Imaynatan predicaswan Reinopaq Servicionchispi yanapaykunawan
1. ¿Imaynatan predicananchis yanapaqninchis qelqawan?
1 Reinopaq Servicionchispiqa sapa kutinmi lloqsimun yanapaykuna, revistanchiskunawanpas huk qelqanchiskunawanpas predicananchispaq. Manan ichaqa chay qelqaq nisqanman hinapunichu predicananchis. Chaypi qelqasqaqa imayna predicananchispaq yanapaqllan. Aswan allintaqa uyariwasun yachasqanchisman hina predicaqtinchismi. Sonqonchispi kasqanman hina rimaqtinchisqa allintan uyariwasun, reparanqakutaq cheqaq rimasqanchistapas (2 Cor. 2:17; 1 Tes. 1:5).
2. Predicanapaq preparakuspa, ¿imaraykun mana qonqananchischu llaqtanchispi runakunaq imayna kasqanta?
2 Uyarinankupaq hina predicasun. Llaqtanchispi runaq imayna kasqanman hinan predicananchis allin willakuykunataqa. ¿Munankuchu llaqtanchispi runakuna, napayukuspa imallamantapas rimarispa predicay qallarinanchista, icha usqhaylla rimananchistachu munanku? Manan llapa runachu nitaq llapan llaqtachu kaqlla kanku. Yachananchismi imakuna tapuytapas. Wakin tapuykunan huk llaqtapi allin kanman huk llaqtakunapitaq, runata phiñachinman. Chayrayku, llaqtanchispi runaq imayna kasqanman hina allin yuyaywan predicasun.
3. ¿Imaraykun mana qonqananchischu rimasqanchis runakunaq imayna tarikusqanta, imayna piensasqantapas?
3 Serviciopaq preparakuspaqa manan qonqananchischu llaqtanchispi runakunaq imayna tarikusqanta, nitaq imayna piensasqantapas. Ejemplopaq, Mateo 6:9, 10 versiculokunamanta rimaspaqa, manachá kaqllatachu rimaswan católico runawanpas nitaq yayayku oracionmanta mana yachaq runawanpas. Ñawpaqmanta chaykunapi allinta piensaspaqa llaqtanchispi runakunaq uyarinanpaq hinan predicasun, rimasqanchispas sonqonkumanmi chayanqa (1 Cor. 9:20-23).
4. ¿Imaraykun allinta preparakunanchis?
4 Yanapaqninchis qelqaq nisqanman hinaña predicayta munanchis chaypas ñawpaqmantan allinta preparakunanchis. Chayraykun ñawpaqta allinta leenanchis predicaspa munachinanchis qelqata, maskhananchistaq rimasqanchiswan tupaq temakunata, chayta ruwaspaqa interesachisunmi uyariqninchiskunata. Qelqanchiskunaq rimasqanta allinta yachaspan kusikuywan munachisun.
5. ¿Imaraykun huknirayta predicanapaq preparakuswan, imaynatan chayta ruwasunman?
5 Hukniray rimaykuna. ¿Qelqanchispi yanapaykunallawanchu predicananchis? Manan. Yachasqanchis textokunawanpas munaspaqa predicallasunmanmi. Aswantaqa revistanchiskunata munachispa, ama qonqasunchu huk temakuna rikuchiyta llaqtanchispi runakunapaq hina kaqtinqa. Reunión de Serviciopi demostracionkuna ruwana kaqtinqa, llaqtaykichispi predicasqaykichista uyarisqankuman hinan ruwawaqchis. Chaymi llapankuta yanapanqa allin willakuykunata allinta predicanankupaq.