¡Chayamushanñan hatun mikhuna p’unchay!
1. ¿Imakunatan ruwakunan hatun mikhuypaq?
1 Askha runakunapaq mikhuna wayk’uyqa sasan; imaymanakunatan wayk’una, chaykuna sumaq lloqsinanpaqpas imaymanakunawanmi churana, chaymantapas chay mikhunata servinapaqqa wasitan allinta allichana, mesakunapas liston kashanan. Ichaqa manan wayk’uqkunallachu alistakunanku, invitasqakunapas alistakunallankutaqmi, astawanqa karuman rinanku kaqtin. Chaykuna ruway sasaña kanman chaypas, ¡may munaymi amigokunantin, familiantin, wawakunantin kuska sumaqta huñunakuspa mikhunata mikhuyqa! Chhaynallataqmi kanqa Jehová Diospa testigonkunaq kinsa p’unchay huñunakuyninkupas, chaypin mikhunata hina chaskisun Diospa yachachikuyninta, chay huñunakuypa sutinmi: “Makilla kashaychis” nisqa. Kunankamaqa ñan imaymanataña ruwakushan chay huñunakuy imayna aparikunanpaq. Ichaqa llapanchismi preparakushananchis chay huñunakuypi kashananchispaq, chhaynapin Diosmanta allinta yachamusunchis (Pro. 21:5).
2. ¿Imakunatan ruwashananchisña chay huñunakuypi kananchispaq?
2 ¿Imatan ruwananchis allinninchispaq kananpaq? ¿Alistakushankiñachu chay huñunakuypi kashanaykipaq? Chaypaqqa patronniykiwanmi rimashanayki iskaynin p’unchay chaypi kanaykipaq. Huk llaqtaman rinayki kaqtinri, ¿ñachu yachankiña imayna riyta maypi alojakuytapas? Chaymantapas umalliqkunaqa allintan qhawarinanku kuraqkunata, onqosqakunata, hinallataq yanapanata necesitaq hermanokunatapas (Jer. 23:4; Gál. 6:10).
3. ¿Imaraykun invitasqa kaqkunalla rinanku asamblea internacional nisqaman?
3 Yachasqanchis hina, wakin llaqtakunapiqa asamblea internacional nisqan aparikunqa. Chaymanqa invitasqa kaqkunallan rinanku, ¿imarayku? Sucursalmantaqa hayk’a runachus haykun sapanka localman, hayk’a alojakuna wasikunachus kan chayman hinallan invitaranku huk ladomanta hermanokunataqa, chayraykun. Sichus mana invitasqa kaqkuna chay huñunakuyman rinkuman chayqa, nishutan hunt’arunkuman.
4. ¿Imatan sapa p’unchay ruwananchis manaraq huñunakuy qallarishaqtin?
4 Kallpachakunanchismi hatun huñunakuyninchisman sapa p’unchay ñawpaqtaraq chayananchispaq. Manaraq chay huñunakuy qallarishaqtinmi programa nisqa hojachata qhawarinanchis, chhaynapin yachasun imakunamantachus rimakunqa chayta, sonqonchistapas allintan preparasunchis (Esd. 7:10). Huñunakuyta qallarichiq “musicata uyarisunchis” nispa niqtinqa, allintan uyarina chay musicata, chaymantataq alistakunanchis takinanchispaq, mañakuytapas tukuy yuyaywanmi uyarina.
5. ¿Imatan familiakuna ruwananku discursokunata allinta uyarinankupaq?
5 Tayta mamakunaqa wawankuwan kuskan tiyakunanku, chhaynapin paykunata yanapanqaku allinta uyarinankupaq (Deu. 31:12). Llapanchismi Biblianchispi maskhananchis discurso qoqpa nimusqan textokunata. Chaymantapas huk cuadernopin qelqasunman discurso qoqpa rimasqanta, chaykunan yanapawasun chay huñunakuypi imamanta rimakusqanta yuyarinapaq. Amapuni yanqa qasiqa piwanpas rimasunchu nitaq hatarisunpaschu. Celularninchis kan chayqa, wañuchinanchismi chayta. Chaymantapas huñunakuy tukuqtinqa rimasunmanmi hukkunawan chay p’unchaypi imakuna yachasqanchismanta.
6. ¿Imapaqmi kusa kanman hatun huñunakuyninchis? ¿Imatan chaypaq ruwana?
6 Hatun huñunakuyninchispiqa hukkuna hukkunawanmi sumaqta kallpachanakunchis, chayqa manan maypipas kanchu (Sal. 133:1-3; Mar. 10:29, 30). Allinmi kanman chawpi p’unchaypi kashaspa muyuriqninchispi kaq hermanokunawan rimayqa, chhaynapin paykunawan allinta reqsinakusun, kallpachanakusun ima. Chayraykun chay huñunakuyman mikhunata apakunanchis pensionman rishanamantaqa (Rom. 1:11, 12).
7. ¿Imaynatan p’achakunanchis hatun huñunakuyninchispaq?
7 ¿Imaynatan p’achakunanchis? Ñawpaq tiempopin Jehová Diosqa Israel runakunata kamachiran p’achankuq patanpi otaq cantonpi warkurayashaq q’aytukunata siranankupaq, chaymantataq sirananku karan sani-puka (morado) watuta (Núm. 15:37-41). Chaykuna churakusqankun paykunata yuyarichiran Diospaq t’aqasqa llaqta kasqankuta. Chhaynallatataqmi ñoqanchispas Diospaq t’aqasqa kasqanchista rikuchisunman allin yuyaywan p’achakusqanchispi, arí, imayna p’achasqa kasqanchispin runakunaqa reparanqaku Dios serviq kasqanchista. Chhaynaqa mikhuq rinapaqpas allintan akllananchis ima p’achawan churakunanchista.
