Conmemoración tiempoqa: servicionchispi yapanapaqmi
1. ¿Imaynatan ‘fiestakuna’ kallpacharan Dios manchakuq israelitakunata?
1 Ñawpa tiempopi israelitakunaqa yuyarirankun Jehová Diosta yupaychanapaq fiestakunata (Lev. 23:2). Diospa sumaq kayninpi yuyaymananankupaq tiempo qokusqankun paykunata kusichiran, kallpacharantaq ch’uya yupaychayrayku askha llank’anankupaq (2 Cró. 30:21–31:2).
2, 3. ¿Imaraykun Conmemoración tiempopi Diospaq astawan llank’ananchis, hayk’aqmi Conmemoración kanqa?
2 Kunanpas, Diospaq kusisqa llank’ayninchisqa sapa watanmi yapan Conmemoracionwan. Chay tiempopin anchata yuyaymananchis sapallan Churinta ñoqanchisrayku Jehová Diospa qosqanpi (Juan 3:16; 1 Ped. 1:18, 19). Diospas, Churinpas munakuwasqanchispi piensasqanchismi kallpachawanchis Jehová Diosta alabananchispaq, munaynin ruwananchispaqpas (2 Cor. 5:14, 15).
3 Kay watapi Conmemoracionqa kanqa jueves 24 de marzotan, Inti haykuy qhepata. ¿Imaynatan servicionchista yapasunman marzopi, abrilpi, mayopipas?
4, 5. a) ¿Imaynatan apanku wakin wayqe pananchiskuna allin willakuykunata askha runakunaman? b) ¿Iman qanta yanaparasunki llaqtaykipi allinta predicanaykipaq?
4 Lliw atisqaykiman predicay. Servicioman lloqsispaqa lliw atisqaykiman predicay. ¿Allichawaqchu tiempoykita wasin wasin predicanaykipaq, runakunaq tarikusqan ratopi, tardentapas otaq ch’isintapas? Manaraq estudio de libro qallarishaqtin wakin wayqe panakuna servicioman lloqsiyta munanku chayqa, estudio de libropi superintendenten allichanqa chay cercapi predicanapaq.
5 Callekunapi, plazakunapi, mercadokunapi predicaspaqa askha runawanmi rimasun. Japón nacionpi huk hermananchismi precursora auxiliar kayta munasqa, ch’isiyaq llank’anayoq kashaspa. Huk ancianon yuyaychasqa, manaraq llank’ananman rishaspa trenpa sayanan cerca callekunapi sapa p’unchay predicananpaq. Manchali kaynintapas, wakin pasajerokunaq asipayasqantapas atipaspan, yaqa tawa chunka runakunawan rimasqa revistakunata sapa kutin apananpaq, wakinmi karan sapa kutin viajaq pasajerokuna, estacionpi llank’aqkuna, hukkunataq comerciantekuna. Yaqa 235 revistakunatan killapi rakisqa. Sapa p’unchay pisi minutollata Bibliamanta rimaspan qallarisqa soqta estudiokunata.
6. ¿Imaynatan wayna sipaskuna Diospaq astawan llank’ankuman?
6 ¿Hayk’aqmi predicasunman, imaynata? Escuelapi kaq publicadorkunaqa vacacionpin precursor auxiliar kankuman. Cristiano wayna sipaskunapas colegionkupi predicaspan servicionkuta yapankuman. Kusichisunkichá Bibliamanta willasqaykipi, compañeroykikunaq interesakusqanqa. ¿Predicawaqchu claseykipi rimanaykipaq tupasuqtiyki, imamantapas qelqanaykipaq tareata qosuqtiykipas? Wakin cristianokunaqa videonchiskunawanmi predicanku. Wakintaq compañeronkuman estudiota qospa yanapanku, Diosman qokuspa bautizakunankukama. Chaykunata ruwaspan Jehová “Diospa sutinta” alabanchis (Sal. 148:12, 13).
7. a) ¿Maypin predicasqa huk hermanonchis? b) ¿Hayk’aqllapas chhaynata predicarankichu?
7 Tukuy tiempopi runamasiykiman willay sumaq Diosninchismanta, promesankunamantawan. Kaq trenkunallapi viajaq cristianon predican, atikuqtinqa chay trenpi riqkunaman. Huk trenpa chayamunanta suyaspan huk waynaman sapa p’unchay pisqa minutota predicasqa. Chaymi chay waynaqa, llank’aq masinpas Bibliata trenpi estudiasqaku. Yuyaq warmipas rimasqankuta uyarispan huk tiempo qhepaman hermanota nisqa paymanpas estudio qonanpaq, chaymi paywanpas viajasqan p’unchaykuna Bibliata trenpi estudiasqaku. Chhaynapin kay hermanoqa chunka runamanña trenpi estudiota qosqa.
8. ¿Imaynatan servicionkuta yapankuman yuyaq wayqe pananchiskuna, onqosqakunapas?
8 ¿Imaynatan predicawaq yuyaqña kaspa otaq onqosqa kaspapas? Qanpas atiwaqmi Jehová Diosta astawan alabayta. ¿Hayk’aqllapas predicarankichu telefonopi? Chhayna predicayta mana yachaspaqa, willay estudio de libropi superintendenteman, paymi rimanman chhayna predicaq publicadorkunaq yanapanasuykipaq. Kuska predicaspan yachachinakunkichis, aswan allintataq predicankichispas.
9. ¿Imaynatan estudiantekunata yanapaswan congregacionwan kuska predicanankupaq?
