Hatun huñunakuypi Jehová Diosta hatunchasun

1, 2. ¿Imaynatan distrito asambleapi Diosninchista yupaychasunman, imaynatan kayta ruwasunman?

¹ Sapa watanmi distrito asambleapi Jehová Diosta hatunchanchis. Sonqonchisqa rey Davidpa hinan, paymi takiran: “Askhallaña huñunasqa runayki ukhupi ‘gracias’ nisqayki, yupa runa ukhupin yupaychasqayki” (Sal. 35:18). Asuykamuq distrito asambleaq sutinmi “Diosta kasukuy”, ¿imakunatan ruwananchis huk llaqta hinalla, Jehová Diosta hukkunapas yupaychananpaq?

² Kaytaqa rikuchisunman sumaq kawsayninchiswanmi. Asamblea ruwana localta kamachiqmi kayta nisqa: “Huk religionkunapas localta munaqtinkuqa niykun, Jehovaq testigonkunaq asamblea ruwanankupaq allichasqankuta qhawamuychis nispa, allintapunin paykunaqa allichanku”. P’achakusqanchiswan, yanapanakusqanchiswan, sumaq kawsasqanchiswan iman, sapankanchis kaykunawan Diosta yupaychasun, payllapaq yupaychay kasqanrayku.

3, 4. ¿Imaynatan mana anchaykachakuspa cristiano hina p’achakunanchis asambleapi, asamblea tukuytapas?

³ Imaynatan p’achakuna. Jehová Diosta yupaychanapaq hinan p’achakunanchis, allichakunanchispas (1 Tim. 2:9). Benefíciese libropin 138 paginanpi kayta nin: “Mana anchaykachaq runaqa manan yanqamanta pitapas phiñachinchu, nitaq hukkunaq qhawarinallanpaqchu p’achakun”. Kunanqa askha nacionkunapin runakuna p’enqayta p’achakunku. Jehová Diosmi ichaqa paypaq hina p’achakunanchista sumaqta qhawarin (Hech. 15:14). Pukllana localpi, otaq chayman rikch’akuq localpi asamblea ruwakun chaypas, kinsantin p’unchaymi noqanchisqa ‘askhallaña huñunasqa runa ukhupi’ kasun. Chayraykun Jehová Diospa ñawpaqenpi huñunakuspaqa, ancha munayniyoq Diospaq hina p’achakunanchis (1 Cró. 29:11).

⁴ Sapa p’unchaymi asamblea tukusqan qhepata qhawarikunanchis imayna p’achakusqanchista. Restauranteta mikhuq rispapas, wasipiña kaspapas, “Diosta yupaychaq” runakuna hinan p’achakunanchis (1 Tim. 2:10). Allin p’achasqa kanapaqqa, manan kay pachapi runakuna hinachu p’achakuna (1 Juan 2:16, 17). Qelqanchiskunapin fotokunata rikunchis maypi tarikuspapas sumaq p’achawan p’achasqa wayqe pananchiskunata. Asamblea ruwakusqan llaqtapi tukuy tiempo qasqonchispi tarjeta apasqanchismi yuyarichiwasun cristiano kasqanchista (2 Cor. 6:3, 4).

5, 6. ¿Imaynatan rikuchisunman Jehová Diospa espiritual mikhuna qowasqanchis respetasqanchista?

⁵ Jehová Diospa qowasqanchis espiritual mikhunata respetasun. Tukuy munayniyoq Diosmi qowanchis askha mikhunata (Isa. 25:6; 1 Cor. 10:21). Jehová Diospa espiritual mikhuna qowasqanchista munaspaqa, allichakunanchismi kinsantin p’unchay asambleapi kananchispaq. ¿Ñachu mañakunchisña maypi qorpachakunapaq, imapi viajanatapas, llank’ananchismantapas permisota mañakunchisñachu? ¿Tanteakunchisñachu hayk’a tiempopi allichakunata, viajanata, asambleaman tempranota chayaspa tiyana maskhanapaq, qallariymantapacha wayqe panakunawan huk nisqalla Jehová Diosta takiwan, oracionpiwan yupaychanapaq? (Sal. 147:1).

⁶ Jehová Diospa espiritual mikhuna qowasqanchista respetaspaqa allintan programata uyarina, chaypaqqa mana mikhushanachu, manan hukkunawan rimashanachu, nitaq yanqata puriykachashanachu. Esclavo fiel y discretowanmi, espiritual mikhunata Jehová Diosqa qowanchis kay necesitasqanchis p’unchaykunapi (Mat. 24:45). Manan mayqenninchispas kay mikhuna qowasqanchista usuchinachu. Tayta mamakunapas wawankuwan kuska tiyaspan yanapananku programata allinta uyarinankupaq (Deu. 31:12).

7. ¿Imatan ruwananchis chawpi p’unchay mikhunapi, imarayku?

