Ima allinkunatan medicokuna ruwashankuña, chayta rikuchiq video
Juezkuna abogadokuna medicokunapas sapa kutinmi astawan qawarishanku hanpina runakunaq derechonkunata imachus paykunapaq allin kasqantapas. Chay rayku mosoq tratamientokuna mast’arikushan Jehovaq testigonkunaq allinninpaq (Hech. 15:28, 29). Chaykunamantan rimashan Asistencia médica sin transfusiones. Necesidades y derechos del paciente nisqa video. Qhaway videota, chaymanta kutipay yachasqaykita. Kay videoq wakin cheqaskunapi rikukun medicokunaq operasqanta, chaymi taytamamakuna allinta reparakuychis huch’uy wawaykichiskunawan qhawaspa.
(1) ¿Imanaqtin wakin medicokuna wakmanta t’aqwishanku yawar churachikuymanta? (2) Willay kinsa operacionkunamanta mana yawarllawan ruwasqankuta. (3) ¿Hayk’a medicokunan operaqkunapas mana yawarta churaspalla hanpiyta munanku? ¿Imanaqtin chhayna hanpiyta munanku? (4) ¿Imatan rikuchin askha hospitalkunapi yawar churaymanta mosoq yachaykuna tarisqanku? (5) ¿Ima sasachakuykunatan cuerponchispaq apamun yawar churachikuy? (6) ¿Ima ninku kunan askha yachayniyoq medicokuna mana yawar churachikuymanta? (7) ¿Imamantan hap’in upichu-kay onqoy? ¿Maykaman upichu runaq cuerpon aguantanman? ¿Imatan ruwakunman yanapanapaq? (8) ¿Imaynatan onqosqa runaq cuerponpi yapakunman puka globulokunata? (9) ¿Operashaqtinku imakunatan ruwakunman yawarta mana usuchinapaq? (10) ¿Mana yawarta churaspalla hanpikunmanchu wawakunata otaq usqaylla hanpina onqosqakunatapas? (11) ¿Imatan medicokuna respetananku hanpisqanku allin kananpaq? (12) ¿Ima raykun cristianokuna ñawpaqmanta willananchis mana yawar churachikuy munasqanchista? ¿Imaynatan chayta ruwasunman?
Kay videopi askha tratamientokunamanta yachachikushan, mayqentachus chaskinapaqqa sapanka cristianon akllakunanchis Bibliaq yachachisqa conciencianchisman hina. ¿Ñachu akllakurankiña qanpas wawaykipas ima tratamientota chaskinaykichispaq? Familiaykipi mana testigo kaqkunapas yachananku imayna hanpichikuy munasqaykita, ima rayku chayta munasqaykitapas (“Preguntas de los lectores” nisqata qhaway kay revistakunapi: 2004 watamanta 15 de junio Atalayapi, 2000 watamanta 15 de octubre Atalayapi).