Imaynapis wañusqakuna tarikunku chayta mana yachaspas payqa sinchita llakikuq. Ichaqa chaykunatan payqa Bibliapi yachasqa, chaywansi anchatapuni kusikusqa. Esposanpas paywan kuskas Bibliata estudiasqa, anchatas paypas kusikusqa Bibliapi imachus yachasqanwan. 1978 watapis paykunaqa iskayninku bautizakapusqaku. Iskayninkun tukuy sonqonkuwan Bibliapi yachasqankumanta familiankuman, amigonkuman, llapa yachayta munaqkunaman ima Diosmanta willasqaku. Chay hermanonchisqa 70 runakunatas esposanwan kuska yanapasqaku Jehová Diosta reqsinankupaq, llapankus bautizakapusqaku.

7. Munakunchistaq Bibliapi yachachikuykunata chayqa, ¿imatan ruwananchis? (Lucas 6:45).

⁷ Arí, Bibliapi yachachikuykunataqa maytapunin munakunchis, chaymi chaykunamantaqa rimaytapuni munanchis (leey Lucas 6:45). Ñaupa tiempopi Jesuspa discipulonkuna jinan tarikunchis, paykunan nirqanku: “Noqaykun ichaqa manapuni imachus rikusqaykumanta imachus uyarisqaykumantawan willaytaqa upallakusaqkuchu”, nispa (Hech. 4:20). Bibliapi cheqaq yachachikuykunataqa maytapunin munakunchis. Chhaynaqa, llapa runakunaman chayta willamusun.

RUNAKUNATA MUNAKUSQANCHISRAYKUN WILLANCHIS

8. ¿Imaraykun allin willakuykunata runakunaman willamunchis? (Qhaway “Munakuq kay: runakunaman Diosmanta yachachiy” nisqa willakuyta). (Qhaway kay parrafopaq fotota).

⁸ Jehová Dios jina Jesús jinan noqanchispas runakunata munakunanchis (Prov. 8:31; Juan 3:16). Runakunaqa khuyaymi kashanku, paykunaqqa manan ni ima suyakuyninkupas kanchu, manan ni Diosninkupas kanchu (Efes. 2:12). Runakunaqa kay pachapi imaymana sasachakuykunawanmi manaña ni samariytapas atishankuñachu. Ichaqa noqanchisqa atisunman paykunata yanapayta, ¿imaynata? Diospa gobiernonmanta allin willakuykunatan paykunaman willananchis. Paykunatachus munakusun khuyapayasun chayqa, tukuy atisqanchistan ruwasun paykunaman chay munay willakuykunata willananchispaq. Chay allin willakuykunaqa ancha valorniyoqmi. Sichus chayta paykunaman willasun chayqa, yanapanqan sumaq kausayta suyakunankupaq, kusisqa kausanankupaqpas. Chaymantapas mosoq pachapi “cheqaq kausayta” chaskinankupaq iman yanapanqa, chayqa wiñaypaq kausaymi (1 Tim. 6:19).

9. ¿Imamantan runakunaman willanallanchistaq, imarayku? (Ezequiel 33:​7, 8).

⁹ Runakunata munakusqanchisraykun willamullanchistaq kay millay pacha chinkachisqa kapunanmantapas (leey Ezequiel 33:​7, 8). May llakikunapaqmi runakunapas Diosta mana serviq familianchiskunapas imachus jamunanta mana reparakuspalla comunta kausasqankuqa. Mateo 24:21 textopin nin: “Chay tiempopiqa manchay ñak’ariymi kanqa, chay ñak’ariy jinaqa manan karqanchu kay pachaq qallariyninmantapacha kunankamapas, nitaq qhepamanpas kanqachu”, nispa. Chhaynataq kanqa chayqa, ¿manachu munasunman chaykuna pasananta paykunapas yachanankuta? Ñaupaqtaqa llapa pantasqa religionkunan chinkachisqa kapunqa. Chay qhepamantaqmi Armagedón guerrapi llapa millay runakuna chinkachisqa kapunqaku (Apo. 16:​14, 16; 17:​16, 17; 19:​11, 19, 20). Jehová Diosmantan mañakunanchis llapa allin sonqoyoq runakuna uyariwananchispaq, jinaspa kunanmantapacha noqanchiswan kuska Diosta servinankupaq. Ichaqa, ¿iman pasanqa mana kasukuq runakunawan, mana kasukuq munakusqanchis familianchiskunawanpas?

