Cristota qatikusun ancha respetowan

1. ¿Imaynatan asambleanchispa teman tupan Diosta hatunchaywan?

¹ Diospa Simin Qelqa nin, Qollana Jehová Dios qhapaq-atiywan p’achasqa kasqanta (Sal. 104:1). Jesusqa hatuncharanpuni Jehová Diosta rimayninwan ruwasqanwanpas, kasukurantaq kamachikuyninkunatapas (Juan 17:4). “¡Cristota qatikusun!” nisqa Distrito Asambleaqa allinpuni kanqa Cristoq ruwasqanta ruwanapaq, Jehová Diosta hatunchanapaqpas.

2. ¿Imaynatan Jehová Diosta hatunchan asambleanchispaq allichakusqanchis?

² Respetowan Diosta yupaychasun: Jehová Dios respetasqanchista rikuchinchis ñawpaqmanta asambleanchispaq allichakuspa. ¿Ñachu patronniykiwan otaq jefeykiwan rimarunkiña viernes p’unchaymantapacha asambleaman rinaykipaq? ¿Allichakurankiñachu asambleaman temprano chayanaykipaq, chhaynapi tiyanaykita maskhaspa qallariymantapacha takiypipas mañakuypipas kashanaykipaq? ¿Allichakunkiñachu mikhunaykita asambleaman apanaykipaq? Sapa p’unchaymi, tutamantanta tardentapas manaraq música uyarikushaqtin asambleaq presidenten niwasun tiyananchispi tiyaykunanchispaq, chayta uyariqtinchisqa manaña piwanpas rimanañachu, aswanpas tiyaykuspa suyananchis asamblea qallarinanta.

3. ¿Imaynatan yupaychayninchista respetanchis asambleapi makilla uyarispa?

³ Asambleata makilla uyariypas Jehová Diosta hatunchan. Huk periodista distrito asambleaman risqanmanta khaynata qelqaran: “Pipas kay asambleaman hamuspaqa musphanmanraqchá uyariqkunaq allin portakusqanta qhawarispa, chaypi kaqkunaqa Diosmanta yachayta munaspan ancha respetowan uyarinku rimakamusqanta. Wawakunapas mana pukllaspan makilla uyarisharanku Bibliankupi textokunata maskhaspa”, nispa. Asamblea ruwakushaqtinqa mana rimashananchischu, celularpi mensajekunata apachinanchischu, mikhushananchischu nitaq purishananchispaschu. Wawakunaqa tayta-mamankuwanmi tiyananku, chhaynapi wawakunata yanapanqaku discursokunata allinta uyarinankupaq (Deu. 31:12; Pro. 29:15). Chaykunata hunt’aspanchismi respetashanchis asambleaman hamuqkunata, rikuchillanchistaq Diospa yachachiwasqanchismanta agradecekusqanchistapas.

4. ¿Imaraykun allin yuyaywan p’achakunanchis distrito asambleaman rispa?

⁴ Allin yuyaywan p’achakusun: Qayna wata distrito asambleapi uyariranchis “Tukuy tiempopi cristiano kasqanchista rikuchisun”, nisqa temata, chaypin yuyarichiwaranchis Diospa kamachinkuna allin yuyaywan p’achakunanchista allichakunanchistapas. Kunan watapas kaqllatataq ruwasunchis. Allin p’achakusqanchiswanmi rikuchinchis Jehová Dios munakusqanchista, paypa Testigon kasqanchista chaniyoqpaq hap’isqanchistapas. Chayraykun ‘Diosta yupaychaq’ runakuna hinapuni p’achakunanchis (1 Tim. 2:9, 10).

5. Distrito asambleaman risqanchis llaqtapi, ¿imaynatan rikuchisunman Diospa kamachinkuna kasqanchista?

⁵ ¿Asambleaman rispallachu allinta p’achakunanchis? Kayta yuyarinanchis: asamblea ruwakusqan llaqtapi runakunaqa rikuwasunchismi tarjetachata qhasqonchispi apasqanchista. P’achakuyninchispi rikuchinanchis runakunamanta hukniray kasqanchista. Chaymi asamblea tukuyta, calleta lloqsipa, mikhuq rispapas p’achakunanchis Diospa kamachinkuna hina, chayrayku mana churakunachu qara pantalonkunawan (pantalón vaquero), trusakunawan, polokunawanpas. Chhaynapin p’achakuyninchiswanpas runakunaman predicasun. Jehová Diostan kusichisun paypa kamachinkuna hina p’achakuspaqa.

6. ¿Ima allinkunata rikusunchis Diospa kamachikuyninman hina kawsasqanchismanta?

