“Qanqa allin precursormi kawaq”
1. ¿Ima nirqanmi huk iñiqmasinchis precursora kaspa llank’asqanmanta?
1 Kathe B. Palm iñiqmasinchismi Chile nacionpi askha watakuna predicarqan precursora kaspa, paymi nirqan: “Kay llank’ayqa anchatan kusichiwan, manan hayk’aqpas chhayna llank’aytaqa tariymanchu karqan”, nispa. Tukuy tiemponkuwan ancha kusisqa llank’aq iñiqmasikunapi yuyaykuspa, yaqapaschá pipas nisunkiman: “Qanqa allin precursormi kawaq”, nispa.
2. ¿Imaraykun Diosta serviy anchata kusichiwanchis?
2 Precursorkunaqa kusisqan kawsanku. Yachachiqninchis Jesuspaqqa Taytanpa munaynin ruwaymi mikhunan hina karqan, chaywanmi kallpata hap’iq (Juan 4:34). Chayraykun qatikuqninkunaman yachachirqan Diospa munaynin ruwaypi kusisqa kawsay tarikusqanta. Arí, Diosta servispaqa kusisqan kanchis. Chaymantapas astawanmi kusikunchis Dios serviyninchispi runamasinchista yanapanapaq tukuy atisqanchista ruwaspa (Hech. 20:31, 35).
3. ¿Ima kusikuytan tarisun astawan predicaspa?
3 Chaymantapas astawan predicaspaqa atisunmanmi Bibliamanta estudiokuna qallariyta, chayqa anchatan kusichiwasun. Manaraq precursor kashaspaqa mana uyarikuqpaq hinapaschá territorioykipi runakunata qhawarirqanki, precursor kaspan ichaqa huknirayta paykunamanta yuyaykunki, aswan askhata aswan allinta predicasqaykirayku. Wata hinaña precursor kaspataq allin yachachikuyta chaskinki Precursorkunapaq Escuelapi, chaykunaqa anchatan yanapasunki predicanaykipaq (2 Tim. 2:15). Sichus mana sayk’uspa predicashallanki chayqa, kunan muhu tarpusqaykin qhepaman rurunqa (Ecl. 11:6).
4. ¿Imatan yuyaykunanku colegiota tukunankupaq kashaq wayna-sipaskuna?
4 Wayna-sipaskuna, precursormi kawaqchis. Colegioykita tukuqtiykiqa kanqan tiempoyki, ¿imatan ruwanki? Tukuy tiempoykiwan llank’anaman qokunaykimantaqa, allinmi kanman precursor regular kanaykipaq Diosmanta mañakuy. Precursor kaspaykiqa imaymana clase runakunamanmi predicanki, allin yachachiqmi kanki, ruwanaykikunatan allinta hunt’anki, yachallankitaqmi sasachakuyniykikuna atipayta, chay yachasqaykiqa tukuy tiempon allinniykipaq kanqa.
5. ¿Imaynatan tayta-mamakuna iñiqmasikunapas wayna-sipaskunata kallpachankuman precursor kanankupaq?
5 Tayta-mamakuna, ¿kallpachashankichischu wawaykichista precursor kanankupaq? Rimayniykichiswan ejemploykichiswan iman allinta yanapankichis paykuna Dios serviyninkuta ñawpaqman churanankupaq (Mat. 6:33). Ray sutiyoq iñiqmasinchisqa estudionta tukuspan precursor regular karqan, paymi nin: “Mamitayqa niqpunin precursor regular kaspa ancha kusikuyta tarikusqanta”, nispa. Llapanchispas kallpachasunmanmi wayna-sipaskunata precursor kanankupaq. España llaqtayoq José sutiyoq iñiqmasinchismi nin: “Iñiqmasikunaqa ancha allinpaqmi qhawariqku precursor kayta, wayna-sipaskunatan kallpachawaqku chaypi llank’anaykupaq, chaymi ñoqapas precursor karqani”, nispa.
6. ¿Imatan ruwawaq precursor kanaykipaq iskayrayashaqtiyki?
