Phisqa yanapaykuna estudiota tarinapaq
1. ¿Imatan ruwana estudiota mana tarispa? ¿Imanaqtinmi chayta ruwana?
1 ¿Sasachu qanpaq huk estudiota tariy? Chhaynaqa ama sayk’uspa maskhashallay. Jehová Diosqa saminchanmi munayninta ruwanapaq kallpachakuqkunata (Gál. 6:9). Kunanmi yachasun phisqa yanapaykunamanta.
2. ¿Imaynatan estudiota qallariwaq predicashaspa?
2 Estudiota qallariypacha. Askhan yachanku Qhawaq, ¡Despertad! revistakuna qosqanchista, ichaqa manan yachankuchu Bibliamanta estudio qosqanchista. ¿Atiwaqchu wasin-wasinta predicaspa huk estudiota qallariyta? Munachiwaqmi visitasqayki runakunamanpas. “Manan” niqtinkupas qelqanchiskunata apashallay astawan interesakunanpaq. Huk iñiqmasin unay watakunaña huk casarasqakunaman revistata apaq. Huk p’unchaymi chayllaraq lloqsimuq revistata aparqan, ripunanpaqña kashaqtintaq tapurirqan: “¿Munawaqchischu Biblia estudiayta?” nispa. “Arí” niqtinkutaq payqa anchata admirakurqan. Kunanqa iskayninkun bautizasqa kashanku.
3. ¿Imanaqtinmi mana hinallatachu qhawananchis huñunakuyman hamuqkunata?
3 Chayllaraq huñunakuyman hamuqkunawan rimay. Huñunakuypi pitapas chayllaraq rikuspaqa, ama niychu: “Payqa ñachá Bibliata estudiashanña”, nispaqa. Huk iñiqmasin nin: “Yaqa llapan estudianteykunatan Huñunakuna Wasipi tarirqani”, nispa. Huk manchali warmin bautizasqa ususinkunawan chunka phisqayoq wataña Huñunakuna Wasita riq. Huñunakuy qallariyllatañan chayaq tukuruqtin hinataq ripuq. Huk kutinmi, huk iñiqmasi estudiota munachiqtin estudiayta qallarirqan, qhepamantaq bautizakapurqan. Chay iñiqmasin nin: “Maytan pesapakuni chunka phisqayoq wata ñawpaqtaraq estudiananpaq mana rimapayasqaymanta”, nispa.
4. ¿Imaynatan makilla kashananchis estudiantekunata tarinapaq?
4 Makilla kashay. Huk cristianan sapa kutilla hukkunata estudio qoyman riysin. Estudiayta tukuruqtinkutaq chay cristiana estudianteta tapun: “¿Reqsinkichu pitapas Bibliamanta estudiay munaqta?” nispa. Hinaspapas Imatapunin librota saqesqanchis runatan tapusunman: “¿Pipas kanmanchu kay librota estudiay munaq?” nispa. Yaqapaschá wakin publicadorkuna otaq precursorkuna mana llapa estudiantenkuta atiendeyta atinkuchu. Chhayna kaqtinqa chaypin yanapanapaq kashana.
5. ¿Imaraykun mana iñiq qosaman otaq esposaman estudiota munachiy allin kanman?
5 Mana iñiqkunata rimapayay. ¿Kanchu iñiq t’aqaykipi iñiqmasikunaq mana iñiq qosanku otaq esposanku? Wakinqa manan munankuchu familianku predicananta, ichaqa munankumanmi huk Testigowan estudiayta. Ñawpaqtaqa iñiqmasinchiswanmi parlarina qosanwan otaq esposanwan hayk’aq, imaynata rimananchispaqpas.
6. ¿Imaraykun Diosmanta mañakuy allinpuni estudiota tarinapaq?
6 Diospa yanapayninta mañakuy. Ama pisipaq hinaqa mañakuyta qhawariychu (Sant. 5:16). Jehová Diosqa uyariwasunmi mañakusqanchista munasqanman hina ruwasunchis chayqa (1 Juan 5:14). Huk iñiqmasinchismi imaymana ruwanayoqña kashaspapas Diosmanta mañakurqan huk estudiota tarinanpaq. Esposanmi ichaqa llakikurqan mana tiempoyoq kasqanwan estudianteta mana allinta atiendenanmanta, astawanqa estudiante nishu sasachakuyniyoq kaqtin. Chaymi Jehová Diosman llakikuyninta willakurqan. Iskay semana qhepallamanmi mañakusqanman Dios kutichirqan. Huk precursoran tarirusqa Bibliata estudiay munaq runata, chaymi payta nirqan estudiota qonanpaq. Esposanmi nin: “Manan hayk’aqpas chhaynataqa kusikurqaykuchu. Estudio qoyta sasapaq qhawariqkunatan kallpachani mana sayk’uspa imatapunichus munasqankuta mañakushanallankupaq”, nispa. Sichus qanpas kallpachakushallanki chayqa, tarinkin Biblia estudiay munaqta, anchatataqmi kusikunki ‘kawsayman riq’ ñanninta purinanpaq yanapasqaykimanta (Mat. 7:13, 14).