⁷ Chawpi p’unchay samanapaqqa mikhunanchistan apakunanchis hawamanta mana rantinapaq. Ancha kusikuymi qayna wata asambleaman yaqa llapan riqkuna kayta kasukusqanku. ¡Ancha allinchá kanman kay watapipas chhayna kasukuyqa! (Heb. 13:17). Kaymi yanapawanchis wayqe pananchiskunawan sumaqta parlarikunapaq, thakpi huk nisqalla Jehová Diosta hatunchanapaqpas (Sal. 133:1).

8, 9. ¿Maykunapin distrito asambleaman rispa Jehová Diosta yupaychasunman?

⁸ Maypipas willasun. Asambleaman rispapas, kutipuspapas Jehová Diosmanta willasunmanmi (Heb. 13:15). Restaurantepi mikhushaspapas, otaq hotelpi llank’aqkunamanpas willasunmanmi. Yuyayninchispas, sonqonchispas, asambleapi sumaq yachasqanchiswan hunt’ataq kanqa chayqa, willananchismi chaykunamanta maypipas tupasqanchis runakunaman (1 Ped. 3:15).

⁹ Munanchismi ‘huñunasqa runakuna qayllapi’ Jehová Dios saminchayta (Sal. 26:12). ¡Huk nisqalla llapanchis “Diosta Kasukuy” nisqa, Distrito Asambleapi Jehová Diosta yupaychasun!

[5 paginapi recuadro]

Distrito asambleapaq yuyariykuna

◼ Programapaq horario. Programaqa qallarinqa kinsantin p’unchay 9.30 tutamantanta. Punkukunan kichakunqa 8.00 tutamantanta. Manaraq huñunakuy qallarishaqtinmi presidenteqa plataformapi tiyanqa, uyarikunqataq Reinomanta takita. Chayta uyarispa hinan llapanchis tiyananchis programa qallarinanpaq. Iskaynin p’unchaymi huñunakuy tukunqa 5.05 tardeta, kinsa kaq p’unchaytaq 4.10 tardeta.

◼ Carrokuna waqaychana. Carrokuna sayananpaq manataq hatunchu chayqa, huk carrollapi askha richunku, huklla otaq iskaylla sapanka carronkupi rinankutaqa.

◼ Tiyanakuna waqaychay. Noqanchiswan carropi riqkunallapaqmi tiyanataqa waqaychana, otaq kaq wasillapi tiyaqkunapaq.

◼ Donacionkuna. Distrito asambleapi askhan gastokunaqa, chaymi agradecekusqanchista rikuchisunman teqsimuyuntinpi llank’anapaq atisqanchisman hina donacionninchista qospa, Salon del Reinopi otaq asambleapi.

◼ Pisi uyariqkunapaq. Wakin asambleakunapiqa uyarikunqa programa (FM) radiopi. Asambleakunapi chhayna kaqtinqa, asamblea qallariytan willakunqa. Radiopi uyarinapaqqa pisi uyariqkunan apananku audifonoyoq huch’uy radiota.

◼ Chawpi p’unchay mikhuna. Chawpi p’unchay samanapaqqa mikhunanchista apakunanchis hawapi rantinamantaqa. Apasunmanmi mikhunanchista tiyasqanchis pachanpi cabeqllata. Manan hatunchu kanan mikhuna waqaychanaqa, nitaqmi apanachu vidriomanta imatapas, machana ukyanakunatapas.

◼ Grabadorakuna. Grabadorata apaspaqa manan hukkunata distraenachu, nitaq localpa corrientenman, sonidopaq corrientenmanpas hap’ichinachu.

◼ Foto orqoy. Discursokuna kashaqtin fotota orqoyta munaspaqa ama k’anchachiychu.

◼ Celular telefonokuna. Hukkunata mana distraechinapaq hinan programananku.

◼ Accidentekuna, qonqayllamanta onqoruqtinkupas. Qonqayllamanta pipas onqoqtinqa acomodadormanmi willana, payñan Primeros Auxilios Departamentoman willanqa, paykunañataqmi yanapanqaku imayna tarikusqanman hina.

◼ Qorpachana. Qorpachayta munaspaqa congregacionpi secretariowanmi rimana, qorpachanapaq formulariotataq hunt’achispa qona. Huk llaqtapi asambleaman rinaykipaq necesitanki qorpachanata chayqa secretarioman willay, hunt’asqa solicitudtataq payman qoy, payñataqmi apachinqa. Ama asamblea qayllaykamunantaraqchu suyay solicitudniykita hunt’anaykipaq, qorpachana departamentotan sasachawaq (1 Cor. 14:40). Pipas wawakunantin qorpachasqa kaspaqa respetanankun qorpachaqpa wasinta, manan imantapas llaminankuchu, maskhanankuchu nitaq malogranankuchu. Qorpachakuyqa asamblea p’unchaykunallapaqmi. Manan allinchu kanman mayta rinapaqpas, ima ruwanapaqpas qorpachakusqayki wasipi askha p’unchay qhepakuyqa.