Iskay p’unchay huñunakuyninchis imayna kananmanta
¿Imaynatan allinta sayasunman Diospa llaqtan cheqnikuqkunaq contranpi? ¿Imaynatan atipasunman huchaman urmananchistapuni munaqkunata? Chay tapuykunatan kutichikunqa iskay p’unchay hamuq huñunakuyninchispi. Chay huñunakuy sutichasqa kanqa: “Mana allinkaqtaqa allinkaqwan atipashallasun”, nisqa. Chaytan horqokun Romanos 12:21 textomanta. Pisillapi kunan qhawasunchis imakunamanta yachasunchis chayta.
Iñiq t’aqakunata qhawariq umallin (superintendente de Distrito) kay yachachikuykunamanta rimanqa: “Kallpachakusun mana allinkaqta allinkaqwan atipananchispaq”, “Ama kikinchispi ñishuta confiakusunchu”, “Tukuy mana allinkunan tukukapunqaña”, “Iñiyninchista kallpachananchis kay pachapi mana allin kaqkunata atipanapaq” nisqamantawan. Iñiq t’aqakunata watukuq umallitaq (superintendente de circuito) rimanqa: “Rikch’asqalla kananchis tiempon” nisqamanta, kayqa horqosqa kashan Romanos 13:11-13 textomanta, chaymantapas rimallanqataq “Ama llakikuy p’unchaykunapi pisi kallpayasunchu” nisqamanta, kayqa horqosqa kashan Proverbios 24:10 textomanta. Chaymantapas allintapunin uyarinanchis “Imakunapin llank’ananchis kashan” nisqata. Kallanqataqmi kay sumaq yachachikuypas: “Dios serviypi allinta llank’asun precursor kaspa”, nisqa. Chaymantapas tawa t’aqapin yachachinqaku “Saqraq q’otukuq yuyayninkuna contra qaqata sayasunchis”, nisqa yachachikuymanta. Chay yachachikuymi reparachiwasun imaynata Saqra urmachiwasunman kusirikuywanpas, educakuywanpas, yachaysapa runakunaq imaymana mosoq maquinakuna ruwasqankuwanpas chayta. Chaymantapas tawa t’aqallapitaq rimanqaku kay yachachikuymanta: “‘Mana allin p’unchaypi’ Satanaspa ruwayninkuna mana urmachiwananchispaq kallpata hap’isun” nisqamanta; chay yachachikuymi yanapawasun Efesios 6:10-18 textoq nisqanta kasukunanchispaq.
Diospa Reinonmanta predicaspan yanapakushanchis mana allin kaqkuna chinkapunanpaq (Apo. 12:17). ¡Chaychá riki Satanasqa mana sayk’uspa imaymanamanta Jehová Diospa testigonkunata urmachiyta munawanchis! (Isa. 43:10, 12.) Ñoqanchisqa allin yuyaykusqañan kashanchis ‘mana allinkaqta allinkaqwan atipananchispaq’, chaymi Saqraqa imataña ruwaspapas mana urmachiwasunchu. Kunanmantapachan alistakushasunña iskaynin p’unchay huñunakuypi kananchispaq.