Hatun huñunakuypi kusikuywan Jehová Diosta yupaychasun

1. ¿Imaynapin Israelpi fiestakuna rikch’akun kay tiempopi hatun huñunakuyninchisman?

¹ Dios sonqo runakunaqa rillaqkupunin Jerusalén llaqtapi sapa wata ruwakuq fiestakunaman, paykunawan kuskan rillaqkutaq José, María, wawankunapas. Chayman rispankuqa qonqapuqkun ima llakikuyninkutapas chhaynapi espiritual ruwaykunapi yuyaykunankupaq. Chay fiestakunapin tiemponku kaq yuyaymananankupaq, Jehová Dios sumaq sonqo kasqanmanta rimanankupaq, kamachikuyninkunata t’aqwinankupaqpas. Chay hinallataqmi kay watapi hatun huñunakuyninchispipas kusikuywan Diosta yupaychasun.

2. ¿Imakunatan ruwana hatun huñunakuyninchisman rinapaq?

² Ñawpaqmantan tiempota t’aqana. Jesuspa familianqa Nazaretmantapachan rinanku kutimunankupas karqan 200 kilometrota hina. Manaña yachanchischu Jesuspa wawqenkuna panankunapas hayk’a kasqanta chaypas, Josewan Mariawanqa ñawpaqmantaraqchá kallpachakurqanku imakunachus necesitakusqanta ruwanankupaq. ¿Ñachu ima necesitakusqanta ruwarqankiña iskaynin p’unchay huñunakuyman rinaykipaq? Yaqapaschá llank’anamanta vacacionta horqonayki kanqa, patronniykiwan rimanayki kanqa, otaq wawaykikunaq profesorninmanta permisota mañakunayki kanqa chay p’unchaykunapaq. ¿Yachankiñachu mayqen hotelpi alojakunaykita? Chaymantapas, ¿yanapawaqchu yanapanata necesitaq iñiqmasita huñunakuyman rinanpaq? (1 Juan 3:17, 18.)

3. ¿Imaynapin Jerusalenpi fiestakuna kallpachanakunapaq kaq?

³ Kallpachanakunapaqmi rinchis. Judío fiestakunaman riqkunaqa paykunapuran kallpachanakuqku. Jesuspa familianqa maytachá munaqku unayña mana rikusqanku amigonkuwan tupayta. Jerusalenpi fiestakunamanqa askhataq riqku chayqa, atiqkun amigokuna ruwayta judiokunawan judioman tukupuq runakunawanpas Jerusalenpi kaspa otaq ñanpi tupaspapas.

4. ¿Imaynatan rikuchisunman iñiqmasinchiskunawan kayta munasqanchista?

⁴ Allin yuyayniyoq hunt’aq kamachi chay yachachikuykunata qelqakunapi horqomunanmantaqa huñunakuypi dicursokunata uyarispa yachananchistan munan. ¿Imarayku? Ñoqanchispura kallpachanakunanchispaqmi (Heb. 10:24, 25). Chayrayku, kunanmantapacha yuyaykuy sapa p’unchay temprano chayanaykipaq, chhaynapi iñiqmasikunawan parlarinaykipaq manaraq huñunakuyta qallarichiq hermano música qallarinanpaq willaqtin, chayta willaqtinqa lliwmi tiyananchis. Chawpi p’unchaypi mikhuna rantiq hawata lloqsinamantaqa pisillatan qoqawata apakunanchis chhaynapi iñiqmasinchiskunawan parlanapaq. Iñiqmasinchiskunaqa Jehová Diospa qowasqanchis regalon, chaymi anchata valorananchis (Miq. 2:12).

5. ¿Imakunatan ruwananchis huñunakuy allinninchispaq kananpaq?

⁵ Yachaqmi rinchis. Jesusqa huch’uy kasqanmantapachan judío fiestakunapi Diosmanta astawan yachamuq (Luc. 2:41-49). ¿Imaynatan ñoqanchis familianchispas chay huñunakuymanta allinta beneficiakusunman? Huñunakuy qallariqtinqa tiyaspan uyarinanchis manataq yanqaqa hukkunawan rimananchischu. Ama celularninchiswan otaq huk aparatokunawanpas distraekusunchu nitaq hukkunatapas distraesunchu. Discurso qoqtan qhawananchis hinaspa interesawasqanchis yachachikuykunata anotananchis. Tayta-mamakunaqa wawanchiskunawan kuskan tiyananchis, chhaynapin asegurakusunchis paykunapas uyarinankupaq. Ch’isintaq rimananchis mayqen yachachikuykunas astawanqa interesawarqanchis chaymanta.

