Cheqaq kaymanta willaq revistakunata munachisun
1. ¿Imapaqmi yanapawanchis Qhawaq revista ¡Despertad! revistapas?
1 Qhawaq. Jehová Diospa Reinonmanta willashan nisqa revista ¡Despertad! revistapas yanapawashallanchismi predicananchispaq runakunaman yachachinanchispaqpas (Mat. 24:14; 28:19, 20). Kay revistakunataqa ancha kusikuywanmi munachinchis wasin-wasinta predicaspa, revisitata ruwaspa, otaq maypiña tarikuspapas.
2. ¿Imaynapin hukniray kapun Qhawaq revista ¡Despertad! revistapas, imarayku?
2 Watakunaq pasasqanman hina, kay revistakunaqa hatun kasqanmanta huch’uyapun temankunapas hukniraymanta willakun, munachinapaq yanapaykunapas hukniraymi kapun. Kay revistakunataqa runakunaq leenankupaq hinapuni ruwakuran, chhaynapi Reinomanta willakuykuna ‘llapa runakunaq’ sonqonman chayananpaq, ‘qespichisqa kanankupaq, cheqaq-kayta reqsinankupaqpas’ (1 Tim. 2:4).
3. ¿Imaynatan revistakunata munachisun?
3 2006 wata enero killamantapacha huk ¡Despertad! revistallata sapa killa munachiranchis hukniray yanapaykunawan. Qhawaq. Jehová Diospa Reinonmanta willashan nisqa revistatapas hukllata sapa killa munachisun hukniray yanapaykunawan. Reinopaq Servicionchispa tukuynin paginapin tarikun imaynata revistakunata munachinapaq yanapaykuna. Chay yanapaykunaqa revistaq qallariy paginanpi tarikuq temakunamanta astawan rimashan, mayninpi ichaqa rimashan runakunaman interesaq mayqen temamantapas. Sichus chay temakunamanta allinta yachasun runakunaq uyarinanpaq hinataq imayna rimasqallanchispi ruwasun chayqa aswan allinmi kanqa munachisqanchis.
4. Reinopaq servicionchispiña tarikun iskay yanapaykuna revistata munachinapaq chaypas, ¿imarayku allin kanman hukniraymantapas munachiy?
4 Reinopaq servicionchispiqa iskay yanapaykuna rikhurin sapanka revistata munachinapaq, ichaqa hukniraymantapas munachiwaqmi. Yaqapaschá reparanki predicasqayki runakunaman huk temakuna interesasqanta. Otaq mayqen munasqayki temamantapas rimawaq.
5. Revistata munachinaykipaq manaraq preparakushaqtiyki, ¿imata ruwanayki?
5 Imaynata preparakuwaq munachinaykipaq: Munachinayki revistamanta manaña llapa temakunatachu leenki chaypas, allintan entiendenayki munachinaykipaq akllasqayki temataqa. Chay temamanta allinta yachanki chayqa, kusikuywanmi tukuy sonqowantaq rimanki.
6. ¿Imaynatan preparakuwaq revistata munachinaykipaq?
6 Preparakuy lliw runakunata uyarinaykipaq hina. Akllasqayki temawan tupaq tapuyta ruway chhaynapi runakunata interesachinaykipaq. Runakunaq sonqonman chayanaykipaqqa Diospa Simin Qelqapi confiay (Heb. 4:12). Chayrayku, munachinaykipaq temawan tupaq textota akllay, akllasqayki textoqa munachisqayki temapin qelqasqa kanan. Yuyaymanay imaynata chay textota rimasqayki temawan tupachiwaq.
7. ¿Imakunata ruwaspan aswan allinta revistakunata munachiwaq?
7 Maypiña tarikuspapas munachiy: Revistata munachinaykipaq preparakusqaykita ruwayman churanayki. Sabadonpi congregacionwan lloqsiy revistakunata munachinaykipaq. Ñawpaqpi huk qelqakunata chaskiq runakunamanpas munachiy. Biblia estudiaqkunamanpas saqey, runakunaqta hukmanta kutispapas munachiwaqmi chaypi tarikuq runakunaman. Munachillawaqtaqmi rantikuq rispa, viajaspa, medicota suyashaspapas. Kallpachakuytaq aswan allinta munachinaykipaq.
8. ¿Imaraykun Qhawaq, ¡Despertad! nisqa revistakuna mana huk revistakunawan tupanmanchu?
8 Qhawaq. Jehová Diospa Reinonmanta willashan, ¡Despertad! nisqa revistakunaqa manan ima revistakunawanpas tupanchu. Kay revistakunaqa teqsimuyu Kamachiq Jehová Diostan hatunchan (Hech. 4:24). Reinomanta willakuywanmi runakunata sonqochan Jesucristopi iñinankupaqpas kallpachan (Mat. 24:14; Hech. 10:43). Hinaspapas, Hallp’antinpi sucedesqanta makilla qhawashan Bibliapi profeciakunaq hunt’akusqanta willawananchispaq (Mat. 25:13). Kay revistakunaqa ancha allinpunin predicasqanchis runakunata yanapanapaq, chayrayku allinta preparakuspa makilla kashay maypi munachinaykipaqpas.
9. ¿Imatan ruwananchis runakunaqta hukmanta kutinapaq?
9 Hinaspapas, yuyaymanachinaykipaq hina tapuy otaq pisillapi rimay. Chhaynapin hukmanta kutinki revistata chaskikuq runaman otaq allin uyarikuq runamanpas. Sichus tukuy sonqowan cheqaq kaymanta willasun chayqa, Jehová Diosmi kicharinqa runakunaq sonqonta payta reqsinankupaq munayninta ruwanankupaqpas (1 Cor. 3:6).