6 Ama manchakuychu precursor kayta. “Precursor kayqa manan ñoqapaqchu”, ¿ninkichu? Chhayna kaqtinqa, Jehová Diosman willakuy chhayna sientekusqaykita. Niwaqmi: “Iskayrayashanin precursor kanaypaq, ichaqa munasqaykitan ruwayta munani”, nispa (Sal. 62:8; Pro. 23:26). Chaymantataq Jehová Diospa yanapayninta maskhay Simin Qelqapi llaqtanpipas. Askhan ñawpaqtaqa precursor auxiliar hina qallarirqanku, chaymi kusisqa sientekuspa precursor regular kapurqanku (Sal. 34:8).
7. Sichus yuyaykushanki 70 horata mana hunt’ay atinaykipaq chayqa, ¿imatan ruwawaq?
7 Yaqapaschá yuyaykushanki 70 horata mana hunt’ayta atinaykipaq. Chhayna kaqtinqa, qallariypi chhaynapi tarikuq precursorkunatan tapuwaq (Pro. 15:22). Chay qhepamantaq askha horariokunata ruwakuy, sichus tiempota horqonki huk mana importante ruwaykunamanta chayqa, reparankin mana sinchi sasachu kasqanta (Efe. 5:15, 16).
8. ¿Imaraykun qhawarikushanallanchis imaynapi tarikushasqanchista?
8 ¿Atiwaqñachu precursor kayta? Imayna kawsasqanchisqa tiempoq pasasqanman hinan cambian, chayraykun allin kanman imaynapi tarikushasqanchista qhawarikuy. Yaqapaschá jubilakunaykipaq pisillaña kashan, chhayna kaqtinqa tiempoykin kanqa precursor kanaykipaq. Randy sutiyoq iñiqmasinchisqa manaraq tiempopin jubilakapurqan, paymi nin: “Chayta decidisqayraykun precursor kayta atirqani, chhaynapin esposaywan maypichus predicaqkuna astawan necesitakusqanman astakurqayku, chay ruwasqaykuqa ancha allinniykupaqmi karqan, ichaqa allin concienciayoq kasqaykumantan astawanqa kusikuyku”, nispa.
9. ¿Imatan qhawarinanku casadokuna?
9 Wakin casado iñiqmasinchiskunaqa imaynapi tarikusqankuta allinta qhawarikuspan reparanku mana iskayninkuraqchu llank’anaman qokunanku kasqanta. Chayta ruwaspaqa imachus kaqnillankuwanmi contentakuyta yachananku, chay ruwaymi ichaqa ancha allinpuni. Johnpa esposanmi llank’ananta saqepurqan astawan predicananrayku. Johnmi nin: “Anchatan kusikuni esposay ch’isiyaqnintin Diosta servisqanmanta”, nispa.
10. ¿Iman cristianokunata kallpachan precursor kanankupaq?
10 Munakuyta iñiytawanmi rikuchinki. Jehová Diosmi kamachiwanchis predicananchispaq, chaymi mana ima llank’aypas chaymanta aswan allinqa kanchu. Pisi tiempollamantan kay millay pacha chinkapunqa, chay tiempopiqa Jehová Diospa sutinta waqyakuqkunallan salvakunqaku (Rom. 10:13). Sichus Jehová Diosta munakunchis agradecekunchistaq ñoqanchisrayku imaymana ruwasqanmanta chayqa, tukuy sonqowanchá kasukusun predicananchispaq Jesuspa kamachiwasqanchista (Mat. 28:19, 20; 1 Juan 5:3). Astawanqa tukukuy tiempokunapi kawsasqanchispi yuyaykuymi yanapawasun tiempo kashaqtinraq tukuy atisqanchista predicananchispaq, amataq kay pachaq imaymana ruwayninkunapichu tiemponchista usuchinanchispaq (1 Cor. 7:29-31).
11. ¿Imaynatan sientekunayki pipas: “Qanqa allin precursormi kawaq”, nisuqtiyki?
11 Precursor regularqa kanchis manan askha horakunata predicananchispaqchu, aswanpas Jehová Diosman munakuyninchista rikuchinapaqmi. Chayrayku, sichus pipas nisunki: “Qanqa allin precursormi kawaq”, nispa chayqa, kusikuywan uyarikuy. Jehová Diosmanta mañakuy, hinaspa qhawarikuy qanpas precursor kaspa kusikuywan Diosta servinaykipaq.
[4 paginapi willakuy]
Tayta-mamakuna, ¿kallpachashankichischu wawaykichista precursor kanankupaq?
[5 paginapi willakuy]
Diosmi kamachiwanchis predicananchispaq, chaymi mana ima llank’aypas chaymanta aswan allin kanchu.