6. ¿Imaynatan p’achakunanchis allichakunanchispas?

⁶ Chaypaq hina p’achakusun. Judío fiestakunaman riqkunaqa sut’i reqsiymi karqanku imayna p’achakusqankupi. P’achankuq patanpin q’aytukunata siraqku, chaypa hawanpitaq huk azul q’aytuwan siraqku (Núm. 15:37-41). Cristianokunaqa manaña hukniray p’achawanchu churakunchis chaypas, allin yuyaywan p’achakusqanchismanta, limpio allin allichasqa risqanchismantan reqsisqa kanchis. Maypichus huñunakuy aparikunqa chay llaqtaman rispa, kutimpuspa, otaq chay llaqtapi kashaspapas qhawarikunanchismi p’achakusqanchista allichakusqanchistapas. Huñunakuy tukuqtin huk p’achawan cambiakuspapas allin yuyaywanmi p’achakunanchis solapa tarjetanchistataq qhasqonchispi apananchis. Chhaynapin hukniray kasun runakunamanta, qhawariwaqninchiskunataq allinta ñoqanchismanta yuyaykunqaku.

7. ¿Imaraykun allinpuni kanman huñunakuy allin aparikunanpaq yanapakuy?

⁷ Llank’aqkunatan necesitakun. Huñunakuy allinta aparikunanpaqqa askha llank’aqkunatan necesitakun. ¿Kallpachakusunmanchu chaypi yanapananchispaq? (Sal. 110:3.) Hatun huñunakuy aparikunanpaq llank’aspanchisqa Diostan servishanchis, chhaynapin runakunapas Diospa llaqtanta allinpaq qhawarinqaku. Hatun huñunakuy aparikusqan llaqtapin localmanta encargasqa gerente anchata admirakusqa limpiaypi llank’aq voluntariokunata rikuspa, chaymi qelqarqan: “Anchatan agradecekuykichis kay localpi sumaq huñunakuy rikusqaymanta, manan hayk’aqpas chhaynataqa rikurqanichu. Niwarqankupunin Jehová Diospa testigonkuna allin runakuna kasqaykichista, asociacionniykupiqa allin reqsisqan kankichis localta allin limpiasqata saqesqaykichismanta. Qankunan organizacionniykichiswan yanapakurqankichis kay local llaqtaq utilizananpaq allin kananpaq. Manan hayk’aqpas qankuna hina sumaq sonqo runakunataqa reqsirqanichu”, nispa.

8. ¿Imaynapin hukkunaman predicasunman huñunakuy aparikusqan llaqtapi kashaspa?

⁸ Hukkunatan predicasunman. Hatun huñunakuy aparikusqan llaqtapi tiyaq runakunaqa rikunqakun huk ladokunamanta hamuq allin p’achasqa runakunata qhasqonkupi solapa tarjetayoqta, chaymi yachayta munankuman, chhaynapitaq hatun huñunakuymanta paykunawan rimasunman. Huk tawa watayoq wawan chayllaraq lloqsimuq qelqata rikuchisqa restaurantepi atiendeqman, chhaynapin tayta-mamanqa payta hatun huñunakuyman invitasqaku.

9. ¿Imaynatan Jesuspa familian hina hatun huñunakuykuna valorasqanchista rikuchisunman?

⁹ Israelpi fiestakunaqa anchata kusikunapaqmi karqan, chaytan mayta suyakuqku Diosmanta astawan yachay munaq judiokunaqa (Deu. 16:15). Jesuspa familianqa ancha kusisqan sientekuqku chay fiestakunaman rinankupaq kallpachakusqankumanta, chayman risqanku allinninkupaq kasqanrayku. Ñoqanchispas anchatan kusikunchis hatun huñunakuykunaman rispa, chaykunataqa Diospa regalonta hinan qhawarinchis (Sant. 1:17). Chayrayku, kunanmantapacha imakunachus necesitakusqanta ruway chay huñunakuyman rinaykipaq.

[6, 7 paginakunapi recuadro]

Hatun huñunakuypaq yuyarichiykuna

◼ Horario.a Sabadotan qallarinqa las 9.10 tutamantanta, tukunqataq las 4.40 tardenta. Domingotan qallarinqa las 8.25 tutamantanta, tukunqataq las 4.00 tardenta. Punkukunataq kichakunqa las 8.00 tutamantanta. Musicata uyarinapaq willakuqtinqa llapanchismi tiyananchis, chhaynapi huñunakuyninchis sumaqta qallarinanpaq.

