Huk p’unchayta akllasun estudiota munachinapaq
1 Enero killamantapachan huk p’unchayta akllasun predicashaspa estudiokunata munachinapaq. Yaqapaschá akllasunman sapa killamanta ñawpaqkaq sabadota otaq domingota, mayqen p’unchaychá aswan allin kanqa llapanchispaq chayta. Pipas estudiayta mana munanqachu chayqa, munachisunmanmi ¿Imatapunin Biblia yachachin? nisqa librota, otaq chayllaraq lloqsimuq revistakunata. Llapa umalliqkuna, yanapakuq wayqekunapas kallpachakunankun chay p’unchay estudiota munachinankupaq, hinallataq llapa predicaqmasinchiskunata yanapanankupaq ima.
2 Comité de Servicio nisqa umalliqkunan akllanqaku mayqen sabadotachus otaq domingotachus estudiota munachikunqa chayta. Hinaspapas llapa wayqe panakunatan huñunakuypi yuyarichikunan wasin wasinta predicashaspa otaq astawan yachay munaq runakunaman kutishaspa chay p’unchay estudiota munachinankupaq, chhaynapi llapanku allinta preparakunankupaq.
3 ¿Imaynatan preparakunanchis? Chaypaqqa yaqapaschá wakmanta qhawarisunman 2006 wata enero killa Reinopaq Servicionchispi suplemento nisqata; qhawarillasunmantaqmi Razonamiento nisqa libropi 11, 12 paginakunatapas. Otaq preparakusunman huk tratadota munachinapaq, yaqapaschá ¿Hayk’aqllapas kaykunata tapukurankichu? nisqa tratadota. Chaymantapas yaqapaschá leellasunmantaq 2007 wata agosto killa Reinopaq Servicionchispi 3 paginata, chaypin willashan revista chaskikuqkunawan estudiota imayna qallarinamanta. Llapa umalliqkuna, hinallataq yanapakuq wayqekunapas turnanakunankun predicanapaq huñunakuypi umallinankupaq, chay huñunakuyqa 10 otaq 15 minutollapin ruwakunan. Chaypin yuyarichinan imaynatachus estudiota qallarinata, otaq huk demostracionta ruwakunman, atikuqtinqa iskayta.
4 Yachasqanchis hina, manan llapa runachu Biblia estudiayta munanqaku, manataqmi llapan estudiaqkunachu unayta estudiashallanqaku. Chhaynaña kaqtinpas manan chayraykuchu pisipananchis. Jehová Diosmi llamp’u sonqo runakunataqa llaqtanman pusamun, manan ñoqanchischu (Juan 6:44). Muhuta tarpuspaqa manan hinallatachu saqerparinchis, aswanmi wanuchanchis, hallmanchis, qarpanchis ima. Chhaynallataqmi ñoqanchispas mana predicanallanchischu, aswanpas estudiotan qonanchis allin sonqoyoq runakunaman. Chayta ruwaqtinchisqa ‘Diostan llank’aysishanchis’ (1 Cor. 3:9).