10. ¿Imaraykun kay millay pacha tukupunanmanta usqhaylla runakunaman willananchis?

¹⁰ Ñaupaq yachachikuypi yachamusqanchis jina, yaqapaschá Jehová Diosqa salvayta munanqa pantasqa religionkunata chinkachisqa kapusqanta rikuspa cambiayta munaq runakunata. Chayta yachaymi yanapawanchis kay pachaq tukukunanmanta usqhaylla runakunaman willamunanchispaq. Kaypi yuyaykusun, kunan imachus willasqanchistaqa yaqapaschá runakunaqa jamuq tiempopi yuyarinqaku (tupanachiy Ezequiel 33:33 textowan). Arí, yaqapaschá imachus willasqanchista yuyarinqaku, jinaspa noqanchiswan kuska Diosta serviyta munanqaku. Ñaupa tiempopi Filipos llaqtamanta carceleropas jatun terremoto chhafchiqtinraqmi cheqaq willakuytaqa chaskikurqan. Chhaynatapaschá wakin runakunaqa pantasqa religionkuna chinkachisqa kapuqtin, chayraq Jehová Diosta serviyta munanqaku (Hech. 16:​25-34).

DIOSTA, SUTINTAPAS MUNAKUSQANCHISRAYKUN WILLANCHIS

11. ¿Imaynatan Jehová Diosta “alabanchis, jatunchanchis, atiytapas” qonchis? (Apocalipsis 4:11). (Qhaway kay parrafopaq fotokunata).

¹¹ Astawanqa allin willakuykunata willanchis Jehová Diosta ch’uya sutintapas munakusqanchisraykun. Predicaspaqa munakusqanchis Diostan alabashanchis. Noqanchisqa janaq pachapi angelkuna jinan niyta munanchis, paykunan ninku: “Qanqa, Jehová Diosniyku, alabaytapas, jatunchaytapas, atiytapas chaskinaykipaq jinapunin kanki”, nispa (leey Apocalipsis 4:11). Chhaynaqa, ¿imaynatan Jehová Diosta alabanchis jatunchanchispas? Chaytaqa ruwanchis imaynas Jehová Diospuni tukuy imaymanata kamarqan chayta Bibliawan sut’ita runakunaman reparachispan. Atiytari, ¿imaynatataq qonchis? Chaytaqa ruwanchis tiemponchiswan, kallpanchiswan, imaymana kaqninchiskunawan Diosmanta willaspan (Mat. 6:33; Luc. 13:24; Col. 3:23). Chhaynaqa, may munaymi noqanchispaqqa munakusqanchis Diosmanta rimayqa. Ichaqa manan payllamantachu rimananchis; sutinmantapas, imaninansi chay suti chaymantapas rimananchismi, ¿imarayku?

12. ¿Imaraykun nisunman “predicaspaqa Diospa sutintan ch’uyanchanchis” nispa?

¹² Jehová Diosta munakusqanchisraykun sutintapas ch’uyanchayta munanchis (Mat. 6:9). Satanasmi imaymanata llullakuspa Diospa sutinta qhellicharqan, chaymi llapanchis yanapakunanchis Diospa sutin ch’uyanchasqa kananpaq (Gén. 3:​1-5; Job 2:4; Juan 8:44). Predicacionman rispaqa llapa uyarikuy munaqkunamanmi sut’inta willananchis pipunichus Jehová Dios chayta, chaymantapas imayna Dioschus chaytan lliuman willananchis. Llapankun yachananku payqa munakuq Dios kasqanta. Gobiernonqa pisi tiempollamantan ñak’ariykunata tukuchipunqa jinaspa thaj kausayta, chanin kausayta, munay kausayta, kusikuyta ima kay pachaman apamunqa (Sal. 37:​10, 11, 29; 1 Juan 4:8). Chaykunata ruwaspan Diospa sutin ch’uyanchasqa kananpaq yanapakunchis. Chaymantapas chayta ruwaspaqa, Jehová Diospa testigon kasqanchistan junt’ashanchis. ¿Imaraykun chayta ninchis?