8. ¿Imaynatan predicasunman hatun huñunakuyninchis aparikunan llaqtapi?
8 Kallpachakusun predicanapaq: Ima llaqtapichá hatun huñunakuy aparikunqa chay llaqtapi kaspapas kallpachakunanchismi predicananchispaqqa. Chaypaq huk hermanomanta yachasunchis, paysi señoranpiwan huk kuti huñunakuy tukuyta pensionman risqaku, chaypis serviqman tarjetanta qhawachispa tapusqa: “¿Rikurankichu khayna tarjetayoq runakunata?” nispa. Hinan serviqqa nisqa: “Arí, rikunin, ichaqa manan yachanichu imapaq chayta apasqankuta”, nispa. Chhaynapin paykuna huk rato rimasqaku, hermanotaq chay serviqta huñunakuyman invitasqa.
9. ¿Imaynatan Jehová Diosta agradecekusunman chay huñunakuymanta?
9 Chay huñunakuykunapiqa cristianomasinchiskunan discursota qonku demostraciontapas ruwanku, ichaqa Jehová Diosmantan hamun chay yachachikuykunaqa, paymi sapa wata chhayna huñunakuykunaman invitawanchis (Isa. 65:13, 14). ¿Imaynatan rikuchisunman agradecekusqanchista? Iskaynin p’unchay chay huñunakuyman rispa, tukuy yuyaywan chaypi yachachikusqanta uyarikuspa ima. Chhaynaqa, allintayá preparakusun chay hatun mikhuyman rinapaq.
[6 paginapi recuadro]
Kinsa p’unchaya huñunakuypaq yuyarichiykuna
◼ Horario. Chay huñunakuyqa qallarinqa las 9.20 tutamantatan sapa p’unchay. Punkukunataq kichakunqa las 8.00 tutamantata. Takikunata uyarispaqa llapanchismi tiyananchispiña kashananchis chhaynapi huñunakuyninchis sumaqta qallarinanpaq. Ñawpaqkaq p’unchaymi tukunqa las 5.05 tardenta, iskaykaq p’unchaytaq las 4.00 tardenta.
◼ Carrokunaq sayanan. Carrokunaq sayanan manataq hatunchu chayqa, huk carrollapin askha rinanku.
◼ Tiyanakunamanta. Ñoqanchiswan kuska carropi riqkunallapaqmi tiyanataqa waqaychana, otaq wasinchispi tiyaqkunallapaq. Chayta ruwaspaqa kuraqkunaq, onqosqa cristianomasinchiskunaq, hinallataq chayllaraq hamuqkunaq allinnintan ñawpaqta maskhashasun.
◼ Qoqawa apaymanta. Hawapi mikhunata rantishanamantaqa qoqawatan apakunanchis chay huñunakuyman. Manan hatun q’epitaraqchu mikhunataqa apana, manan vidrio cosaskunataqa apanachu, nitaq ima clase tragotapas.
◼ Donacionkuna. Hatun huñunakuymanta agradecekusqanchistaqa donacionninchista qospan rikuchisunman, yaqapaschá chayta qosunman Huñunakuna Wasipi otaq chay hatun huñunakuypipas.
◼ Accidentekuna, qonqaylla imapas karuqtin. Qonqayllamanta pipas onqoqtinqa acomodadormanmi willana, payñan Primeros Auxilios nisqaman willanqa, paykunañan yanapanqaku imayna tarikusqanman hina.
◼ Imayna zapatowan rinamanta. Zapatonchisqa allinta purinapaq hinan kanan, hermanakunaq zapatonkupas manan sinchi alto tacoyoqchu kanan. Chhaynapin maymanpas seqashaspa otaq purishaspapas mana ima accidentepas kanqachu.
◼ Grabadorakuna. Grabadorata apaspaqa manan hukkunata distraechinachu, nitaq localpa corrientenman, sonidopaq corrientenmanpas hap’ichinachu.
◼ Sírvase visitar hojachakuna. Chay p’unchaykuna predicashaspa astawan yachay munaq runakunata tarisun chayqa, Sírvase visitar (S-43) nisqa hojachapin chayta qelqananchis. Sapanka predicaqmi chay huñunakuyman apanan huk otaq iskay hojachakunata. Chay hojachata hunt’aruspaqa secretariomanmi qonanchis (qhawariy 2005 wata febrero killamanta Reinopaq Servicionchispi 6 paginata).
◼ Alojamiento. Pitapas alojayta munanki chayqa, secretario nisqa umalliqwan rimay, chhaynapi alojanapaq formulariota hunt’anaykipaq. Huk llaqtapi hatun huñunakuyman rinaykipaq alojamientota necesitanki chayqa, secretarioman willay, huk formulariota hunt’aspataq chayta qoy payña apachinanpaq. Ama chay huñunakuypaq pisillaña kashaqtinchu chaytaqa hunt’ay, mana chayqa alojamiento nisqapi llank’aqkunapaschá sasachakuypi rikukunkuman (1 Cor. 14:40). Pipas wawakunantin alojasqa kaspaqa respetanankun alojaqpa wasinta, manan imantapas llaminankuchu, malogranankuchu, nitaq ch’inllaqa maymanpas haykunankuchu. Alojamientoqa hatun huñunakuy p’unchaykunallapaqmi. Manan allinchu kanman mayta rinapaqpas, ima ruwanapaqpas alojakusqayki wasipi askha p’unchay qhepakuyqa.
[Uranpi willakuy]
a Kay watapiqa iskay p’unchayllan kanqa.