⁶ Allin willaykuna: Diospa kamachikusqanman hina distrito asambleapi portakuyqa yanapawanchismi runamasinchisman predicananchispaq, asambleaman chayllaraq hamuqkunapas allinta qhawariwasun. Asamblea tukuytan policiakunaq umalliqnin niran: “Manan hayk’aqpas qankuna hina allin portakuq runakunataqa rikuraykuchu. Qankunaqa Diospa munasqanman hinapuni kawsankichis”, nispa. Diospa kamachikusqanman hina kawsaspaqa iñiqmasinchiskunawan respetanakunchis munanakunchispas, Jehová Diosninchistataq hatunchanchis (1 Ped. 2:12). Rikuchillanchistaq Jehová Diosta tukuy sonqowan manchakusqanchista, yachachiwasqanchismanta agradecekusqanchistapas (Heb. 12:28). “¡Cristota qatikusun!” nisqa Distrito Asambleanchista suyananchiskamaqa Diospa kamachikusqanman hina kawsashallasun.

[5 paginapi recuadro]

Distrito asambleapaq yuyariykuna

◼ Programapaq horario: Asambleaqa qallarinqa kinsantin p’unchay las 9.20 tutamantanta, punkukunataq kichakunqa las 8.00 tutamantanta. Reinomanta takikunata uyariqtinchisqa, llapanchismi tiyaykunanchis asambleanchis allinta qallarinanpaq. Ñawpaq kaq p’unchay iskay kaq p’unchaypas tukunqa las 5.05 tardenta, kinsa kaq p’unchaytaq las 4.10 tardenta.

◼ Carrokunaq sayanan: Carrokunaq sayanan manataq hatunchu chayqa, huk carrollapi askha rinkuman.

◼ Tiyanakuna waqaychanamanta: Ñoqanchiswan kuska carropi riqkunallapaqmi tiyanataqa waqaychana, otaq wasinchispi tiyaqkunallapaq.

◼ Chawpi p’unchay mikhuna: Chawpi p’unchay samanapaqqa mikhunanchista apakunanchis hawapi rantinamantaqa. Apasunmanmi mikhunanchista tiyasqanchis pachanpi cabeqllata. Manan hatunchu kanan mikhuna waqaychanaqa, nitaqmi vidriomanta imatapas apanachu, machana ukyanakunatapas.

◼ Donacionkuna: Distrito asamblea ruwakunanpaqqa askhan gastokuna, chaymi agradecekusqanchista rikuchisunman teqsimuyuntinpi predicay llank’anapaq atisqanchisman hina donacionninchista qospa, Huñunakuna Wasipi otaq asambleapi.

◼ Accidentekuna, qonqayllamanta onqoruqtinkupas: Qonqayllamanta pipas onqoqtinqa acomodadormanmi willana, payñan Primeros Auxilios Departamentoman willanqa, paykunañataqmi yanapanqaku imayna tarikusqanman hina.

◼ Pisi uyariqkunapaq: Wakin asambleakunaqa FM radiopipas uyarikunqa. Chhayna kaqtinqa, asamblea qallariytan willakunqa. Pisi uyariqkuna asambleata uyarinankupaqqa audifonoyoq huch’uy radiota apananku.

◼ Grabadorakuna: Grabadorata apaspaqa manan hukkunata distraechinachu, nitaq localpa corrientenman, sonidopaq corrientenmanpas hap’ichinachu.

◼ Sírvase visitar hojachakuna: Distrito asambleapi, pi predicasqanchispas astawan yachayta munan chayqa, Sírvase visitar (S-43) nisqa hojachapi qelqananchis sutinta, maypi tiyasqanta, hukkunatawan. Publicadorkuna asambleaman rispa apananku huk otaq iskay hojachakunata. Chay hojachata hunt’aruspaqa congregacionninchispi secretarioman qonanchis asambleamanta kutispa (qhawariy 2005 watamanta febrero killamanta Reinopaq Servicionchis 6 paginata).

◼ Qorpachana: Qorpachayta munaspaqa congregacionpa secretarionwan rimana, qorpachanapaq formulariotataq hunt’aspa qona. Huk llaqtapi asambleaman rinaykipaq necesitanki qorpachanata chayqa, secretarioman willay, hunt’asqa solicitudtataq qoy, payñataqmi apachinqa. Ama asamblea qayllaykamunantaraqchu suyay solicitudniykita hunt’anaykipaq, qorpachana departamentotan sasachakuyman churawaq (1 Cor. 14:40). Pipas wawakunantin qorpachasqa kaspaqa respetanankun qorpachaqpa wasinta, manan imantapas llaminankuchu, malogranankuchu, nitaq ch’inlla maymanpas haykunankuchu. Qorpachakuyqa asamblea p’unchaykunallapaqmi. Manan allinchu kanman mayta rinapaqpas, ima ruwanapaqpas qorpachakusqayki wasipi askha p’unchay qhepakuyqa.