13. ¿Imaraykun ancha kusikunapaq Jehová Diospa testigon nisqa sutita apay? (Isaías 43:​10-12).

¹³ Jehová Diosmi ajllakuwarqanchis paypa testigonkuna kananchispaq (leey Isaías 43:​10-12). 2007 watapin Umalliq T’aqa juj cartapi nirqan: “Jehová Diospa sutinta apayqa manan imawanpas tupanmanchu, may munaypunin chayqa”, nispa.c Chaypaq piensasunchis kaypi, yanqamanta tumpasqa kasqanchisraykupaschá juj juiciopi tarikushanchis, chaypaqmi necesitanchis noqanchismanta allinta rimananpaq juj testigota. Chaypaqqa allinta reqsisqanchis confianapaq jina allin runatachá ajllakunanchis kanqa, ¿riki? Chhaynatan Jehová Diospas allinta reqsiwanchis, jinaspapas noqanchispin confian. Chayraykun ajllakuwarqanchis payllapuni cheqaq Dios kasqanta willananchispaq. May munaypunin may kusikunapaqmi Jehová Diospa testigon kayqa, chaymi tukuy tiempo sutinmanta runakunaman yachachinanchis. Chaymantapas Diosmanta llulla yachachikuykunatan sut’iman orqonanchis, chhaynapin junt’asun Jehová Diospa testigon kasqanchista (Sal. 83:18; Rom. 10:​13-15).

TUKUKUYKAMA WILLASHALLASUNCHIS

14. ¿Imakunan jamuq tiempopi pasanqa?

¹⁴ Imaymanaraqchá jamuq tiempopiqa pasanqa, chaytan suyakushanchis. Maytachá munashanchis Jehová Diospa bendicionninwan manaraq manchay ñak’ariy tiempo chayamushaqtin askha runakuna cheqaq yachachikuyta chaskikunankuta. Chay manchay ñak’ariy tiempoqa laqhayaq jina sinchi sasapunin runakunapaq kanqa. Ichaqa chay tiempopipas yaqapaschá wakin runakunaqa Satanaspa kamachikusqan pachata saqepunqaku, jinaspa noqanchiswan kuska Jehová Diosta alabayta munanqaku, chayqa ¡may kusikunapaqchá kanqa! (Hech. 13:48.)

15, 16. ¿Imatan ruwashanallanchis, jayk’aqkaman chayta ruwananchis?

¹⁵ Manaraq chay tiempo chayamushaqtinmi juj llank’ayta aparinanchis kashan, chay llank’ay jinaqa manan ima llank’aypas kanmanchu. Chaymi kashan Diospa gobiernonmanta allin willakuykunata pachantinpi willay. Chaymantapas runakunamanmi willananchis kay millay pacha chinkachisqa kapunanpaq tiempo usqhaylla chayamushasqanta. Juicio p’unchay chayamuqtinmi runakunaqa cuentata qokunqaku paykunaman willasqanchis Jehová Diosmantapuni jamusqanta (Ezeq. 38:23).

¹⁶ Chhaynaqa, ¿imata ruwananchispaqmi kallpachakushanallanchis? Allin willakuykunata, runakunatapas, astawanqa Diosta, sutintapas munakusqanchisraykun allin willakuykunata tukuy sonqowan willashanallanchis. Jehová Dios Taytanchis “¡kaykamalla!” ninankaman chayta ruwananchis.