¿Imatan sucursalkunapi ruwakun?

Betelkunapi llank’aq Testigokunaqa nacionninkupi otaq huk nacionkunapi predicación aparikunanpaqmi llank’anku. Wakinmi llank’anku qelqakunata t’ikraspa, fabricakunapi qelqakunata ruwaspa, waqaychaspa ima otaq grabacionkunata, videokunata ruwaspa, hukkunapipas.

Sucursalmanta Encargakuqkunan llank’ayta qhawarinku. Umalliq T’aqan allin preparasqa kinsa otaq más umallikunata akllan sucursalkunapi llank’ayta umallinankupaq. Paykunan Umalliq T’aqaman willanku qhawarisqanku llaqtakunapi llank’ay imayna aparikusqanta, ima sasachakuykuna kasqantapas. Chayman hinan Umalliq T’aqa ruwamun qelqakunata, huñunakuykunapaq hatun huñunakuykunapaqpas discursokunata. Yaqa sapa watanmi sapanka sucursalman rin Umalli T’aqaq rantinpi watukuq chaypi llank’ayta qhawarinanpaq, Encargakuqkunata yanapananpaq ima (Proverbios 11:14). Visitasqan semanapin hatun huñunakuy aparikun, chaypin Umalli T’aqaq rantinpi watukuqqa huk discursota qon chay llaqtapi iñiqkunata kallpachananpaq.

Iñiq t’aqakunatan yanapanku. Sucursalkunapin qhawarinku huk iñiq t’aqakunata kichakunanpaq. Chaypin qhawarinku precursorkunaq, misionerokunaq, iñiq t’aqakunata watukuq umallikunaq llank’ayninta. Chaypin hatun huñunakuykuna aparikunanpaq, Huñunakunapaq Wasikuna ruwaytapas qhawarinku. Chaymantan llapa iñiq t’aqakunaman qelqakunata apachimunku. Sucursalkunapi tukuy llank’aykunaqa predicación allinta aparikunanpaqmi ruwakun (1 Corintios 14:33, 40).

• ¿Imaynatan Sucursalpi Encargakuqkuna yanapanku Umalliq T’aqata?

• ¿Imakunatan ruwakun sucursalpi?