Sucursalmanta cartan

Ancha munasqa wayqe panakuna:

Ancha kusisqan tarikuyku Ecuadorpi, Perupi, Venezuelapi hinallataq Colombiapi 403.008 predicaqkuna tukuy sonqowan llank’ashasqaykichismanta. Llapa chay predicaqkunamantan 57.604 precursor (regular) kashanku. Paykunaqa allintachá yanapashanku huñunakuqmasin wayqe panakunata (Tito 2:14).

Yanapaq precursorkunapas (precursor auxiliar) askhan karanku Jesuspa wañusqanta yuyarikusqan killakunapi. ¿Hayk’an karanku? Marzo killapin karanku 43.084; abril killapitaq 24.151; mayo killapitaq 20.758. Chay wayqe panakunaqa “rawrashaq sonqowan[chá]” llank’aranku chay killakunapi, huk predicaqkunapas kusisqachá llank’aranku paykunawan (Rom. 12:11).

Jehová Diospunin yanaparasunkichis Reinonmanta willasqaykichispi, chaychá 641.420 estudiokunata qoshankichis. Chaymantapas 125 huñunakuy wasikunatawanmi hatarichikuran, 35 wasikunatataq hukmanta sumaqta allichakuran; chhaynapi Diospa llaqtanman haykumuq runakuna chay wasikunapi allin yachachisqa kanankupaq (Isa. 2:3).

2008 watapi 22 p’unchay marzo killapin tawantin nacionkunapi Jesuspa wañusqanta yuyarinapaq huñunakuranchis 1.351.292 runakuna, chayqa predicaqkunamanta kinsa kuti masraqmi. Chaymi rikuchiwanchis Diospa llaqtanman haykumuy munaqkuna askharaq kasqanta.

Ñoqaykuqa astawanraqmi Jehová Diosta mañakushayku Reinonmanta tukuy sonqowan predicaypi astawan yanapawananchispaq. Kaytaqa tukuy sonqowanmi qelqamuykiku, wayqe panakuna.

Sucursalmanta

iñiqmasiykichiskuna