Hukkunapi interesakusun ñawpaqmanta preparakuspa
1 Predicananchispaq allinta preparakusun chayqa, atillasunmi hukkunapi interesakuyta. ¿Ima rayku? Manan nishutañachu yuyaymanasun ima rimananchispi, aswanqa uyariqninchista uyarisunchis. Yanapawasuntaqmi mana manchakuspa sonqomanta rimanapaq. Chay hinaqa, ¿imaynata yachachinanchista allinta preparakusunman?
2 Uyariqniykipaq hina yachachinaykita preparay: Enero de 2006 Reinopaq Servicionchismanta akllay huk preparasqa yachachikuyta llaqtaykipaq hina kaqtinqa. Yuyaykuy imayna rimanaykita, preparaytaq llaqtaykipaq hina kananpaq. Qhawasunchis; huk religionniyoq otaq wak llaqtayoq runakunawan tupallanki chayqa, akllay ima yachachinawan yanapawaq. Rimasqanchis runakunapaq hina yachachikuyninchista preparaspanchismi rikuchinchis paykunapi sonqomanta interesakusqanchista (1 Cor. 9:22).
3 Akllasqa yachachinata ruwapayasqaykiman hinan aswan allintaqa ruwanki. Qallariy simikunataq ancha allinpuni chayqa, qhawashanallanchismi uyariqninchispa imayna kutichisqanta. ¿Makillachu uyarin rimasqaykita? ¿Kutichinchu tapusqaykita? Mana chayqa, allin kanankama yachachisqaykita preparay.
4 Imaynata yuyarisunman akllasqa yachachinanchista: Askha wayqe-panakuna wasi punkupiña kashaqtinku mana yuyariyta atinkuchu akllasqa yachachinankuta. Chhayna kaqtinqa, ¿manachu hukwan yanapachikuspa allin kunkawan ruwapayawaq imayna rimanaykita? Chay ruwapayasqaykin yanapasunki allinta yuyarinaykipaq imatachus rimanaykita, hinaspa atikuqta hinalla yachachinki allin yuyaychasqatataq. Yanapallasunkitaqmi mana uyariyta munaq runakunaman imayna kutichinapaq.
5 Qelqallawaqtaqmi huk tarjetachapi pisillapi imayna rimanaykita, manaraq punkuta takashaspa yuyarinaykipaq. Askha wayqe-panakuna chay qelqasqanku tarjetachakunawan yanapachikunku mana manchakuspa hukkunawan rimanankupaq. Qhawasqanchispas hina ñawpaqmanta preparakuyqa yanapawasunmi hukkunapi interesakunanchispaq, allin willakuykunata imayna predicananchistapas allinyachinapaq.