Predicasqanchiskunapaq hina horariota allichasun
1. ¿Ima rayku predicasqanchiskunapaq hina horariota allichananchis?
1 Cheqaq cristianokunaqa chaskikuranchis “runakuna challwayta yachachisqaykichis”, niq mink’akuyta (Mat. 4:19). Challwaqkuna hina aswan askhata “hap’isun” sichus allichakusun wasinkupi runa kashaqtin predicanapaq chayqa. Wakin llaqtakunapi runaqa wasinkupi tarikunku ch’isiyashaqtin, yaqapaschá qasilla kashankuman predicananchispaq hina. ¿Manachu horarionchista allichasunman chay horakunapi predicananchispaq? (1 Cor. 9:23.)
2. ¿Imata ruwaspa askha runakunaman allin willakuykunata apasunman?
2 Ch’isiyashaqtin predicaymanta: Ch’isiyashaqtin predicanapaq yuyaykusun chayqa, askha runakunamanmi atisun allin willakuykuna willayta (Pro. 21:5). Wayna-sipaskunapas colegionkumanta lloqsispa predicankumanmi, hinallataq llank’aqkunapas llank’anankumanta lloqsispa. Libro estudiana grupokunapas lloqsinkumanmi predicaq, huñunakuyninmanta huk hora ñawpaqta.
3. ¿Servicionchispa ima ruwayninkunapi llank’asunman ch’isiyashaqtinpas ch’isintapas?
3 Ch’isiyashaqtin, ch’isintapas wasin-wasinta predicaspaqa tarisunmanmi p’unchaypi mana tarisqanchis runakunata. Chay horakunata askha llaqtakunapi predicakunmanmi callekunapi otaq servicionchispa huk ruwayninkunatapas ruwakunmanmi. Chaymantapas ch’isiyay horakunaqa allinpuni askha publicadorkunapaq, runakunaman kutispa estudio qallarinankupaq.
4. ¿Ch’isiyaypi predicaspaqa ima rayku allin yuyayniyoq, allin kaqta ruwaq kananchis?
4 Allin yuyayniyoq kasun: Ch’isiyashaqtin predicanapaqqa allin yuyayniyoq kananchis. Manan tutakamaqa predicananchischu, puñunapaq allichakuqkunata ama phiñachinanchispaq (Fili. 4:5). Punkuta takaspa rikuwananchispaq hina sayananchis, willakunanchistaq pi kasqanchista. Usqhayllataq willananchis imapaq hamusqanchista. Mana allin ratopichus chayarunchis, mikhushaqtinkupas chayqa, hukpi kutimunapaq ninanchis. Allin kaqtapuni paykunapaq ruwananchis (Mat. 7:12).
5. ¿Imaynata cuidakusunman sasachakuykunamanta ch’isiyaypi predicaspa?
5 Cuidakunallanchistaqmi sasachakuykunaman ama churakunanchispaq. Sichus predicashanchis ch’isiyashaqtin otaq ch’isinta chayqa, allinmi kanman iskay iskaymanta puriy otaq t’aqa-t’aqapipas. Predicananchismi allin k’anchasqa callekunapi, maykunapichus thak kasunman chaykunallapi. Chaymantapas, tutapi peligroso callekunamanqa mana haykunanchischu (Pro. 22:3).
6. ¿Ima saminchaytawan chaskisunchis ch’isiyayta ch’isintapas predicaspa?
6 Ch’isiyayta ch’isintapas predicaspaqa precursor auxiliarkunawan, regularkunawanpas lloqsisunmi (Rom. 1:12). Chay hinaqa, ¿kaypaq hina horarionchista allichasunmanchu?