9 Conmemoracionman risqankun mosoqkunatapas kallpachanman Jehová Diosta astawan alabanankupaq. Predicanankupaq manchakuyninkuta atipanankupaqmi, willankuman serviciopi tarisqanku sumaq experienciakunata, pisi pisillamantataq yachachinkuman Bibliamanta yachachinankupaq, iñiyninkupi allin takyasqa kanankupaqpas (1 Ped. 3:15). Sichus Biblia estudiaq munan publicador kayta chayqa, willay superintendente presidenteman. Paymi estudiantewan rimanqa, congregacionwan kuska predicananpaq requisitokunata hunt’anchu icha manachu chayta yachananpaq. ¡Anchatachá Jehová Diosqa kusikun mosoqkunapas paypa gobiernonmanta predicaqtinku! (Pro. 27:11.)
10. a) ¿Imaynatan allin horario yanapawasunman precursor auxiliar kanapaq? b) Qayna wata Conmemoración tiempopi, ¿karankichu precursor auxiliar? ¿Imaynatan ruwaranki?
10 ¿Atiwaqchu precursor auxiliar kayta? Precursor auxiliar kaspaqa hunt’anapunin pisqa chunka horata (Mat. 5:37). Chaypaqqa chunka iskayniyoq horata hinan sapa semana predicana. ¿Atiwaqchu precursor auxiliar kayta 5 paginapi mayqen horariowanpas tiempoykita tupachispa? Mana chhayna kaqtinqa, ¿qan kikiykichu horariota ruwakuwaq marzopi, abrilpi otaq mayopipas precursor kanaykipaq? Jehová Diosta mañakuy servicioykipi yapanaykipaq kallpachakusqaykita saminchananpaq (Pro. 16:3).
11. ¿Imaynatan ancianokunapas, siervo ministerialkunapas yanapankuman precursor auxiliar kaqkunata?
11 Ancianokunapas, siervo ministerialkunapas allintan yanapanqaku Jehová Diosta astawan alabanapaq Conmemoración tiempopi kallpachakusqaykichista. Paykunapas kallpachakunqakuchá precursor auxiliar kanankupaq. Ancianokunan allichanqaku predicanapaq horariokunata tardentapas, ch’isintapas, chawpi semanapipas, semana tukuypipas otaq huk ratokunapipas. Maypi predicanata, hayk’aq predicanata, piqpa umallinanta yachanankupaqmi ancianokuna rimanqaku chay killapi precursor kaqkunawan otaq precursor kay munaqkunawanpas. Ancianokunan rimanqaku predicasqaykichis horapi huk publicadorkunapas qankunawan kuska predicanankupaq. Chaykuna ruwasqankun llapankuta yanapanqa (Pro. 20:18).
12. ¿Iman kallpachawanchis tukuy tiempopi Jehová Diosta alabananchispaq?
12 Tukuy atisqaykita kallpachakuy. Sichus mana atinkichu precursor auxiliar kayta chayqa ama llakikuychu, Jehová Diosqa chaskinmi atisqanchisman hina ruwasqanchista, manan mana atisqanchistachu mañawanchis (2 Cor. 8:12). Anchatan agradecekuna Jehová Diostaqa. Chayraykuchá Davidqa qelqaran: Jehová “Diostaqa saminchashallasaqpunin, simiyqa yupaychallashanqapunin,” nispa (Sal. 34:1). Ñoqanchispas chayta ruwasun Conmemoración tiempopi.
[3 paginapi recuadro]
Imaynatan servicioykita yapawaq
◼ Wasipi kashaqtinku predicay
◼ Predicay callekunapi, plazakunapi, mercadokunapi
◼ Bibliamanta willay llank’anaykipi, escuelapipas
◼ Predicay telefonopi
◼ Kallpachakuy precursor auxiliar kanaykipaq
[5 paginapi lista]
Precursor auxiliar kanapaq horariokuna—Semanapi chunka iskayniyoq horata predicanapaq
Tutamantakuna: lunesmanta sabadokama
Huk p’unchaypa rantintan domingota lloqsiwaq.
P’unchay Ima hora Hayk’a hora
Lunes tutamanta 2
Martes tutamanta 2
Miércoles tutamanta 2
Jueves tutamanta 2
Viernes tutamanta 2
Sábado tutamanta 2
Llapanpi: 12
Iskay p’unchay ch’isiyaq
Semanapi iskay p’unchaytan akllawaq. (Llank’anapaq akllasqa p’unchaykunaman hinan, killantinpi aypanman 48 horallaman.)
P’unchay Ima hora Hayk’a hora
Miércoles ch’isiyaq 6
Sábado ch’isiyaq 6
Llapanpi: 12
Iskay ch’isin, semana tukuytawan
Semanapi iskay ch’isintan akllawaq.
P’unchay Ima hora Hayk’a hora
Lunes ch’isin 1 1⁄2
Miércoles ch’isin 1 1⁄2
Sábado ch’isiyaq 6
Domingo kuskan p’unchay 3
Llapanpi: 12
Kinsa tarde, sabadotawan
Huk p’unchaypa rantintan domingota lloqsiwaq.
P’unchay Ima hora Hayk’a hora
Lunes tarde 2
Miércoles tarde 2
Viernes tarde 2
Sábado ch’isiyaq 6
Llapanpi: 12
Qan kikiyki horariota ruwakuy
Tanteakuy sapa p’unchay hayk’a llank’anaykita.
P’unchay Ima hora Hayk’a hora
Lunes
Martes
Miércoles
Jueves
Viernes
Sábado
Domingo
Llapanpi: 12