Bibliamanta estudiota munachisun
1 Askha wayqe-panakunan estudiota munachispa runakunata Bibliamanta yachachishanku. Huk wiraqocha qelqanchiskunata manapuni chaskikuqchu, ichaqa Bibliamanta estudiota munachiqtinku estudiayta qallariran. Paymi nin: “Munaranipunin Bibliamanta yachachiwanankuta”, nispa. Hinan familiantin Bibliata estudiaspa iñiyninkupi usqhaylla wiñaranku.
2 Llapallanchismi yuyarinanchis estudio qallariy ancha allinpuni kasqanta. Runakunata yachachinanchis iñiyninkupi wiñanankupaq, Jesuspa yachachisqan kanankupaqpas (Mat. 28:19, 20). Yachachinapaqtaq paykunawan estudiana. ¿Imatan ruwananchis predicasqanchis runawan estudiota qallarinapaq? Demostracionpi qhawachinanchis imaynatan Bibliamanta, Diospa munayninmantapas yachankuman chayta. Huk wayqe pisqa runawan estudiota qallariran Thaq (Hawka) kausay mosoq pachapi, nisqa tratadowan. Manataq llapanwanchu estudiayta atiran chayqa, huk publicadorkunaman wakinta saqeran.
3 Mana sasachakuspallachus estudiota qallarinchis chayqa, huk publicadorkunata pusaspa yanapasunman estudiota tarinankupaq, otaq wakin estudionchiskunata paykunaman saqesunman. Bibliamanta estudiachiyta munanki chayqa, kallpachakuy wasin-wasinta predicaspa estudiota munachinaykipaq. Huk publicadormi kutiran ñawpaqpi mana tukuy yuyaywan uyarikuq sipasman. Bibliamanta estudiota munachiqtintaq, estudiayta qallariran. Kunanqa chay sipasqa bautizasqañan, ñañanpas cuñadonpas rishankuña huñunakuykunaman (Gál. 6:6).
4 Wakin estudiachisqanchiskunaqa manapaschá munanqakuñachu estudiayta. Chaymantapas wakillanmi estudiachisqanchiskunamantaqa bautizakunqaku. Askha estudiokunata qallarisun chayqa, aswan askha runakunata yanapasun Jehová Diospa yupaychaqnin kanankupaq.