◼ Estacionamiento. Estacionamiento nisqatawan alquilakunqa chayqa, manan cobrakunqachu. Chayasqankuman hinan carrokunataqa estacionakunqa. “Discapacitados” nisqakunapaq t’aqasqa campo kan chayqa, manan chaypiqa estacionakunachu. Estacionamientoqa manapaschá hatunchu kanqa, chaymi allin kanman huk carrollapi askha rinkuman chayqa.

◼ Tiyanakuna. Tiyanataqa hap’isunman ñoqanchiswan kuska carropi riqkunapaq, wasinchispi tiyaqkunapaq, estudiantenchiskunallapaqwanmi (1 Cor. 13:5). Ichaqa manan qonqananchischu kurak iñiqmasinchiskunaq, onqosqakunaq, mosoq hamuqkunaq allinnintaraq ñawpaqta maskhayta.

◼ Qoqawa. Chawpi p’unchay hawapi mikhunata rantishanamantaqa qoqawatan apakunanchis. Ichaqa, manan q’epitaraqchu apana nitaq vidrio cosaskunatapas apanachu.

◼ Donacionkuna. Hatun huñunakuymanta agradecekusqanchistaqa donacionninchista churaspan rikuchisunman, chaytan qosunman Huñunakuna Wasipi otaq hatun huñunakuypipas.

◼ Accidentekuna, qonqaylla imapas kaqtin. Qonqaylla pipas onqoqtinqa acomodadormanmi willana, paymi Primeros Auxilios nisqaman willanqa, hinan paykunaña yanapanqaku imayna tarikusqanman hina.

◼ Imayna zapatowan rinamanta. Zapatonchisqa allinta purinapaq hinan kanan, chhaynapin mana ima accidentepas kanqachu.

◼ Grabación. Grabanapaq aparatokunata apaspaqa manan chaywan hukkunata distraenachu, nitaq localpa corrientenman sonidoq corrientenmanpas enchufanachu.

◼ Coches para bebés, sillakuna. Huñunakuna wasimanqa manan apanachu tanqakachana cochekunata, nitaq ima sillatapas. Ichaqa apawaqchismi wawakunapaq sillakunata tiyana pataman churanapaq kaqtinqa.

◼ Sírvase visitar hojakuna. Allinmi kanman hukta otaq iskay Sírvase visitar (S-43) hojata apay, pimanpas predicaqtinchis astawan yachayta munaqtinqa chaypi anotanapaq. Chay hojata hunt’aspaqa iñiq t’aqapi secretariomanmi qonanchis (qhaway 2005 watamanta febrero killa Reinopaq Servicionchispi 6 paginata).

◼ Alojamiento. Pitapas alojayta munanki chayqa, secretario umalliwan rimay alojanapaq formulariota hunt’anaykipaq. Huk llaqtapi hatun huñunakuyman rinaykipaq alojamientota necesitanki chayqa, secretarioman willay, huk formulariota hunt’aspataq chayta qoy pay apachinanpaq. Ama huñunakuypaq pisillaña kashaqtinchu chaytaqa hunt’ay, mana chayqa alojamiento nisqapi llank’aqkunan sasachakuypi rikukunkuman (1 Cor. 14:40). Pipas wawakunantin alojakuspaqa respetanankun alojaqpa wasinta, manan imantapas llaminankuchu, malogranankuchu, nitaq ch’inlla maymanpas haykunankuchu. Alojamientoqa huñunakuy p’unchaykunallapaqmi. Manan allinchu kanman mayta rinapaqpas, ima ruwanapaqpas alojakusqayki wasipi askha p’unchay qhepakuyqa.

◼ Servicio voluntario. Hatun huñunakuyman rispaqa astawanraqmi kusikusunman sichus allinta aparikunanpaq imachus necesitakusqanpi yanapasunman chayqa (Hech. 20:35). Yanapayta munanchis chayqa Departamento de Servicio Voluntario nisqamanmi rinanchis. 16 watankumanta urayman kaq wawakunapas yanapankumanmi tayta-mamankuq qhawasqan, otaq paykunaq encargasqanku cristianoq qhawasqan.

[Uranpi willakuy]