¡Kunanmi predicananchisqa!
1. ¿Imanaqtintaq kunanpuni predicananchisri?
1 “Diosta manchakuychis, payta yupaychaychis”. Kay willakuyqa angelkunaq yanapayninwan willakushan “kay pachapi tiyaqkunaman, llapa suyukunaman, ayllukunaman, tukuy t’aqa rimaqkunamanpas”. ¿Imanaqtin? ‘Diospa Juzgana p’unchay’ chayamusqanrayku. Kunanqa chay juzgana p’unchaypiña tiyashanchis, chay p’unchaytaq tukupunqa kay pachapi mana allin kaqkunata thunikuqtin, chayrayku lluy runakunaqa usqhaylla ‘Diosta yupaychananku, hanaq pachatapas kay pachatapas mama qochatapas pukyukunatapas kamaqta’. ‘Wiñay qespikuypaq allin willakuykunamantaqa’, mana ima ruwaypas aswan chaniyoq kanmanchu, nitaq aswan usqhaylla ruwakunanpaqqa. Arí, ¡kunanmi predicananchisqa! (Apo. 14:6, 7.)
2. ¿Imaynatan Jehováq siervonkuna rikuchishanku kay tiempo k’uchilla kanapaq kasqanta reparasqankuta?
2 Ñawpa chunka watakunapi, Jehováq siervonkuna ruwanku Reinopaq servicionpi, qatikuqkuna ruway llank’aypipas 12 000 millon horata. Askhan horarionkuta allicharanku espiritual cosechapi astawan llank’anankupaq (Mat. 9:37, 38). Qayna wataqa sapa killa, yaqa 850 000 wayqenchiskuna llank’aranku precursor hina. Regular precursorkunaqa sapa killan llank’anku 70 horata predicaspa. Auxiliar presursortaq 50 horata hunt’anan.
3. ¿Imakunata ruwanku publicadorkuna precursor kanankupaq?
3 ¿Munawaqchu precursor kayta? ‘Pisi tiempolla kasqanta’ reparaspa, precursokuna kallpachakushanku kawsayninkuta mana yanqalla sasachanankupaq (1 Cor. 7:29, 31). Pisilla kay pachapi llank’anankupaqqa manan qolqenkuta yanqata usuchinkuchu. Ejemplopaq, wakinkunaqa aswan huch’uy wasikunaman tiyanankupaq rinku, hukkunataq mana chaniyoq kapuqninkunata saqepunku (Mat. 6:19-21). Samananku tiempotapas pisiyachinku. Chaykunata ruwanku astawan servicionpi llank’anankupaq (Efe. 5:15, 16). Muchuspa, Diosman mañakuypi hap’ipakuspa, mana sayk’uspa ima, askha publicadorkuna tiemponkuta allicharanku precursor kanankupaq
4. ¿Ima ruwaykuna yanapasunkiman precursor kanaykipaq?
4 Qanri, ¿atiwaqchu precursor kayta? ¿Tapuwaqchu poqosqa precursorkunata imaynata precursor llank’ayninkuta hunt’anku? Paykunawan llank’ay serviciopi, yachaytaq paykuna hina kusisqa kayta. T’aqwiy, precursor kaymanta rimaq qhelqanchiskunata. Allin aypanakunata churakuy pisi pisillamanta precursor kanaykipaq. Sichus sasachakuykuna hark’ashasunki precursor kanaykipaq chayqa, Jehová Dioswan rimay mañakuypi, yanapaynintataq mañakuy atipanaykipaq (Pro. 16:3).
5. ¿Imaynatan precursor kay yanapawasunman aswan allin yachachiq kananchispaq?
5 Saminchaykunawan kusikuykunawan. Precursor kaspaqa aswan allinta Bibliawan yachachinchis, chaytaq sinchita kusichiwanchis. Huk sipas precursor pananchis nin: “Diospa Siminta allin yachachiyqa, ancha saminchaymi. Precursor kaqtiykiqa askhatapuni Bibliata t’aqwinki. Kunanqa sapa punkupi yuyayniyman hamun wasiyoqpaq hina textokuna”, nispa. (2 Tim. 2:15.)
6. ¿Ima yachachiykunata yachanchis precursor kaspa?
6 Precursor kayqa yachachiwallanchistaqmi imayna kawsanapaq. Waynakuna yachanqaku imaynata tiemponta allichankuman, qolqenkuta allinta hap’inkuman, runakunawanpas allinta kawsankuman. Askhan wiñachinku espiritual kayninkuta precursor kasqanrayku (Efe. 4:13). Chaymantapas precursorkunaqa pasaqllata qhawanku Jehová Diospa makin paykuna yanapasqanta (Hech. 11:21; Fili. 4:11-13).
7. ¿Imaynatan precursor kay yanapawanchis Jehová Diosman asuykunanchispaq?
7 Ichaqa, precursor kaspaqa, aswan hatun saminchayta chaskinchis; Jehová Diosman asuykunchis, chaytaq yanapawanchis sasachakuykunata atipananchispaq. Huk pananchis sasachakuykunapi tarikuq niran: “Precursor kaspa Dioswan allin kasqayta t’ikarichisqay yanapawaran sasachakuykunata atipanaypaq”, nispa. Nillarantaq: “Jehová Diosman kawsayniyta tukuy sonqowan qosqayqa kusichiwanmi, runamasiyta yanaparani mana hayk’aqpas yuyasqayta” (Hech. 20:35). Noqanchispas kaqllatataqmi saminchaykunata chaskisunman sichus aswantaraq kallpachakusunchis predicananchispaq chayqa (Pro. 10:22).